1-2. a) Yezu y’a yira cogo nɔgɔman na an ka ɲi ka min kɛ walisa k’an hakili jigi a ka saya la. Mun na o tɛ bari an na? b) An bena Yezu ka jogo jumanw lo lajɛ?

KRISTA saya Hakilijigi lajɛn be kɛ cogo min na saan o saan, i be se k’o lakali wa? Siga t’a la, an fanba be se k’o lakali. Mun na? Sabu a kɛcogo man gwɛlɛ. Tiɲɛn lo ko a kɛcogo ka nɔgɔ, nka a b’an kalan koo nafamanw na. An be se k’an yɛrɛ ɲininga ko: “Mun na o lajɛn kɛcogo ka nɔgɔ ten?”

² Yezu ka cidenya baara la dugukolo kan, a tun be to ka mɔgɔw kalan koo nafamanw na. A tun b’o kɛ cogo nɔgɔman na. A ka kalanw tun gwɛnin lo ani u faamuyali tun man gwɛlɛ (Mat. 7:28, 29). O kama, a tɛ bari an na k’a ye ko Yezu y’a yira cogo nɔgɔman na an ka ɲi ka min kɛ walisa k’an hakili jigi a ka saya la. O hakilijigiko * ka nɔgɔ, nka a nafa ka bon. An ka miiri koɲuman Hakilijigi lajɛn koo la. Yezu ye kuma minw fɔ ani a ye koo minw kɛ, an k’u dɔw lajɛ fana. O la, an bena a faamu bɛrɛbɛrɛ ko Yezu majiginin lo, a jaa ka gwɛlɛ ani a be mɔgɔw kanu kosɔbɛ. An bena a ye fana an be se k’a ladegi koɲuman cogo min na.

3. Ka kɛɲɛ ni Matiyo 26:26-28 ye, Yezu ye Hakilijigi lajɛn min sigi sen kan, mun na an be se k’a fɔ ko a y’o kɛ cogo nɔgɔman na? Buru ni diwɛn ye mun lo tagamasiɲɛ ye?

³ Yezu y’a ka saya Hakilijigi lajɛn sigi sen kan n’a ka ciden kantigi 11 lo ye. A ye Tɛmɛnkan seli buru funubali  ani diwɛn tɔɔ lo ta k’o Hakilijigi lajɛn kɛ cogo nɔgɔman na (Matiyo 26:26-28 kalan). Yezu y’a ɲɛfɔ a ka cidenw ye ko buru ni diwɛn y’a farisogo n’a joli tagamasiɲɛ ye, a tun bena o minw saraka u kosɔn. N’a sɔrɔ a ma bari cidenw na k’a ye ko Yezu y’o koo kura kɛ cogo nɔgɔman na. Mun na?

4. Mun lo be se k’an dɛmɛ k’a faamu fɛɛn min kama Yezu ye Hakilijigi lajɛn dumuni labɛn cogo nɔgɔman na?

⁴ An k’a filɛ min kɛra kalo damanin ka kɔn o lajɛn ɲɛ. O kɛra Yezu ka cidenya baara saan sabanan na. A tun tagara a teri sɔbɛw Lazari, Marita ani Mariyamu fɛ. O yɔrɔ la, a y’a daminɛ ka mɔgɔw kalan. Nka Marita tun ɲɛɛ gwannin lo tobiliba la sabu a tun b’a fɛ k’u teri Yezu ladon koɲuman. Yezu y’o ye minkɛ, a ye Marita ladi ni ɲumanya ye. A y’a dɛmɛ k’a faamu ko tobiliba tɛ waajibi ye tuma bɛɛ (Luka 10:40-42). Kɔfɛ, lɛri damanin ka kɔn a ka saya ɲɛ, Yezu tun ye ladili min di Marita ma, ale yɛrɛ y’o sira tagama. A ye Hakilijigi lajɛn dumuni labɛn cogo nɔgɔman na. O be mun lo yira an na Yezu koo la?

