1, 2. Saan 2018, kooba juman lo bena mɔgɔ caaman kaan bɛn k’u kɛ kelen ye? Mun na do? (Jaa lajɛ, barokun daminɛ na.)

SAAN 2018 marisikalo tile 31nan na, mɔgɔ miliyɔn caaman bena taga kooba dɔ la min be kɛ siɲɛ kelen saan kɔnɔ. Tile benni kɔ, Jehova Seerew ani mɔgɔ caaman wɛrɛw bena lajɛn k’u hakili jigi Yezu Krista ka saya la. Saan o saan, kooba si tɛ mɔgɔw kaan bɛn cogo kabakoman na ten dugukolo faan bɛɛ la ka se Hakilijigi lajɛn ma!

² Siga t’a la, Jehova ni Yezu dusu ka di kosɔbɛ k’a ye ko mɔgɔ miliyɔn caaman be taga o kooba la duniɲa kuru bɛɛ kɔnɔ. Bibulu be kuma “jamaba dɔ” koo la “mɔgɔ si te se ka minw jati k’u daa lɔn. Jamanaw bɛɛ mɔgɔw tun b’a la, ni siya bɛɛ.” O mɔgɔw bena kule ni kaanba ye ko: “An ka Ala min be masasigilan kan, anw kisira ale ni Sagaden sababu la.” (Yir. 7:9, 10). Jehova ni Yezu ye kooba caaman kɛ an ye. Ninsɔndiyaba lo k’a ye ko saan o saan, mɔgɔ caaman be bonya la u kan Hakilijigi lajɛn na!

3. An bena ɲiningali jumanw lo jaabi barokun nin na?

 ³ Barokun nin na, i bena ɲiningali naani nunu jaabili sɔrɔ: 1) Walisa ka nafa sɔrɔ bɛrɛbɛrɛ Hakilijigi lajɛn na, ne be se ka n’ yɛrɛ labɛn cogo di? 2) Hakilijigi lajɛn be Ala sagokɛlaw bɛɛ kaan bɛn cogo di k’u kɛ kelen ye? 3) Ne be se ka mun lo kɛ walisa hɛɛrɛ ka to Ala sagokɛlaw cɛ? 4) Yala loon dɔ, an bena Matigi ka surafana kɛ ani o bena kɛ a laban ye wa? N’o lo, o bena kɛ tuma juman?

4. Mun na a kɔrɔtanin lo an ka taga Krista ka saya Hakilijigi lajɛn na?

⁴ Mun na a kɔrɔtanin lo an ka taga Hakilijigi lajɛn na? Kuun fɔlɔ ye ko lajɛnw ye an ka batoli faan dɔ lo ye. O kama, an kelen kelen bɛɛ be jijali minw kɛ ka taga o kooba la, an ka la a la ko Jehova ni Yezu b’o kɔrɔsi. Tiɲɛn na, n’a ma kɛ bana jugu dɔ wala fɛɛn wɛrɛ kosɔn, an b’a fɛ u k’a ye ko an b’an seko bɛɛ kɛra ka taga o lajɛn na. N’an ka kɛwalew b’a yira ko an ka lajɛnw kɔrɔtanin lo an fɛ, an be sababu wɛrɛ di Jehova ma a k’an tɔgɔ sɛbɛ a ka “kitabu” kɔnɔ. O kitabu be weele fana ko “ɲɛnamaya kitabu.” Jehova b’a fɛ ka ɲɛnamaya banbali di minw bɛɛ ma, olu tɔgɔ sɛbɛnin b’o kitabu kɔnɔ.—Mal. 3:16; Yir. 20:15, ABM.

