1-2. a) Ni mɔgɔ miliyɔn caaman nana Matigi ka surafana na, Jehova be mun lo filɛ do? (Jaa lajɛ ɲɛɛ fɔlɔ kan.) b) An bena mun lo lajɛ barokun nin na?

DUNIƝA kuru bɛɛ kɔnɔ, ni mɔgɔ miliyɔn caaman nana Matigi ka surafana na, Jehova be mun lo filɛ do? A tɛ o mɔgɔw hakɛ dɔrɔn lo filɛ, nka a b’u kelen kelen bɛɛ lo filɛ. Ɲɛyirali fɛ, a b’a ye mɔgɔ minw be kantigiya kɛ ka na o lajɛn na saan o saan. O mɔgɔw cɛma, n’a sɔrɔ dɔw be na kɔrɔbɔlibaw bɛɛ n’a ta. U dɔw tɛ na kafo ka lajɛnw na tuma o tuma. Nka, u b’a jati ko a kɔrɔtanin lo u ka na Hakilijigi lajɛn na. Minw siɲɛ fɔlɔ lo ka na o lajɛn na, Jehova b’olu fana ye. N’a sɔrɔ u nana sabu u b’a fɛ k’a lɔn dɔrɔn min be kɛ yen.

² Siga t’a la, ni mɔgɔ caamanba nana Hakilijigi lajɛn na, o ka di Jehova ye (Luka 22:19). Nka Jehova fɛ, mɔgɔw be na o lajɛn na kuun min kama o kɔrɔtanin lo ka tɛmɛ mɔgɔ hakɛ min nana. Ka fara Hakilijigi lajɛn kan, Jehova be lajɛn dɔw labɛn lɔgɔkun o lɔgɔkun a ka mɔgɔ kanulenw ye. Mun na an be taga o lajɛnw na? An bena o ɲiningali jɔnjɔn lo lajɛ barokun nin na.

3-4. a) Kuun jumanw lo kama an be taga lajɛnw na? b) N’an be taga an ka lajɛnw na, o be mun lo yira an koo la? c) Ka kɛɲɛ ni 1 Korɛntikaw 11:23-26 ye, mun na an man ɲi ka fɔn Hakilijigi lajɛn na?

³ Kuun jɔnjɔn min kama an be taga an ka lajɛnw na, o ye ko lajɛnw y’an ka batoli faan dɔ lo ye. An be taga lajɛnw na fana sabu Jehova b’an kalan yen. Mɔgɔ minw fanin b’u yɛrɛ la, olu t’a fɛ mɔgɔ si k’u kalan (3 Zan 9). Nka, a ka di an kɔni ye Jehova n’a ka ɔriganisasiyɔn k’an kalan.—Ezayi 30:20; Zan 6:45.

 ⁴ N’an be taga an ka lajɛnw na, o b’a yira ko an majiginin lo, o kɔrɔ, an be sɔn kalan ma. An be taga Yezu ka saya Hakilijigi lajɛn na sabu an b’a lɔn k’o lajɛn kɔrɔtanin lo kosɔbɛ. Nka o dɔrɔn tɛ. An be taga yen fana sabu an be Yezu ka cikan nin labato ni majigilenya ye: “Aw ye to ka nin kɛ k’aw hakili to ne la.” (1 Korɛntikaw 11:23-26 kalan). O lajɛn b’an ka jigiya barika bonya siniɲasigi koo la ani a b’an hakili jigi ko Jehova b’an kanu yɛrɛ le! Jehova b’a lɔn ko an mako b’a la u k’an jija ani k’an barika bonya. A b’a lɔn fana ko siɲɛ kelen dɔrɔn tɛ bɔri kɛ saan kɔnɔ. O lo kama, a be lajɛn dɔw labɛn lɔgɔkun o lɔgɔkun ani a b’an jija an kana fɔn u la. Majigilenya b’an lasun ka mɛnni kɛ Jehova fɛ. An be lɛri caaman kɛ lɔgɔkun o lɔgɔkun k’o lajɛnw labɛn ani ka taga u la.

5. Mun na mɔgɔ majigininw be sɔn Jehova ka welekan ma?

⁵ Jehova be mɔgɔw weele walisa k’u kalan. Saan o saan, mɔgɔ majiginin caaman be sɔn o welekan ma (Ezayi 50:4). Tuma caaman na, u be na Hakilijigi lajɛn lo la fɔlɔ ani o kɔ le, u b’a daminɛ ka na lajɛn tɔɔw la (Zak. 8:20-23). A ka di an ni olu ye ka kalan sɔrɔ ka bɔ Jehova fɛ ani k’a to a k’an ɲɛminɛ. Ale lo y’an ‘dɛmɛbaga n’an bɔsibaga ye.’ (Zab. 40:18). Jehova n’a Dencɛ kanulen b’an weele walisa k’an kalan. Tiɲɛn na, ka sɔn o welekan ma, fɛɛn si kɔrɔtanin tɛ ani fɛɛn si tɛ mɔgɔ ninsɔn diya ka tɛmɛ o kan!—Mat. 17:5; 18:20; 28:20.