5. Matigi ka surafana kɛcogo ka nɔgɔ. O be mun yira an na Yezu koo la? Mun na an be se k’a fɔ k’o bɛnni lo ni Filipikaw 2:5, 7, 8 ka miiriya ye?

⁵ Yezu y’a yira a ka kumaw n’a ka kɛwalew fɛ ko a majiginin lo. O la, a tɛ bari an na k’a ye ko a ka suu laban na, a y’a yira ko a majiginin lo kosɔbɛ (Mat. 11:29). A tun b’a lɔn ko a bena saraka min kɛ, o ɲɔgɔn ma deli ka kɛ. A tun b’a lɔn fana ko Jehova bena a lakunu k’a kɛ Masacɛ ye sankolo la. O bɛɛ n’a ta, Yezu m’a ɲini ka waso. A m’a ɲini fana a ka kalandenw fɛ u ka koo gwɛlɛman dɔw kɛ walisa k’u hakili jigi ale ka saya koo la. Nka, a y’a fɔ k’u ka hakilijigiko nɔgɔman dɔ lo kɛ siɲɛ kelen saan o saan (Zan 13:15; 1 Kor. 11:23-25). O koo kɛ ka nɔgɔ, nka a bɛnnin lo. O b’an dɛmɛ k’a faamu ko Yezu yadanin tɛ. Tiɲɛn na, an ninsɔn ka di k’a ye ko majigilenya ye an ka Masacɛ ka jogo ɲuman dɔ ye.—Filipikaw 2:5, 7, 8 kalan.

6. An be se ka Yezu ka majigilenya ladegi cogo di kɔrɔbɔli tuma na?

⁶ N’an be tɔɔw nafa lo ɲini fɔlɔ, an b’a yira ko an be Yezu ka majigilenya ladegi (Filip. 2:3, 4). Miiri k’a filɛ Yezu ye min kɛ a ka suu laban na. A tun b’a lɔn ko yanni dɔɔni, a tun bena tɔɔrɔ ani ka sa. O bɛɛ n’a ta, a tun be jɔrɔla kosɔbɛ a ka ciden kantigimanw lo koo la sabu a ka saya tun bena u tɔɔrɔ. O kama, a y’a ka suu laban bɛɛ kɛ k’u kalan, k’u jija ani k’u hakili sigi (Zan 14:25-31). Yezu  tun be tɔɔw nafa lo ɲini fɔlɔ. O tun b’a yira ko a majiginin lo. A ye ɲɛyirali ɲuman to an ye!

7. Matigi ka surafana kɛnin kɔ, Yezu y’a yira cogo di ko a jaa ka gwɛlɛ kosɔbɛ?

⁷ Dɔɔni Matigi ka surafana kɛnin kɔ, Yezu y’a yira ko a jaa ka gwɛlɛ kosɔbɛ. O ye koo juman lo ye? A tun b’a lɔn ko u tun bena a jalaki ko a ye Ala tɔgɔ tiɲɛ ani o kɔ, u tun bena a faga. O tun ye maloyako ye dɛ! O n’a ta bɛɛ, a Faa ye min ɲini a fɛ, a y’o kɛ (Mat. 26:65, 66; Luka 22:41, 42). Yezu tora kantigiya la. O cogo la, a ye nɔɔrɔ la Jehova tɔgɔ kan, k’a ka Masabaya lafasa ani mɔgɔ minw nimisara u ka jurumuw na, a ye ɲɛnamaya banbali jigiya di u ma. Kɔrɔbɔli minw tun bena cun a ka kalandenw kan yanni dɔɔni, a y’u labɛn o kama fana.

8. a) Yezu ye mun lo fɔ a ka ciden kantigiw ye? b) Saan caaman Yezu sanin kɔ, a ka kalandenw y’a ka jagwɛlɛya ladegi cogo di?

