1-2. a) Ezayi 41:10 ka kumaw ye nɔɔ juman to an balimamuso Yoshiko kan? b) O kumaw be se ka jɔn lo nafa fana?

AN BALIMAMUSO kantigi dɔ tɔgɔ ko Yoshiko. Loon dɔ, a ye kibaro goman dɔ mɛn. A ka dɔgɔtɔrɔmuso y’a fɔ a ye ko a tora kalo damanin a be sa. Yoshiko ye mun lo kɛ do? Bibulusen minw koo ka di a ye kosɔbɛ, a hakili jigira u dɔ la. O ye Ezayi 41:10 ye. (A kalan). A y’a hakili sigi k’a fɔ a ka dɔgɔtɔrɔmuso ye k’o tɛ siranya bila ale la sabu Jehova b’ale dɛmɛna n’a bolo barikaman ye. * Dususalo kuma minw be sɔrɔ o vɛrise kɔnɔ, o y’an balimamuso dɛmɛ a y’a jigi bɛɛ la Jehova kan. O kumaw be se k’an fana dɛmɛ an hakili siginin ka to kɔrɔbɔlibaw wagati la. Walisa k’a faamu o be se ka kɛ cogo min na, an k’a filɛ fɔlɔ fɛɛn min kama Ala y’o kumaw lase kira Ezayi ma.

² A daminɛ na, Jehova tun y’a kɛ kira Ezayi y’o kumaw sɛbɛ walisa ka Yahutuw dusu saalo, olu minw tun bena taga jɔnya la Babilɔni. Nka a tun tɛna dan olu dɔrɔn ma. O kumaw tun bena Ala sagokɛla wɛrɛw nafa kɔfɛ (Ezayi 40:8; Ɔrɔm. 15:4). Bi, an be wagati gwɛlɛw lo la. Jijali kuma minw be sɔrɔ Ezayi ka kitabu kɔnɔ, an mako b’u la sisan ka tɛmɛ sanga ni wagati bɛɛ kan.—2 Tim. 3:1.

3. a) Layidu jumanw lo be sɔrɔ Ezayi 41:10 kɔnɔ? b) Mun na an mako b’o layiduw la?

³ Barokun nin na, an bena kuma Jehova ka layidu saba koo la minw be mɔgɔ ka limaniya barika bonya: 1) Jehova be n’an ye, 2) a y’an ka Ala ye ani 3) a bena an dɛmɛ.  O layiduw * be sɔrɔ Ezayi 41:10 kɔnɔ ani o lo ye saan 2019 ka kalankun ye. U b’an hakili sigi. An mako b’u la sabu i ko Yoshiko, gwɛlɛyaw b’an bɛɛ kan. Koo jugu minw be kɛra duniɲa kɔnɔ, n’a sɔrɔ an be tɔɔrɔla olu fana kosɔn. Gofɛrɛnɛman setigi dɔw be tɔɔrɔ lara an balima dɔw kan fana. An k’o layidu kelen kelen bɛɛ lajɛ.

4. a) An bena Jehova ka layidu juman lo lajɛ fɔlɔ? (Jukɔrɔla kunnafoni fana lajɛ). b) Jehova y’a yira cogo di ko a b’an kanu? c) Jehova ka kumaw be mun lo kɛ i la?

⁴ A fɔlɔ, Jehova ye layidu ta ko: “Aw kana siran, bari, ne be ni aw ye.” * Jehova b’a janto an na kosɔbɛ ani a b’an kanu. O cogo la, a b’a yira ko a be n’an ye. A filɛ a b’o yira cogo min na. A ko: “Aw koo ka gwɛlɛ ne ma, aw ye fɛnba ye ne fɛ, aw koo ka di n ye fana.” (Ezayi 43:4). Jehova b’a sagokεlaw kanu cogo min na, foyi wala mɔgɔ si tε se k’a to a t’u kanu tugun. Foyi tɛ se ka Jehova ka kantigiya nagasi (Ezayi 54:10). A ka kanuya n’a ka teriya b’an jaa gwɛlɛya kosɔbɛ. Bi, a b’an tanga i ko a y’a tericɛ Abramu (Ibrayima) tanga cogo min na. Jehova tun y’a fɔ a ye ko: “Abramu, i kana siran. Ne y’i tangabaga ye i n’a fɔ kɛlɛden ka nigɛkunbɛnnan.”—Zɛnɛzi 15:1.

5-6. a) An b’a lɔn cogo di ko Jehova b’a fɛ k’an dɛmɛ an k’an ka gwɛlɛyaw muɲu? b) Yoshiko ka koo be mun lo yira an na?

