ƆNHƆN, u tun b’o kɛ tuma dɔw la. An ka ɲɛyirali dɔ lajɛ. Deteronɔmu 24:14, 15 b’a fɔ ko: “Kana i ka baaraden dɛsɛbagatɔ fantan tɔɲɔ, i balima lo wo, walima lonan wo, min siginin be aw ka duguw dɔ la . . . N’o tɛ, a bena i jalaki Masaba ɲana, o bena kɛ hakɛ ye i fɛ.”

Bɔgɔdaga cinin dɔ yera Asidɔdi gɛrɛfɛ ani delilikan dɔ tun sɛbɛnin b’a kan. O sɛbɛri tun kɛra saan kɛmɛkulu 7nan na K.T.Ɲ. N’a sɔrɔ sɛnɛkɛla dɔ lo y’a kɛ u y’o sɛbɛ k’a cii gofɛrɛnɛrɛ ma. A tun fɔra o sɛnɛkɛla ye ko a ka suman hakɛ min lajɛn, n’a sɔrɔ a ma se k’o kɛ. A tun sɛbɛra o bɔgɔdaga kan ko: “I ka baaraden [sɛnɛkɛla] ye suman don bondo kɔnɔ. Tile damanin o kɔ, Hoshayahu, Shobay dencɛ nana i ka baaraden ka fani bɔsi. . . . N’ ka baarakɛɲɔgɔn minw bɛɛ tun be suman tigɛra ni n’ ye, tile gwanniman jukɔrɔ, olu be se ka seereya kɛ . . . ko n’ ye min fɔ, o ye tiɲɛn ye. N’ ma koo jugu si kɛ. . . . Ni gofɛrɛnɛrɛ y’a ye ko waajibi tɛ a k’a fɔ Hoshayahu ye a ka n’ ka fani kɔsegi n’ ma, a ka sabari k’a deli n’ ye! I man ɲi ka je n’u y’i ka baaraden ka fani bɔsi.”

Lɔnnikɛla Simon Schama y’a fɔ k’o delilikan “b’a yira an na ko sɛnɛkɛla dusukasinin tun b’a fɛ u k’a ka fani kɔsegi a ma. Nka o dɔrɔn tɛ. O b’a yira fana k’o sɛnɛkɛla tun be Bibulu ka sariyaw lɔn sanko minw be sɔrɔ Levitiki ani Deteronɔmu ka kitabuw kɔnɔ. A fɔra yen ko an man kan ka fantanw tɔɲɔ.”