5. Lɔgɔkun damanin ka kɔn Hakilijigi lajɛn ɲɛ, cogo juman na an be se k’an yɛrɛ “sɛgɛsɛgɛ k’a filɛ” n’an limaniyanin lo?

⁵ Lɔgɔkun damanin ka kɔn Hakilijigi lajɛn ɲɛ, an be se ka wagati ta ka delili kɛ. An be se fana ka miiri koɲuman k’a filɛ n’an be jɛnɲɔgɔnya ɲuman kɛra ni Jehova ye (2 Korɛntikaw 13:5 kalan). Pol y’a fɔ kerecɛnw ye ko: ‘Aw k’aw yɛrɛ sɛgɛsɛgɛ k’a filɛ yala n’aw limaniyanin lo.’ An be se k’o kɛ cogo di? An be se k’an yɛrɛ ɲininga ko: “Yala n’ lanin b’a la sɔbɛ la ko Jehova ye ɔriganisasiyɔn min sugandi walisa k’a sago kɛ, ne b’o lo kɔnɔ wa? Yala n’ be n’ seko kɛra walisa ka n’ seen don bɛrɛbɛrɛ Masaya waajuli baara la wa? N’ ka kɛwalew b’a yira ko n’ lanin b’a la tiɲɛn na ko an be laban loonw na wa? N’ lanin b’a la ko yanni dɔɔni Ala bena daan sigi Sutana ka kuntigiya la wa? Yala n’ lanin be Jehova ni Yezu la sisan i ko n’ y’a daminɛ ka baara kɛ Jehova ye tuma min na wa?” (Mat. 24:14; 2 Tim. 3:1; Eburuw 3:14). N’an be miiri o ɲiningaliw la, o bena an dɛmɛ ka to k’an yɛrɛ sɛgɛsɛgɛ k’a filɛ n’an limaniyanin lo kosɔbɛ.

6. a) An be se ka ɲɛnamaya banbali sɔrɔ cogo di? b) Diinan mɔgɔkɔrɔ dɔ b’a yɛrɛ labɛn Hakilijigi lajɛn kama cogo di? Ele be se k’a ladegi cogo di?

⁶ Barokun minw b’a ɲɛfɔ fɛɛn min kama Hakilijigi lajɛn kɔrɔtanin lo, an be se k’u kalan ani ka miiri u kan (Zan 3:16; 17:3 kalan). N’an b’a fɛ ka ɲɛnamaya banbali sɔrɔ, an ka ɲi ka Jehova lɔn ani ka limaniya a Dencɛ Yezu Krista la. Walisa k’i yɛrɛ labɛn Hakilijigi lajɛn kama ani k’i magwɛrɛ Jehova ni Yezu la, i be se ka kɔn ka barokun dɔw sugandi ani k’u sɛgɛsɛgɛ. Balimacɛ dɔ ye diinan mɔgɔkɔrɔ ye kabi wagatijan, ale b’o lo kɛ. Kabi saan caaman, Kɔrɔsili Sangaso ka barokun minw be kuma Hakilijigi lajɛn ani Jehova ni Yezu ka kanuya koo la, a b’olu mara. Lɔgɔkun damanin ka kɔn Hakilijigi lajɛn ɲɛ, a b’o barokunw kalan tugun. A be miiri fana Hakilijigi lajɛn nafa koo la. Tuma dɔw la, a be barokun kelen wala fila fara a ka barokunw kan. Bibulu kalangwɛ min labɛnna Hakilijigi lajɛn kama, a b’o fana kalan ani ka miiri a kan. A y’a fɔ ko n’a b’o koow bɛɛ kɛ, a be fɛɛn kuraw  faamu saan o saan. Min yɛrɛ kɔrɔtanin lo, o ye ko dɔ be fara a ka kanuya kan Jehova ni Yezu koo la. N’i fana b’o kɛ, i bena Jehova ni Yezu kanu kosɔbɛ ani k’u waleɲuman lɔn. O la, i bena nafa sɔrɔ bɛrɛbɛrɛ Hakilijigi lajɛn na.

7. a) Matigi ka surafana fɔlɔ la, Yezu ye delili kɛ mun lo koo la? b) Mun lo b’a yira ko Jehova ye Yezu ka delili jaabi?

⁷ Matigi ka surafana fɔlɔ la, Yezu ye delili kɛ ko a ka kalandenw bɛɛ ka kɛ kelen ye i ko ale n’a Faa ye kelen ye cogo min na (Zan 17:20, 21 kalan). Jehova y’a Dencɛ kanulen ka delili jaabi. Bi, mɔgɔ miliyɔn caaman lanin b’a la ko Jehova lo y’a Dencɛ ci. Hakilijigi lajɛn b’a yira ka tɛmɛ an ka lajɛnw bɛɛ kan ko Jehova Seerew kaan bɛnnin lo, siga t’o la. Hakilijigi lajɛn loon na, mɔgɔ miliyɔn caaman be ɲɔgɔn lajɛn duniɲa kuru bɛɛ kɔnɔ. U be bɔ jamana caaman na ani u ka siyaw tɛ kelen ye. Yɔrɔ dɔw la, mɔgɔ minw ka siya tɛ kelen ye, olu man teli ka lajɛn ɲɔgɔn fɛ walisa ka Ala bato. Mun na do? Sabu mɔgɔw b’a miiri k’o bɛnnin tɛ. Nka, a ka di Jehova ni Yezu ye k’a ye ko an kaan bɛnnin lo!

