1-3. Koo jumanw lo be se k’a to an be kasi?

YALA i mɛnna ka kasi wa? Tuma dɔw la, an be kasi ninsɔndiya bolo. Nka tuma caaman na, dusukasi lo b’an bila kasi la. Ɲɛyirali fɛ, an be kasi n’an ka mɔgɔ kanulen dɔ sara. Balimamuso Lorilei be Etazini ani a y’a sɛbɛ ko: “Tuma dɔw la, n’ dusu be kasi n’ denmuso saya kosɔn fɔɔ a be komi foyi tɛ se ka n’ dusu saalo. N’ b’a miiri ko n’ tɛna se k’o koo muɲu.” *

² Koo wɛrɛw be se k’a to an be kasi. Balimamuso Hiromi be Zapɔn ani piyɔniye lo. A ko: “Tuma dɔw la, n’ fari be faga sabu n’ be mɔgɔ minw waaju u t’u mako don Bibulu kɔnɔkumaw na. Wagati dɔw la, n’ kasitɔ b’a ɲini Jehova fɛ a ka n’ dɛmɛ walisa n’ ka mɔgɔ dɔ sɔrɔ min be tiɲɛn diinan ɲinina.”

³ Yala tuma dɔw la, i be n’o balimamusow dusukunnakow ɲɔgɔn ye wa? An caaman be n’o dusukunnakow ɲɔgɔn ye (1 Piyɛri 5:9). An b’a fɛ ka Jehova “tanu ni nisɔndiya ye.” Nka tuma dɔw la, an be kasi sabu an ka mɔgɔ kanulen dɔ sara, wala an fari fagara. A be se ka kɛ fana ko gwɛlɛya dɔ b’an kan min b’a to a ka gwɛlɛ an ma ka kantigiya kɛ Ala ye (Zab. 6:7; 100:2). An be se ka mun lo kɛ n’o gwɛlɛyaw ɲɔgɔn b’an kan?

4. An bena mun lo lajɛ barokun nin na?

⁴ Yezu ka ɲɛyirali b’an dɛmɛ ka koo caaman faamu. Tuma dɔw la, koo dɔw ye ale fana sɔrɔ minw y’a to a “kasira” (Zan 11:35; Luka 19:41; 22:44; Eburuw 5:7). An k’o koow lajɛ ani k’a filɛ an be se ka kalan minw sɔrɔ u la.  An bena a ye fana an be se ka min kɛ ni koo dɔ y’an sɔrɔ min b’an bila kasi la.

5. Ka kɛɲɛ ni Zan 11:32-36 ye, an be kalan juman lo sɔrɔ Yezu fɛ?

⁵ Saan 32 nɛnɛ wagati la, Yezu teri sɔbɛ Lazari banana ani a sara (Zan 11:3, 14). Lazari tun be ni balimamuso fila ye, Mariyamu ani Marita. U saba bɛɛ koo tun ka di Yezu ye kosɔbɛ. O musow dusu tun kasinin lo kojugu u balimacɛ saya kosɔn. Lazari sanin kɔ, Yezu tagara Mariyamu ni Marita fɛ Betani dugu la. Tuma min na Marita y’a mɛn ko Yezu be nana, a teliyara ka taga a kunbɛn. Miiri k’a filɛ, a dusu tun kasinin lo cogo min na tuma min na a ko: “Matigi, ni e tun be yan, ne balimacɛ tun tena sa.” (Zan 11:21). Dɔɔni o kɔ, Yezu ye Mariyamu ni mɔgɔ wɛrɛw kasitɔ ye minkɛ, a “kasira.”—Zan 11:32-36 kalan.

