YALA i b’a fɛ ka kunkanbaara dɔ sɔrɔ kafo kɔnɔ, nka i tɛ se k’o kɛ sisan wa? N’a sɔrɔ o kalifara mɔgɔ wɛrɛ ma. A be se ka kɛ fana ko nɛɛma baara dɔ lo, i tun be min kɛra fɔlɔ la. Nka sisan, n’a sɔrɔ i tɛ sera ka koow kɛ i ko fɔlɔ la gwɛlɛya nunu dɔ kosɔn: kɔrɔya, kɛnɛyako, wariko wala kunkanbaaraw denbaya kɔnɔ. N’a sɔrɔ yɛlɛmani dɔw kosɔn ɔriganisasiyɔn kɔnɔ, i ka ɲi ka nɛɛma baara dɔ to yen, i tun be min kɛra kabi wagatijan. A mana kɛ min o min ye, n’a sɔrɔ i b’a miiri ko i tun b’a fɛ ka min kɛ Jehova ka baara la, i t’o kɛra. N’i dusu be tiɲɛ tuma dɔw la o koow ɲɔgɔn na, o be faamu. O bɛɛ n’a ta, mun lo be se k’i dɛmɛ i fari kana faga pewu, i dusu tiɲɛnin kana to wala i kana dimi mara? I ninsɔndiyanin be se ka to cogo di?

Zan Batizelikɛla ka koo be se k’an dɛmɛ an ninsɔndiyanin ka to. A tun be ni nɛɛmaba ye. Nka, koo minw y’a sɔrɔ, a tun ma miiri u la. A tun ma deli k’a miiri ko a bena wagati caaman kɛ kaso la ka tɛmɛ a ye wagati min kɛ a ka cidenya baara la. Nka, a ninsɔndiyanin tora a sii tɔɔ bɛɛ la. Mun lo y’a dɛmɛ do? An ninsɔndiyanin be se ka to cogo di hali n’an jigi tun be min na, o ma kɛ?

Zan y’a ka baara daminɛ saan 29, awirilikalo fan fɛ. A ye mɔgɔw labɛn Masiya nali kama. A tun b’a fɔ ko: “Aw ye nimisa ka faran aw ka kojuguw la, bari sankolo masaya waati surunyana.” (Mat. 3:2; Luka 1:12-17). Mɔgɔ caaman ye mɛnni kɛ a fɛ. Jama bɔra yɔrɔjan ka na a ka kumaw lamɛn. A ka kumaw y’a to u caaman nimisara u ka jurumuw na ani u batizera. Diinan kuntigi minw tun b’u yɛrɛ jati mɔgɔ tilenninw ye, Zan y’a jaa gwɛlɛya k’u lasɔmi. A ko n’u m’u sɔɔn yɛlɛma, Ala bena kiti tigɛ u kan (Mat. 3:5-12). Saan 29, ɔkutɔburukalo fan fɛ, Zan ye Yezu batize. O kɛra koo kɔrɔtaninba ye a ka cidenya baara la. Kabi o tuma, a ye tɔɔw jija u ka tugu Yezu kɔ ale min ye Masiya ye, layidu tara min koo la.—Zan 1:32-37.

Zan tun be ni lɔyɔrɔba ye. O kama, Yezu y’a fɔ a koo la ko: “Mɔgɔ si ma wolo diɲɛ na  min kɛra mɔgɔbaba ye ka tɛmɛ Zan batizelikɛla kan.” (Mat. 11:11). Jehova tun ye duga minw lase Zan ma, siga t’a la, Zan ninsɔn diyara o kosɔn. Bi, Jehova ye mɔgɔ caaman fana duga. An ka balimacɛ Terry ka koo lajɛ. Ale n’a muso Sandra ye saan 50 ni kɔ kɛ kudayi cidenya baara la. A ko: “N’ ye nɛɛma caaman sɔrɔ. N’ kɛra piyɔniye, betɛliden, dan na piyɔniye, kafokulu kɔrɔsibaga ani distriki kɔrɔsibaga ye. Sisan, n’ ye dan na piyɔniye ye tugun.” Ninsɔndiya lo ka nɛɛma baaraw sɔrɔ. Nka n’an ka koow cogoya yɛlɛmana, walisa an ninsɔndiyanin ka to, fɔɔ an ka jijalibaw kɛ. Zan ka koo bena o lo yira.

