1. An ninsɔndiyanin lo kuun jɔnjɔn juman lo kosɔn?

AN NINSƆN ka di kosɔbɛ k’a ye ko dɔ be farala Jehova Seerew hakɛ kan! Salon, an ye bibulukalan 10 000 000 ni kɔ lo kɛ. O b’a yira ka gwɛ ko Ala sagokɛlaw b’a tora u ka yeelen ka bɔ! Ka fara o kan, makodonmɔgɔ miliyɔn caaman nana Hakilijigi lajɛn na. O sen fɛ, u sera k’a lɔn Jehova ye kanuya min yira kunmabɔsara sababu fɛ.—1 Zan 4:9.

2, 3. a) Koo juman lo t’an bali ka “yeelen” bɔ? b) Ka kɛɲɛ ni Yezu ka kumaw ye minw be sɔrɔ Matiyo 5:14-16 kɔnɔ, an bena mun lo lajɛ barokun nin na?

² Duniɲa kuru bɛɛ kɔnɔ, Jehova sagokɛlaw be kaan minw fɔ, u tɛ kelen ye. Nka, o t’an bali k’an Faa Jehova tando ni kaan kelen ye (Yir. 7:9). An mana kɛ yɔrɔ o yɔrɔ ani an ka siyakan mana kɛ min o min ye, an be se ka “yeelen” bɔ duniɲa kɔnɔ.—Filip. 2:15.

³ Koo nunu b’a to an be nɔɔrɔ la Jehova kan ani o be kɛ sababu ye mɔgɔw be na tiɲɛn sira kan: an ka waajuli baara, an kaan bɛnnin lo ani an b’an jija fana ka to ɲɛɛ na Alako ta fan fɛ. Barokun nin na, an bena a filɛ an be sera k’o koo saba kɛ cogo min na.—Matiyo 5:14-16 kalan.

4, 5. a) Ka fara waajuli baara kan, an be se ka yeelen bɔ cogo wɛrɛ jumanw na? b) N’an be mɔgɔw minɛ teriya la ni ɲumanya ye, nafa juman lo b’o la? (Jaa lajɛ, barokun daminɛ na.)

⁴ Walisa an ka yeelen ka bɔ, a kɔrɔtanin lo an ka waajuli kɛ ani ka mɔgɔw dɛmɛ u ka kɛ Yezu ka kalandenw ye (Mat. 28:19, 20). Barokun dɔ tun bɔra saan 1925, zuwɛnkalo tile fɔlɔ ka Kɔrɔsili Sangaso kɔnɔ ani a kuun ko: “Yeelen, dibi kɔnɔ.” (angilikan na). A tun fɔra o barokun kɔnɔ ko laban loonw na, mɔgɔ si tɛ se ka to kantigiya la Matigi ye n’a ma “tɛmɛ sababuw fɛ k’a to a ka yeelen ka bɔ.” A tun fɔra yen fana ko a tigi ka ɲi ka kibaro diiman fɔ dugukolo kan mɔgɔw ye ani ka tagama ka kɛɲɛ ni Ala ka sariya tilenninw ye. Ka fara waajuli baara kan, an ka kɛwalew be nɔɔrɔ la Jehova kan. Mɔgɔ caaman b’an kɔrɔsi n’an be waajuli kɛra. O kama, an ka to ka yɛlɛmisɛn kɛ n’u ye ani k’u fo teriya la. O la, u bena koo ɲuman miiri an ni an ka Ala koo la.