8. Jehova tun ye mun lo fɔ Ezekiyɛli ye?

⁸ An minw ye Jehova Seerew ye, a tɛ bari an na k’a ye ko an kaan bɛnnin lo o cogo la. Jehova tun kɔnna k’a fɔ kira Ezekiyɛli ye k’o bena kɛ. A y’a fɔ a ye ko “Zuda” ka lɔgɔ ni “Yusufu” ka lɔgɔ bena tugu ɲɔgɔn na ka kɛ lɔgɔ kelen ye (Ezekiyɛli 37:15-17 kalan). A tun fɔra saan 2016, zuwekalo ka Kɔrɔsili Sangaso (Kalanbagaw ka ɲiningaliw) kɔnɔ ko: “Jehova ye min fɔ kira Ezekiyɛli ye, o tun ye jigitugu kuma lo ye. A tun y’a daa di ko Israɛldenw kɔseginin layidu jamana kɔnɔ, u tun bena jɛn ka kɛ siya kelen ye. O kiraya kuma b’a yira fana ko laban loonw na, Ala sagokɛlaw kaan bena bɛn ka kɛ kelen ye.”

9. Saan o saan Hakilijigi lajɛn na, an b’a ye cogo di ko Ala sagokɛlaw kaan bɛnnin lo i ko kira Ezekiyɛli tun y’a fɔ cogo min na?

⁹ Kabi saan 1919, Jehova y’a daminɛ dɔɔni dɔɔni ka kerecɛn mɔlenw labɛn kokura ani k’u kaan bɛn k’u kɛ kelen ye. Olu ye “Zuda” ka lɔgɔ tagamasiɲɛ lo ye. O kɔ, mɔgɔ caaman wɛrɛ minw ka jigiya ye ka ɲɛnamaya kɛ dugukolo kan fɔɔ abada, u farala kerecɛn mɔlenw kan. Olu ye “Yusufu” ka lɔgɔ tagamasiɲɛ lo ye. Jehova tun y’a fɔ ko a bena o lɔgɔ fila tugu ɲɔgɔn na, “k’u kɛ lɔgɔ kelen ye.” (Ezek. 37:19). A y’a kɛ kerecɛn mɔlenw ani “saga dɔ wɛrɛw” jɛnna ka kɛ ‘sagakulu kelen ye.’ (Zan 10:16; Zak. 8:23). Bi, o jɛnkulu fila be baara kɛra ɲɔgɔn fɛ Masacɛ kelen ka kuntigiya kɔrɔ, o min ye Yezu Krista ye. Ezekiyɛli ka kiraya kuma kɔnɔ, Yezu weelela ko Ala ka “baarakɛla Dawuda.” (Ezek. 37:24, 25). Saan o saan, an be ɲɔgɔn lajɛn Hakilijigi lajɛn na. An b’a ye k’o jɛnkulu fila kaan bɛnnin lo i ko a tun fɔra Ezekiyɛli ka kitabu kɔnɔ cogo min na. Nka, an kelen kelen bɛɛ be se ka mun lo kɛ walisa hɛɛrɛ ka to Ala sagokɛlaw cɛ?

10. An be se ka mun lo kɛ walisa hɛɛrɛ ka to Ala sagokɛlaw cɛ?

¹⁰ Cogo fɔlɔ juman na an be se k’an jija walisa hɛɛrɛ ka to Ala sagokɛlaw cɛ? An k’an yɛrɛ majigi. Ka Yezu to dugukolo kan, a y’a fɔ a ka kalandenw ye ko u ka ɲi k’u yɛrɛ majigi (Mat. 23:12). N’an majiginin lo, an tɛna an yɛrɛ yira i ko duniɲamɔgɔw. Nka, an bena kolo an ɲɛminɛbagaw ye. A kɔrɔtanin lo an  k’o kɛ walisa hɛɛrɛ ka to kafo kɔnɔ. Min yɛrɛ kɔrɔtanin lo kosɔbɛ, o ye ko n’an majiginin lo, an bena an koo diya Jehova ye. Bibulu b’a fɔ ko “yɛrɛboɲala ka koo man di Ala ye. Nga a be nɛɛma kɛ mɔgɔmajigininw ye.”—1 Piyɛri 5:5.

