1, 2. Gwɛlɛya juman lo be Ala sagokɛlaw kan bi? (Jaa lajɛ, barokun daminɛ na.)

MƆGƆ minw ka bana be yɛlɛma mɔgɔw la, dɔgɔtɔrɔ caaman b’olu furakɛ. U b’u janto o banabagatɔw la sabu u b’a fɛ k’u dɛmɛ. Nka, u ka ɲi k’u yɛrɛ kɔrɔsi walisa o bana kana yɛlɛma u la. O cogo kelen na, an caaman be ɲɛnamaya kɛ ani ka baara kɛ ni mɔgɔ dɔw ye minw ka miiricogo n’u ka kokɛcogow tɛ kelen ye ni Ala ka jogow ye. O be se ka kɛ gwɛlɛya ye an fɛ.

² Duniɲa laban loon nunu na, mɔgɔ minw tɛ Ala kanu, olu t’u janto Ala ka sariyaw la ɲuman ni juguman koo la. Ciden Pol kumana u ka jogo juguw koo la tuma min na a ye bataki dɔ sɛbɛ Timote ma. Pol y’a fɔ ko mɔgɔ caaman tun bena kɛ n’o jogo juguw ye duniɲa laban loonw na (2 Timote 3:1-5, 13 kalan). * O jogo juguw be se k’an kɔnɔ gwan. O n’a t’a bɛɛ, o  mɔgɔw ka miiricogo, u ka kumacogo n’u ka kɛwalew be se ka nɔɔ jugu to an kan (Talenw 13:20). Faranfasi be yen Ala sagokɛlaw ka jogo ɲumanw ni duniɲa mɔgɔw ka jogo juguw cɛ. An bena o lo lajɛ barokun nin na. An bena a ye fana an be se k’an yɛrɛ kɔrɔsi cogo min na walisa u ka jogo juguw kana nɔɔ to an kan hali n’an b’u dɛmɛna Alako ta fan fɛ.

3. Jogo jugu minw kofɔra 2 Timote 3:2-5 kɔnɔ, o ɲɛsinna jɔn lo ma?

³ Ciden Pol y’a sɛbɛ ko: “Laban loonw na, wagati gwɛlɛw bena kɛ minw muɲu man nɔgɔ.” O kɔ, a kumana jogo jugu 19 koo la mɔgɔ caaman tun bena kɛ ni minw ye laban loonw na. O jogo ɲɔgɔnw lo kofɔra Ɔrɔmukaw 1:29-31 kɔnɔ. Nka, Pol ye bataki min sɛbɛ Timote ma, jogo jugu minw b’a kɔnɔ, u dɔw koo ma fɔ yɔrɔ si Gɛrɛkikan sɛbɛninw kɔnɔ. Tuma min na Pol tun be kumana o jogow koo la, a y’a ka kuma dadon ko: “Mɔgɔw bena . . . ” Nka o kɔrɔ tɛ k’o jogo juguw be mɔgɔ bɛɛ la. Kerecɛnw tɛ n’o jogo juguw ye.—Malasi 3:18 kalan.

4. Mɔgɔ minw fanin be kuncɛbaya la, i be se ka mun lo fɔ olu koo la?

⁴ Pol y’a fɔ ko mɔgɔw bena u yɛrɛ kanu ani ka wari kanu. O kɔ, a y’a fɔ ko mɔgɔw bena kɛ yɛrɛbonyalaw, kuncɛbaw ye ani u bena fa kuncɛbaya la. Mɔgɔ minw be n’o jogow ye, olu b’a miiri k’u ka fisa ni tɔɔw ye sabu u cɛ ka ɲi, see b’u ye ka koo caaman kɛ, u ye nafolotigiw ye wala u be ni lɔyɔrɔba ye. O ɲɔgɔnna mɔgɔ be koo bɛɛ kɛ k’a koo diya mɔgɔw ye ani a b’a fɛ bonya ka la a kan kojugu. Lɔnnikɛla dɔ y’a fɔ ko: “Sarakabɔlan dɔ b’o tigi dusukun na, a b’a kunbiri gwan min kɔrɔ k’a yɛrɛ bato.” Dɔw y’a fɔ ko minw be kuncɛbaya kɛ, kuncɛbaw yɛrɛ koo man di olu ye. Mun na do? Sabu kuncɛbaya ye jogo jugu lo ye.

