JAMANA dɔw la, u mako be waajulikɛlaw la kosɔbɛ. Balima kisɛyanin minw be taga waajuli kɛ yen, u dɔw ye balimamusow ye minw ma furu. O balimamuso dɔw ye saan caaman kɛ o jamanaw na. Mun lo y’u dɛmɛ u sera ka taga o jamanaw na? U ye nafa juman lo sɔrɔ o la? U ka ɲɛnamaya kɛra cogo di? Balimamuso minw y’o kɛ, an y’u dɔw ɲininga u ka fɛtaw la. N’a sɔrɔ i ye balimamuso ye min ma furu ani i b’a fɛ ka ninsɔndiyaba sɔrɔ waajuli la. N’o lo, o balimamusow ka fɛtaw bena i jija. Tiɲɛn na, Ala sagokɛlaw bɛɛ be se ka nafa sɔrɔ u ka ɲɛyiraliw la.

N’i ye piyɔniye ye min ma furu, yala i b’i yɛrɛ ɲiningara i ka ɲi ka min kɛ walisa ka waajuli kɛ jamana wɛrɛ la wa? Anita be ni saan 75 ye sisan. Ale tun ma la a la hali dɔɔni ko a tun bena se k’o kɛ. A bonyana Angletɛri jamana na. A saan 18, a kɛra piyɔniye ye. A ko: “A tun ka di ne ye ka mɔgɔw kalan Jehova koo la. Nka, n’ tun m’a miiri ko, n’ tun bena se ka taga o kɛ jamana wɛrɛ la loon dɔ. Ne tun ma deli ka kaan wɛrɛ degi ani a n’ tun b’a miiri ko n’ tɛna se ka kaan wɛrɛ fɔ ka ɲɛ abada. O kosɔn, tuma min na n’ ye lɛtɛrɛ sɔrɔ ko n’ ka na Gilead lakɔli la, o barila n’ na yɛrɛ le. N’ kabakoyara k’a ye k’u ye ne ɲɔgɔn fana weele o lakɔli la. Nka, n’ y’a miiri ko ni Jehova y’a jati ko ne be se k’o kɛ, n’ bena a kɛ k’a filɛ. O kɛra a saan 50 ni kɔ ye nin ye. Kabi o wagati la, n’ bele ye misɔnden ye Zapɔn jamana na.” A y’a fara a kan ko: “Tuma dɔw la, ne ninsɔndiyaninba b’a fɔ kerecɛn sunguruw ye ko: ‘Aw ye aw ka sakɔsi ta an be taga waajuli kɛ jamana wɛrɛ la sabu o ɲɔgɔn tɛ yen!’ Ne dusu ka di k’a fɔ ko mɔgɔ caaman sɔnna k’o kɛ.”

Balimamuso caaman minw tagara waajuli kɛ jamana wɛrɛw la, a daminɛ na, u tun be sigasigara ka taga yen. U ye jagwɛlɛya sɔrɔ cogo di?

Maureen be ni saan 64 ye sisan. A ko: “N’ bonyatɔ, n’ tun b’a fɛ ka ɲɛnama kɛ kuun be min na bɛrɛbɛrɛ, i n’a fɔ ka mɔgɔ wɛrɛw dɛmɛ.” A saan 20, a tagara Kebɛk, Kanada jamana na. U makoya gwɛlɛ tun be piyɔniyew la yen. A ko: “Kɔfɛ, u ye n’ weele ko n’ ka na Gilead lakɔli la. Nka, n’ tun be siranna ka taga jamana dɔ la n’ tɛ min lɔn. N’ fana tun t’a fɛ ka taga ka n’ teriw to yen. N’ facɛ tun man kɛnɛ ani n’ bamuso tun b’a ladonna. N’ tun  be jɔrɔla sabu n’ tun t’a fɛ ka taga k’u to yen. Tuma caaman suu fɛ, n’ tun be kasi ka Jehova deli kosɔbɛ o koo la. N’ ye n’ ka haminankow fɔ n’ bangebagaw ye ani u ye n’ jija ka taga o lakɔli la. N’ y’a ye fana ko kafodenw tun be n’ bangebagaw dɛmɛna ni kanuya ye. K’a ye ko Jehova tun b’a jantora u la o cogo la, o ye n’ dɛmɛ k’a la a la ko a bena o ɲɔgɔn kɛ ne fana ye. Sisan kɔni, n’ tun labɛnnin lo ka taga!” Maureen y’a ka misɔndenya baara daminɛ kabi saan 1979 la. A ye saan 30 ni kɔ kɛ o baara la, Afiriki tileben fan fɛ. Sisan, a b’a bamuso ladonna Kanada ani a ye dan na piyɔniye ye. A ye saan minw bɛɛ kɛ jamana wɛrɛw la, a kɛtɔ ka miiri o la, a ko: “Jehova ye ne makoya fɛɛnw bɛɛ di ne ma, a wagati la.”