11. Buru ni diwɛn ye fɛɛn minw tagamasiɲɛ ye, n’an be miiri u koo la, o b’an kaan bɛn cogo di?

¹¹ Cogo filanan juman na an be se k’an jija walisa hɛɛrɛ ka to Jehova sagokɛlaw cɛ? Buru ni diwɛn ye fɛɛn minw tagamasiɲɛ ye, an ka ɲi ka miiri u koo la ka kɔn Hakilijigi lajɛn ɲɛ ani o loon sufɛ yɛrɛ (1 Kor. 11:23-25). Buru funubali ye Yezu farisogo dafanin tagamasiɲɛ lo ye, a ye min saraka an kosɔn. Diwɛn wulen ye Yezu ka joli tagamasiɲɛ lo ye. An ka ɲi k’o faamu, nka o dama tɛ bɔri kɛ. An k’a to an hakili la ko Yezu ka kunmabɔsara ye kanuya wale fila ye minw ɲɔgɔn tɛ ye: Jehova y’a Dencɛ di k’a kɛ saraka ye ani Yezu sɔnna k’a niin di an kosɔn. N’an be miiri u ka kanuya koo la, o b’an lasun k’u kanu fana. An kelen kelen bɛɛ be ni kanuya min ye Jehova koo la, o lo b’an kaan bɛn ani k’an ka kelenya sabati.

12. Yezu ye ɲɛyirali min di masacɛ dɔ n’a ka jɔɔnw koo la, o b’a yira cogo di ko Jehova b’a fɛ an ka yafa tɔɔw ma?

¹² Cogo sabanan juman na an be se k’an jija walisa hɛɛrɛ ka to an ni ɲɔgɔn cɛ? An ka ɲi ka yafa ɲɔgɔn ma n’an dusu bɛɛ ye. N’an b’o kɛ, an b’a yira ko an be Jehova waleɲuman lɔn sabu a be yafa an ma Yezu ka kunmabɔsara barika la. Yezu ye ɲɛyirali min fɔ Matiyo 18:23-34 kɔnɔ, o kalan. O kɔ, i yɛrɛ ɲininga ko: “Yezu ye min fɔ, yala ne b’a fɛ k’o sira tagama wa? Yala n’ be muɲu n’ balimaw kɔrɔ ani k’u faamu wa? Mɔgɔ minw ye n’ hakɛ ta, yala n’ labɛnnin lo ka yafa u ma wa?” Tiɲɛn lo ko jurumu dɔw ka jugu ni dɔ wɛrɛw ye ani ko a ka gwɛlɛ an mɔgɔ dafabaliw fɛ ka jurumu dɔw yafa. O n’a ta bɛɛ, o ɲɛyirali b’a yira Jehova be min ɲini an fɛ (Matiyo 18:35 kalan). Yezu y’a yira ka gwɛ ko n’an banna ka yafa an balimaw ma k’a sɔrɔ kuun b’a la an ka yafa u ma, Jehova fana tɛna yafa an ma. An ka miiri o la  koɲuman! Walisa hɛɛrɛ ka to an ni ɲɔgɔn cɛ, an ka ɲi ka yafa ɲɔgɔn ma i ko Yezu y’a fɔ cogo min na.

13. N’an ye hɛɛrɛkɛlaw ye, o be kɛ sababu ye cogo di bɛɛn be kɛ an ni tɔɔw cɛ?

¹³ N’an be yafa tɔɔw ma, an b’a yira ko an ye hɛɛrɛkɛlaw ye. Ciden Pol y’a fɔ ko: “Bɛɛn min be sɔrɔ [hakili] Senuman fɛ, aw ka banba ka to o la hɛrɛ kosɔn.” An k’o ladili to an hakili la (Efɛz. 4:3). Yezu ka saya Hakilijigi wagati la ani o loon suu yɛrɛ la, i be tɔɔw minɛ cogo min na, miiri o la. I yɛrɛ ɲininga ko: “Yala a lɔnnin be ko n’ tɛ dimi mara n’ kɔnɔ wa? Yala bɛɛ b’a lɔn ko n’ be n’ jija walisa hɛɛrɛ ni bɛɛn ka kɛ ne ni tɔɔw cɛ wa?” O ɲiningaliw kɔrɔtanin lo kosɔbɛ ani an ka ɲi ka miiri u la.

