SYLVIANA be ni saan 25 ɲɔgɔn ye ani a ye piyɔniye ye. A y’a fɔ ko: “N’ teri minw tagara dɛmɛ don yɔrɔ minw na piyɔniyew man ca, ni n’ y’u ka lakalitaw mɛn, n’ fana b’a fɛ ka ninsɔndiya sɔrɔ o baara la. Nka, n’ tun be siranna ko n’ tɛna se ka taga dɛmɛ don jamana wɛrɛ la.”

Yala i be ni Sylviana ka miiriya ɲɔgɔn ye wa? Yala i fana b’a fɛ ka taga dɛmɛ don yɔrɔ minw na waajulikɛlaw man ca wa? I b’i yɛrɛ ɲiningara n’i bena se k’o laɲinita dafa loon dɔ wa? N’o lo, kana i fari faga! Gwɛlɛya dɔw tun be balima waa caaman bali ka taga dɛmɛ don yɔrɔ wɛrɛw la. U ye see sɔrɔ u kan Jehova ka dɛmɛ sababu fɛ. Walisa k’a lɔn Jehova y’u dɔw dɛmɛ cogo min na, an bena kuma Madagasikari koo la. Madagasikari lo ye guun naaninan ye min ka bon ni guun tɔɔw bɛɛ ye.

Madagasikari jamana na, mɔgɔ caaman be bonya la Bibulu kan ani u be sɔn kibaro diiman ma. Saan tan tɛmɛninw na, weleweledalaw ani piyɔniye 70 ni kɔ bɔra jamana 11 * ɲɔgɔn na ka taga waajuli kɛ yen. U tun kisɛyanin lo kosɔbɛ. O jamana kɔnɔ, balima caaman sɔnna ka taga dugu wɛrɛw la walisa ka Masaya kibaro diiman jɛnsɛn o guun kan. An ka kuma u dɔw koo la.

Louis n’a muso Perrine be ni saan 30 ni kɔ ye ani u bɔra Faransi ka taga sigi Madagasikari. Kabi saan caaman, u tun b’a fɛ ka taga jamana wɛrɛ la walisa ka dɛmɛ don waajuli baara la. Nka, Perrine tun be sigasigara. A y’a fɔ ko: “N’ tɛ yɔrɔ min lɔn, n’ tun be siran ka taga yen. N’ tun bena taga k’an ka denbaya, kafo ani an ka boon to yen. N’ delinankow ani n’ tun delila yɔrɔ minw na, n’ tun bena u bɛɛ to yen fana. O tun be hami bila n’ na. Tiɲɛn na, n’ ka hami tun ka bon ka tɛmɛ gwɛlɛyaw bɛɛ kan.” Saan 2012, Perrine y’a jaa gwɛlɛya ani ale ni Louis yɛlɛmana Madagasikari. A be mun lo miiri o yɛlɛmani koo la? A ko: “Ni n’ be miiri o la, n’ be se k’a fɔ ko k’a ye Jehova y’an dɛmɛ cogo min na, o y’an ka limaniya sabati.” Louis y’a fɔ ko: “Miiri  k’a filɛ, an ye Krista saya Hakilijigi lajɛn fɔlɔ min kɛ, an ka Bibulu kalanden 10 lo nana!”

Mun lo ye jagwɛlɛya di u ma ani u tora Madagasikari gwɛlɛya tuma na? U ye Jehova deli kosɔbɛ ko a ka see d’u ma ka muɲuli kɛ (Filip. 4:13). Louis ko: “An y’a ye ko Jehova y’an ka deliliw jaabi ani k’a ka ‘hɛɛrɛ’ di an ma. O kama, an tun be ninsɔndiya min sɔrɔ an ka waajuli baara la, an tun be sinsin o lo kan. Ka fara o kan, an teriw tun be e-mail ni lɛtɛrɛw ci an ma walisa k’an jija an kana an fari faga.”—Filip. 4:6, 7; 2 Kor. 4:7.

Jehova ye Louis ni Perrine duga u ka muɲuli kosɔn. Louis ko: “Saan 2014, ɔkutɔburukalo la, an tagara kerecɛn furuninw ka Bibuluko lakɔli * kɛ Faransi. O lakɔli tun ye Jehova ka nilifɛn lo ye. An tɛna ɲinɛ o kɔ abada!” U ka diplomu sɔrɔnin kɔ, u y’u ci ka taga Madagasikari tugun. U ninsɔndiyara yɛrɛ le!

