1. Fɛɛn juman lo b’a to mɔgɔw ka fisa ni bɛgɛnw ye?

JEHOVA ye fɛɛn kɛrɛnkɛrɛnnin dɔ di adamadenw ma. O ye dusukun sifa dɔ ye min b’a to an ka fisa ni bɛgɛnw ye. An b’a lɔn cogo di ko Adama ni Awa tun be ni dusukun ye min be se k’u dɛmɛ ka koo ɲuman ni koo jugu faranfasi? U ye jurumu kɛ ka ban tuma min na, u dogora Ala ɲɛ. Mun na do? Sabu u dusukun tun b’u kɛlɛla.

2. Mun na an be se k’an dusukun suma ni volan ye? (Jaa lajɛ, barokun daminɛ na.)

² Minw dusukun kolonin tɛ ka ɲɛ, olu be komi bato min volan man ɲi. Faratiba b’a la ka taga dugu la n’o bato ɲɔgɔn ye. Fɔɲɔ ni jikuruw ka teli k’o bato bila sira jugu kan. Nka ni bato volan ka ɲi, o bena batobolila dɛmɛ a ka to sira ɲuman kan. An be se k’an dusukun suma n’o volan ye. Ala y’an dan ni dusukun ye walisa k’an dɛmɛ ka ɲuman ni juguman lɔn ka bɔ ɲɔgɔn na. O dusukun be se k’an ɲɛminɛ sira ɲuman kan. Nka walisa an dusukun k’an ɲɛminɛ bɛrɛbɛrɛ, an ka ɲi k’a kolo koɲuman.

3. Mun lo be se ka kɛ ni an m’an dusukun kolo ka ɲɛ?

 ³ Ni mɔgɔ m’a dusukun kolo koɲuman, a tɛna a bali ka koo jugu kɛ (1 Tim. 4:1, 2, ABM ). A yɛrɛ be se k’a to o tigi b’a jati ko “kojugu ye koɲuman ye.” (Ezayi 5:20). Yezu y’a ka kalandenw lasɔmi ko: “Waati dɔ bena se, mɔgɔ minw bena aw faga, olu bena miiri k’u ye Ala sago le kɛ.” (Zan 16:2). Mɔgɔ minw ye Yezu ka kalanden Etiyɛni faga, olu tun b’o lo miiri (Kɛw. 6:8, 12; 7:54-60). Kabi wagatijan, diinan caaman mɔgɔw ye kojugubaw kɛ i n’a fɔ ka mɔgɔw faga ani k’a fɔ k’u b’o kɛra Ala lo tɔgɔ la. Nka tiɲɛn na, u ka kɛtaw tun bɛnnin tɛ Ala ka sariyaw ma (Ɛkiz. 20:13). A gwɛnnin lo k’u dusukun t’u ɲɛminɛna ka ɲɛ!

4. An be se ka mun lo kɛ walisa an dusukun ka baara kɛ koɲuman?

⁴ An be se ka mun lo kɛ walisa an dusukun ka baara kɛ koɲuman? Sariyaw ni sariyakolo minw be Ala ka Kuma kɔnɔ, ‘nafaba b’a la ka mɔgɔw kalan n’u ye, ani ka galon ban, ani ka mɔgɔw bila siraɲuman kan, k’u tilen.’ (2 Tim. 3:16). An ka ɲi ka Bibulu kalan loon o loon, ka miiri a kan koɲuman ani k’a sira tagama. O la, dɔɔni dɔɔni, an bena kɛ ni Ala ka miiriya ye koow kan. N’an sera k’o kɛ, an dusukun bena to k’an ɲɛminɛ ka ɲɛ. An k’a filɛ an be se k’an dusukun kolo cogo min na ni Jehova ka sariyaw n’a ka sariyakolow ye.

5, 6. N’an be Ala ka sariyaw labato, o b’an nafa cogo di?