Zan Batizelikɛla ninsɔndiyanin tora sabu Jehova tun ye nɛɛma baara minw kalifa a ma, a tun b’a waleɲuman lɔn tuma bɛɛ o kosɔn. Ɲɛyirali fɛ Yezu batizenin kɔ, dɔ tora ka bɔ Zan ka kalandenw hakɛ la ani dɔ tora ka fara Yezu taw kan. Zan ka kalandenw tun be jɔrɔla o koo la. O kama, u y’a fɔ Zan ye ko: “[Yezu] b’a la fana ka mɔgɔw batize, bɛɛ be tagara ale kɔ.” (Zan 3:26). Zan y’u jaabi ko: “Kɔnyɔmuso ye kɔɲɔcɛ ta le ye. Nga kɔɲɔcɛ tericɛ be lɔ gɛrɛfɛ, ka to ka mɛnni kɛ a fɛ. A nisɔn be diya bari a be mɛnni kɛra kɔɲɔcɛ fɛ. O nisɔndiya ɲɔgɔn le be n na. N nisɔn ka di kosɔbɛ.” (Zan 3:29). Zan m’a yɛrɛ suma ni Yezu ye. A m’a miiri fana ko nafa tɛ ale ka baara la sabu Yezu ka baara kɔrɔtanin lo ka tɛmɛ ale ta kan. Nka, Zan ninsɔndiyanin tora sabu a tun ye “kɔɲɔcɛ tericɛ” ye ani a tun b’o jati nɛɛmaba ye.

Zan ka koow filɛcogo y’a dɛmɛ a ninsɔndiyanin tora hali k’a sɔrɔ a ka baara tun man nɔgɔ. Ɲɛyirali fɛ, a tun ye Naziricɛ ye kabi a wolotuma. O kama, a tun tɛ diwɛn min (Luka 1:15). A tun be ɲɛnamaya kɛ cogo nɔgɔman na. Yezu y’a fɔ a koo la ko: “Zan nana, a te dumuni kɛ, a te minni kɛ.” Nka, Yezu n’a ka kalandenw tun be ɲɛnamaya kɛ i n’a fɔ tɔɔw. Olu tun tɛ Naziricɛw ye (Mat. 11:18, 19). Zan ma kabako si kɛ fana. A do tun b’a lɔn ko see dira Yezu ka kalandenw n’ale ka kalanden kɔrɔw ma ka kabakow kɛ (Mat. 10:1; Zan 10:41). Faranfasi min tun b’ale ka kalandenw ni Yezu taw cɛ, a ma sinsin o kan. Nka, a tora k’a ka baara kɛ ni kisɛya ye.

An be baara min kɛra Jehova ye bi, n’an fana b’o jati nɛɛmaba ye, an ninsɔndiyanin bena to. Terry min kofɔra ka tɛmɛ, ale ko: “Baara o baara tun mana kalifa n’ ma, n’ tun be sinsin o kan.” A miirila a ka kudayi cidenya baara la ani a ko: “N’ tɛ nimisa foyi la, ninsɔndiyakow dama lo be n’ hakili la.”

Nɛɛmaba lo an fɛ ka kɛ Ala ka “baarakɛɲɔgɔnw” ye (1 Kor. 3:9). N’an be to ka miiri o nɛɛma la, baara o baara mana kalifa an ma, dɔ bena fara an ka ninsɔndiya kan. Walisa fɛɛn cɛɲumanin dɔ ka to a cogo la, fɔɔ an k’a ladon tuma o tuma. O cogo kelen na, an be ni nɛɛma min ye ka baara kɛ ni Jehova ye, n’an be to ka miiri o la, an ninsɔndiyanin bena to. An man ɲi k’an ka jijaliw suma ni tɔɔw ta ye. An man ɲi k’a miiri ko Jehova ye baara min kalifa an ma, o nafa man bon ka se tɔɔw ta ma.—Gal. 6:4.

