Kɔrɔsili Sangaso minw bɔra kɔsa la, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

An be se ka koo naani jumanw lo kɛ walisa k’an ka dɔnkili lacogo fisaya?

I ka dɔnkiligafe kɔrɔta koɲuman walisa ka lɔ ka ɲɛ. Nɛnɛkiri koɲuman. I daa yɛlɛ ka ɲɛ. O la i bena se ka dɔnkili la ni kaanba ye.—w17.11, ɲɛɛ 5.

Kalifadugu minw tun be Israɛl an be se ka mun lo fɔ u yɔrɔw n’u siraw koo la?

Kalifadugu wɔɔrɔ lo tun be Israɛl jamana yɔrɔ bɛɛ la ani u ka siraw tun ladonna ka ɲɛ. Mɔgɔ tun be se ka boli ka taga a yɛrɛ kalifa yen cogo nɔgɔman na.—w17.11, ɲɛɛ 14.

Ala ye kunmabɔsara min di Yezu sababu fɛ, mun na o ye nilifɛnw bɛɛ la fisaman ye?

Ale lo sababu la an bena se ka to niin na fɔɔ abada ani ka hɔɔrɔnya ka bɔ jurumu ni saya fanga kɔrɔ. Ala be adamadenw kanu kosɔbɛ. O lo kama, a ye Yezu di k’a kɛ an kunmabɔsara ye hali k’a sɔrɔ an ye jurumukɛlaw ye.—wp17.6-F, ɲɛɛ 6-7.

Zaburuw 118:22 b’a yira cogo di ko Yezu suu tun bena kunu?

Mɔgɔw ma sɔn a ma ko Yezu lo ye Masiya ye ani u y’a faga. Yezu suu tun ka ɲi ka kunu walisa a ka kɛ “boon nɔnkɔn” ka kabakuru barikaman ye.—w17.12, ɲɛɛ 9-10.

Yala deen fɔlɔw dɔrɔn lo tun ka ɲi ka kɛ Masiya buruju dɔ ye wa?

Deen fɔlɔw kɛra Masiya buruju dɔw ye, nka tuma bɛɛ tɛ. Ɲɛyirali fɛ, Dawuda tun tɛ Zese deen fɔlɔ ye. Nka, Masiya buruju bɔra ale lo la.—w17.12, ɲɛɛ 14-15.

Sariyakolo minw be Bibulu kɔnɔ ka ɲɛsin kɛnɛyako ma, u dɔw ye jumanw ye?

Ka kɛɲɛ ni Musa ka sariya ye, banabagatɔ sifa dɔw tun ka ɲi ka bila dan na. Mɔgɔ ka ɲi ka jiko n’a magara suu la. Mɔgɔw tun ka ɲi k’u ka banakɔtaga kɛ dingɛ kɔnɔ dugu kɔfɛ ani k’a datugu. Cɛdenninw tun be kɛnɛkɛnɛ u tile seeginna loon walisa joli ka simi joona.—wp18.1-F, ɲɛɛ 7.

Mun na kerecɛn ka ɲi k’a yɛrɛ kanu k’a dama kɛɲɛ?

An ka ɲi k’an mɔgɔɲɔgɔnw kanu i n’a fɔ an yɛrɛ (Mariki 12:31). Cɛɛw ka ɲi k’u “musow kanu i n’a fɔ u yɛrɛ farisogo.” (Efɛz. 5:28). Nka, dɔw be se k’u yɛrɛ kanu k’a dama tɛmɛ.—w18.01, ɲɛɛ 23.

An ka ɲi ka mun ni mun lo kɛ walisa ka ɲɛtaga kɛ Alako ta fan fɛ?

An ka ɲi ka Ala ka Kuma kalan, ka miiri a kan ani k’a sira tagama. An ka ɲi k’an hakili n’an dusukun yɛlɛ walisa hakili senu k’an ɲɛminɛ. An ka sɔn tɔɔw ka dɛmɛ na fana ni ninsɔndiya ye.—w18.02, ɲɛɛ 26.

Mun na an man ɲi ka tɛmɛ lolow wala filɛlikɛlaw fɛ walisa ka sinikow lɔn?

Kuun caaman b’o la. Nka a fɔlɔ ye ko Bibulu b’o kɛcogo fila bɛɛ haramuya.—wp18.2-F, ɲɛɛ 4-5.

Ni dɔ y’an weele ka na dumuni kɛ, an ka ɲi k’o koo jati cogo di?

N’an sɔnna weeleli dɔ la, an ka ɲi ka banba ka kɛ kaan kelen tigi ye (Zab. 15:4). Ni waajibiko tɛ, an man ɲi ka bari k’o lasa. N’a sɔrɔ a tigi ye baaraba kɛ walisa ka dumuni labɛn.—w18.03, ɲɛɛ 18.

Kunkanbaara kalifara balimacɛ minw ma, olu be se ka kalan juman lo sɔrɔ Timote fɛ?

Alako lo tun ye Timote ɲɛnako fɔlɔ ye ani a tun b’a janto tɔɔw la sɔbɛ la. A jijanin tun lo Ala ka baara la ani a tun ye min faamu, a tun b’o labato. A tora k’a yɛrɛ degi ani a tun lanin b’a la ko Jehova bena hakili senu di a ma. Diinan mɔgɔkɔrɔw ni tɔɔw be se ka Timote ladegi.—w18.04, ɲɛɛ 13-14.