⁸ Yezu tun tɛ hami kojugu a ka gwɛlɛyaw koo la. Nka, a ka ciden kantigiw mako tun be min na, a tun be miiri o lo la. O cogo la, a y’a yira fana ko a jaa ka gwɛlɛ. A y’a to Zuda Isikariyɔti bɔra ka sɔrɔ ka Matigi ka surafana dumu n’a ka kalanden mɔlenw ye. O surafana nɔgɔman tun bena to k’u hakili jigi Yezu joli nafa koo la ani k’u dɛmɛ k’a faamu k’u niin be layidu kura la (1 Kor. 10:16, 17). Walisa k’a ka kalandenw dɛmɛ u ka to kantigiya la ani k’u ka sara sɔrɔ sankolo la, Yezu y’a fɔ u ye ale n’a Faa be min ɲini u fɛ (Zan 15:12-15). A y’a fɔ a ka cidenw ye fana kɔrɔbɔli minw bena u sɔrɔ. O kɔ, a y’u jija u k’u “jaa gwɛlɛya” i ko ale y’a kɛ cogo min na (Zan 16:1-4a, 33). Saan caaman o kɔ, Yezu ka  kalandenw bele tora k’a ladegi. U tun b’u yɛrɛ saraka tɔɔw kosɔn ani u tun b’a yira k’u jaa ka gwɛlɛ. U tora ka ɲɔgɔn jija u ka kɔrɔbɔliw bɛɛ la hali n’u tun ka kan ka tɔɔrɔ kosɔbɛ o kosɔn.—Eburuw 10:33, 34.

9. I ko Yezu, an be se k’a yira cogo di ko an jaa ka gwɛlɛ?

⁹ Bi, an fana be Yezu ka jagwɛlɛya ladegi. Ɲɛyirali fɛ, u b’an balima minw kɛlɛ u ka limaniya kosɔn, an b’an jaa gwɛlɛya k’olu dɛmɛ. Tuma dɔw la, u be baga an balimaw ma gwansan k’u don kaso la. N’o ɲɔgɔn kɛra, an ka ɲi k’an seko bɛɛ kɛ walisa k’u dɛmɛ. An yɛrɛ be se k’u lafasa kititigɛso la (Filip. 1:14; Eburuw 13:19). An be se k’a yira cogo wɛrɛ min na ko an jaa ka gwɛlɛ, o ye ka to ka waajuli kɛ ni “ja gɛlɛya ye.” (Kɛw. 14: 3, Bible senuma). I ko Yezu, an cɛsirinin lo ka to ka Masaya kibaro diiman fɔ hali ni mɔgɔw b’an kɛlɛ wala n’u b’an tɔɔrɔ. Nka tuma dɔw la, siranya be se k’an minɛ. N’o lo, an be se ka mun lo kɛ do?

10. Lɔgɔkun minw be kɔn Hakilijigi lajɛn ɲɛ, an ka ɲi ka mun lo kɛ ani mun na?

¹⁰ An be ni jigiya min ye Yezu ka kunmabɔsara barika la, n’an be miiri o la, o be se ka dɔ fara an ka jagwɛlɛya kan (Zan 3:16; Efɛz. 1:7). Lɔgɔkun minw be kɔn Hakilijigi lajɛn ɲɛ, o be sababu ɲuman di an ma ka Jehova ni Yezu waleɲuman lɔn kosɔbɛ kunmabɔsara kosɔn. O wagati la, Bibulu yɔrɔ minw sugandira Hakilijigi lajɛn kama, an k’u kalan. Koo minw kɛra ka kɔn Yezu ka saya ɲɛ ani koo minw kɛra o kɔ, an ka miiri o kan koɲuman. O la, Hakilijigi lajɛn loon na, an bena a faamu ka ɲɛ buru ni diwɛn ye fɛɛn minw tagamasiɲɛ ye. An bena se k’a faamu koɲuman fana  ko kunmabɔsara ɲɔgɔn tɛ yen. Jehova ni Yezu ye min kɛ an ye, an k’a ɲini k’o faamu bɛrɛbɛrɛ ani k’a lɔn o be an n’an ka mɔgɔ kanulenw nafa cogo min na. O la, an be ni jigiya min ye siniɲasigi koo la, o barika bena bonya. An bena fanga sɔrɔ fana ka muɲuli kɛ ni jagwɛlɛya ye fɔɔ ka taga se laban na.—Eburuw 12:3.