5. Ala sagokɛla dɔw ye kuncɛbaya kɛ cogo di?

⁵ Siga t’a la, kuncɛbaya man di Jehova ye fewu! “Yɛrɛboɲa” fana ka gwo a ye (Talenw 6:16, 17). Kuncɛbaw yɔrɔ ka jan Ala ma (Zab. 10:4). Kuncɛbaya ye Sutana ka jogo dɔ lo ye (1 Tim. 3:6). A fɔ man di nka, hali Jehova sagokɛla kantigi dɔw ye kuncɛbaya kɛ. Ɲɛyirali fɛ, Zuda masacɛ Oziyasi tun ye kantigiya kɛ saan caaman kɔnɔ. Nka, Bibulu b’a fɔ ko: “A ye fanga sɔrɔ tuma min na, yɛrɛboɲa donn’a la, o nana n’a ka bɔnɛ ye. A ma tilen Masaba a ka Ala ma, a tagara don Masaba batoso kɔnɔ wusulan jɛniyɔrɔ la ko ale be wusulan jɛni.” Kɔfɛ, masacɛ Ezekiyasi fana ye kuncɛbaya kɛ wagati kunkurunin kɔnɔ.—2 Til. Kib. 26:16; 32:25, 26.

6. Mun lo tun be se k’a to Dawuda be kuncɛbaya kɛ? Nka mun lo y’a to a ma kuncɛbaya kɛ?

⁶ Mɔgɔ dɔw be kuncɛbaya kɛ sabu u cɛ ka ɲi, u tɔgɔ bɔra, u be se ka dɔnkili la ka ɲɛ, fanga b’u la wala u be ni lɔyɔrɔba ye. Dawuda tun be n’o fɛɛnw bɛɛ ye, nka, a y’a yɛrɛ majigi a ka ɲɛnamaya kuru bɛɛ la. A ye Goliyati faga ka ban tuma min na, masacɛ Sayuli tun b’a fɛ k’a denmuso di a ma. Nka Dawuda y’a fɔ ko: “Ne ye jɔn ye? Ne buruju ye mun ye? Ne faa ka fadenyabolo ye mun le ye Isirayɛlidenw cɛma ni ne le bena kɛ masacɛ birancɛ ye?” (1 Sam. 18:18). Mun lo ye Dawuda dɛmɛ a tora k’a yɛrɛ majigi? Jogo ɲumanw, setigiya ani nɛɛma baara tun be Dawuda fɛ sabu Jehova tun y’a “yɛrɛ majigi” k’a janto a la (Zab. 113:5-8). Dawuda tun b’a lɔn ko a ye fɛɛn ɲuman minw bɛɛ sɔrɔ, Jehova lo y’u di a ma.—1 Korɛntikaw 4:7 lajɛ.

7. Mun lo bena an dɛmɛ k’an yɛrɛ majigi?

⁷ I ko Dawuda, Jehova sagokɛlaw b’u  seko bɛɛ kɛ bi walisa k’u yɛrɛ majigi. Mun na do? Sabu majigilenya ye jogo ɲumanba lo ye. Miiri k’a filɛ, Jehova lo ye Sebagayabɛɛtigi ye, nka a b’a yɛrɛ majigi. O b’an kabakoya yɛrɛ le (Zab. 18:36). An jijanin lo ka ladili nin sira tagama: “Aw ka kɛ mɔgɔɲumanw ye, minw be makari. Aw k’aw yɛrɛ majigi, ka kɛ mɔgɔsabalininw ye, minw be muɲuli kɛ.” (Kɔlɔs. 3:12). An b’a lɔn fana ko kanuya be mɔgɔ min dusu la, a “t’a yɛrɛ yira, a t’a yɛrɛ boɲa fana.” (1 Kor. 13:4). N’an b’an yɛrɛ majigi, o b’a to mɔgɔw b’a ɲini ka Jehova lɔn. Cɛɛ dannabali be se ka sɔn ka Jehova bato a muso tagamacogo ɲuman kosɔn. O cogo kelen na, mɔgɔw be se k’a ɲini ka Jehova bato a sagokɛlaw ka majigilenya kosɔn.—1 Piyɛri 3:1.

8. a) Bi, denmisɛnw t’u bangebagaw kaan minɛ. Dɔw b’o koo jati cogo di? b) Ala ka Kuma be denmisɛnw jija u ka mun lo kɛ?