Didier n’a muso Nadine be bɔ Faransi. Saan 2010, u yɛlɛmana Madagasikari. U tun be ni saan 50 ni kɔ ye o tuma na. Didier y’a fɔ ko: “An ye piyɔniye baara kɛ, tuma min na an tun ye kanbele ni sunguru ye. O kɔ, an ye deen saba lamɔ. Tuma min na u kɛra balikuw ye, an tun be miirila ka taga waajuli kɛ jamana wɛrɛ la.” Nadine ko: “K’a miiri ko an ka ɲi ka taga k’an deenw to yen, o y’a to ne tun be sigasigara. Nka, an deenw y’a fɔ an ye ko: ‘N’aw tagara dɛmɛ don jamana wɛrɛ la, an dusu bena diya aw kɔrɔ!’ U ka kumaw y’an jija ani an yɛlɛmana Madagasikari. Hali n’an yɔrɔ ka jan an deenw na sisan, an dusu ka di sabu an be se ka kuma n’u ye tuma o tuma.”

A tun man nɔgɔ Didier ni Nadine fɛ ka Malagasikan degi. Nadine y’a fɔ ni yɛlɛmisɛn ye ko: “An tun tɛ ni saan 20 ye tugun.” Nka, u sera k’o kaan degi cogo di? U senin, u tun be to ka taga Faransɛkan kafo kɔnɔ. Tuma min na u tun labɛnnin lo ka Malagasikan degi, u yɛlɛmana kafo dɔ kɔnɔ o kaan be fɔ yɔrɔ min na. Nadine ko: “An be mɔgɔ caaman minw kunbɛn waajuli la, bibulukalan ka di u ye kosɔbɛ. Tuma caaman na u b’an fo sabu an nana bɔ u ye. A daminɛ na, n’ tun b’a miiri ko n’ be sikora le. A ka di n’ ye kosɔbɛ ka kɛ piyɔniye ye o jamana na. Ni n’ wulila sɔgɔma, n’ be miiri ko: ‘N’ bena taga waajuli kɛ bi, o ye koo ɲuman yɛrɛ lo ye!’ ”

Tuma min na Didier y’a daminɛ ka Malagasikan degi, n’a miirila o la, a be yɛlɛmisɛnw kɛ. A ko: “N’ tun be kafo ka lajɛn dɔ ɲɛminɛna. Nka, n’ tun tɛ balimaw ka jaabili si faamu. N’ tun be se ka min dɔrɔn fɔ, o ye ko: ‘I ni ce.’ N’ ye balimamuso dɔ fo a ka lakalita la ani mɔgɔ minw tun siginin b’a kɔfɛ, olu y’a daminɛ k’u kuun yuguyugu walisa k’a yira n’ na ko a ka jaabili man ɲi. N’ sinna ka balimacɛ wɛrɛ weele. N’ kɔni b’a miiri ko ale ye jaabili ɲuman lo di.”

Saan 2005 ka lajɛnba dɔ la, Thierry n’a muso Nadia ye dramu dɔ filɛ min kuun ko: “Tugu laɲinitaw kɔ minw be bonya la Ala kan.” O dramu tun be kuma Timote koo la ani a y’u dusu sɔrɔ kosɔbɛ. O kosɔn, u tun b’a fɛ n’u dusu bɛɛ ye ka taga dɛmɛ don yɔrɔ min na waajulikɛlaw man ca. Thierry ko: “Dramu bannin kɔ, tuma min na an tun be tɛgɛrɛ fɔra, n’ jɛngɛna ka n’ muso ɲininga ko: ‘An bena taga min do?’ N’ muso ko ale fana tun be miirila o lo la.” Dɔɔni o kɔ, u ye labɛnw kɛ walisa k’u ka laɲinita dafa. Nadia ko: “An ye dɔ bɔ an ka minanw na dɔɔni dɔɔni fɔɔ a tora valizi 4 dɔrɔn!”

