1-2. a) Wagati tigitigi juman lo la an ka teli ka miiri an ka mɔgɔ kanulen dɔ la min sara? b) Yezu ka suu laban na dugukolo kan, a ye mun lo sigi sen kan?

HALI n’an ka mɔgɔ kanulen dɔ sara a mɛɛnna, an bele be to ka miiri a koo la. A tigi saya sanyɛlɛma loon yɛrɛ lo la an be miiri a la kosɔbɛ.

² Saan o saan, an mɔgɔ miliyɔn caaman lo be lajɛn Yezu Krista ka saya sanyɛlɛma loon na sabu an b’a kanu kosɔbɛ (1 Piyɛri 1:8). Yezu y’a niin di ka kɛ kunmabɔsara ye walisa ka an kisi ka bɔ jurumu ni saya la. O la, an be lajɛn walisa k’an hakili jigi a koo la (Mat. 20:28). Tiɲɛn na, Yezu b’a fɛ a ka kalandenw k’u hakili jigi a ka saya koo la. A ye suu laban min kɛ dugukolo kan, a ye surafana kɛrɛnkɛrɛnnin dɔ sigi sen kan ani a ye cii di ko: “Aw ye to ka nin kɛ k’aw hakili to ne la.” *—Luka 22:19.

3. An bena mun lo lajɛ barokun nin na?

³ Minw be na Krista saya Hakilijigi lajɛn na, u damanin ka jigiya ye ka ɲɛnamaya kɛ sankolo la. Nka mɔgɔ miliyɔn caaman minw ka jigiya ye ka ɲɛnamaya kɛ dugukolo kan, olu fana be na. Barokun nin na, an bena a ye kuun minw kama o jɛnkulu fila mɔgɔw kɔrɔtɔnin lo ka taga Hakilijigi lajɛn na saan o saan. An bena a ye fana an be nafa min sɔrɔ n’an be taga o lajɛn na. An k’a daminɛ ka kuun damanin lajɛ minw kama kerecɛn mɔlenw be taga Hakilijigi lajɛn na.

4. Mun na kerecɛn mɔlenw be buru dumu ani ka diwɛn min Hakilijigi lajɛn na?

⁴ Saan o saan kerecɛn mɔlen minw be taga Hakilijigi lajɛn  na, u be o lajɛn buru dumu ani ka diwɛn min. Mun na a bɛnnin lo u ka o buru dumu ani k’o diwɛn min? Walisa k’o ɲiningali jaabi, an k’a filɛ min kɛra Yezu ka suu laban na dugukolo kan. Tɛmɛnkan seli dumuni kɛnin kɔ, Yezu ye fɛɛn dɔ sigi sen kan, min nana weele ko Matigi ka surafana. A ye buru ni diwɛn tilan tilan a ka ciden kantigi 11 ye ani a y’a fɔ u ye ko u k’a dumu ani k’a min. Yezu ye layidu fila kofɔ u ye: layidu kura ani Masaya layidu * (Luka 22:19, 20, 28-30). O layiduw ye sababu di cidenw ani mɔgɔ damanin wɛrɛw ma ka kɛ masaw ni sarakalasebagaw ye sankolo la (Yir. 5:10; 14:1). Kerecɛn mɔlen tɔɔw, * o layidu fila tara o minw ye fana, olu dɔrɔn lo be se ka buru dumu ani ka diwɛn min Hakilijigi lajɛn na.