⁸ Mɔgɔw bena ɲɔgɔn minɛ cogo min na laban loonw na, Pol y’o ɲɛfɔ. A y’a sɛbɛ ko denmisɛnw tɛna mɛnni kɛ u wolobagaw fɛ. Bi, gafew, filimuw ani telewisɔn ka porogramu caaman b’a yira ko koo jugu tɛ ni deenw tɛ mɛnni kɛ u bangebagaw fɛ. Ni deenw tɛ mɛnni kɛ u bangebagaw fɛ, o be denbaya ka hɛɛrɛ nagasi. Adamadenya juu do siginin be denbaya lo kan. Kabi wagatijan, mɔgɔw b’o kala ma. Fɔlɔfɔlɔ la Grɛkiw fɛ, ni mɔgɔ dɔ tun y’a bangebagaw bugɔ, a tun tɛ jati u ka siyamɔgɔ dɔ ye tugun. Ɔrɔmukaw ka sariya tun b’a fɔ ko ni mɔgɔ dɔ y’a facɛ bugɔ, o ni mɔgɔ faga tun ka kan. Heburukan sɛbɛninw ni Gɛrɛkikan sɛbɛninw be denmisɛnw jija u k’u bangebagaw bonya.—Ɛkiz. 20:12; Efɛz. 6:1-3.

9. Mun lo be se ka denmisɛnw dɛmɛ u ka mɛnni kɛ u bangebagaw fɛ?

⁹ Mun lo be se ka denmisɛnw dɛmɛ u ka mɛnni kɛ u bangebagaw fɛ hali ni mɔgɔw fanba t’o kɛ? U bangebagaw ye koo ɲuman minw bɛɛ kɛ u ye, n’u be miiri o la, u bena u waleɲuman lɔn o kosɔn ani ka mɛnni kɛ u fɛ. Kanbelew ni sunguruw fana ka ɲi k’a faamu ko Ala min y’an bɛɛ Faa ye, ale b’a fɛ u ka mɛnni kɛ u bangebagaw fɛ. Ni kanbelew ni sunguruw b’u bangebagaw tɔgɔ ɲuman fɔ, o bena a to u teriw b’u bangebagaw bonya. Ni bangebagaw tɛ u deenw kanu, a bena gwɛlɛya u deenw fɛ k’u bonya n’u dusukun bɛɛ ye. Nka ni kanbelew ni sunguruw y’a ye k’u bangebagaw b’u kanu sɔbɛ la, o bena a to u be mɛnni kɛ u fɛ hali n’a ka gwɛlɛ. Balimacɛ Austin ko: “N’ tun b’a miiri ko n’ be se ka n’ diyananko bɛɛ kɛ. Nka, n’ bangebagaw tun ye sarati bɛnnin dɔw sigi ani k’a ɲɛfɔ fɛɛn min kama u tun y’o kɛ. An tun be baro kɛ ɲɔgɔn fɛ tuma caaman na fana. O ye n’ lasun ka mɛnni kɛ u fɛ ani k’a ɲini ka n’ koo diya u ye sabu n’ y’a ye ko u b’u janto n’ na.”

10, 11. a) Jogo jugu jumanw lo b’a yira ko kanuya tɛ mɔgɔw ni ɲɔgɔn cɛ? b) Kerecɛn sɔbɛw b’u mɔgɔɲɔgɔnw kanu fɔɔ ka se hakɛ juman ma?

¹⁰ Pol ye jogo jugu wɛrɛw kofɔ minw b’a yira ko mɔgɔw tɛ ɲɔgɔn kanu. A y’a fɔ ko “denmisɛnw tɛna mɛnni kɛ u wolobagaw fɛ.” O kɔ, a ko mɔgɔw bena kɛ ɲumanlɔnbaliw ye. O ye tiɲɛn ye sabu ɲumanlɔnbaliw tɛ tɔɔw waleɲuman lɔn u ka ɲumanya kosɔn. Pol y’a fɔ ko mɔgɔw tɛna kantigiya kɛ. A ko hɛɛrɛ tɛna diya u ye fana. O kɔrɔ, u tɛna a ɲini ka bɛɛn sigi ni tɔɔw ye. Mɔgɔw bena kɛ Ala tɔgɔ tiɲɛbagaw ani janfanciw ye. U bena nɛni kumaw ani kuma juguw fɔ  mɔgɔw ani Ala koo la. Mɔgɔw bena kɛ naafigiw ye fana, o kɔrɔ, u bena ngalon la tɔɔw kan. *