11-12. An ye mun lo ye dakun tɛmɛninw na?

¹¹ An y’a ye ko Matigi ka surafana t’an hakili jigi Yezu ka kunmabɔsara koo la dɔrɔn. A b’an hakili jigi fana Yezu ka jogo ɲumanba nunu na: majigilenya ani jagwɛlɛya. Yezu y’an ka Sarakalasebaga Kuntigiba ye sankolo la ani a be to ka Ala deli an ye (Eburuw 7:24, 25). An b’a waleɲuman lɔn sabu a bele be to k’a yira ko a majiginin lo ani ko a jaa ka gwɛlɛ. Walisa k’an ka waleɲumanlɔn yira, an ka ɲi k’an hakili jigi Yezu ka saya la ni kantigiya ye i ko a y’a ɲini an fɛ cogo min na (Luka 22:19, 20). An b’o Hakilijigi lajɛn kɛ Nisankalo tile 14. O ye loon ye min ɲɔgɔn tɛ yen saan kɔnɔ.

¹² Yezu ye Matigi ka surafana kɛ cogo nɔgɔman na. O b’a ka jogo wɛrɛ yira an na o min y’a lasun ka sa an kosɔn. Tuma min na a tun be dugukolo kan, bɛɛ tun b’a lɔn ko a be n’o jogo ye. O ye jogo juman lo ye do?

13. Jehova ni Yezu y’an kanu cogo min na, Zan 15:9 ani 1 Zan 4:8-10 b’o yira cogo di? U ka kanuya be jɔn ni jɔn lo nafa?

¹³ Yezu ka kokɛtaw bɛɛ la, a y’a yira ko a b’an kanu kosɔbɛ i ko a Faa b’an kanu cogo min na (Zan 15:9; 1 Zan 4:8-10 kalan). A nana dugukolo kan k’a niin saraka an kosɔn. O ye kanuya wale ye min ɲɔgɔn tɛ yen. An mana kɛ kerecɛn mɔlenw wala “saga dɔ wɛrɛw” cɛma, an be nafa sɔrɔ kunmabɔsara la. O kunmabɔsara be Jehova n’a Dencɛ ka kanuya yira an na (Zan 10:16; 1 Zan 2:2). An ka miiri fana buru ni diwɛn koo la. U b’a yira ko Yezu b’a ka kalandenw kanu ani a b’a janto u la. Cogo di do?

14. Yezu y’a yira cogo di ko a b’a ka kalandenw kanu?

¹⁴ Yezu ye Matigi ka surafana kɛ cogo nɔgɔman na. O b’a yira ko a be kerecɛn mɔlenw kanu. Kɔfɛ, olu tun ka kan k’o surafana kɛ saan o saan, u mana kɛ yɔrɔ o yɔrɔ, hali kaso la (Yir. 2:10). Yala u sera k’o kɛ wa? Ɔnhɔn. U sera k’o kɛ.

15-16. Dɔw sera ka Matigi ka surafana kɛ cogo di hali wagati gwɛlɛw na?