Wendy fana be ni saan 65 ye sisan. A ye piyɔniye baara daminɛ Ɔsitarali jamana na a sunguru tuma na. A ko: “Ne tun sumanin lo kojugu ani n’ tun be siran ka kuma ni lonanw ye. Nka, piyɔniye baara ye n’ dɛmɛ ka se ka kuma ni mɔgɔ sifaw bɛɛ ye. N’ tun tɛ siran tugun sabu sisan, n’ hakili tun siginin lo koɲuman. O baara tun be n’ dɛmɛna ka n’ jigi la Jehova kan ani n’ y’a daminɛ ka miiri ka taga jamana wɛrɛ la. Balimamuso dɔ tun ye saan 30 kɛ misɔndenya la Zapɔn ani a tun furunin tɛ. Ale tun ko n’ ka na kalo 3 kɛ yen ka waajuli kɛ. N’ ye wagati min kɛ n’a ye, o ye n’ lasun k’a ɲini ka taga jamana wɛrɛ la.” Saan 1986 la, Wendy tagara Vanuatu. Guun dɔ lo min be Ɔsitarali tilebɔ fan fɛ. Kilomɛtɛrɛ 1 770 b’a ni Ɔsitarali cɛ.

Wendy bele be Vanuatu. Sisan, a be baara kɛ an ka sɛbɛw bayɛlɛma biro dɔ la. A ko: “Ne mana a ye ko kafow ni jɛnkuluw be cayara yen, o be ne ninsɔndiya kosɔbɛ. Nɛɛmaba lo ne fɛ ka se ka dɛmɛ don dɔɔni Jehova ka baara la o yɔrɔ la.”

Kumiko fana be ni saan 65 ye sisan. Ale tun ye kudayi piyɔniye ye Zapɔn ani a tɔɲɔgɔn y’a fɔ a ye k’u ka taga Nepal jamana na. Kumiko y’a fɔ ko: “A tora k’o fɔ n’ ye tuma o tuma, nka, n’ tora ka ban. N’ tun be siranna ko n’ tɛna se ka kaan wɛrɛ degi ani ka deli jamana wɛrɛ la. A tun ka gwɛlɛ n’ ma fana ka wari sɔrɔ ka taga jamana wɛrɛ la. Ka n’ to jatiminɛ na, n’ ye aksidan dɔ kɛ ni n’ ka mɔtɛri ye ani u tagara ni n’ ye dɔgɔtɔrɔso la. O yɔrɔ la, n’ miirila ko: ‘Mɔgɔ tɛ siniko lɔn! N’ be se ka bana kosɔbɛ ani sababu min dira n’ ma ka taga jamana wɛrɛ la, n’ be bɔnɛ o la. A man fisa n’ ka taga waajuli kɛ saan kelen jamana wɛrɛ la k’a filɛ wa?’ N’ ye Jehova deli kosɔbɛ ko a ka n’ dɛmɛ ka dɔ kɛ dɔ ye.” Kumiko bɔnin kɔ dɔgɔtɔrɔso la, a tagara wagati dɔ kɛ Nepal. Kɔfɛ ale n’a tɔɲɔgɔn yɛlɛmana yen.