⁵ Yezu y’a fɔ a ka kalandenw ye ko: “N’aw bena don luu min kɔnɔ, aw k’a fɔ ko Ala ka hɛrɛ kɛ o luu kɔnɔ mɔgɔw ye.” (Mat. 10:12). Yezu n’a ka cidenw tun be to ka waajuli kɛ yɔrɔ minw na, mɔgɔw tun ka teli ka lonanw ladon u ka soo kɔnɔ. Nka yɔrɔ caaman na bi, mɔgɔw man teli k’o kɛ. Mɔgɔw mana lonan ye u ka daa la, tuma caaman na u hakili siginin tɛ ani o ka teli k’u kɔnɔ gwan. Nka, n’an b’u minɛ teriya la ni ɲumanya ye, o be se k’a to u hakili be sigi. Waajuli kɛtɔ jamayɔrɔ la ni wotoro ye, an ka yɛlɛmisɛnw kɛ ani ka mɔgɔw fo teriya la. N’an b’o kɛ, o be se ka mɔgɔw lasun u k’u magwɛrɛ an na ani ka gafew ta. N’a sɔrɔ o yɛrɛ bena an dɛmɛ ka baro daminɛ n’u ye.

6. Balimacɛ dɔ n’a muso ye dɔ fara u ka waajuli baara kan cogo di?

⁶ Balimacɛ dɔ n’a muso kɔrɔla ani u be Angletɛri jamana na. Kɛnɛyako kosɔn, u tɛ se ka waajuli kɛ soo ni soo i ko fɔlɔ la. O n’a ta bɛɛ, u y’a latigɛ k’a to u ka yeelen ka bɔ. U ka luu gɛrɛfɛ, lakɔliso dɔ be yen. U b’an ka gafew bila tabali dɔ kan tuma min na bangebagaw be na u deenw ta o lakɔliso la. Bangebaga dɔw y’an ka gafe dɔw ta i n’a fɔ Les jeunes s’interrogent. Réponses pratiques, gafe fɔlɔ ni 2nan. Sungurunin dɔ ye piyɔniye ye kafo kelen kɔnɔ n’o balimacɛ n’a muso ye. A be to ka na fara u kan ka waajuli kɛ. A be mɔgɔw minɛ teriya la ani o balimacɛ n’a muso be jijalibaw kɛ k’a ɲini ka mɔgɔw dɛmɛ. O lo ye bangebaga dɔ lasun ka sɔn bibulukalan na.

7. Minw tagara kalifa jamana wɛrɛw la, i be se k’olu dɛmɛ cogo di?

⁷ Kɔsa la, mɔgɔ caaman bolila ka taga kalifa jamana wɛrɛw la. I be se ka mun lo kɛ k’o ɲɔgɔnna mɔgɔw dɛmɛ u ka Jehova n’a sagonata lɔn? A fɔlɔ, foli kɛcogo degi o mɔgɔw ka kaan na. Ka fara o kan, tɛmɛ JW Language porogramu fɛ walisa ka kumasen damanin degi. N’i y’o kɛ, o be se k’a to o mɔgɔw b’u mako don kibaro diiman na. Videwow ani gafe minw be sɔrɔ u ka kaan na jw.org kan, o yira u la.—Deter. 10:19.

8, 9. a) An be dɛmɛ juman lo sɔrɔ an ka lajɛn na min be kɛ lɔgɔkun kɔnɔ? b) Bangebagaw be se k’u deenw dɛmɛ cogo di u ka lakalitaw kɛ lajɛnw na?

⁸ Jehova b’an kanu. O kama, a ye labɛn kɛ walisa lajɛn min be kɛ lɔgɔkun kɔnɔ, o k’an dɛmɛ ka se waajuli la koɲuman. An be kalan min sɔrɔ o lajɛn na, o b’an caaman dɛmɛ an tɛ siran ka viziti kuraw ni bibulukalanw kɛ.

⁹ Mɔgɔ kura minw be na an ka lajɛnw na, u caaman y’a kɔrɔsi ko an ka denmisɛnw be lakalitaw kɛ. Bangebagaw, aw k’aw deenw dɛmɛ walisa u k’a to u ka  yeelen ka bɔ. Aw be se k’o kɛ cogo di do? Aw k’u degi u ka to ka lakalitaw kɛ u yɛrɛ kumacogo la. Mɔgɔ dɔw sɔnna tiɲɛn batoli ma sabu u y’a ye ko denmisɛn dɔw be lakalitaw kɛ n’u dusukun bɛɛ ye walisa k’u ka limaniya yira.—1 Kor. 14:25.