6. Mun na Yezu kasira do?

⁶ Mun na Yezu kasira do? Gafe Étude perspicace des Écritures b’a fɔ ko: “Yezu tericɛ Lazari tun sara ani Lazari balimamusow tun be kasira dusukasi bolo. O Koow lo y’a to Yezu ‘kasira.’ ” * Lazari ka bana y’a sɛgɛn cogo min na, n’a sɔrɔ Yezu miirila o la. N’a sɔrɔ a miirila fana k’a filɛ Lazari dusukunnakow tun ye min ye tuma min na a y’a faamu ko a ka bana tɛna kun a la. Mariyamu ni Marita dusu tun kasinin lo cogo min na u balimacɛ saya kosɔn, siga t’a la o fana lo y’a to Yezu kasira. N’i teri sɔbɛ wala i somɔgɔ dɔ sara, siga t’a la i be Yezu, Mariyamu ani Marita dusukunnakow faamu. An ka miiriya jɔnjɔn saba lajɛ, o koo b’an dɛmɛ ka minw faamu.

7. Yezu ye kasi min kɛ tuma min na Lazari sara, o be mun lo yira an na Jehova koo la?

⁷Jehova b’i dusukunnakow faamu. Yezu ye a Faa “jaa tigitigi yɛrɛ lo” ye  (Eburuw 1:3). Tuma min na Yezu kasira, a y’a yira a Faa dusukunnako tun ye min ye (Zan 14:9). N’i ka mɔgɔ kanulen dɔ sara, la a la ko Jehova b’i ka dusukasi kala ma ani ale fana dusu kasinin lo kosɔbɛ o kosɔn. A b’a fɛ k’i dusu saalo.—Zab. 34:19; 147:3.

8. An ka mɔgɔ kanulen minw sara, mun na an be se ka la a la ko Yezu bena u lakunu?

⁸I ka mɔgɔ kanulen minw sara, Yezu b’a fɛ k’u lakunu. Dɔɔni sanni Yezu ka kasi, a ye Marita hakili sigi ko: “I balimacɛ bena kunun.” Marita lara Yezu la (Zan 11:23-27). Marita tun ye Jehova sagokɛla kantigi dɔ ye. O kama, a tun b’a kala ma ko kira Eli ni Elize ye mɔgɔ dɔw suu kunu galen (1 Mas. 17:17-24; 2 Mas. 4:32-37). N’a sɔrɔ a tun y’a mɛn fana ko Yezu ye mɔgɔ sanin dɔw lakunu (Luka 7:11-15; 8:41, 42, 49-56). Ele fana be se ka la a la ko i ka mɔgɔ kanulen minw sara, i bena u ye tugun. Tuma min na Yezu tun be a teri dusukasininw dusu saalola, a kasira. O b’a yira ko a kɔrɔtɔnin lo ka suuw lakunu!

9. I ko Yezu, i be se ka mɔgɔ dusukasininw dɛmɛ cogo di? Ɲɛyirali dɔ fɔ.

⁹Mɔgɔ minw dusu kasinin lo, i be se k’u dɛmɛ. Yezu kasira ni Marita ani Mariyamu ye. Nka o dɔrɔn tɛ, a ye dususalo kumaw fɔ u ye fana. An be se k’o ɲɔgɔn kɛ dusukasibagatɔw ye. Dan ye diinan mɔgɔkɔrɔ ye ani a be Ɔsitarali jamana na. A ko: “N’ muso sanin kɔ, n’ mako tun be dɛmɛ na. Balimacɛ caaman n’u musow y’u yɛrɛ labila ka n’ lamɛn suu ni tile. U y’a to n’ ye n’ ka dusukasi yira ani ni n’ tun be kasira, o tun tɛ u niin degun. U ye n’ dɛmɛ cogo tigitigi dɔw la fana i n’a fɔ ka n’ ka mobili ko, ka n’ ka boliboliw kɛ ani ka gwa kɛ n’ ye fana. U tun b’o koow kɛ, n’a tun ka gwɛlɛ n’ ma k’u kɛ. Ani tuma caaman na, u tun be delili kɛ ni n’ ye. U y’a yira k’u ye teri sɔbɛw ye ani u kɛra ‘balimaw ye tɔɔrɔ wagati la.’ ”—Talenw 17:17, Bible senuma.