 Kumiko ye saan 10 ɲɔgɔn kɛ Nepal. A kɛtɔ ka miiri o la, a ko: “Jehova ye n’ dɛmɛ ka n’ ka jɔrɔnankow ɲɛnabɔ i ko a ye Israɛldenw dɛmɛ cogo min na ka Kɔgɔji Wulen cɛtigɛ. N’ dusu ka di sabu n’ sera ka taga waajuli kɛ yɔrɔ min na u mako be dɛmɛ na. Tuma caaman, ni n’ be kibaro diiman fɔra denbaya dɔ ye soo dɔ kɔnɔ, u sigiɲɔgɔnw mɔgɔ 5 wala 6 be na lamɛnni kɛ. Hali denmisɛn fitininw be na sɛbɛninw deli n’ fɛ. Ninsɔndiyaba lo ka waajuli kɛ yen sabu mɔgɔw be lamɛnni kɛ.”

An ye balimamuso minw ɲininga u ka fɛtaw la, siga t’a la u ye gwɛlɛyaw sɔrɔ. U ye u ɲɛnabɔ cogo di?

Diane be Kanada ani a be ni saan 62 ye sisan. A ye saan 20 kɛ misɔndenya baara la Kodiwari (Côte d’Ivoire). A ko: “A daminɛ na, a tun man nɔgɔ n’ fɛ sabu n’ yɔrɔ tun ka jan ni n’ somɔgɔw ye. N’ ye Jehova deli a ka n’ dɛmɛ k’o yɔrɔ mɔgɔw kanu. Gilead kalanfa dɔ, balimacɛ Jack Redford tun y’a fɔ ko a daminɛ na, o yɔrɔ mɔgɔw ka koow cogoya be se k’an hakili ɲagami wala k’an tɔɔrɔ yɛrɛ, sanko ni fantanya be yɔrɔ bɛɛ. Nka, a tun y’a fɔ fana ko: ‘Aw kana u ka fantanya filɛ. U be Bibulu ka tiɲɛn kumaw ta cogo min na, aw k’o lo kɔrɔsi u ɲɛda la.’ Ne y’o lo kɛ ani n’ ye duga caaman sɔrɔ o la! Bibulu ka dususalo kumaw fɔtɔ mɔgɔw ye, n’ tun b’a kɔrɔsi k’u ɲɛda be manamana!” Koo wɛrɛ jumanw lo ye Diane dɛmɛ ka waajuli kɛ jamana wɛrɛ la? A ko: “Ne ye teriya don ni n’ ka Bibulu kalandenw ye. N’ dusu tun ka di k’a ye k’u kɛra Jehova sagokɛla kantigimanw ye. O jamana kɛra n’ faso ye. I ko Yezu tun y’a fɔ cogo min na, ne ye bamusow, facɛw, balimacɛw ani balimamusow sɔrɔ yen Alako ta fan fɛ.”—Mariki 10:29, 30.

Anne be ni saan 46 ye sisan. Ale be Azi mara la, yɔrɔ min na u ye bali sigi an ka baara kan. A ko: “Ne ye saan minw bɛɛ kɛ jamana wɛrɛw la, ne ni balimamuso dɔw tun be sii boon kelen kɔnɔ. U bɔyɔrɔw n’u sɔɔn tun tɛ kelen ye ni ne ta ye hali dɔɔni. Tuma dɔw la, o tun b’a to an tɛ ɲɔgɔn faamu ani an be don ɲɔgɔn gasi la. N’o ɲɔgɔn tun kɛra, ne tun be n’ magwɛrɛ u la ani k’a ɲini k’u ka kokɛcogow faamu ka ɲɛ. N’ ye n’ jija fana k’u kanu kosɔbɛ ani ka n’ janto u ka fɛtaw la. N’ dusu ka di k’a ye ko nafa sɔrɔla o la ani o kɛra sababu ye n’ ye teri sɔbɛw sɔrɔ. O teriw ye n’ dɛmɛ ka muɲuli kɛ n’ ka cidenyabaara la.”

 Ute be bɔ Alemaɲi ani a be ni saan 53 ye sisan. Saan 1993 la, u y’ale ci misɔndenya baara la Madagasikari. A ko: “A daminɛ na, ne sɛgɛnna k’o yɔrɔ ka kaan degi.