6. Majigilenya ye cɛɛ dɔ dɛmɛ cogo di a nana Hakilijigi lajɛn na?

⁶ Saan o saan, an b’an jija ka mɔgɔ caamanba weele Yezu ka saya Hakilijigi lajɛn na. Mɔgɔ majiginin caaman sɔnna o welekan ma ani u ye nafa sɔrɔ o la. An ka ɲɛyirali dɔ lajɛ. A saan caaman ye nin ye, balimacɛ dɔ ye Hakilijigi lajɛn welelisɛbɛ di cɛɛ dɔ ma. O cɛɛ y’a fɔ a ye ko ale tɛna se ka na o lajɛn na. Nka, Hakilijigi lajɛn loon wulafɛ, balimacɛ kabakoyara k’o cɛɛ dontɔ ye Masaya Boon kɔnɔ. Balimaw y’o cɛɛ bisimila cogo min na, o y’a dusu sɔrɔ, fɔɔ a y’a daminɛ ka na kafo ka lajɛnw na. Saan kelen kɔnɔ, o cɛɛ fɔnna lajɛn saba dɔrɔn lo la. Mun lo y’a dɛmɛ a y’a latigɛ ka to ka na kafo ka lajɛnw bɛɛ la? Majigilenya lo y’a to a y’a ka miiriya yɛlɛma. Balimacɛ min tun y’a weele, ale y’a fɔ kɔfɛ ko: “Cɛɛ nin majiginin lo kosɔbɛ.” Siga t’a la, Jehova sababu lo la o cɛɛ nana tiɲɛn sira kan. Sisan, a kɛra an balimacɛ ye.—1 Piyɛri 5:5; Zan 6:44.

7. An be kalan minw sɔrɔ kafo ka lajɛnw na ani an be min kalan Bibulu kɔnɔ, o be se k’an dɛmɛ ka kɛ mɔgɔ majigininw ye cogo di?

⁷ An be kalan minw sɔrɔ kafo ka lajɛnw na ani an be min kalan Bibulu kɔnɔ, o be se k’an dɛmɛ ka kɛ mɔgɔ majigininw ye. Lɔgɔkun damanin ka kɔn Hakilijigi lajɛn ɲɛ, kafo ka lajɛnw ka teli ka sinsin Yezu ka ɲɛyirali kan. U be sinsin fana a ka majigilenya kan, a ye min yira tuma min na a y’a niin saraka an kosɔn. Koo minw kɛra ka kɔn Yezu ka saya n’a sukununi ɲɛ ani minw kɛra o kɔ, Bibulu b’o lakali. Tile damanin ka kɔn Hakilijigi lajɛn ɲɛ, a ka ɲi an k’o maanaw kalan. O maanaw n’o lajɛnw be dɔ fara an ka waleɲumanlɔn kan Yezu ka kunmabɔsara koo la. O b’an lasun ka Yezu ka majigilenya ladegi ani ka Jehova sago kɛ gwɛlɛyaw bɛɛ n’a ta.—Luka 22:41, 42.

8. Yezu y’a yira cogo di ko a jaa ka gwɛlɛ?

⁸ An be Yezu ladegi fana an kɛtɔ k’a yira ko an jaa ka gwɛlɛ. Loon damanin ka kɔn Yezu ka saya ɲɛ, a y’a yira ko a jaa ka gwɛlɛ. Miiri k’a filɛ a y’o yira cogo min na. A tun b’a kala ma ko yanni dɔɔni a juguw bena a lamaloya, k’a bugɔ ani k’a faga (Mat. 20:17-19). O bɛɛ n’a ta, a sɔnna saya ma. A fagawagati sera tuma min na, a ka ciden kantigi minw tun be n’a ye Zɛtisemane, a y’a fɔ olu ye ko: “Aw ye wili an ka taga. Min be ne donna u bolo, ale natɔ filɛ.” (Mat. 26:36, 46). Tuma min na jamaba nana a minɛyɔrɔ ni kɛlɛkɛminanw ye u bolo, a gwɛrɛla k’a yɛrɛ yira u la. O kɔ, a y’a fɔ sɔrɔdasiw ye ko u k’ale ka kalandenw to u ka taga (Zan 18:3-8). Nin ye jagwɛlɛya ye dɛ! Bi, kerecɛn mɔlenw ni saga wɛrɛ mɔgɔw b’u jija ka Yezu ka jagwɛlɛya ladegi. U b’o kɛ cogo di do?