⁵ N’an b’a fɛ Ala ka sariyaw k’an nafa, an ka ɲi k’u kalan walisa k’u lɔn. Nka o dama tɛ bɔri kɛ. U koo ka ɲi ka diya an ye ani an ka ɲi k’u labato. Bibulu b’a fɔ an ye ko: “Aw kana kojugu koo diya aw yɛrɛ ye, nga, aw ka koɲuman le kanu.” (Amɔsi 5:15). Nka, an be se k’o kɛ cogo di? An ka ɲi ka kɛ ni Ala ka miiriya ye koow kan. An ka ɲɛyirali dɔ ta. Miiri k’a filɛ ko i tɛ sera ka sinɔgɔ ka ɲɛ ani i ka dɔgɔtɔrɔcɛ ko i ka dumuni saniyanin dumu, ka spɔr kɛ ani k’i ka ɲɛnamaya kɛcogo dɔw yɛlɛma. I y’a ka cikan sira tagama ani i be sera ka sinɔgɔ! Siga t’a la, i bena o dɔgɔtɔrɔcɛ waleɲuman lɔn sabu a ye cikan minw d’i ma, u y’i dɛmɛ k’i ka ɲɛnamaya kɛcogo fisaya.

⁶ O cogo kelen na, an Danbaga ye sariyaw di an ma minw b’an tanga jurumu nɔfɛkow ma. U b’an dɛmɛ fana k’an ka ɲɛnamaya kɛcogo fisaya. Ɲɛyirali fɛ, Bibulu b’a fɔ ko an kana ngalon tigɛ, an kana nanbarakow, soɲɛni, kakalayakow, fariyakow ani jinakow kɛ. N’an b’o cikanw labato, miiri k’a filɛ o b’an nafa cogo min na (Talenw 6:16-19 kalan; Yir. 21:8). N’an y’a ye ko nafa b’a la ka mɛnni kɛ Jehova fɛ, ale n’a ka sariyaw koo bena an diya an ye kosɔbɛ.

7. Mɔgɔ minw kofɔra Bibulu kɔnɔ, n’an b’u ka maanaw kalan ani ka miiri a kan, o bena an dɛmɛ ka mun lo kɛ?

⁷ Kuun t’a la an ka Ala ka sariyaw tiɲɛ ani ka tɔɔrɔ ka sɔrɔ k’a lɔn min ye ɲuman ni juguman ye. Mɔgɔ minw ye Ala ka sariyaw tiɲɛn ani u kofɔra Bibulu kɔnɔ, an be se ka kalan sɔrɔ olu fɛ. Talenw 1:5 b’a fɔ ko: “Lɔnnikɛlaw bena u tulo malɔ u fɛ, ka dɔ fara u ka lɔnniya kan.” Tiɲɛn na, mɔgɔ minw kofɔra Bibulu kɔnɔ, n’an b’u ka maanaw kalan ani ka miiri u kan, an bena kalan nafamanba sɔrɔ ka bɔ Ala yɔrɔ. Ɲɛyirali fɛ, dusukasi min ye Dawuda sɔrɔ tuma min na a ye Jehova ka sariya tiɲɛ ani ka kakalaya kɛ ni Batiseba ye, an ka miiri o la (2 Sam. 12:7-14). N’an b’o maana kalanna ani ka miiri a kan, an k’an yɛrɛ ɲininga  ko: “Masacɛ Dawuda tun be se k’a yɛrɛ tanga o dusukasi ma cogo di? Ne tun bena mun lo kɛ o koo ɲɔgɔn na? Yala n’ tun bena kakalaya kɛ i ko Dawuda wala n’ tun bena boli i ko Yusufu wa?” (Zɛnɛzi 39:11-15). N’an be miiri jurumu nɔfɛkow la, an tɛna ‘kojugu koo diya an yɛrɛ ye,’ nka an bena a kɔniya kosɔbɛ!

8, 9. a) An dusukun b’an dɛmɛ ka mun lo kɛ? b) An dusukun be baara kɛ cogo di ni Jehova ka sariyakolow ye?

