AN BƐƐ lanin b’a la ko Jehova b’a sagokɛlaw ɲɛminɛna ani ko a b’u dɛmɛna Alako ta fan fɛ “laban tuma” nin na (2 Tim. 3:1). Nka, an kelen kelen bɛɛ lo ka ɲi ka mɛnni kɛ a fɛ. An be se k’an ka koo suma ni Israɛldenw ta ye kongokolon kɔnɔ. N’u tun ye buru fiyɛkan mɛn, u tun ka ɲi ka dɔ kɛ dɔ ye.

Jehova y’a kɛ Musa ye buru fila dilan ni warigwɛ ye walisa u ka fiyɛ janko “ka jama lajɛn, walima n’u ka kan ka wili ka taga.” (Nɔnb. 10:2). Sarakalasebagaw tun ka ɲi k’o buruw fiyɛ cogo caaman na walisa k’a yira jama na u ka ɲi ka min kɛ (Nɔnb. 10:3-8). Bi, Ala sagokɛlaw be cikanw sɔrɔ cogo caaman na fana. An bena u sɔrɔcogo saba lajɛ barokun nin na ani k’u suma ni buru fiyɛkanw ye Israɛldenw ka wagati la. Bi, u be Ala sagokɛlaw weele lajɛnbaw la, diinan mɔgɔkɔrɔw be fɔrɔmasɔn sɔrɔ ani kafow ka labɛnw be lakuraya wala ka yɛlɛma.

Ni Jehova tun b’a fɛ “jama bɛɛ ka lajɛn” kɔrɔn fan fɛ ɲɔgɔnkunbɛn fanibugu daa la, sarakalasebagaw tun be buru fila bɛɛ fiyɛ (Nɔnb. 10:3). Israɛl siya 12 bɛɛ tun b’o buru fiyɛkan mɛn. U tun tilanna yɔrɔ naani ani u tun siginin be ka fanibugu lamini. Minw yɔrɔ tun man jan fanibugu la, olu tun be se joona. Nka minw yɔrɔ tun ka jan, u tun be wagati caaman ta ani ka jijalibaw kɛ ka sɔrɔ ka se. A mana kɛ min o min ye, Jehova tun b’a fɛ bɛɛ ka lajɛn ani k’ale ka cikanw lamɛn.

Bi, Ala sagokɛlaw tɛ lajɛn fanibugu daa la. Nka, u b’an weele lajɛnbaw la. U dɔw ye tile saba lajɛnbaw ani lajɛn kɛrɛnkɛrɛnnin wɛrɛw ye. An be kunnafoniw ani cikan nafamanw sɔrɔ yen. Duniɲa kuru bɛɛ kɔnɔ, Jehova sagokɛlaw bɛɛ b’o kalan kelen lo sɔrɔ. Minw be sɔn o welekan ma, a ka di olu ye ka lajɛn ɲɔgɔn fɛ ninsɔndiya la. Dɔw bɔyɔrɔ ka jan ka tɛmɛ dɔw kan. Nka u b’a lɔn ko n’u nana o lajɛnw na, u bena nafaba sɔrɔ o la.

Minw bɔyɔrɔ ka jan kosɔbɛ, yala olu fana be se ka nafa sɔrɔ o lajɛnbaw la wa? Ɔnhɔn. Fɛɛrɛ kuraw sababu fɛ, u caaman be se ka lajɛnba ka kalanw lamɛn. A yɛrɛ be kɛ komi u b’o lajɛnba kɛyɔrɔ la. Ɲɛyirali fɛ wagati dɔ la, an ka sigiyɔrɔsoba ka lasigiden dɔ nana Benɛn tɔnbolo la. A ye kalan min kɛ, balimaw tora fɔɔ Arlit k’o lamɛn telewisɔn na. Arlit ye dugu dɔ ye Nizɛr kongojalan kɔnɔ ani u be iraniyɔmu bɔ yen. Balimaw ni makodonmɔgɔ minw tun be yen, u bɛɛ lajɛnin tun ye mɔgɔ 21 ye. Hali n’u yɔrɔ tun ka jan, a tun be u ɲɛɛ na k’u lajɛnnin lo  ni tɔɔw bɛɛ ye minw y’o kalan lamɛn. U bɛɛ lajɛnnin tun ye mɔgɔ 44 131 ye. Balimacɛ dɔ y’a sɛbɛ ko: “An b’aw fo n’an dusu bɛɛ ye sabu a’ y’a to an sera k’o kalan lamɛn telewisɔn na. O y’a yira an na tugun ko an koo ka gwɛlɛ aw ma kosɔbɛ.”

Ni sarakalasebagaw tun ye buru kelen dɔrɔn fiyɛ, “kuntigi minnu bɛ Israɛl bɔnsɔn waa caman kun na,” olu dɔrɔn lo tun ka ɲi ka lajɛn fanibugu daa la (Nɔnb. 10:4, Bible senuma). O yɔrɔ la, u tun be kunnafoniw ani fɔrɔmasɔn sɔrɔ ka bɔ Musa fɛ. O tun b’u dɛmɛ k’u ka kunkanbaaraw dafa Israɛldenw cɛma. N’i tun y’o kuntigiw dɔ ye, yala i tun tɛna i seko bɛɛ kɛ ka taga o lajɛn na ani ka nafa sɔrɔ a la wa?