¹⁵ Kabi saan kɛmɛkulu fɔlɔ la, kerecɛn sɔbɛw y’u jija ka Yezu saya Hakilijigi lajɛn kɛ. Yezu ye Matigi ka surafana kɛ cogo min na, u fana jijara k’a kɛ o cogo la, hali n’a tun man nɔgɔ tuma dɔw la. An ka ɲɛyirali dɔ lajɛ. Tuma min na u tun ye balimacɛ Harold King datugu kasobon na a kelen, a ye fɛɛrɛw ɲini walisa ka se ka Hakilijigi lajɛn kɛ. Fɛɛn minw tun b’a bolo kɔrɔ, a y’o kɛ ka Hakili lajɛn tagamasiɲɛw labɛn dogo la. A ye jatiminɛ kɛ fana koɲuman k’a filɛ o lajɛn be bɛn loon min ma. Hakilijigi lajɛn loon na, a tora a ka kasobon kɔnɔ a kelen ka dɔnkili la ani ka delili kɛ. O kɔ, a basigira Bibulu kan ka kalan dɔ di.

¹⁶ An ka ɲɛyirali wɛrɛ lajɛ. Duniɲa ka kɛlɛba filanan wagati la, balimamuso dɔw tun be kaso la. U y’u niin bila farati walisa ka Matigi ka surafana kɛ. Komi o hakilijigiko ka nɔgɔ, u sera k’o kɛ dogo la. U ko: “An ye sigilan dennin dɔ bila ka fani gwɛman la a kan. An ye buru ni diwɛn bila o sigilan kan ani an lɔra k’a lamini. An ye buzi dɔ mɛnɛ sabu  kuran yeelen tun bena a to u b’a lɔn an be min kɛra. . . . An y’an daa di an Faa Jehova ma kokura ko an bena an seko bɛɛ kɛ k’a tɔgɔ senuman lafasa.” U ka limaniya barika tun ka bon yɛrɛ le! Yezu ye Hakilijigi lajɛn sigi sen kan cogo nɔgɔman na walisa an ka se k’a kɛ hali wagati gwɛlɛw na. O b’a yira tiɲɛn na ko a b’an kanu kosɔbɛ!

17. A ka ɲi an k’an yɛrɛ ɲininga mun lo la?

¹⁷ Hakilijigi lajɛn be surunyana minkɛ, a ka ɲi an k’an yɛrɛ ɲininga ko: “N’ be se ka Yezu ka kanuya ladegi bɛrɛbɛrɛ cogo di? Yala n’ be n’ kerecɛnɲɔgɔnw nafa lo ɲini fɔlɔ wa? Yala n’ be fɛɛn dɔw waajibiya n’ balimaw ma k’a sɔrɔ u tɛ se k’o kɛ wa? Wala u seko ye min ye n’ be n’ janto o la wa?” An k’an jija ka Yezu ladegi tuma bɛɛ ani ka hinɛ ɲɔgɔn na.—1 Piyɛri 3:8.

18-19. a) An be se ka la mun lo la? b) I jijanin lo ka mun lo kɛ?

¹⁸ Wagati dɔ bena se, an tɛna Yezu saya Hakilijigi lajɛn kɛ tugun. Ni Yezu ‘kɔsegira ka na’ tɔɔrɔba wagati la, “a ye mɔgɔ minw woloma,” a bena olu lajɛn sankolo la. O tuma na, Hakilijigi lajɛn tɛna kɛ tugun.—1 Kor. 11:26; Mat. 24:31.

¹⁹ Nka, kalan min be sɔrɔ o surafana nɔgɔman na, Jehova ka mɔgɔw hakili bena to o la. O surafana b’a yira ko Yezu majiginin lo ani a jaa ka gwɛlɛ kosɔbɛ. O b’a yira fana ko a be adamadenw kanu yɛrɛ le! Ni Hakilijigi lajɛn nana dabila, minw y’o kooba kɛ ka ye, siga t’a la olu bena o lakali tɔɔw ye. Walisa ka nafa sɔrɔ bɛrɛbɛrɛ Hakilijigi lajɛn na sisan yɛrɛ, an ka ɲi k’an jija ka Yezu ka majigilenya, a ka jagwɛlɛya n’a ka kanuya ladegi. N’an b’o kɛ, an ka la a la ko Jehova bena an duga.—2 Piyɛri 1:10, 11.