10. Gwa kɔnɔ batoli be se k’an dɛmɛ cogo di k’an ka denbaya ka kelenya sabati?

¹⁰ An be se k’a to an ka yeelen ka bɔ cogo wɛrɛ min na, o ye k’an ka denbaya ni kafo ka kelenya sabati. Ɲɛyirali fɛ, bangebagaw be se ka labɛn kɛ walisa ka gwa kɔnɔ batoli kɛ tuma o tuma. JW Telewisɔn ka videwo minw be to ka bɔ kalo o kalo, denbaya caaman b’o filɛ ɲɔgɔn fɛ. O kɔ, u ye kalan minw sɔrɔ o videwo la, u be baro kɛ k’a filɛ u be se k’o sira tagama cogo min na. Gwa kɔnɔ batoli ɲɛminɛtɔ, bangebaga ka ɲi ka nin to a hakili la: denmisɛnw mako be dɛmɛ min na, tuma caaman na, o tɛ kelen ye ni kanbelew ni sunguruw ta ye. I seko bɛɛ kɛ walisa aw ka gwa kɔnɔ batoli k’aw ka denbayamɔgɔ kelen kelen bɛɛ nafa.—Zab. 148:12, 13.

11-13. An bɛɛ be se ka mun lo kɛ ka kafo ka kelenya sabati ani ka tɔɔw dɛmɛ u k’a to u ka yeelen ka bɔ?

¹¹ Kanbelew ni sunguruw be se ka kafo ka kelenya sabati cogo di ani ka tɔɔw jija u k’a to u ka yeelen ka bɔ? Ɲɛyirali fɛ, n’i ye kanbele wala sunguru ye, a ɲini ka teriya kɛ ni mɔgɔkɔrɔbaw ye kafo kɔnɔ. U ɲininga ni bonya ye fɛɛn min y’u dɛmɛ ka kantigiya kɛ Jehova ye kabi saan caaman. O bena ele n’olu jija kosɔbɛ ani k’aw lasun k’a to aw ka yeelen be bɔ. I be se ka kalan nafaman caaman sɔrɔ u fɛ. Mɔgɔ kura minw be na an ka Masaya Boon na, an bɛɛ be se k’u bisimila koɲuman, kanbelew ni sunguruw ani mɔgɔkɔrɔbaw bɛɛ be se k’o kɛ. N’an y’o kɛ, o bena an ka kelenya sabati ani n’a sɔrɔ o bena mɔgɔ kuraw lasun u k’a to u ka yeelen ka bɔ. I ka ɲi ka min kɛ, o ye k’u fo, ka yɛlɛmisɛn kɛ n’u ye ni kɔnɔgwɛ ye, k’u dɛmɛ ka sigiyɔrɔ sɔrɔ ani k’u yira balimaw na. U ka ɲi k’a ye k’u nako diyara an ye.

¹² N’a ɲinina i fɛ ko i ka waajulibaara lajɛn ɲɛminɛ, i be se ka mɔgɔkɔrɔbaw dɛmɛ walisa u ka yeelen ka to ka bɔ. U be  se ka waajuli kɛ cogo nɔgɔman na kiin min kɔnɔ, u bila o yɔrɔ la. I be se k’u bila ni kanbele wala sunguru dɔ ye waajuli la. Mɔgɔkɔrɔbaw ani minw ka kɛnɛyako man ɲi, olu fari ka teli ka faga tuma caaman na sabu u tɛ se ka waajuli kɛ i ko fɔlɔ la. Nka, n’u y’a lɔn ko i b’i janto u la ani ko i b’u faamu, o bena u jija. Hali n’u kɔrɔla kosɔbɛ ani u be tiɲɛn sira kan kabi wagatijan, n’i b’u minɛ ni ɲumanya ye, o be se k’u jija ka to ka waajuli kɛ ni kisɛya ye.—Lev. 19:32.