⁸ Ala be koo minw kɔniya, an be se k’an yɔrɔ janya u la pewu! Nka koo wɛrɛw be yen Bibulu tɛ sariya tigitigi di minw na. N’an y’an yɛrɛ sɔrɔ o koo ɲɔgɔn na, an ka ɲi ka mun lo kɛ? Ala be min ɲini an fɛ o koo la, an be se k’o lɔn cogo di? N’an y’a to Bibulu y’an dusukun kolo, an bena se ka desizɔn ɲuman ta.

⁹ Jehova b’an kanu. O kama, a ye sariyakolow di minw be se k’an dusukun kolo. Ale yɛrɛ y’a fɔ ko: “Ne Masaba ye aw ka Ala ye. Ne b’aw kalan aw ka nafa kama. Ne b’aw bila sira, aw taayɔrɔw la.” (Ezayi 48:17, 18). N’an be miiri koɲuman Bibulu ka sariyakolow kan ani n’an b’a to u k’an dusukun sɔrɔ, an bena se k’an dusukun kolo ka ɲɛ. O lo bena a to an be desizɔn ɲumanw ta.

10. Sariyakolow ye mun ye ani Yezu ye baara kɛ n’u ye cogo di?

¹⁰ Sariyakolow ye miiriya jɔnjɔnw ye minw b’an ɲɛminɛ ani k’an dɛmɛ ka desizɔn ɲumanw ta. N’an be Jehova ka sariyakolow lɔn, o b’an dɛmɛ k’a lɔn ale yɛrɛ be min miiri ani fɛɛn min kama a ye sariya dɔw di an ma. Yezu ka cidenya baara kuru bɛɛ la, a tɛmɛna sariyakolow fɛ k’a ka kalandenw dɛmɛ k’a faamu k’u ka miiriyaw n’u ka kɛwalew be ni nɔfɛkow ye. Ɲɛyirali fɛ, a y’a fɔ ko dimiya be se k’a to mɔgɔ be fariyakow kɛ ani ko ni mɔgɔ be miiri kakalayakow la, o be se k’a to a be kakalaya kɛ (Mat. 5:21, 22, 27, 28). N’an b’a to Jehova ka sariyakolow k’an ɲɛminɛ, an dusukun bena kolo ka ɲɛ ani an bena desizɔnw ta minw be nɔɔrɔ la Ala kan.—1 Kor. 10:31.

11. Yala kerecɛnw bena desizɔn kelen ta koo bɛɛ la wa? A ɲɛfɔ.

¹¹ Hali ni kerecɛnw basigira Bibulu kan k’u dusukun kolo, a be se ka kɛ ko u tɛ desizɔn kelen ta koo dɔw la. An ka ɲɛyirali ta dɔrɔ koo la. N’an be dɔrɔ min k’a dama kɛɲɛ, Bibulu t’o haramuya. Nka, a b’an lasɔmi ko an man ɲi ka dɔrɔ min kojugu wala k’a min fɔɔ ka su (Talenw 20:1; 1 Tim. 3:8). Yala o kɔrɔ ko ni kerecɛn be dɔrɔ min k’a dama kɛɲɛ, a man ɲi k’a janto koo wɛrɛw la wa? Ayi. Hali ni kerecɛn dusukun t’a kɛlɛ n’a be dɔrɔ min, a ka ɲi k’a janto mɔgɔ wɛrɛw dusukun koo la.

12. Ɔrɔmukaw 14:21 b’an dɛmɛ cogo di an k’an janto mɔgɔ wɛrɛw dusukun koo la?

¹² Pol y’a yira ko an ka ɲi k’an janto mɔgɔ wɛrɛw dusukun koo la. A y’a sɛbɛ ko: “Fɛɛn min ka fisa, i kana josɔnsogo ɲimi, i kana dɔrɔ min, fɛɛn o fɛɛn min be se ka kɛ sababu ye k’i balima kunnacɛn, i kana o kɛ.” (Ɔrɔm. 14:21). O la, hali ni joo b’an fɛ ka dɔrɔ min, an be se ka ban k’o kɛ, n’an b’a lɔn ko an balima dɔ dusukun be se k’a kɛlɛ o kosɔn. N’a sɔrɔ an balima dɔ tun ye dɔrɔtɔ ye sanni a ka kɛ Jehova Seere ye. Nka, a y’a latigɛ ko a tɛna dɔrɔ min tugun. An t’a fɛ ka kɛ sababu ye an balima be kɔsegi a ka delinanko juguw la sabu o be se ka bɔnɛba lase a ma! (1 Kor. 6:9, 10). N’an y’o balima dɔ weele an ka soo, yala an bena a ɲini k’a lasun a ka dɔrɔ min wa? Ayi, an tɛna o kɛ!

