Orobowamu facɛ Solomani ye saan 40 kɛ masaya la Israɛl (1 Mas. 11:42). Solomani sara saan 997 Krista tile ɲɛ. O kɔ, Orobowamu bɔra Zeruzalɛmu ka taga Sisɛmu walisa u k’a mɔ k’a kɛ masacɛ ye (2 Til. Kib. 10:1). Yala a tun be siranna ka kɛ masacɛ ye a facɛ nɔɔ na wa? Bɛɛ tun b’a lɔn ko hakilitigiyaba tun be Solomani fɛ. Yanni dɔɔni, Orobowamu tun bena a yira ni hakilitigiya b’a fɛ walisa ka koo gwɛlɛ dɔw ɲɛnabɔ.

Israɛldenw tun tɔɔrɔnin lo. O kama, u ye mɔgɔw ci ka taga a fɔ Orobowamu ye u b’a fɛ a ka min kɛ. U y’a fɔ a ye ko: “I facɛ ye sigɛnba la an kan. Sisan, ele k’o baaragwɛlɛn n’o sigɛn nin nɔgɔya an ye, i faa tun ye min la an kan, an bena baara kɛ i ye.”—2 Til. Kib. 10:3, 4.

Orobowamu ka ɲi ka desizɔn gwɛlɛ ta. Jama be min ɲinina a fɛ, n’a y’o kɛ, ale n’a somɔgɔw ani minw be masaso kɔnɔ, olu tɛna ɲɛnamaya kɛ faamanya la tugun i ko fɔlɔ la. Nka, n’a banna ka mɛnni kɛ u fɛ, u be se ka muruti a kama. A ye mun lo kɛ do? A kɔnna ka ladili ɲini cɛkɔrɔbaw fɛ. Olu lo tun y’a facɛ ladibagaw ye. Cɛkɔrɔbaw ko a ka mɛnni kɛ jama fɛ. Nka, Orobowamu ye ladili ɲini a filankuruw fɛ. A tugura olu ka ladiliw lo kɔ ani a y’a latigɛ ka dɔ fara jama ka sɛgɛn kan. A y’a fɔ jama ye ko: “Ne faa ye sigɛnba la aw kan, ne fana bena dɔ fara o sigɛn nin kan. Ne faa tun be to k’aw bugɔ ni busan ye, ne bena aw bugɔ ni ŋɔni ye.”—2 Til. Kib. 10:6-14.

An be kalan juman lo sɔrɔ o la? Bi, cɛkɔrɔba caaman b’an ka kafow kɔnɔ minw be baara kɛra Jehova ye kabi saan caaman. Olu be se k’an dɛmɛ ka desizɔn ɲumanw ta. N’an be mɛnni kɛ u fɛ, an b’a yira ko an ye hakilitigiw ye.—Zɔbu 12:12.

Orobowamu y’a ka kɛlɛdenw lajɛn walisa ka mɔgɔ murutininw kɛlɛ. Nka, Jehova ye kira  Semaya ci k’a fɔ u ye ko: “Aw man kan ka taga aw badenw, Isirayɛli mara mɔgɔw kɛlɛ. Aw kelen kelen bɛɛ ka kɔsegi aw ka soo, bari koo nin bɔra ne le la.”—1 Mas. 12:21-24. *

Yala a tun ka nɔgɔ Orobowamu fɛ ka mɛnni kɛ Jehova fɛ wa? Orobowamu tun y’a fɔ ko minw murutira ale kama, a bena olu “bugɔ ni busan ye.” Nka sisan, a ma foyi kɛ u la. Mɔgɔw tun bena mun lo miiri u ka masacɛ kura koo la do? (2 Tilew Kibaru 13:7 lajɛ). Mɔgɔw tun mana min o min fɔ masacɛ koo la, ale n’a ka sɔrɔdasiw “ye mɛnni kɛ Masaba ka fɔta la, u kɔsegira u ka soo ka kɛɲɛ ni Masaba ka kuma ye.”

O be mun lo yira an na? O b’a yira ko hakilitigiyako lo ka mɛnni kɛ Ala fɛ hali ni mɔgɔw b’an lɔgɔbɔ o kosɔn. N’an be mɛnni kɛ Ala fɛ, an koo bena diya a ye ani a bena an duga.—Deter. 28:2.

Yala Ala ye Orobowamu duga wa? Ɔnhɔn. Orobowamu tora ka masaya kɛ Zuda ni Bɛnzamɛn kun na ani a y’a latigɛ ka dugu kuraw lɔ. A ye dugu dɔw barika bonya “kosɔbɛ” fana (2 Til. Kib. 11:5-12). Min yɛrɛ kɔrɔtanin lo, o ye ko a ye Jehova ka sariyaw sira tagama wagati dɔ la. Komi Israɛl siya tan ka masaya tun y’a daminɛ ka boliw bato, mɔgɔ caaman tun be bɔ yen ka na Zeruzalɛmu. U tun b’o kɛ walisa ka Orobowamu ni tiɲɛn batoli lafasa (2 Til. Kib. 11:16, 17). Orobowamu ye mɛnni kɛ Jehova fɛ minkɛ, a ka masaya ye barika sɔrɔ.

