ARABALON sɔgɔma, saan 2018, zanwiyekalo tile 24, Etazini ani Kanada betɛlidenw ninsɔndiyara ka kunnafoni kɛrɛnkɛrɛnnin dɔ lamɛn: Balimacɛ Kenneth Cook, Jr. kɛra Jehova Seerew ka Koow Ɲɛnabɔla Jɛnkulu mɔgɔ dɔ ye.

Balimacɛ Cook wolola ani a lamɔna Etazini, Pɛnnsilvani mara la. Tuma min na a tun tora dɔɔni a be tila kalan na lise la, a ye tiɲɛn lɔn a ka lakɔli filankuru dɔ sababu fɛ. A batizera saan 1980, zuwɛnkalo tile 7. A ye kudayi piyɔniye baara daminɛ saan 1982, sɛtanburukalo tile fɔlɔ la. Saan fila o kɔ, u y’a weele Betɛli la Wɔlkil, Niyɔriki mara la. O kɛra saan 1984, ɔkutɔburukalo tile 12.

Saan 25 minw tugura o kɔ, balimacɛ Cook ye baara kɛ yɔrɔ caaman na Betɛli la: ɛnprimɛri la ani biro dɔ la min be Betɛli ka koow ɲɛnabɔ. Saan 1996, a ye Jamie furu ani u ye baara kɛ ɲɔgɔn fɛ Betɛli la Wɔlkil. Saan 2009 desanburukalo la, u ye balimacɛ ni balimamuso Cook ci ka taga baara kɛ Jehova Seerew ka Bibuluko lakɔli la Patɛrsɔn, Niyɔriki mara la. Mɔgɔw be ɲiningali minw kɛ Bibulu koo la, biro min b’o ɲiningaliw jaabi, balimacɛ Cook tun be baara kɛ yen. Saan 2016 awirilikalo la, u y’ale n’a muso ci tugun ka taga Betɛli la Wɔlkil. Dɔɔni o kɔ, u y’u ci ka taga Buruklyn Betɛli la, Niyɔriki. Kalo duuru o kɔ, u yɛlɛmana an ka sigiyɔrɔsoba la Wɔrwik, Niyɔriki. Koow Ɲɛnabɔla Jɛnkulu ka kɔmite min b’an ka gafew sɛbɛriko kun na, balimacɛ Cook kɛra o dɛmɛbaga dɔ ye saan 2017, zanwiyekalo la.