9. a) Mun na an mako be jagwɛlɛya la walisa ka to ka taga lajɛnw na? b) An balima minw be kaso la u ka limaniya kosɔn, an ka ɲɛyirali be nɔɔ juman to olu kan?

⁹ Gwɛlɛyaw wagati la, an mako be jagwɛlɛya la walisa ka to ka taga lajɛnw na tuma o tuma. Dusukasi, farifaga ani kɛnɛyako bɛɛ n’a ta, an balima dɔw tɛ fɔn lajɛnw na. Dɔ wɛrɛw b’u jaa gwɛlɛya ka taga lajɛnw na k’a sɔrɔ u somɔgɔw wala faamanw b’u kɛlɛ kosɔbɛ u ka limaniya kosɔn. An balima minw be kaso la u ka limaniya kosɔn, miiri k’a filɛ an ka ɲɛyirali be nɔɔ min to olu kan (Eburuw 13:3). N’u y’a mɛn ko an bele be Jehova batora gwɛlɛyaw bɛɛ n’a ta, dɔ be fara u ka limaniya n’u ka jagwɛlɛya kan. O b’u dɛmɛ fana ka to kantigiya la. O ɲɔgɔn lo ye ciden Pol sɔrɔ tuma min na a tun be kaso la Ɔrɔmu. A y’a mɛn ko a balimaw be Ala batora kantigiya la minkɛ, a ninsɔndiyara kosɔbɛ (Filip. 1:3-5, 12-14). Wagati dɔɔni a bɔnin kɔ kaso la wala dɔɔni ka kɔn o ɲɛ, ciden Pol ye lɛtɛrɛ ci Eburuw ma. O lɛtɛrɛ kɔnɔ, a y’o balima kantigiw jija k’u k’a to u ka “ɲɔgɔnkanuya ka barika sɔrɔ” ani u kana ban ka taga lajɛnw na.—Eburuw 10:24, 25; 13:1.

10-11. a) An ka ɲi ka jɔn ni jɔn lo weele ka na Hakilijigi lajɛn na? b) Ka kɛɲɛ ni Efɛzikaw 1:7 ye, mun na an ka ɲi k’o kɛ?

¹⁰ N’an b’an somɔgɔw, an sigiɲɔgɔnw n’an baarakɛɲɔgɔnw weele ka na Hakilijigi lajɛn na, an b’a yira ko an jaa ka gwɛlɛ. Mun na an b’u weele do? Jehova ni Yezu ye min kɛ an ye, an b’u waleɲuman lɔn kosɔbɛ o kosɔn. O lo b’an lasun ka mɔgɔw weele ka na Hakilijigi lajɛn na. Jehova ye “nɛɛma dafanin” kɛ an ye kunmabɔsara sababu fɛ. An b’a fɛ mɔgɔ wɛrɛw fana k’a lɔn cogo min na u be se ka nafa sɔrɔ o la.—Efɛzikaw 1:7 kalan; Yir. 22:17.

¹¹ N’an b’an jaa gwɛlɛya ka to ka taga an ka lajɛnw na, an b’a yira ko an be ni jogo  ɲuman wɛrɛ ye. Ala n’a Dencɛ y’o jogo yira cogo kabakoman na.

12. a) Cogo juman na lajɛnw b’a to an be Jehova ni Yezu kanu kosɔbɛ? b) 2 Korɛntikaw 5:14, 15 b’an jija an ka mun lo kɛ walisa ka Yezu ladegi?

¹² An be Jehova ni Yezu kanu cogo min na, o b’an lasun ka taga lajɛnw na. An be kalan minw sɔrɔ yen, o b’a to an be Jehova n’a Dencɛ kanu kosɔbɛ. Lajɛnw na, u b’an hakili jigi tuma o tuma Jehova ni Yezu ye min kɛ an ye (Ɔrɔm. 5:8). Hakilijigi lajɛn yɛrɛ lo b’an hakili jigi ko u be adamadenw kanu kosɔbɛ, hali minw tɛ kunmabɔsara nafa lɔn fɔlɔ. Waleɲumanlɔn b’an lasun ka Yezu ladegi loon o loon (2 Korɛntikaw 5:14, 15 kalan). Ka fara o kan, an dusukun b’an lasun ka Jehova tando kunmabɔsara kosɔn. An be Jehova tando cogo minw na, u dɔ ye ka lakalitaw kɛ n’an dusu bɛɛ ye lajɛnw na.