5. Kerecɛn mɔlenw be mun lo to u hakili la ka ɲɛsin u ka jigiya koo ma?

⁵ Kerecɛn mɔlenw be taga Hakilijigi lajɛn na kuun wɛrɛ min kosɔn, o ye ko o lajɛn be sababu di u ma ka miiri u ka jigiya koo la. Jehova ye jigiya kabakoman di u ma, o min ye ka sabaliya ni tolibaliya sɔrɔ sankolo la. Ka fara o kan, Yezu Krista min suu kununa, u jigi b’a la ka masaya kɛ n’ale ani mɔgɔ 144 000 tɔɔw ye. Min kɔrɔtanin lo ka tɛmɛ o bɛɛ kan, o ye ko u jigi b’a la ka Jehova Ala yɛrɛ ye! (1 Kor. 15:51-53; 1 Zan 3:2). Kerecɛn mɔlenw b’a lɔn ko sababu dira u ma k’o nɛɛmaw sɔrɔ sankolo la. Nka, u b’a to u hakili la ko walisa ka sira sɔrɔ ka taga sankolo la, u ka ɲi ka to kantigiya la fɔɔ ka taga se u saya ma (2 Tim. 4:7, 8). Kerecɛn mɔlenw kɛtɔ ka miiri u ka jigiya koo la, o be u ninsɔn diya kosɔbɛ (Titi 2:13). Nka ‘saga dɔ wɛrɛ’ mɔgɔw do? (Zan 10:16). Kuun jumanw lo kama olu be taga Hakilijigi lajɛn na?

6. Mun na saga dɔ wɛrɛ mɔgɔw be taga Hakilijigi lajɛn na saan o saan?

⁶ Saga dɔ wɛrɛ mɔgɔw fana be taga Hakilijigi lajɛn na. U tɛ buru dumu ani ka diwɛn min o lajɛn na, nka u ninsɔn ka di ka kɛ yen. Minw ka jigiya ye ka ɲɛnamaya kɛ dugukolo kan, siɲɛ fɔlɔ min na u weelela ka na Hakilijigi lajɛn na, o tun ye saan 1938 lo ye. A tun fɔra saan 1938, marisikalo tile fɔlɔ ka Kɔrɔsili Sangaso kɔnɔ ko: “A bɛnnin lo kosɔbɛ [saga dɔ wɛrɛ mɔgɔw] ka na o lajɛn na walisa k’a filɛ min be kɛra. . . . O ye ninsɔndiya wagati lo ye olu fana fɛ.” N’u ye mɔgɔ dɔw weele furusiri la, u ninsɔn ka di ka kɛ o furusiri la. O cogo kelen na, saga dɔ wɛrɛ mɔgɔw ninsɔn ka di ka kɛ Hakilijigi lajɛn na.

7. Mun na saga dɔ wɛrɛ mɔgɔw kɔrɔtɔnin lo ka Hakilijigi lajɛn ka forobakalan lamɛn?

⁷ Saga dɔ wɛrɛ mɔgɔw fana be miiri u ka jigiya koo la. U kɔrɔtɔnin lo ka Hakilijigi lajɛn ka forobakalan lamɛn. Mun na do? Sabu o kalan yɔrɔ fanba b’a yira Krista n’a ka marakɛɲɔgɔn mɔgɔ 144 000 bena min kɛ adamaden kantigiw ye saan waa kelen mara tuma na. O marakɛɲɔgɔnw bena dɛmɛ don ka dugukolo yɛlɛma k’a kɛ alijɛnɛ ye ani u bena adamadenw dɛmɛ walisa u ka kɛ mɔgɔ dafaninw ye. U bena o kɛ u ka Masacɛ Yezu Krista ka kuntigiya kɔrɔ. Ni saga dɔ wɛrɛ mɔgɔw miirila Bibulu ka kiraya kumaw na siniɲasigi  koo la, o b’u ninsɔn diya kosɔbɛ! O kiraya kuma dɔw be sɔrɔ Ezayi 35:5, 6; 65:21-23 ani Yirali 21:3, 4 na. N’u miirila k’a ye k’u be duniɲa kura kɔnɔ n’u ka mɔgɔ kanulenw ye, o b’u ka jigiya sabati siniɲasigi koo la. O b’a to fana u b’u cɛsiri Jehova sago kɛli la.—Mat. 24:13; Gal. 6:9.

8. Kuun wɛrɛ juman lo kama saga dɔ wɛrɛ mɔgɔw be taga Hakilijigi lajɛn na?

⁸ An k’a filɛ kuun wɛrɛ min kama saga dɔ wɛrɛ mɔgɔw be taga Hakilijigi lajɛn na. U b’a fɛ k’a yira kerecɛn mɔlenw na k’u b’u kanu ani ko u be n’u ye. Ala ka Kuma tun kɔnna k’a fɔ ko minw be ni jigiya ye ka ɲɛnamaya kɛ dugukolo kan, olu ni kerecɛn mɔlenw bena jɛn ka baara kɛ ɲɔgɔn fɛ kelenya la. O yirala cogo di? An ka ɲɛyirali damanin lajɛ.