10. Min fɔra Luka 19:36-40 kɔnɔ, o lakali.

¹⁰ Yezu tagara Zeruzalɛmu saan 33, Nisankalo tile 9nan na. A surunyatɔ dugu la, jama y’a kunbɛn ani mɔgɔw tora k’u ka faniw la sira kan a ye k’a yira ko u sɔnna a ka kɛ u ka Masacɛ ye. Siga t’a la, o tun ye ninsɔndiya wagati lo ye (Luka 19:36-40 kalan). O lo kama min kɛra o kɔ, o barila a ka kalandenw na. “Yezu surunyana ka Zeruzalɛmu ye tuma min na, a kasira.” A ɲɛji jigitɔ, balawo min tun bena Zeruzalɛmukaw sɔrɔ yanni dɔɔni, a kumana o koo la.—Luka 19:41-44.

11. Mun na Yezu kasira Zeruzalɛmukaw koo la?

¹¹ Jama ye Yezu kunbɛn ni dusudiya ye. O bɛɛ n’a ta, Yezu dusu tiɲɛna sabu a tun b’a lɔn ko Yahutuw fanba tun tɛna sɔn Masaya kibaro ma. O kama, Zeruzalɛmu tun bena halaki ani Yahutu minw tun bena kisi o balawo la, olu tun bena minɛ ka taga jɔnya la (Luka 21:20-24). A fɔ man di, nka i ko Yezu tun kɔnna k’a fɔ cogo min na, mɔgɔw fanba banna a la. E ka mara la, mɔgɔw fanba be Masaya kibaro ta cogo di? N’a sɔrɔ a ka di mɔgɔ damanin dɔrɔn lo ye ka Bibulu ka tiɲɛnkalanw lamɛn. N’o lo, Yezu kasira mɔgɔw koo la minkɛ, e be se ka kalan jumanw lo sɔrɔ o la? An ka miiriya jɔnjɔn saba wɛrɛw lajɛ.

12. Yezu kasira Zeruzalɛmukaw koo la minkɛ, o b’an dɛmɛ ka mun lo faamu Jehova koo la?

 ¹²Jehova b’a janto mɔgɔw la. Jehova b’a janto mɔgɔw la kosɔbɛ cogo min na, Yezu ɲɛji b’an hakili jigi o la. “A t’a fɛ mɔgɔ si ka halaki, a b’a fɛ bɛɛ ka se ka nimisa ka faran a ka kojuguw la.” (2 Piyɛri 3:9). Bi, an b’a yira ko an b’an mɔgɔɲɔgɔnw kanu an kɛtɔ k’an seko bɛɛ kɛ walisa k’u dɛmɛ u ka Masaya kibaro diiman mɛn.—Mat. 22:39.

13-14. Yezu y’a yira cogo di ko a tun be hinɛ mɔgɔw la? An be se k’a ladegi cogo di?

¹³Yezu y’a jija kosɔbɛ waajuli baara la. A y’a yira ko a be mɔgɔw kanu a kɛtɔ ka tɛmɛ sababuw bɛɛ fɛ k’u kalan (Luka 19:47, 48). Mun lo tun be Yezu lasun k’o kɛ do? A tun be hinɛ u la. Tuma dɔw la, mɔgɔ caamanba tun b’a fɛ ka Yezu ka kalanw lamɛn “fɔɔ Yezu n’a ka kalandenw tun te se ka waati yɛrɛ sɔrɔ ka dumuni kɛ.” (Mariki 3:20). A tun labilanin lo ka mɔgɔw kalan hali sufɛ. Loon dɔ, o wagati lo tun bɛnnin be cɛɛ dɔ ma ani Yezu sɔnna o ma (Zan 3:1, 2). Yezu ye mɔgɔ minw waaju, u fanba ma kɛ a ka kalandenw ye. Nka, minw bɛɛ y’a lamɛn, a ye kibaro diiman fɔ u ye bɛrɛbɛrɛ. Bi fana, an b’a fɛ ka sababu di mɔgɔw bɛɛ ma u ka kibaro diiman mɛn (Kɛw. 10:42). Walisa ka se k’o kɛ, an ka ɲi ka yɛlɛmani don an ka waajuli kɛcogo la.