13. Timote y’a janto mɔgɔ wɛrɛw dusukun koo la ani k’u dɛmɛ cogo di u ka sɔn kibaro diiman ma?

 ¹³ Tuma min na Timote tun be ni saan 20 ɲɔgɔn ye, a sɔnna u y’a kɛnɛkɛnɛ hali k’a sɔrɔ o be dimi kosɔbɛ. Mun na do? Sabu Timote tun ka ɲi ka Yahutuw waaju ani a tun b’a lɔn ko kɛnɛkɛnɛli koo kɔrɔtanin lo olu fɛ. I ko Pol, Timote tun t’a fɛ ka don mɔgɔ si gasi la (Kɛw. 16:3; 1 Kor. 9:19-23). Yala ele fana labɛnnin lo k’i yɛrɛ saraka mɔgɔ wɛrɛw nafa kosɔn i ko Timote wa?

14, 15. a) Ka ɲɛtaga kɛ Alako ta fan fɛ, o kɔrɔ ko di? b) Kerecɛn minw ye ɲɛtaga kɛ Alako ta fan fɛ, olu be tɔɔw minɛ cogo di?

¹⁴ “Krista ka koo minw faamu man gwɛlɛ,” kerecɛn si man ɲi ka dan o dɔrɔn ma. Nka, an ka ɲi k’an “jija ka taga ɲa” Alako ta fan fɛ (Eburuw 6:1). An tɛ se k’a fɔ ko an ye ɲɛtaga kɛ Alako ta fan fɛ sabu an be tiɲɛn sira kan kabi saan caaman. Walisa ka ɲɛtaga kɛ, fɔɔ an ka jijaliw kɛ. An ka ɲi ka to ka dɔ fara an ka lɔnniya n’an ka faamuyali kan. O kama, an ka ɲi ka Bibulu kalan loon o loon (Zab. 1:1-3). Yala o y’i ka laɲinita ye wa? N’i be Bibulu kalan loon o loon, i bena Jehova ka sariyaw n’a ka sariyakolow faamu koɲuman.

¹⁵ Kerecɛnw fɛ, sariya juman lo kɔrɔtanin lo ka tɛmɛ sariyaw bɛɛ kan? O ye sariya ye min ɲɛsinna kanuya ma. Yezu y’a fɔ a ka kalandenw ye ko: “Mɔgɔ bɛɛ ben’a lɔn o seen fɛ ko aw kɛra ne ka kalandenw ye, ni aw be ɲɔgɔn kanu.” (Zan 13:35). Zaki y’a fɔ ko kanuya ye “masaya sariya” ye (Zaki 2:8, ABM ). Pol y’a fɔ ko: “Sariya be se ka bato kanuya barika la.” (Ɔrɔm. 13:10). A tɛ bari an na ko kanuya ye jogo ye min kɔrɔtanin lo kosɔbɛ sabu Bibulu b’a fɔ ko “n’i ko Ala, i ko kanuya le.” (1 Zan 4:8). Ala ka kanuya tɛ dusukunnakow dama ye. Zan y’a fɔ ko: “Dencɛ kelenpe min be Ala fɛ, a y’o ci diɲɛ na waasa an ka [ ɲɛnamaya kɛ] ale barika la. Ala y’a ka kanuya yira an na ten le.” (1 Zan 4:9). Tiɲɛn na, Ala ka kanuya lo y’a lasun k’a Dencɛ ci dugukolo kan. N’an be Jehova, Yezu, an balimaw ani tɔɔw kanu, an b’a yira ka gwɛ ko an ye ɲɛtaga kɛ Alako ta fan fɛ.—Mat. 22:37-39.