U sera Madagasikari saan 2006 ani kabi u sera yen, a ka di u ye ka waajuli kɛ o yɔrɔ la. Nadia ko: “An ye mɔgɔ minw kunbɛn, u y’an ninsɔndiya.”

Saan wɔɔrɔ o kɔ, Thierry n’a muso Nadia ye gwɛlɛya dɔ sɔrɔ. Nadia bamuso Marie-Madeleine tun be Faransi. A benna k’a bolo kari ani k’a kuun mandimi. Thierry ni Nadia ye Marie-Madeleine ka dɔgɔtɔrɔ ɲininga. O kɔ, u y’a ɲini u bamuso fɛ ko a ka na to n’u ye Madagasikari. A tun be ni saan 80 ye o tuma na. Nka, a ninsɔndiyara ka taga. Ka ɲɛnamaya kɛ jamana wɛrɛ la, a be mun lo miiri o koo la? A ko: “Tuma dɔw la, a man nɔgɔ ka deli koo dɔw la. Nka, hali ni n’ tɛ se ka koo dɔw kɛ, n’ be se ka koo caaman kɛ kafo kɔnɔ. Min yɛrɛ be n’ ninsɔndiya, o ye ko o b’a to n’ deenw be se ka to kudayi cidenya baara la yan.”

Balimacɛ Riana be ni saan 20 ɲɔgɔn ye ani a lamɔna Alaotra Mangoro mara la. O mara be Madagasikari kɔrɔn fan fɛ ani sanji be ben yen kosɔbɛ. A ye baara kɛ lakɔli la ka ɲɛ ani a tun b’a fɛ ka kalanbabaw kɛ. Nka, bibulukalan daminɛnin kɔ, a y’a latigɛ ko a tɛna o kɛ tugun. A ko: “N’ banbara ka lise ban joona ani n’ ye n’ daa di Jehova ma ko: ‘Ni n’ ye n’ ka ɛkizamɛn sɔrɔ, n’ bena kɛ piyɔniye ye.’ ” A ka diplomu sɔrɔnin kɔ, a y’a ka dajuru dafa. A yɛlɛmana balimacɛ dɔ fɛ min ye piyɔniye ye. O kɔ, a ye baara ɲini min be kɛ tuma kelen kelen ani a kɛra piyɔniye ye. A ko: “N’ ma deli k’o desizɔn ɲuman ɲɔgɔn ta ka ye.”

Nka, Riana somɔgɔw m’a faamu fɛɛn min kama a banna ka kalanbabaw kɛ walisa ka baara sɔrɔ min sara ka ca. A ko: “N’ facɛ, n’ facɛ dɔgɔcɛ ani n’ mamamuso ye n’ jija ko n’ ka kalanbabaw kɛ. Nka, n’ tun t’a fɛ ka piyɔniye baara dabila koo si kama.” Dɔɔni o kɔ, Riana y’a ɲini ka taga yɔrɔ min na waajulikɛlaw man ca. Mun na do? A ko: “Soonw donna an fɛ, k’an ka fɛɛn caaman soɲɛ. O y’a to n’ miirila Yezu ka kumaw na. A ko an ka nafolo lajɛn sankolo la. O kama, n’ y’a latigɛ ka n’ jija ka nafolow lajɛn Alako ta fan fɛ.” (Mat. 6:19, 20). A yɛlɛmana Madagasikari worodugu fan fɛ. O yɔrɔ janin lo ani kilomɛtɛrɛ 1 300 lo b’o yɔrɔ n’a sigiyɔrɔ kɔrɔ cɛ. Tandroyikan lo be fɔ yen. Mun na a tagara yen do?

Kalo kelen ka kɔn o soɲɛni ɲɛ, Riana tun ye bibulukalan daminɛ ni Antandroyi mɔgɔ fila ye ani a ye kumaden dɔw degi o kaan na. O kama, a miirila o siyamɔgɔw koo la minw ma deli ka kibaro diiman mɛn. A ko: “N’ ye Jehova deli a ka n’ dɛmɛ walisa n’ ka yɛlɛma mara dɔ la u ka kaan be fɔ yɔrɔ min na.”