Orobowamu ka masaya sabatira tuma min na, a ye koo dɔ kɛ min barila bɛɛ la. A banna ka Jehova ka sariyaw sira tagama ani a ye ngalon diinan lafasa! Mun na a y’o kɛ do? A bamuso tun ye Amoni ye. Yala ale lo ye Orobowamu lasun k’o kɛ wa? (1 Mas. 14:21). A ka kɛ min o min ye, jamanadenw bɛɛ tugura a kɔ. O kama, Jehova y’a to Ezipiti masacɛ Sisaki ye Zuda dugu caaman minɛ hali k’a sɔrɔ Orobowamu tun y’o duguw barika bonya!—1 Mas. 14:22-24; 2 Til. Kib. 12:1-4.

Koo tɔɔ juguyara tuma min na Sisaki n’a ka sɔrɔdasiw wulila Zeruzalɛmu kama. Masacɛ Orobowamu tun siginin lo o yɔrɔ lo la. O wagati la, kira Semaya ye Ala ka cii lase Orobowamu ni jamana ɲɛmɔgɔw ma ko: “Masaba y’a fɔ ko aw y’ale bila. K’o la, ale bena aw bila k’aw don Sisaki bolo.” Orobowamu y’o kololi ta cogo di? A sɔnna o kololi ma! Bibulu b’a fɔ ko: “Isirayɛlidenw ka ɲamɔgɔ nunu ni masacɛ y’u yɛrɛ majigi k’a fɔ ko: ‘Tiɲɛ be Masaba fɛ.’ ” O kama, Jehova ye Orobowamu kisi ani Zeruzalɛmu ma halaki.—2 Til. Kib. 12:5-7, 12.

O kɔ, Orobowamu tora ka masaya kɛ Zuda mara kun na. Sanni a ka sa, a ye kado caaman di a dencɛw ma. N’a sɔrɔ a y’o kɛ walisa u kana muruti u balimacɛ Abiya kama sabu ale lo tun bena sigi masaya la Orobowamu nɔɔ na (2 Tilew Kibaru 11:21-23). O koo la, Orobowamu y’a yira ko a ye hakilitigi ye ka tɛmɛ a kanbele tuma na.

Tiɲɛn lo ko Orobowamu y’a jija ka koo ɲuman dɔw kɛ. Nka Bibulu b’a fɔ ko: “Orobowamu ye kojugu kɛ.” Mun na do? Sabu “a tun ma Masaba ɲini n’a sɔbɛ ye.” O kama, a koo ma diya Jehova ye.—2 Til. Kib. 12:14.

An be kalan juman lo sɔrɔ Orobowamu ka koo la? A ye mɛnni kɛ Ala fɛ tuma dɔw la ani a ye koo ɲuman dɔw kɛ Jehova ka jama ye. Nka, a ma jɛnɲɔgɔnya teriman kɛ ni Jehova ye ani a m’a ɲini sɔbɛ la k’a koo diya a ye. O kama, a ye koo juguw kɛ ani a y’a daminɛ ka ngalon alaw bato. I be se k’i yɛrɛ ɲininga ko: “Yala Orobowamu ye mɛnni kɛ Jehova fɛ sabu a nimisara sɔbɛ la a ka filiw kosɔn ani a tun b’a fɛ k’a koo diya Ala ye wa? Wala a y’o kɛ sabu mɔgɔw lo ko a k’o kɛ?” (2 Til. Kib. 11:3, 4; 12:6). Kɔfɛ, Orobowamu y’a daminɛ ka koo jugu kɛ tugun. Ale n’a mamacɛ Dawuda kɔni tun tɛ kelen ye fewu! Tiɲɛn lo ko masacɛ  Dawuda ye jurumu kɛ, nka a nimisara sɔbɛ la a ka jurumuw kosɔn. Dawuda sii bɛɛ la, Jehova ni tiɲɛn batoli koo tun ka di a ye.—1 Mas. 14:8; Zab. 51:3, 19; 63:2.

Orobowamu ka koo b’an dɛmɛ ka koo caaman faamu. Mɔgɔ minw b’u seko kɛ k’u ka denbaya makoya jɔnjɔnw wasa ani u b’u jija ka baara ɲuman kɛ, olu ka kan ni tandoli ye. Nka, n’an b’a fɛ k’an koo diya Jehova ye, an ka ɲi k’a bato i ko a b’a fɛ cogo min na ani ka jɛnɲɔgɔnya barikaman kɛ n’a ye.

Walisa k’o laɲinita dafa, an ka ɲi ka Jehova kanu kosɔbɛ. Ɲɛyirali fɛ, n’an b’a fɛ tasuma mananin ka to, fɔɔ an ka to ka lɔgɔ don a la. O cogo kelen na, n’an b’a fɛ ka to ka Ala kanu kosɔbɛ, an ka ɲi k’a ka Kuma sɛgɛsɛgɛ tuma o tuma, ka miiri a kan ani k’an jija delili la (Zab. 1:2; Ɔrɔm. 12:12). O kanuya lo bena an lasun k’a ɲini k’an koo diya Jehova ye an ka kokɛtaw bɛɛ la. N’an ye jurumu kɛ, o kanuya lo bena an lasun fana ka nimisa ani ka yafa deli Jehova fɛ. O la, an tɛna kɛ i n’a fɔ Orobowamu. Nka, an bena to kantigiya la tiɲɛn batoli la.—Zude 20, 21.