16. N’an be ɲɛtaga kɛra Alako ta fan fɛ, mun na an bena a ye ko Bibulu ka sariyakolow kɔrɔtanin lo kosɔbɛ?

 ¹⁶ N’an be ɲɛtaga kɛra Alako ta fan fɛ, an bena a ye ko Bibulu ka sariyakolow kɔrɔtanin lo kosɔbɛ. Mun na do? Sabu sariya ɲɛsinna koo tigitigi dɔ lo ma. Nka, sariyakolo ɲɛsinna koo caaman ma. Ɲɛyirali fɛ, denmisɛnw t’a faamu fɛɛn min kama farati b’a la ka teriya kɛ ni mɔgɔ juguw ye. O kama, bangebaga hakilitigiw be sariyaw sigi u ye walisa k’u latanga (1 Kor. 15:33). Nka ni deen kɔrɔbayara, dɔ be fara a ka faamuyali kan ani a be se ka tɛmɛ Bibulu ka sariyakolow fɛ ka hakilijagabɔ kɛ. O b’a dɛmɛ ka teri ɲumanw sugandi (1 Korɛntikaw 13:11; 14:20 kalan). N’an be to ka tɛmɛ Bibulu ka sariyakolow fɛ ka hakilijagabɔ kɛ, an dusukun bena an ɲɛminɛ koɲuman. Ala b’a fɛ an ka min kɛ koo dɔw sen fɛ, an bena to k’o faamu ka ɲɛ.

17. An mako be fɛɛn minw na ka desizɔn ɲumanw ta, mun na an be se k’a fɔ k’o b’an fɛ?

¹⁷ Fɛɛn o fɛɛn bena an dɛmɛ ka desizɔnw ta minw ka di Jehova ye, a y’o di an ma. An be sariyaw ni sariyakolow sɔrɔ Bibulu kɔnɔ minw be se k’an dɛmɛ ka “kɛ mɔgɔdafanin ye ka se ka koɲuman sifa bɛɛ kɛ.” (2 Tim. 3:16, 17). O kama, an k’a ɲini ka Bibulu ka sariyakolow lɔn walisa ka “Matigi sago” lɔn ka ɲɛ (Efɛz. 5:17). Sɛgɛsɛgɛrikɛ minan minw b’an fɛ, baara ɲuman kɛ n’u ye. O sɛgɛsɛgɛrikɛ minanw ye: Gafe Index des publications des Témoins de Jéhovah, Guide de recherche pour les Témoins de Jéhovah, Watchtower Library, BIBLOTƐKI ƐNTƐRƐNƐTI KAN ani JW Library. O fɛɛnw labɛnna walisa k’an dɛmɛ ka nafa sɔrɔ bɛrɛbɛrɛ an ka gwa kɔnɔ batoli ani an ka kelenna kalan na.

18. N’an be Jehova ka sariyaw n’a ka sariyakolow sira tagama, nafa jumanw lo b’o la?

¹⁸ N’an be Jehova ka sariyaw n’a ka sariyakolow sira tagama, nafa b’o la. Zaburuw 119:97-100 b’a fɔ ko: “E ka sariya koo ka di ne ye haali. Loon o loon ne be miiri a la. E ka fɔta be barika don ne la ka tɛmɛ n juguw kan, bari o be to ne hakili la tuma bɛɛ. Ne be koo lɔn ka tɛmɛ n kalanfaw kan, bari ne be miiri i ka kuma na kosɔbɛ. Lɔnniya be ne la ka tɛmɛ cɛkɔrɔbaw kan, bari ne b’i ka kuma bato.” N’an be wagati ta ka miiri koɲuman Ala ka sariyaw n’a ka sariyakolow kan, an bena to ka koow kɛ ni hakilitigiya ani faamuyali ye. Ka fara o kan, n’an y’an dusukun kolo ni Ala ka sariyaw n’a ka sariyakolow ye, an bena “kɔgɔ fɔɔ ka kɛ mɔgɔdafaninw ye i n’a fɔ Krista.”—Efɛz. 4:13.