⁵ Ni gwɛlɛyaw b’an kan, an b’a lɔn ko Jehova b’a fɛ k’an dɛmɛ an k’u muɲu sabu a ye layidu ta a sagokɛlaw ye ko: “Hali n’aw be tɛmɛna jii kɔnɔ, ne bena kɛ n’aw ye. Hali n’aw be baji tigɛ, a tena aw kunu. Hali n’aw be tagamana tasuma cɛma, a tena aw jɛni. K’aw to tasuma cɛma, a tena foyi kɛ aw la.” (Ezayi 43:2). O kumaw kɔrɔ ko di?

⁶ Jehova ma layidu ta ko a bena gwɛlɛyaw bɔ an kan. Nka, a ko hali n’an ka gwɛlɛyaw be i ko “baji,” a tɛna a to u k’an kunu, o kɔrɔ, u k’an hakili  ɲagami pewu. Wala ni kɔrɔbɔliw be i ko “tasuma,” a tɛna a to u k’an jɛni ka ban, o kɔrɔ, k’an mako sa pewu. A y’a daa di ko a bena kɛ n’an ye ani k’an dɛmɛ ka see sɔrɔ o gwɛlɛyaw kan. Jehova bena mun lo kɛ do? A bena an dɛmɛ an hakili be sigi walisa an ka to kantigiya la hali n’an niin be farati la (Ezayi 41:13). Yoshiko min kofɔra ka tɛmɛ, ale y’a ye k’o kumaw ye tiɲɛn ye. A denmuso ko: “Mama hakili tun siginin lo cogo min na, o y’an bɛɛ kabakoya. An y’a ye tiɲɛn na ko Jehova y’a hakili sigi. Fɔɔ ka taga a sa, mama tun be to ka kuma dɔgɔtɔrɔw ni banabagatɔw fɛ Jehova n’a ka layiduw koo la.” Jehova ye layidu ta ko ‘a bena kɛ n’an ye.’ Yoshiko ka koo b’a yira an na ko n’an lanin b’o layidu la, an fana jaa bena gwɛlɛya. An bena fanga sɔrɔ walisa ka gwɛlɛyaw muɲu.

7-8. a) An bena layidu filanan juman lo lajɛ ani o layidu kɔrɔ ko di? b) Yahutu minw tun bena taga jɔnya la, mun na Jehova y’a fɔ u ye k’u “hakili kana ɲagami”? c) Ezayi 46:3, 4 ka kuma jumanw lo ye Ala ka jama hakili sigi?

⁷ A filanan, Jehova ye layidu ta Ezayi ka kitabu kɔnɔ ko: “Aw hakili kana ɲagami, bari, ne le ye aw ka Ala ye.” O kumaw kɔrɔ ko di? Kumaden min bayɛlɛmana ko “hakili ɲagami,” o kɔrɔ ko “ka to ka filɛri kɛ kɔfɛ sabu i sirannin lo koo jugu dɔ ɲɛ.” Wala “ka siran kosɔbɛ i n’a fɔ farati be mɔgɔ min seen kɔrɔ.”

⁸ Yahutu minw tun bena taga jɔnya la Babilɔni, mun na Jehova y’a fɔ u ye ko u “hakili kana ɲagami”? Jehova y’o fɔ sabu a tun b’a lɔn ko, k’u to Babilɔni, koo dɔw tun bena siranya bila u la. Mun na do? Sabu Yahutuw tun bena saan 70 minw kɛ jɔnya la, o laban fan fɛ, Medi ni Perse sɔrɔdasiw tun bena Babilɔni dugu minɛ. Jehova tun bena tɛmɛ o sɔrɔdasiw lo fɛ k’a ka jama hɔɔrɔnya ka bɔ jɔnya la Babilɔni (Ezayi 41:2-4). O wagati la, Babilɔnikaw ani siya wɛrɛ mɔgɔw y’a lɔn ko u juguw yɔrɔ tun man jan minkɛ, u y’a ɲini k’u jaa gwɛlɛya. U tun b’a fɔra ɲɔgɔn ye ko: “I jaa gwɛlɛya.” U ye boli caaman dilan fana sabu u jigi tun b’a la k’o boliw bena u kisi (Ezayi 41:5-7). Yahutu minw tun be jɔnya la o wagati la, Jehova ka kuma nunu y’u hakili sigi: “Aw Isirayɛlidenw, ne ka baarakɛlaw, [aw tɛ komi siya wɛrɛ mɔgɔw] . . . aw hakili kana ɲagami, bari, ne le ye aw ka Ala ye.” (Ezayi 41:8-10). Jehova ko: “Ne le ye aw ka Ala ye.” O cogo la, a y’a sagokɛla kantigiw hakili sigi ko a ma ɲinɛ u kɔ: a bele y’u ka Ala ye ani olu bele y’a ka jama ye. A y’a fɔ u ye fana ko: “Ne bena aw kɔrɔta . . . ne bena aw kisi.” Yahutu minw tun be jɔnya la, siga t’a la, o kumaw y’u hakili sigi ani k’u jaa gwɛlɛya.—Ezayi 46:3, 4 kalan.