14. An b’a yira cogo di ko an be “ɲɔgɔn dɛmɛdɛmɛ kanuya la”?

¹⁴ Cogo naaninan juman na an be se k’an jija walisa hɛɛrɛ ka to an ni ɲɔgɔn cɛ? An ka ɲi ka tɔɔw kanu i ko Jehova (1 Zan 4:8). An t’a fɛ k’a fɔ an kerecɛnɲɔgɔnw koo la abada ko: “N’a sɔrɔ n’ ka ɲi ka n’ balimaw kanu nka, waajibi tɛ u koo ka diya n’ ye.” O miiriya bɛnnin tɛ ni Pol ka ladiliw ye. A ko an ka “ɲɔgɔn dɛmɛdɛmɛ kanuya la.” (Efɛz. 4:2). A m’a fɔ ko an ka “ɲɔgɔn dɛmɛdɛmɛ” dɔrɔn dɛ! Nka, a ko an k’o kɛ “kanuya la.” O koo fila tɛ kelen ye. Mɔgɔ sifa bɛɛ b’an ka kafow kɔnɔ ani Jehova sababu lo fɛ u be tiɲɛn sira kan (Zan 6:44). Ni Jehova b’u kanu, kuun b’o la. Mun na an b’a fɔ ko u man kan n’an ka kanuya ye? An ka ɲi ka sɔn k’u kanu i ko Jehova b’a fɛ an k’a kɛ cogo min na.—1 Zan 4:20, 21.

15. Loon dɔ an bena Hakilijigi lajɛn kɛ ani o bena kɛ a laban. An b’o lɔn cogo di?

¹⁵ Loon dɔ an bena Hakilijigi lajɛn kɛ ani o bena kɛ a laban ye. An b’o lɔn cogo di? Ciden Pol ye lɛtɛrɛ sɛbɛ kerecɛn mɔlenw ma ko n’u b’u hakili jigi Yezu ka saya koo la saan o saan, u “be Matigi ka saya le koo fɔ, fɔɔ a ka kɔsegi ka na.” (1 Kor. 11:26). Yezu ye kiraya kuma dɔ fɔ ka ɲɛsin laban loonw ma. O kiraya kuma kɔnɔ, a kumana fana a “kɔsegi” tuma koo la. Yezu y’a fɔ tɔɔrɔba nata koo la ko: “Mɔgɔ Dencɛ taamasiɲɛ bena bɔ sankolo la ka ye dugukolo kan. Mɔgɔw bɛɛ bena kasi kosɔbɛ, u bena Mɔgɔ Dencɛ natɔ ye sankaba kan ni sebagaya ni nɔɔrɔ ye. [Yezu] ben’a ka mɛlɛkɛw ci ni buru fiyɛta belebele ye. A ye mɔgɔ minw woloma k’u kɛ a taw ye, u bena taga diɲɛ faan bɛɛ la k’olu lajɛn.” (Mat. 24:29-31). Yezu ye “mɔgɔ minw woloma,” a bena u “lajɛn.” O bena kɛ tuma min na kerecɛn mɔlen minw bele be dugukolo kan, olu bena u ka sara sɔrɔ sankolo la. O bena kɛ tɔɔrɔba daminɛnin kɔ, ka kɔn Arimagedɔn kɛlɛ ɲɛ. O kɛlɛ la, Yezu ni mɔgɔ 144 000 bena dugukolo ka masacɛw kɛlɛ ani u bena see sɔrɔ u kan (Yir. 17:12-14). An bena Hakilijigi lajɛn min kɛ sanni Yezu ka “kɔsegi” ka na kerecɛn mɔlenw lajɛn sankolo la, o bena kɛ a laban ye.

16. Mun na i b’a fɛ ka banba ka taga ɲinan ka Hakilijigi lajɛn na?

¹⁶ Banba ka na Hakilijigi lajɛn na min bena kɛ saan 2018, marisikalo tile 31nan na. Jehova deli fana a k’i dɛmɛ i k’i seko kɛ walisa hɛɛrɛ ka to a sagokɛlaw cɛ (Zaburuw 133:1 kalan). A to i hakili la ko loon dɔ, an bena Hakilijigi lajɛn kɛ ani o bena kɛ a laban ye. Nka sanni o cɛ, an k’an seko bɛɛ kɛ ka taga Hakilijigi lajɛn na. Bɛɛn min b’an ni ɲɔgɔn cɛ o lajɛnw na, an k’o jati fɛɛn nafamanba ye.