A be se ka kɛ ko Zan tun b’a lɔn ko a tɛna a ka cidenya baara kɛ wagatijan kɔnɔ. Nka, n’a sɔrɔ a tun m’a lɔn k’o baara bena bari ka ban (Zan 3:30). Saan 30nan na, kalo wɔɔrɔ Yezu batizenin kɔ, masacɛ Erɔdi ye Zan don kaso la. Nka, Zan y’a seko kɛ ka to ka seereya kɛ (Mariki 6:17-20). O yɛlɛmaniw bɛɛ n’a ta, mun lo y’a dɛmɛ a ninsɔndiyanin tora? A tora ka sinsin Alakow lo kan.

Ka Zan to kaso la, a y’a mɛn ko Yezu ka cidenya baara be yiriwara (Mat. 11:2; Luka 7:18). A tun lanin b’a la ko Yezu lo ye Masiya ye. Nka, n’a sɔrɔ a tun b’a yɛrɛ ɲiningara Ala ka Kuma ye min fɔ Masiya koo la, Yezu tun bena o bɛɛ dafa cogo min na. A tun fɔra ko Masiya bena kɛ Masacɛ ye. O la, n’a sɔrɔ Zan tun b’a yɛrɛ ɲiningara ni Yezu tun bena sigi  masaya la sisan ani n’a tun bena ale bɔ kaso la. Zan tun b’a fɛ k’a lɔn Yezu tun bena min kɛ tigitigi. O kama, a y’a ka kalanden fila ci k’u ka taga Yezu ɲininga ko: “Ala ka Mɔgɔ wolomanin min ka kan ka na, [ele] lo wa? Walima an ka kan ka mɔgɔ wɛrɛ kɔnɔ?” (Luka 7:19). U kɔsegira ka n’a ɲɛfɔ Zan ye ko Yezu be kabakow kɛra ka mɔgɔw kɛnɛya. Yezu ko u k’a fɔ Zan ye ko: “Fiɲɛntɔw be yeli kɛra, murukuw be taama, farisogobanatigiw be kɛnɛyara, tulogwerenw be mɛnni kɛra, suuw be kununna, kibaru diman be fɔra fantanw ye.” N’a sɔrɔ Zan y’a tulo malɔ k’u lamɛn.—Luka 7:20-22.

Siga t’a la, o kumaw ye Zan jija. O y’a yira ka gwɛ ko kiraya kuma minw tun fɔra Masiya koo la, Yezu b’u bɛɛ dafara. Yezu ma Zan bɔ kaso la. Nka, Zan tun b’a lɔn ko ale ka baara ma kɛ fuu ye. Koow tun man nɔgɔ a fɛ. Nka, joo tun b’a fɛ ka ninsɔn diya tuma bɛɛ.

I ko Zan, n’an be Alakow kɛ an ɲɛnako fɔlɔ ye, an bena se ka koo bɛɛ muɲu ni ninsɔndiya ye (Kɔlɔs. 1:9-11). An bena se k’o kɛ n’an be Bibulu kalan ani ka miiri a kan. O bena an dɛmɛ k’a lɔn ko an be baara min kɛra Jehova ye, nafa b’o la (1 Kor. 15:58). Sandra ko: “Ka Bibulu sapitiri kelen kalan loon o loon, o be n’ dɛmɛ ka n’ magwɛrɛ Jehova la kosɔbɛ. O be n’ dɛmɛ n’ ka miiri Jehova lo koo la sanni ka miiri n’ yɛrɛ dɔrɔn koo la.” Baaraba min be kɛra Masaya waajuli la, an be se ka miiri fana o la. O be se k’an dɛmɛ an kana to ka miiri an yɛrɛ dɔrɔn koo la. Sandra ko: “Porogramu min be bɔ kalo o kalo JW Telewisɔn na, o b’an dɛmɛ an k’a ye ko an magwɛrɛnin lo kosɔbɛ Jehova ka ɔriganisasiyɔn na. O b’an dɛmɛ fana an ninsɔndiyanin ka to Jehova ka baara la.”

Zan ye waajuli kɛ wagati kunkurunin min na, a y’o kɛ “ni sebagaya ye, min ɲɔgɔn tun dira kira Eli ma.” I ko Eli, Zan fana tun ye “anw bɔɲɔgɔnko adamaden ye.” (Luka 1:17; Zaki 5:17). Zan tun be Jehova waleɲuman lɔn ani Alakow lo tun y’a ɲɛnako fɔlɔ ye. N’an b’a ladegi, a mana kɛ min o min ye, an fana ninsɔndiyanin bena to Jehova ka baara la.