¹¹ Jehova sagokɛlaw tɛ kelen ye ni duniɲamɔgɔw fanba ye sabu Jehova sagokɛlaw be mɔgɔw kanu sɔbɛ la sanga ni wagati bɛɛ. Yezu y’a fɔ ko Ala ka cifɔlenw bɛɛ la fɔlɔ ye ka Ala kanu. A filanan ye k’an mɔgɔɲɔgɔnw kanu. O kanuya sifa be weele ko agapɛ (Mat. 22:38, 39). Yezu y’a fɔ fana ko kanuya min b’an ni ɲɔgɔn cɛ, o lo bena a yira ko an ye kerecɛn sɔbɛw ye (Zan 13:34, 35 kalan). Kerecɛn sɔbɛw ka ɲi k’u juguw yɛrɛ kanu.—Mat. 5:43, 44.

12. Yezu y’a yira cogo di ko a be mɔgɔw kanu?

¹² Yezu y’a yira ko a be tɔɔw kanu sɔbɛ la. A tagara dugu ni duguw la ka Ala ka Masaya kibaro diiman fɔ mɔgɔw ye. A ye fiyentɔw ɲɛɛw yɛlɛ, ka namaraw, kunatɔw ani tulogwerenw kɛnɛya. A yɛrɛ ye suuw kunu (Luka 7:22). Hali ni mɔgɔ caaman tun b’a kɔniya, Yezu y’a niin saraka walisa ka adamadenw kisi. Yezu y’a Faa ka kanuya ladegi cogo dafanin na. Dugukolo faan bɛɛ la, Jehova Seerew be Yezu ladegi ani ka tɔɔw kanu.

13. N’an be tɔɔw kanu, o be se k’u dɛmɛ cogo di k’a ɲini ka Jehova lɔn?

¹³ N’an be tɔɔw kanu, o be se k’a to u b’a ɲini k’an sankolola Faa lɔn. Ɲɛyirali fɛ, Tayilandi jamana na, cɛɛ dɔ tagara an ka tile saba lajɛnba dɔ la. A kabakoyara k’a ye balimaw be ɲɔgɔn kanu cogo min na. A kɔseginin soo, a y’a ɲini ka bibulukalan kɛ siɲɛ fila lɔgɔkun kɔnɔ. A y’a somɔgɔw bɛɛ waaju ani kalo wɔɔrɔ dɔrɔn o lajɛnba kɔ, a y’a ka Bibulu kalangwɛ fɔlɔ kɛ Masaya Boon na. Walisa k’a filɛ n’an be tɔɔw kanu, an k’an yɛrɛ ɲininga ko: “Yala n’ be n’ seko bɛɛ kɛ ka n’ somɔgɔw ni kafodenw dɛmɛ ani ka mɔgɔ wɛrɛw dɛmɛ waajuli la wa? Yala n’ be n’ jija ka tɔɔw jati i ko Jehova b’u jati cogo min na wa?”

14, 15. Mɔgɔ caaman be ni jogo jugu jumanw lo ye? Dɔw ye yɛlɛmani jumanw lo kɛ?

¹⁴ Laban loonw na, mɔgɔw be ni jogo jugu wɛrɛw ye. O kama, kerecɛnw ka ɲi k’u mabɔ o mɔgɔw la. Ɲɛyirali fɛ, koo ɲuman man di mɔgɔ caaman ye. U be koo ɲumankɛlaw kɔniya ani k’u kɛlɛ. O ɲɔgɔnna mɔgɔw ye yɛrɛminɛbaliw ani mɔgɔ farimanw ye. Dɔw ye tulogwɛlɛnw ye. U tɛ miiri ka sɔrɔ ka koow kɛ. U ka kɛwalew be min kɛ tɔɔw la, u mako t’o la fewu!

¹⁵ Mɔgɔ minw tun be koow kɛ i n’a fɔ bɛgɛnw, u caaman yɛlɛmana ka kɛ mɔgɔ ɲumanw ye. O Yɛlɛmani tun kofɔra Bibulu ka kiraya kuma dɔ kɔnɔ (Ezayi 11:6, 7 kalan). A tun fɔra ko kongosogow i n’a fɔ waraw ani jaraw bena to hɛɛrɛ la ni sagadenw ani misidenw ye. Mun na u tun bena to hɛɛrɛ la? Bibulu b’a fɔ ko: “Bari Masaba lɔnni bena yɔrɔ bɛɛ fa.” (Ezayi 11:9). Komi bɛgɛnw tɛ se ka Jehova lɔn, o kiraya kuma ɲɛsinna mɔgɔw lo ma minw b’u sɔɔn yɛlɛma.