¹⁴Sɔn ka yɛlɛmani bɛnninw kɛ. N’an be waajuli kɛ tuma bɛɛ wagati kelen lo la, n’a sɔrɔ mɔgɔ minw b’a fɛ ka kibaro diiman lamɛn an tɛna olu sɔrɔ. Balimamuso Matilda ye piyɔniye ye ani a ko: “Ne ni n’ cɛɛ b’an jija ka taga bɔ mɔgɔw ye wagati wɛrɛw la. Sɔgɔma joona, an be waajuli kɛ jagokɛyɔrɔw la. Tile fɛ, tuma min na mɔgɔ caaman be siraw kan, an be waajuli kɛ ni wotorow ye. Wulafɛ, an be waajuli kɛ soo ni soo sabu an y’a kɔrɔsi k’o wagati lo la mɔgɔ caaman be sɔrɔ u ka soo.” Sanni an ka to ka waajuli kɛ an diyanye wagatiw dɔrɔn na, an ka ɲi ka sɔn ka yɛlɛmaniw kɛ. O la, an bena se ka waajuli kɛ wagati min na an ka teli ka mɔgɔw sɔrɔ. N’an b’o kɛ, an ka la a la k’o bena diya Jehova ye.

15. Ka kɛɲɛ ni Luka 22:39-44 ye, mun lo kɛra Yezu ka suu laban na?

¹⁵ Saan 33, Nisankalo tile 14nan loon sufɛ, Yezu tagara Zɛtisemane nankɔtu la. O yɔrɔ la, a y’a kɔnɔkow bɛɛ fɔ Jehova ye delili la (Luka 22:39-44 kalan). O wagati gwɛlɛ lo la, a ye Ala “dali kosɔbɛ ni mankanba ni ɲaji ye.” (Eburuw 5:7). Yezu ka suu laban na, a ye delili kɛ mun lo koo la do? A ye Jehova deli a ka barika don ale la walisa a ka to kantigiya la ani ka Jehova sago kɛ. Jehova y’a Dencɛ ka delili lamɛn. Hami min tun b’a Dencɛ kan, a y’o ye ani a ye mɛlɛkɛ dɔ ci a nana barika don a la.

16. Mun na Yezu kasira tuma min na a tun be delili kɛra Zɛtisemane nankɔtu la?

¹⁶ Tuma min na Yezu tun be delili kɛra Zɛtisemane nankɔtu la, a kasira. Siga t’a la, a y’o kɛ sabu a dusu tun kasinin lo k’a ye ko mɔgɔw bena ale jati Ala tɔgɔ tiɲɛbaga ye. A tun b’a lɔn fana ko a kɔrɔtanin lo kosɔbɛ a ka to kantigiya la ani k’a Faa tɔgɔ lafasa. Ni dusukasiko dɔ b’i kan min b’i ka kantigiya kɔrɔbɔra, i be kalan juman sɔrɔ Yezu kasiko la Zɛtisemane nankɔtu la? An ka miiriya jɔnjɔn saba wɛrɛw lajɛ.

17. Tuma min na Yezu ye Jehova deli kosɔbɛ, a y’a jaabi cogo min na, an be kalan juman lo sɔrɔ o la?

¹⁷Jehova b’i ka deliliw lamɛn. Yezu ye Jehova deli kosɔbɛ ani Jehova y’a lamɛn. Mun na do? Yezu hamiko fɔlɔ tun ye ka Faa tɔgɔ lafasa ani ka kantigiya kɛ a ye. N’an hamiko fɔlɔ ye ka Jehova tɔgɔ lafasa ani ka kantigiya kɛ a ye, n’an y’a deli ko a k’an dɛmɛ a bena an jaabi.—Zab. 145:18, 19.