9. Ka kɛɲɛ ni Zakari 8:23 ye, saga dɔ wɛrɛ mɔgɔw be mun lo miiri kerecɛn mɔlenw koo la?

⁹ Zakari 8:23 kalan. O kiraya kuma b’a yira cogo kabakoman na saga dɔ wɛrɛ mɔgɔw be min miiri u balimaw koo la minw ye kerecɛn mɔlenw ye. N’u ko “zuwifu kelen” ani “aw,” o kumadenw ɲɛsinna kerecɛn mɔlen tɔɔw lo ma minw be dugukolo kan (Ɔrɔm. 2:28, 29). “Siya wɛrɛw mɔgɔ tan” minw kofɔra, o ye saga dɔ wɛrɛ mɔgɔw lo ye. U be “zuwifu kelen ka fani dagolo minɛ,” o kɔrɔ, u be u masiri kerecɛn mɔlenw na kosɔbɛ ani u be fara u kan tiɲɛn batoli la. O kama Hakilijigi lajɛn loon sufɛ, saga dɔ wɛrɛ mɔgɔw b’a yira k’u masirinin lo kosɔbɛ kerecɛn mɔlenw na u kɛtɔ ka kɛ n’u ye o lajɛn na.

10. Kiraya kuma min be sɔrɔ Ezekiyɛli 37:15-19, 24, 25 la, Jehova ye mun lo kɛ k’o dafa?

¹⁰ Ezekiyɛli 37:15-19, 24, 25 kalan. Jehova ye mun lo kɛ walisa k’o kiraya kuma dafa? A y’a kɛ saga dɔ wɛrɛ mɔgɔw ni kerecɛn mɔlenw be jɛn ka baara kɛ ɲɔgɔn fɛ kelenya la. O kiraya kuma ye lɔgɔ fila kofɔ. Galen, u tun be Israɛl masacɛw sugandi Zuda kɔmɔgɔw lo cɛma. Minw be ni jigiya ye ka taga ɲɛnamaya kɛ sankolo la, “Zuda ka lɔgɔ” ye olu tagamasiɲɛ lo ye. Ani, minw be ni jigiya ye ka ɲɛnamaya kɛ dugukolo kan “Efarayimu ka lɔgɔ” y’olu tagamasiɲɛ lo ye. * A tun fɔra ko Jehova bena o jɛnkulu fila jɛn ka kɛ kelen ye. O la, u tun bena kɛ i n’a fɔ “lɔgɔ kelen.” O kɔrɔ ko u bena jɛn ka Jehova sago kɛ kelenya la masacɛ kelen ka kuntigiya kɔrɔ, o min ye Yezu Krista ye. Saan o saan, kerecɛn mɔlenw ni saga dɔ wɛrɛ mɔgɔw be na Hakilijigi lajɛn na. U t’o kɛ dan na dan na, nka u b’o kɛ i ko saga “kulu kelen” mɔgɔw, “dɛndɛbaga kelen” be minw kɔ.—Zan 10:16.

11. ‘Saga’ minw kofɔra Matiyo 25:31-36, 40 na, u b’a yira cogo jɔnjɔn juman na k’u be ni Krista balimaw ye?

¹¹ Matiyo 25:31-36, 40 kalan. Yezu kumana ‘saga’ minw koo la, o ɲɛsinna mɔgɔ tilenninw lo ma laban wagati la. O mɔgɔw be ni jigiya ye ka ɲɛnamaya kɛ dugukolo kan ani olu lo ye saga dɔ wɛrɛ mɔgɔw ye. Krista balima tɔɔ minw be dugukolo kan, saga dɔ wɛrɛ mɔgɔw b’a yira k’u be n’u ye, u kɛtɔ k’u dɛmɛ ka kunkanbaaraba dɔ dafa, o min ye ka waajuli kɛ ani ka mɔgɔw dɛmɛ u ka kɛ Krista ka kalandenw ye duniɲa kuru bɛɛ kɔnɔ.—Mat. 24:14; 28:19, 20.

12-13. Saga dɔ wɛrɛ mɔgɔw b’a yira cogo wɛrɛ jumanw na k’u be ni Krista balimaw ye?