16. Bibulu ye mɔgɔw dɛmɛ cogo di k’u sɔɔn yɛlɛma?

¹⁶ An balima caaman tun ka fari i n’a fɔ wara, nka sisan, u be hɛɛrɛ la ni tɔɔw ye. I be se k’u ka maana dɔw kalan jw.org kan barokun nunu kɔnɔ: “La Bible transforme des vies.” Mɔgɔ dɔw b’a kɛ komi Alako ka di u ye, nka u tɛ sɔn a ka sebagaya ma. O mɔgɔw b’a fɔ k’u be Ala bato, nka u ka kɛwalew t’o yira. Mɔgɔ minw be Jehova lɔn ani k’a bato, olu tɛ i n’a fɔ o mɔgɔw. Mɔgɔ caaman tun ka fari, nka u ye “jogokura ta, ka kɛ Ala jaa ye, ka kɛ mɔgɔtilenninw ni mɔgɔɲumanw ye.” (Efɛz. 4:23, 24). Mɔgɔ mana Ala lɔn, a b’a faamu ko a ka ɲi ka Ala ka sariyaw labato. O lo b’a lasun k’a ka lannakow, a ka miiriyaw n’a ka kokɛcogow yɛlɛma. A man nɔgɔ k’o yɛlɛmaniw kɛ. Nka mɔgɔ min b’a fɛ ka Ala sago kɛ sɔbɛ la, Ala ka hakili senu bena o tigi dɛmɛ.

17. Minw be ni jogo juguw ye, an be se ka mun lo kɛ walisa olu kana nɔɔ jugu to an kan?

¹⁷ Minw be Ala bato ani minw t’a bato, faranfasi minw b’u cɛ, o be gwɛra ka taga. An ka ɲi k’an janto walisa mɔgɔ minw tɛ Ala bato, olu ka jogo juguw kana nɔɔ to an kan. Mɔgɔ minw kofɔra 2 Timote 3:2-5 kɔnɔ, n’an b’an mabɔ olu la, o ye hakilitigiyako lo ye. Tiɲɛn lo ko minw be n’o jogo juguw ye, an tɛ se k’an mabɔ olu la pewu. An ka ɲi ka baara kɛ n’u ye, ka taga lakɔliso la n’u ye wala ka ɲɛnamaya kɛ n’u ye. Nka, an t’a fɛ ka miiri ani ka koow kɛ i n’a fɔ olu. Mun lo bena an dɛmɛ do? An ka ɲi k’an ka jɛnɲɔgɔnya sabati ni Jehova ye an kɛtɔ ka Bibulu kalan ani ka teriw sugandi minw be Jehova kanu.

18. An ka kumaw n’an ka kɛwalew be se ka tɔɔw nafa Alako ta fan fɛ cogo di?

¹⁸ An ka ɲi k’an seko bɛɛ kɛ fana walisa ka tɔɔw dɛmɛ Alako ta fan fɛ. Tɛmɛ sababu bɛɛ fɛ walisa ka seereya kɛ, Jehova deli a k’i dɛmɛ k’a lɔn i bena min fɔ wagati bɛnnin na. An k’a to tɔɔw k’a lɔn ko an ye Jehova Seerew ye. O cogo la, an ka kɛwalew tɛna bonya la an yɛrɛ kan, nka, u bena bonya la Ala lo kan. Jehova y’a fɔ an ye ko an “ka ban nin diɲɛ nigɛjuguw la, waasa k’an to bii diɲɛ na, an ka se k’an yɛrɛ minɛ ka taama tilenninya la Ala ɲakɔrɔ.” (Titi 2:11-14). N’an be Jehova ladegi ani k’a ka sariyaw labato, tɔɔw bena o kɔrɔsi. N’a sɔrɔ dɔw bena a fɔ an ye ko: “An b’a fɛ ka taga n’aw ye, bari an y’a mɛn ko Ala b’aw le fɛ.”—Zak. 8:23.