18. Mun na an be se k’a fɔ ko Yezu ye teri ɲuman ye min b’an faamu?

¹⁸Yezu be i dusukunnakow faamu. Ni hami b’an kan, ani n’an be ni teri dɔ ye min b’an dusukunnakow faamu, o b’an ninsɔn diya yɛrɛ le, sanko n’o teri y’an ka gwɛlɛyaw ɲɔgɔn sɔrɔ ka ye. Yezu y’o teri ɲɔgɔn lo ye. N’an barika dɛsɛnin lo ani an mako be dɛmɛ na, Yezu b’o faamu sabu o ɲɔgɔn delila k’ale fana  sɔrɔ. A b’an ka dɛsɛyɔrɔw lɔn ani a bena dɔ kɛ dɔ ye walisa an mako be dɛmɛ min na, an k’o sɔrɔ wagati bɛnnin na (Eburuw 4:15, 16). Yezu sɔnna mɛlɛkɛ dɔ ka dɛmɛ ma Zɛtisemane nankɔtu la. O cogo kelen na, Jehova mana tɛmɛ an ka gafe, videwo, forobakalan, diinan mɔgɔkɔrɔw wala teri kolɔnbaga dɔ fɛ k’an dɛmɛ, an fana ka ɲi ka sɔn o ma.

19. Ni koo dɔ be an ka kantigiya kɔrɔbɔra, an be se ka fanga sɔrɔ cogo di? Ɲɛyirali dɔ fɔ.

¹⁹Jehova bena a ka “hɛrɛ” d’i ma. Jehova be barika don an na cogo di? N’an y’a deli, a ka “hɛrɛ min tɛmɛna mɔgɔw ka faamuyali ma,” a bena o di an ma (Filip. 4:6, 7). Jehova be hɛɛrɛ min di an ma, o b’an lafiya ani k’an hakili sigi. Balimamuso Luz ka koo b’o lo yira. A ko: “Tuma caaman na, n’ b’a miiri ko n’ be n’ kelen na. Tuma dɔw la, o b’a to n’ b’a miiri ko Jehova tɛ n’ kanu. N’o miiriyaw nana n’ kɔnɔ, n’ be sin ka Jehova deli. Delili be n’ dɛmɛ ka see sɔrɔ n’ ka miiriya juguw kan.” I ko o balimamuso ka koo b’a yira cogo min na, delili be se ka an dusukun lafiya.

20. An be kalan jumanw lo sɔrɔ Yezu ka kasiw la?

²⁰ Yezu ka kasiw b’an dɛmɛ ka koo nafaman dɔw faamu minw b’an dusu saalo yɛrɛ le! An teri minw ka mɔgɔ dɔ sara, an ka ɲi k’olu dusu saalo. Ani an ka la a la ko n’an ka mɔgɔ kanulen dɔ sara, Jehova ni Yezu bena an dɛmɛ. N’an be waajuli la, an ka ɲi ka hinɛ mɔgɔw la i ko Jehova ni Yezu be hinɛ cogo min na. An b’a lɔn fana ko Jehova n’a Dencɛ kanulen b’an dusukunnakow faamu. N’an barika dɛsɛnin lo, u b’o kala ma ani u b’an dɛmɛ ka muɲuli kɛ. O b’an dusu saalo kosɔbɛ! An ye kalan minw sɔrɔ, an ka to k’u sira tagama. An ka to k’o kɛ fɔɔ loon min na Jehova bena a ka layidu ɲuman nin dafa, o min ye ko a “bena [an] ɲaji bɛɛ cɛ”!—Yir. 21:4.