Riana yɛlɛmana, nka a tun tɛ baara sɔrɔla. Cɛɛ dɔ y’a fɔ a ye ko: “Mun na i nana yan? Mɔgɔw be taga i bɔyɔrɔ la walisa ka baara ɲini!” Lɔgɔkun fila o kɔ, Riana tagara tile saba lajɛnba dɔ la ani wari bɛrɛ tun t’a kun. A tun b’a yɛrɛ ɲiningara a bena min kɛ. Lajɛnba tile sabanan na, balimacɛ dɔ ye fɛɛn dɔ don Riana pɔsi kɔnɔ. Wari tun lo ani a tun ka ca. O y’a dɛmɛ a kɔsegira Antandroyi mara la ani a y’a daminɛ ka yawu feere. Riana ko: “Jehova ye n’ dɛmɛ wagati bɛnnin na. Minw tun tɛ Jehova lɔn, o kɛra sababu ye n’ tora k’olu dɛmɛ!” Baara tun ka ca kafo kɔnɔ fana. Riana y’a fɔ tugun ko: “A tun ɲinina n’ fɛ n’ ka forobakalan kɛ lɔgɔkun fila fila bɛɛ. Jehova tun be tɛmɛna a ka ɔriganisasiyɔn fɛ ka fɔrɔmasɔn di n’ ma.” Antandroyika minw b’a fɛ ka dɔ lɔn Jehova koo la, Riana bele be Masaya kibaro diiman fɔra olu ye.

Jehova b’an hakili sigi ko “mɔgɔ o mɔgɔ ko a be duba [ɲini] jamana kɔnɔ, . . . Tiɲɛtigi Ala” bena o tigi duga (Ezayi 65:16). N’an b’an jija ka see sɔrɔ gwɛlɛyaw kan ani ka dɔ fara an ka waajuli baara kan, Jehova b’an duga. An ka Sylviana ka koo lajɛ min kofɔra daminɛ na. A tun be siranna ko a tɛna se ka taga dɛmɛ don yɔrɔ min na waajulikɛlaw man ca. Mun na a tun b’o miiri? A ko: “N’ kinibolo seen ka jan ni n’ numanbolo ta ye santimɛtɛrɛ 9. O kama, n’ seen kelen man ɲi ani n’ be sɛgɛn joona.”

O n’a ta bɛɛ, saan 2014, Sylviana farala piyɔniye sunguru dɔ kan min tɔgɔ ko Sylvie Ann ani u tagara dugu dennin dɔ la. Kilomɛtɛrɛ 85 lo b’u ka soo n’o yɔrɔ cɛ. Gwɛlɛyaw bɛɛ n’a ta, Sylviana sera k’a ka laɲinita dafa. A ye dugaba sɔrɔ o la! A ko: “Saan kelen kɛnin kɔ o yɔrɔ la, n’ tun be bibulukalan kɛra ni muso denbatigi dɔ ye min tɔgɔ ko Doratine, ale batizera kafokulu ka lajɛnba dɔ la.”

Dɔw tagara dɛmɛ don jamana wɛrɛ la. Olu ka ɲɛyirali y’a yira ko gwɛlɛya minw be se k’an bali ka dɔ fara an ka waajuli baara kan, an ka ɲi k’a ɲini ka see sɔrɔ u kan. O la, an bena a ye ko Jehova ye min fɔ a sagokɛlaw ye, o ye tiɲɛn ye. A ko: ‘Ne bena barika don aw la, ne bena aw dɛmɛ.’ (Ezayi 41:10). N’an ye dɔ fara an ka waajuli baara kan, an be jɛnɲɔgɔnya min kɛra ni Jehova ye, o bena sabati. Ka fara o kan, an k’an yɛrɛ di ka taga dɛmɛ don yɔrɔ dɔ la an ka jamana kɔnɔ wala jamana wɛrɛ la. O bena an dɛmɛ ka se ka baara dɔw kɛ duniɲa kura kɔnɔ. I ko Didier y’a fɔ cogo min na, “n’an be taga dɛmɛ don yɔrɔ minw na waajulikɛlaw man ca, o ye fɔrɔmasɔn ɲuman lo ye siniɲasigi kama!” N’a sɔrɔ waajulikɛla caaman wɛrɛw b’a fɛ k’o fɔrɔmasɔn sɔrɔ!