¹³ Zaburu sɛbɛbaga y’a sɛbɛ ko: “Tiɲɛ na, balimaw ka to ɲɔgɔn fɛ, o ka ɲi, o ka di.” (Zaburuw 133:1, 2 kalan). A tun ka di Israɛldenw ye ka Jehova bato ɲɔgɔn fɛ. A tun be komi o be tulu min kɛ mɔgɔ kuun kan walisa k’a tigi mɔ. O tulu be mɔgɔ fari lafiya ani a kasa ka di. O cogo kelen na, an be se k’an balimaw barika bonya n’an b’u minɛ teriya la ani ka ɲumanya kɛ u ye. O b’a to kafomɔgɔw kaan be bɛn kosɔbɛ ka kɛ kelen ye. Yala i be se k’a ɲini k’i ka kafomɔgɔw lɔn ka ɲɛ wa?—2 Kor. 6:11-13.

14. I be se ka mun lo kɛ walisa i ka yeelen bɔ i sigiɲɔgɔnw cɛma?

¹⁴ I ka yeelen be se ka bɔ i mana kɛ yɔrɔ o yɔrɔ. I ka ɲumanya be se k’a to i sigiɲɔgɔnw b’a ɲini ka dɔ lɔn tugun Jehova koo la. I k’i yɛrɛ ɲininga ko: “N’ sigiɲɔgɔnw be mun lo miiri n’ koo la? Yala n’ ka luu n’a gɛrɛfɛyɔrɔw labɛnnin lo ka ɲɛ ani a saniyanin lo wa? Yala a tɛ n’ sigiɲɔgɔnw niin degun wa? Yala ne ye sigiɲɔgɔn ɲuman ye wa?” Jehova Seere wɛrɛw ɲininga u ka ɲumanya ani u ka ɲɛyirali ɲuman ye nɔɔ min to u somɔgɔw, u sigiɲɔgɔnw u ka baarakɛɲɔgɔnw wala u ka lakɔli filankuruw kan. N’i y’u ɲininga, siga t’a la, i bena lakalita ɲumanw mɛn.—Efɛz. 5:9.

15. Mun na a kɔrɔtanin lo kosɔbɛ an ka to ɲɛɛ na?

¹⁵ N’an b’a fɛ an ka yeelen ka to ka bɔ koɲuman, an ka ɲi k’a lɔn ko an be laban loonw na. Yezu y’a ka kalandenw jija siɲɛ caaman ko: “Aw ye to ɲana.” (Mat. 24:42; 25:13; 26:41). An be se k’a miiri ko “tɔɔrɔba” wagati tɔɔ ka jan ani ko a tɛna na k’an to sii la. N’an be n’o miiriya ɲɔgɔn ye, siga t’a la, an tɛna waajuli kɛ ni kɔrɔtɔ ye (Mat. 24:21). Sanni an ka to ka yeelen bɔ kosɔbɛ, an ka yeelen be se ka to ka dɔgɔya dɔɔni dɔɔni ani a laban, a yɛrɛ be se ka faga.

16, 17. I be se ka mun lo kɛ walisa ka to ɲɛɛ na?

¹⁶ Duniɲa ka koow be juguyara ka taga. O kama, a kɔrɔtanin lo an bɛɛ ka to ɲɛɛ na Alako ta fan fɛ. Jehova ye loon min latigɛ, an lanin b’a la ko duniɲa laban bena se o loon yɛrɛ lo la. Siga si t’o la (Mat. 24:42-44). Nka sanni o cɛ, fɔɔ an ka muɲu ani ka to ɲɛɛ na Alako ta fan fɛ. An ka ɲi ka Ala ka Kuma kalan loon o loon ani k’an jija delili la (1 Piyɛri 4:7). Balima minw be Jehova batora kabi saan caaman, a ɲini k’olu ladegi. An be se k’u dɔw ka maanaw kalan an ka sɛbɛw kɔnɔ. U dɔ ka maana lakalila saan 2012, awirilikalo tile 15nan ka Kɔrɔsili Sangaso kɔnɔ, ɲɛɛ 18-21nan na. O barokun ko: “Cramponné depuis 70 ans au pan du vêtement d’un Juif. ”