9-10. Mun na kuun t’a la an ka siran? Ɲɛyirali dɔ fɔ.

⁹ Bi ka tɛmɛ sanga ni wagati bɛɛ kan, mɔgɔ caaman be hami sabu duniɲa ka koow be juguyara ka taga. Tiɲɛn lo k’o gwɛlɛyaw b’an fana kan. Nka, kuun t’a la an ka siran. Jehova b’a fɔ an ye ko: “Ne le ye aw ka Ala ye.” Mun na o kumaw b’an hakili sigi cogo barikaman na?

¹⁰ An ka ɲɛyirali dɔ lajɛ: Jim ni Ben be tagara dugu la awiyɔn kɔnɔ. Fɔɲɔba be awiyɔn yuguyugura k’u to a kɔnɔ. Ka awiyɔn to lengelanga la, mɔgɔ dɔ y’a fɔ mikro kɔnɔ ko: “A’ y’aw ka sɛntiriw siri ka ɲɛ. An be tɛmɛna fɔɲɔba yɔrɔ le la.” Jim siranninba tun lo. Nka, awiyɔn bolila y’a fɔ ko: “Awiyɔn bolila yɛrɛ lo be  kumana aw fɛ. N’ b’a lɔn min ka ɲi ka kɛ. O kama, aw kana siran, foyi tɛna an sɔrɔ.” Jim y’a kuun yuguyugu ani a y’a fɔ a kaan jukɔrɔ ko: “Ele be se k’a lɔn cogo di ko foyi tɛna an sɔrɔ?” Nka, a y’a kɔrɔsi ko Ben hakili tun siginin lo. A y’a ɲininga ko: “A be komi siranya t’ele la dɛ!” Ben ye yɛlɛmisɛn kɛ ani a ko: “Siranya tɛ n’ na sabu n’ be awiyɔn bolila lɔn ka ɲɛ. N’ facɛ lo!” O kɔ, a ko: “A to n’ ka dɔ fɔ i ye n’ facɛ koo la. N’ lanin b’a la ko n’i y’a lɔn ka ɲɛ ani n’i y’a lɔn a be se awiyɔn boli la cogo min na, ele fana hakili bena sigi.”

11. An be kalan juman lo sɔrɔ Ben ni Jim ka koo la?

¹¹ An be kalan juman lo sɔrɔ o ɲɛyirali la? I ko Ben, an hakili siginin lo sabu an b’an sankolola Faa Jehova lɔn koɲuman. An b’a lɔn ko laban loon nunu na, a bena an dɛmɛ ka see sɔrɔ hali gwɛlɛyabaw kan (Ezayi 35:4). Siranyaba be duniɲamɔgɔw la. Nka, an hakili siginin lo sabu an jigi lanin be Ala kan (Ezayi 30:15). An fana be Ben ladegi n’an b’a fɔ an sigiɲɔgɔnw ye fɛɛn min kama an jigi lanin be Ala kan. O la, olu fana bena la a la ko gwɛlɛya o gwɛlɛya mana u sɔrɔ, Jehova bena u dɛmɛ.

12. a) An bena layidu sabanan juman lo lajɛ? b) N’a fɔra ko ‘kuntigiya be Jehova bolo,’ o b’an hakili jigi mun lo la?

¹² A sabanan, Jehova tɛmɛna kira Ezayi fɛ ka layidu ta ko: “Ne be barika don aw la, ne b’aw dɛmɛ.” Ezayi tun kɔnna k’a yira Jehova bena a sagokɛlaw barika bonya cogo min na. A ko: “[Jehova] be nana ni barika ye. Kuntigiya b’a bolo.” (Ezayi 40:10). Bibulu kɔnɔ, tuma caaman na n’u ko “bolo,” o ɲɛsinna sebagaya lo ma. O la, n’a fɔra ko ‘kuntigiya be Jehova bolo,’ o  b’an hakili jigi ko Jehova ye Masaba ye ani Sebagayabɛɛtigi lo. A y’a ka sebagaya kabakoman kɛ k’a sagokɛlaw dɛmɛ ani k’u lafasa galen. Bi fana, minw b’u jigi la a kan, a b’olu barika bonya ani k’u latanga.—Deter. 1:30, 31; Ezayi 43:10.

13. a) Jehova ko ale bena barika don an na. Wagati juman yɛrɛ lo la a b’o layidu dafa? b) Layidu juman lo be barika don an na ani k’an lasun k’an jigi bɛɛ la Jehova kan?