¹² Saan o saan, saga dɔ wɛrɛ mɔgɔw b’a yira k’u be ni Krista balimaw ye. Lɔgɔkun minw be kɔn Hakilijigi lajɛn loon ɲɛ,  u b’u seen don bɛrɛbɛrɛ waajuli baara kanpaɲiba dɔ la walisa ka makodonmɔgɔw weele u ka na o lajɛn na. (Koorilen nin lajɛ: “ Yala i be labɛnw kɛra Hakilijigi lajɛn wagati kama wa?”) Labɛn minw bɛɛ ka ɲi ka kɛ Hakilijigi lajɛn kama, u be dɛmɛ don o la fana hali ni kerecɛn mɔlen si t’u ka kafo kɔnɔ. Saga dɔ wɛrɛ mɔgɔw ninsɔn ka di kosɔbɛ ka Krista balimaw dɛmɛ o cogow la. U b’a faamu ko u be min kɛra Krista balimaw ye, Krista b’a jati ko u b’o kɛra ale yɛrɛ lo ye.—Mat. 25:37-40.

¹³ Kuun wɛrɛ jumanw lo kosɔn an bɛɛ be taga Hakilijigi lajɛn na an ka jigiya mana kɛ min o min ye?

14. Jehova ni Yezu y’a yira cogo di k’u b’an kanu kosɔbɛ?

¹⁴An be Jehova ni Yezu waleɲuman lɔn u ka kanuya kosɔn. Jehova y’a yira cogo caaman na ko a b’an kanu. Nka a ka kanuya wale min ka bon ni tɔɔw bɛɛ ye, o ye ko a y’a Dencɛ kanulen ci dugukolo kan walisa a ka tɔɔrɔ ani ka sa an kosɔn (Zan 3:16). Yezu fana y’a yira ko a b’an kanu kosɔbɛ a kɛtɔ ka sɔn k’a niin di an kosɔn (Zan 15:13). Jehova ni Yezu y’a yira cogo minw na ko u b’an kanu, an tɛ se k’u sara o kosɔn. Nka an be ɲɛnamaya kɛ cogo min na loon o loon, an be se k’a yira o fɛ ko an b’u waleɲuman lɔn (Kɔlɔs. 3:15). Ka fara o kan, an be taga Hakilijigi lajɛn na sabu an b’a fɛ ka miiri u ka kanuya koo la ani k’a yira u la ko an b’u kanu.

15. Mun na kerecɛn mɔlenw ni saga dɔ wɛrɛ mɔgɔw be Jehova ni Yezu waleɲuman lɔn kosɔbɛ kunmabɔsara kosɔn?

¹⁵An be Jehova ni Yezu waleɲuman lɔn kosɔbɛ kunmabɔsara kosɔn (Mat. 20:28). Kerecɛn mɔlenw be ni jigiya kabakoman min ye, u be se k’o sɔrɔ kunmabɔsara lo sababu la. O kosɔn, kunmabɔsara koo ka gwɛlɛ u ma kosɔbɛ. U limaniyanin lo Krista ka kunmabɔsara koo la minkɛ, Jehova y’u jati mɔgɔ tilenninw ye ani k’u kɛ a deenw ye (Ɔrɔm. 5:1; 8:15-17, 23). Saga dɔ wɛrɛ mɔgɔw fana be Jehova ni Yezu waleɲuman lɔn kunmabɔsara kosɔn. U limaniyanin lo Krista ka kunmabɔsara koo la minkɛ, u saniyanin lo Ala ɲɛɛ kɔrɔ, u be se k’a bato ani u be ni jigiya ye ka kisi ka ‘bɔ tɔɔrɔba la.’ (Yir. 7:13-15). Kerecɛn mɔlenw ni saga dɔ wɛrɛ mɔgɔw b’u ka waleɲuman lɔn yira kunmabɔsara koo la cogo minw na, u la dɔ ye ka na Hakilijigi lajɛn na saan o saan.