¹⁷ Baara kɛ Jehova ye bɛrɛbɛrɛ. Koo ɲuman kɛ tɔɔw ye ani wagati kɛ n’i balimaw ye. O la, i bena ninsɔndiyaba sɔrɔ ani a bena kɛ i ɲɛɛ na ko wagati be tɛmɛna joona joona (Efɛz. 5:16). Saan kɛmɛkulu tɛmɛnin na, an balimaw ye caaman kɛ waajuli baara la. Nka, an yɛrɛ tun t’a miiri ko an ka waajuli baara bena se hakɛ min na, bi a tɛmɛna o kan Jehova  ka dɛmɛ sababu fɛ. Tiɲɛn na, an ka yeelen be bɔra kosɔbɛ!

18, 19. Diinan mɔgɔkɔrɔw be se k’an dɛmɛ cogo di ka baara kɛ Jehova ye ni kisɛya ye? Ɲɛyirali dɔ fɔ.

¹⁸ Hali n’an be fili siɲɛ caaman, Jehova b’a to an b’a bato. Walisa k’an dɛmɛ k’o kɛ, a ye “boɲafɛnw” di an ma, o minw ye diinan mɔgɔkɔrɔw ye (Efɛzikaw 4:8, 11, 12 kalan). O kama, ni diinan mɔgɔkɔrɔw nana bɔ i ye, o bena wagati min kɛ n’i ye, a ɲini ka nafa sɔrɔ u ka hakilitigiya n’u ka ladiliw la.

¹⁹ Ɲɛyirali fɛ, balimacɛ dɔ n’a muso be Angletɛri jamana na ani u ye gwɛlɛya dɔw sɔrɔ u ka furu kɔnɔ. O kama, u ye dɛmɛ ɲini diinan mɔgɔkɔrɔ fila fɛ. Muso y’a fɔ ko a cɛɛ t’a ɲɛminɛna koɲuman Alako ta fan fɛ. Cɛɛ ko ale tɛ kalanfa ɲuman ye ani a sɔnna a ma ko ale ma labɛn kɛ walisa u ka gwa kɔnɔ batoli kɛ tuma o tuma. Diinan mɔgɔkɔrɔw y’o balimacɛ n’a muso dɛmɛ ka miiri Yezu ka ɲɛyirali koo la. Yezu y’a janto a ka kalandenw na. Diinan mɔgɔkɔrɔw ye cɛɛ jija a ka Yezu ladegi. U ye muso fana jija a ka muɲu a cɛɛ kɔrɔ. U ye ladiliw di u fila bɛɛ ma walisa u ka labɛn kɛ ɲɔgɔn fɛ ka to ka gwa kɔnɔ batoli kɛ n’u deen fila ye (Efɛz. 5:21-29). Kɔfɛ, diinan mɔgɔkɔrɔw ye cɛɛ tando a ka jijaliw kosɔn. U y’a jija fana a kana a fari faga ani a k’a jigi la Jehova kan walisa a ka hakili senu di a ma. O la, a bena kɛ furucɛ ɲuman ye min b’a ka denbaya ɲɛminɛ koɲuman Alako ta fan fɛ. Diinan mɔgɔkɔrɔw ka ɲumanya n’u ka kanuya y’a to o denbayamɔgɔw ka yeelen bɔra koɲuman.

20. N’i b’a to i ka yeelen ka bɔ, i bena nafa juman lo sɔrɔ o la?

²⁰ “Mɔgɔ minw bɛɛ be siran Masaba ɲa, n’u be taama ka kɛɲɛ n’a sago ye, olu dagamunin lo.” (Zab. 128:1). I bena ninsɔndiya sɔrɔ n’i b’a to i ka yeelen ka bɔ. O la, mɔgɔw kalan Ala koo la, i seko bɛɛ kɛ k’i ka denbaya ni kafo ka kelenya sabati ani to ɲɛɛ na Alako ta fan fɛ. Tɔɔw bena i ka ɲɛyirali ɲuman ye ani u bena a ɲini ka nɔɔrɔ la an Faa Jehova kan.—Mat. 5:16.