13. An be se k’a yira cogo di ko an be Jehova n’a Dencɛ kanu kosɔbɛ? A ɲɛfɔ.

¹³ N’an labilanin lo ka fɛɛn bɛɛ saraka Jehova n’a Dencɛ kosɔn, o b’a yira ko an b’u kanu kosɔbɛ. Tuma caaman na, an ka ɲi ka fɛɛn dɔw saraka walisa ka taga kafo ka lajɛnw na. Kafo caaman b’u ka lajɛnw kɛ wulafɛ baara jiginin kɔ, tuma min na an fanba sɛgɛnnin lo. Lajɛn wɛrɛ be kɛ wikɛni na, tuma min na mɔgɔw fanba be lafiɲɛna. N’an be taga lajɛnw na k’a sɔrɔ an sɛgɛnnin lo, yala Jehova b’o kɔrɔsi wa? Siga t’a la, a b’o kɔrɔsi! N’an b’an jija ka to ka taga lajɛnw na, o ka di Jehova ye kosɔbɛ.—Mariki 12:41-44.

14. Yezu ye ɲɛyirali ɲuman juman lo to an ye?

¹⁴ Yezu kɛra ɲɛyirali ɲuman ye an fɛ. A tun be sɔn k’a yɛrɛ saraka tɔɔw nafa kosɔn sabu a tun b’u kanu. A tun b’a yira loon o loon a ka ɲɛnamaya kɛcogo fɛ ko a b’a ka kalandenw nafa lo ɲini fɔlɔ. Ka fara o kan, a sɔnna k’a niin di u kosɔn. Ɲɛyirali fɛ, hali n’a tun sɛgɛnnin lo ani a hakili tun ɲagaminin lo, a tun be sɔn ka wagati kɛ n’a ka kalandenw ye (Luka 22:39-46). A tun b’a ɲini ka mɔgɔw mako ɲɛ sanni k’a ɲini mɔgɔw k’ale mako ɲɛ (Mat. 20:28). N’an be Jehova n’an balimaw kanu kosɔbɛ i ko Yezu b’u kanu  cogo min na, an bena an seko bɛɛ kɛ ka taga Hakilijigi lajɛn ni kafo ka lajɛn tɔɔw bɛɛ la.

15. A ka di an ye kosɔbɛ ka mɔgɔ jumanw yɛrɛ lo dɛmɛ?

¹⁵ Denbaya kelen dɔrɔn lo be yen min mɔgɔw ye kerecɛn sɔbɛw ye. An y’o denbayamɔgɔw ye ani a ka di an ye ka wagati caaman kɛ ka mɔgɔ wɛrɛw weele u ka na fara an kan. Nka, an ‘balima lanabaga’ minw fari fagara, a ka di an ye k’olu yɛrɛ lo dɛmɛ (Gal. 6:10, Biblu Ala ta Kuma). N’an b’u jija u ka to ka taga lajɛnw na sanko Hakilijigi lajɛn na, an b’a yira ko an b’u kanu. Jehova y’an Faa kanutigi n’an Ɲɛminɛbaga ye. Minw sumana Alako ta fan fɛ, n’olu dɔ y’a daminɛ k’a bato kokura, o ka di ale, Yezu ani an fana ye kosɔbɛ!—Mat. 18:14.

16. a) An be se ka ɲɔgɔn jija cogo di? An ka lajɛnw b’an nafa cogo di? b) Yezu ka kuma minw be sɔrɔ Zan 3:16 kɔnɔ, mun na sisan ye wagati ɲuman ye ka miiri o la?

¹⁶ Lɔgɔkun nataw la, an ka banba ka mɔgɔ caamanba weele u ka na Hakilijigi lajɛn na jumalon wulafɛ, saan 2019, awirilikalo tile 19 (Koorilen nin lajɛ: “ I bena u weele ka na wa?”) An ka ɲɔgɔn jija tuma bɛɛ an kɛtɔ ka to ka taga kafo ka lajɛnw bɛɛ la. Jehova lo b’o lajɛnw labɛn an ye. An ka ɲi ka to ka taga o lajɛnw na sabu duniɲa laban be surunyana. U b’an dɛmɛ ka kɛ ni majigilenya, jagwɛlɛya ani kanuya ye tuma bɛɛ (1 Tes. 5:8-11). Jehova n’a Dencɛ b’an kanu kosɔbɛ! O la, an k’a yira n’an dusu bɛɛ ye ko an fana b’u kanu.—Zan 3:16 kalan.