Bi, diinan mɔgɔkɔrɔw tɛ ‘kuntigiw’ ye ani Ala y’a ka sagakulu min kalifa u ma, u t’u fanga digi o kan (1 Piyɛri 5:1-3). Nka, u b’u seko bɛɛ kɛ k’u janto a la. O kama, n’u weelela fɔrɔmasɔn na i n’a fɔ Masaya cidenyabaara lakɔli la, u be sɔn o welekan ma. O fɔrɔmasɔnw b’u dɛmɛ k’a faamu cogo min na u be se ka kafo ka koow ɲɛnabɔ koɲuman. O b’a to diinan mɔgɔkɔrɔw ani balima tɔɔw b’u magwɛrɛ kosɔbɛ Jehova la. Hali n’i ma deli ka taga o lakɔliw dɔ la, siga t’a la i be nafa sɔrɔla u la balimaw sababu fɛ minw y’o lakɔliw kɛ.

Tuma dɔw la, sarakalasebagaw tun be buru fiyɛkan bonya. O tun b’a yira ko Jehova b’a fɛ jama bɛɛ ka wuli ka taga (Nɔnb. 10:5, 6). Ni jama tun be wulila ka taga, u tun b’o kɛ cogo labɛnnin na. Nka, o tun tɛ ɲɛ jijaliba kɔ. Tuma dɔw la, n’a sɔrɔ Israɛlden dɔw tun t’a fɛ ka taga yɔrɔ wɛrɛ la. Mun na do?

N’a sɔrɔ dɔw tun b’a jati ko buru be fiyɛ joona joona kojugu ani k’o be bari u la. “Sankaba nin tun be lɔ tuma dɔ k’a ta sufɛ fɔɔ sɔgɔma dɔrɔn.” Tuma wɛrɛw la, a tun be se “ka tile fila kɛ, walima kalo kelen,” wala ka tɛmɛ o kan yɛrɛ (Nɔnb. 9:21, 22). Israɛldenw wulila ka taga siɲɛ joli? Nɔnburuw sapitiri 33 be yɔrɔ 40 ɲɔgɔn kofɔ, u sigira yɔrɔ minw na.

N’a sɔrɔ dɔw tun be sumayɔrɔ sɔrɔ tuma dɔw la. Ninsɔndiyaba tun lo u fɛ k’o yɔrɔ ɲɔgɔn sɔrɔ “kongokolonba kabakoman” kɔnɔ (Deter. 1:19). O kama, u tun be se k’a miiri ko n’u tagara, u tɛna o yɔrɔ ɲuman ɲɔgɔn sɔrɔ.

Ni jama tun y’a daminɛ ka taga, n’a sɔrɔ a tun ka gwɛlɛ dɔw fɛ k’u tagatuma kɔnɔ. Bɛɛ tun be buru fiyɛkanba mɛn, nka bɛɛ tun tɛ taga wagati kelen na. N’u ye buru fiyɛkan bonya, Israɛl siya minw be kɔrɔn fɛ, olu b’a daminɛ ka taga. O ye Zuda, Isakari ani Zabulɔn kɔmɔgɔw ye (Nɔnb. 2:3-7; 10:5, 6). O kɔ, sarakalasebagaw tun be buru fiyɛkan bonya siɲɛ filanan na walisa Israɛl siya saba minw be worodugu fan fɛ olu ka taga. Sarakalasebagaw tun b’a kɛ o cogo la fɔɔ jama bɛɛ be taga.

N’a sɔrɔ a ka gwɛlɛ i ma ka sɔn yɛlɛmani dɔw ma Jehova ka ɔriganisasiyɔn kɔnɔ. Mun na do? N’a sɔrɔ i b’a miiri ko yɛlɛmaniw ka ca kojugu. Wala koow tun be kɛ cogo min na, n’a sɔrɔ o tun ka d’i ye ani i tun t’a fɛ o ka yɛlɛma. A mana kɛ min o min ye, n’a sɔrɔ a ka gwɛlɛ i ma ka muɲu walisa ka koow kɛ ka kɛɲɛ ni yɛlɛmaniw ye. Nka n’an be koow kɛ ka kɛɲɛ n’u ye, an bena a ye k’o b’an nafa ani ko Jehova dusu ka di an kɔrɔ.

Musa ka wagati la, Jehova ye mɔgɔ miliyɔn caaman ɲɛminɛ kongokolon kɔnɔ: cɛɛw, musow ani denmisɛnw. Ni Jehova tun m’a janto u la ani k’u ɲɛminɛ, u tun tɛna kisi. Bi, Jehova b’an ɲɛminɛna duniɲa juguman nin laban tuma na. A b’an dɛmɛna an k’an magwɛrɛ a la ani an ka limaniya sabatinin ka to. Israɛlden kantigiw tun be koow kɛ ka kɛɲɛ ni buru fiyɛkanw ye. O cogo kelen na, an fana k’an seko bɛɛ kɛ ka kolo Jehova ye!