¹³ N’an juguw b’an kɛlɛla, o wagati yɛrɛ lo la Jehova b’a ka layidu nin dafa: “Ne be barika don aw la.” Bi duniɲa faan dɔw la, an juguw b’u seko bɛɛ kɛra k’a ɲini ka daan sigi an ka waajuli baara la wala ka bali sigi an ka ɔriganisasiyɔn kan. O bɛɛ n’a ta, o t’an hakili ɲagami kojugu. Jehova y’a daa di ko: “Kɛlɛkɛminan fɛɛn o fɛɛn dilanna i kama, o si tena foyi ɲa.” O layidu ye garanti ye min b’an barika bonya ani a b’an lasun k’an jigi bɛɛ la Jehova kan (Ezayi 54:17). O layidu b’an hakili jigi koo saba la minw kɔrɔtanin lo.

14. Mun na a tɛ bari an na k’a ye ko Ala juguw be wuli an kama?

¹⁴ A fɔlɔ, an b’a lɔn ko mɔgɔw bena an kɔniya sabu an ye Krista ka kalandenw ye (Mat. 10:22). Yezu tun kɔnna k’a fɔ ko mɔgɔw bena a ka kalandenw tɔɔrɔ kosɔbɛ laban loonw na (Mat. 24:9; Zan 15:20). A filanan, kira Ezayi tun kɔnna k’a fɔ ko an juguw tɛna an kɔniya dɔrɔn. Nka, u bena kɛlɛkɛminan sifa caaman dilan an kama fana. O kɛlɛkɛminan dɔ ye ngalon ye u be min la an kan. Tuma dɔw la, u yɛrɛ be wuli an kama (Mat. 5:11). Jehova tɛna an juguw bali u k’an kɛlɛ (Efɛz. 6:12; Yir. 12:17). Nka, an man ɲi ka siran. Mun na do?

15-16. a) An ka ɲi k’an hakili to koo sabanan juman lo la? Ezayi 25:4, 5 b’o koo yira cogo di? b) Fɛɛn min bena an kɛlɛbagaw sɔrɔ, Ezayi 41:11, 12 b’o lakali cogo di?

¹⁵ An ka koo sabanan lajɛ an ka ɲi ka min to an hakili la. Jehova ko ‘kɛlɛkɛminan fɛɛn o fɛɛn dilanna an  kama, o si tena foyi ɲa.’ Jehova b’an tanga “mɔgɔ farimanw dusu” ma i ko boon kogow be mɔgɔ tanga cogo min na sanjiba ma (Ezayi 25:4, 5 kalan). An juguw tɛna se k’an bali fewu ka ɲɛnamaya banbali sɔrɔ.—Ezayi 65:17.

¹⁶ ‘Minw bɛɛ diminin’ b’an kɔrɔ, fɛɛn min bena olu sɔrɔ, Jehova y’o lakali ka gwɛ. O b’an lasun k’an jigi la a kan kosɔbɛ (Ezayi 41:11, 12 kalan). An juguw mana fariya an ma cogo o cogo, u bɛɛ laban ye kelen ye. U bɛɛ bena kɛ “fɛɛn gwansanw ye, ka halaki.”

17-18. a) Bibulu kalangwɛ be se k’an dɛmɛ cogo di k’an jigi bɛɛ la Jehova kan? Ɲɛyirali dɔ fɔ. b) N’an be miiri saan 2019 ka kalankun kan, o b’an dɛmɛ cogo di?

¹⁷ N’an be Jehova lɔn kosɔbɛ, o b’an dɛmɛ k’an jigi bɛɛ la a kan. Fɛɛrɛ kelenpe min fɛ an be se ka Jehova lɔn kosɔbɛ, o ye ka Bibulu kalangwɛ kɛ. An ye min kalan, a ka ɲi fana an ka miiri o kan koɲuman. Maana lakikaw be sɔrɔ Bibulu kɔnɔ minw b’a yira cogo min na Jehova y’a ka mɔgɔw latanga galen. O maanaw b’a to an be la a la ko Jehova bena a janto an fana na bi.

¹⁸ Ezayi tɛmɛna ɲɛyirali dɔ fɛ k’a lakali koɲuman Jehova b’an latanga cogo min na. A ye Jehova suma ni sagadɛndɛla ye ani k’a sagokɛlaw suma ni sagadenw ye. A y’a fɔ Jehova koo la ko: “A be sagadenw minɛ k’u ta a disi la.” (Ezayi 40:11). N’an miirila k’a ye ko Jehova y’an ta a bolo barikamanw na, an b’a ye ko an latanganin lo ani an hakili siginin lo. Walisa k’an dɛmɛ an hakili siginin ka to gwɛlɛyaw wagati la, jɔncɛ kantigiman hakiliman ye Ezayi 41:10 sugandi k’a kɛ saan 2019 ka kalankun ye: “Aw hakili kana ɲagami, bari, ne le ye aw ka Ala ye.” O kumaw b’an hakili sigi. N’an be miiri u kan, u bena barika don an na gwɛlɛya nataw kama.