16. Kuun wɛrɛ juman lo kosɔn an be taga Hakilijigi lajɛn na?

¹⁶ Kuun wɛrɛ min kosɔn an be taga Hakilijigi lajɛn na, o ye ko an b’a fɛ ka mɛnni kɛ Yezu fɛ. Yezu ye Hakilijigi lajɛn koo sigi sen kan suu min na, o suu kelen nin na a y’a fɔ a ka kalandenw ye ko: “Aw ye nin kɛ ka aw hakiri jigi ne ra.” (1 Kor. 11:23, 24, Biblu Ala ta Kuma). An ka jigiya mana kɛ min o min ye, an kelen kelen bɛɛ b’a fɛ k’o cikan labato.

17. Hakilijigi lajɛn b’an dɛmɛ cogo di an k’an magwɛrɛ kosɔbɛ Jehova la?

¹⁷An b’an magwɛrɛ kosɔbɛ Jehova la (Zaki. 4:8). I ko an y’a fɔ ka tɛmɛ cogo min na, Jehova ye jigiya min di an ma ani a y’a yira cogo kabakoman min na ko a b’an kanu, Hakilijigi lajɛn be sababu di an ma an ka miiri o bɛɛ la (Zer. 29:11; 1 Zan 4:8-10). Jehova ye jigiya min di an ma siniɲasigi koo la, o ye sɔbɛko lo ye. N’an miirila o jigiya ani Jehova ka kanuya  kantigiman koo la, o b’a to an b’a kanu kosɔbɛ ani an n’ale ka teriya be sabati.—Ɔrɔm. 8:38, 39.

18. N’an be miiri Yezu ka ɲɛyirali koo la, o b’an lasun ka mun lo kɛ?

¹⁸O b’an lasun an k’a ɲini ka Yezu ladegi (1 Piyɛri 2:21). Loon minw be kɔn Hakilijigi lajɛn ɲɛ, an be sinsin Bibulu yɔrɔ nunu lo kan: minw be kuma a ka lɔgɔkun laban koo la dugukolo kan ani minw be kuma a saya n’a sukununi koo la. O kɔ, forobakalan min be kɛ Hakilijigi lajɛn loon na yɛrɛ, o b’an hakili jigi Yezu ka kanuya la an koo la (Efɛz. 5:2; 1 Zan 3:16). Yezu ye ɲɛyirali min to an ye yɛrɛsaraka miiriya koo la, n’an b’o kalan Bibulu kɔnɔ ani ka miiri o kan, o b’an lasun k’a “taamacogo ladege.”—1 Zan 2:6.

19. An be se ka to Ala ka kanuya la cogo di?

¹⁹An cɛsirinin lo kosɔbɛ ka to Ala ka kanuya la (Zude 20, 21). An be se ka to Ala ka kanuya la n’an b’an seko bɛɛ kɛ ka mɛnni kɛ a fɛ, k’a tɔgɔ saniya ani k’a dusu diya (Talenw 27:11; Mat. 6:9; 1 Zan 5:3). N’an be taga Hakilijigi lajɛn na, o b’an jija kosɔbɛ an ka ɲɛnamaya kɛ loon o loon i n’a fɔ an b’a fɔra Jehova ye le ko: “Ne b’a fɛ ka to i ka kanuya la fɔɔ abada!”

20. Kuun jumanw lo kama an be taga Hakilijigi lajɛn na?

²⁰ An ka jigiya mana kɛ ka ɲɛnamaya kɛ fɔɔ abada sankolo la wala dugukolo kan, an be taga Hakilijigi lajɛn na kuun jɔnjɔn dɔw kama. An mana ɲɔgɔn lajɛn saan o saan o lajɛn kama, an b’an hakili jigi mɔgɔ dɔ koo la an be min kanu, o min ye Yezu Krista ye. Min yɛrɛ kɔrɔtanin lo kosɔbɛ, o ye ko an b’an hakili jigi Jehova ka kanuya koo la a ye min yira an na a kɛtɔ k’a Dencɛ di ka kɛ kunmabɔsara ye an kosɔn. O ye kanuya wale ye min ɲɔgɔn tɛ yen. Ɲinan ka Hakilijigi lajɛn bena kɛ jumalon, awirilikalo tile 15, tilen bennin kɔ. An be Jehova n’a Dencɛ kanu. O kama Yezu ka saya sanyɛlɛma loon na, an tɛna a to koo si k’an bali ka kɛ Hakilijigi lajɛn na.