Komi o yɔrɔ sumanin lo, ne banbara ka n’ yɛrɛ deli o la ani ka tɔgɔtɔgɔnin, sumaya ani bana wɛrɛw muɲu. Nka, mɔgɔ caaman ye n’ dɛmɛ. Balimamusow, u deenw ani n’ ka Bibulu kalandenw muɲuna n’ kɔrɔ ka n’ dɛmɛ n’ sera k’u ka kaan fɔ ka ɲɛ. Ni n’ tun banana, n’ misɔndenɲɔgɔn tun be n’ ladon ka ɲɛ ni kanuya ye. Min kɔrɔtanin lo yɛrɛ, o ye ko Jehova ye n’ dɛmɛ. N’ tun be to ka n’ ka haminankow bɛɛ fɔ a ye delili la. O kɔ, n’ be muɲu ka n’ ka deliliw jaabili kɔnɔ. O be se ka kɛ tile damanin, wala kalo damanin koo ye. Jehova ye n’ ka gwɛlɛyaw bɛɛ ɲɛnabɔ.” A saan 23 ye nin ye, Ute be Madagasikari.

I n’a fɔ balima wɛrɛw, balimamuso minw ma furu, olu fana be taga dɛmɛ don jamana wɛrɛw la. O balimamusow ka teli k’a fɔ ko duga caaman b’o la. O duga dɔw ye jumanw ye?

Heidi be bɔ Alemaɲi ani a be ni saan 73 ye sisan. Ale ye misɔnden ye Kodiwari kabi saan 1968 la. A ko: “Ne ye ninsɔndiyaba min sɔrɔ, o ye ko n’ ka Bibulu kalandenw be ɲɛtaga kɛra tiɲɛn sira kan. N’ ka kalanden kɔrɔ dɔw ye piyɔniyew ni diinan mɔgɔkɔrɔw ye. U caaman be n’ weele ko M’ma wala M’makɔrɔba. Minw ye diinan mɔgɔkɔrɔw ye, u dɔ n’a ka denbaya be n’ jati u somɔgɔ dɔ ye. O cogo la, Jehova y’a to ne ye dencɛ, buranmuso ani mamaden saba sɔrɔ.”—3 Zan 4.

Karen be bɔ Kanada ani a be ni saan 72 ye sisan. Ale ye waajuli kɛ saan 20 ni kɔ Afiriki tileben fan fɛ. A ko: “Misɔndenya ye ne dɛmɛ ka dɔ fara n’ ka yɛrɛsaraka miiriya kan, ka kɛ ni kanuya ni muɲuli ye. N’ be waajuli kɛ ni balimaw ye minw bɔra jamana caaman na. O ye n’ dɛmɛ n’ kana dan n’ ka koow filɛcogo dɔrɔn ma. N’ y’a faamu ko kokɛcogow ka ca. Sisan n’ be ni teri sɔbɛw ye duniɲa faan bɛɛ la. O ye dugaba ye dɛ! Hali n’an ka ɲɛnamaya kɛcogo n’an ka cii yɛlɛmana, an ka teriya b’a nɔɔ na.”

Margaret be bɔ Angletɛri ani a be ni saan 79 ye sisan. Ale tun ye misɔnden ye Lawɔs jamana na. A ko: “Ka waajuli kɛ jamana wɛrɛ la, o ye n’ dɛmɛ k’a ye Jehova be mɔgɔ sifaw bɛɛ sama cogo min na ka na a ka jɛnkulu kɔnɔ. O ye n’ ka limaniya sabati kosɔbɛ. O kama, n’ lanin b’a la kosɔbɛ ko Jehova lo b’a ka jɛnkulu ɲɛminɛna ani ko a sago bena dafa.”

Balimamuso minw ma furu ani u be waajuli kɛra jamana wɛrɛ la, tiɲɛn na u ye ɲɛyirali ɲuman ye an fɛ. U ka kan ni tandoli ye (Kirit. 11:40). Dɔ yɛrɛ be farala u hakɛ kan (Zab. 68:12). O balimamusow kisɛyanin lo yɛrɛ le! I be se ka yɛlɛmani don i ka koow la walisa k’u seen nɔɔ ta wa? N’i y’o kɛ, siga t’a la i bena a nɛnɛ “k’a filɛ . . . ko Masaba [ Jehova] ka ɲi.”—Zab. 34:9.