1. Ka siran Jehova ɲɛ, o kɔrɔ ko di? Minw be Jehova kanu, mun na u ka ɲi ka siran a ɲɛ?

KERECƐNW be Ala kanu ani u be siran a ɲɛ. Dɔw be se k’a miiri k’o koo fila tɛ taga ɲɔgɔn fɛ. Nka siranya min b’a to mɔgɔ jaa be tigɛ ani a be yɛrɛyɛrɛ, an kaan t’o lo ma. An bena kuma siranya min koo la, mɔgɔ minw be n’o ye, Ala koo ka di u ye ani u be bonyaba la a kan. U t’a fɛ k’u sankolola Faa dusu tiɲɛ sabu jɛnɲɔgɔnya min b’u ni ɲɔgɔn cɛ, u t’a fɛ k’o nagasi.—Zab. 111:10; Talenw 8:13.

2. Ka kɛɲɛ ni Zaburuw 86:11 ye, an bena koo fila jumanw lo lajɛ?

² Zaburuw 86:11 kalan. * N’an miirila o vɛrise kɔnɔnakumaw kan, an b’a faamu ko masacɛ Dawuda tun b’a lɔn ko a kɔrɔtanin lo kosɔbɛ ka kɛ ni Ala ɲɛsiran ye. A ye min fɔ a ka delili la, an k’a filɛ an be se k’o sira tagama cogo min na. Fɛɛn minw kama an ka ɲi ka bonyaba la Ala tɔgɔ kan, an bena kɔn k’u dɔw lajɛ. O kɔ, an bena a ye cogo min na an be se k’a yira loon o loon ko an be bonya la Ala tɔgɔ kan.

3. N’a sɔrɔ koo juman lo ye Musa dɛmɛ a tora ka bonya la Ala tɔgɔ kan?

³ Loon dɔ, Musa mɔsɔnnin tora farawo kɔnɔ ani a ye Jehova nɔɔrɔ tɛmɛtɔ ye. Miiri k’a filɛ o koo ye  min kɛ a la. N’a sɔrɔ adamaden si tun ma deli k’o koo kabakoman ɲɔgɔn ye ka kɔn Yezu natuma ɲɛ dugukolo kan! Musa ye kuma nunu mɛn: “Masaba, Masaba, makaritigi, hinɛbaga Ala. A te dimi joona, a ka ɲumanya n’a ka kantigiya ka bon. A b’a ka ɲumanya yira adamadenw kɔmɔgɔw la fɔɔ filankuru caaman. A be tilenbaliyako, ni murutili, ani hakɛ yafa.” (Ɛkiz. 33:17-23; 34:5-7). A be komi mɛlɛkɛ dɔ lo y’o kumaw fɔ. Musa ye min ye ani a ye min mɛn, a tun mana Jehova tɔgɔ weele, n’a sɔrɔ a hakili tun be jigi o la. O kama, a ye Israɛldenw lasɔmi ko: “Aw [ka] siran nin tɔgɔ nɔɔrɔman ani nin siranyatɔgɔba ɲa.”—Deter. 28:58, Biblu Ala ta Kuma.

4. Mun lo be se k’an dɛmɛ an ka siran Ala ɲɛ kosɔbɛ?

⁴ N’an be miiri Jehova tɔgɔ koo la, a ka ɲi an ka miiri a ye Ala sifa min ye. A ka ɲi an ka miiri fana a jogow koo la i n’a fɔ a ka setigiya, hakilitigiya, tilenninya ani kanuya. N’an be miiri o jogow ani jogo wɛrɛw koo la, an bena siran Ala ɲɛ kosɔbɛ.—Zab. 77:12-16.

5-6. a) Ala tɔgɔ kɔrɔ ko di? b) Ka kɛɲɛ ni Ɛkizɔdi 3:13, 14 ani Ezayi 64:7 ye, cogo jumanw na Jehova b’a kɛ a sago ka dafa?

⁵ Ala tɔgɔ kɔrɔ ko di? Lɔnnikɛla caaman fɛ, a be komi Ala tɔgɔ Jehova kɔrɔ ko: “A b’a kɛ a be kɛ a ye.” O b’an hakili jigi ko foyi tɛ se k’a bali a k’a sagonata dafa ani a mana min o min latigɛ, a be se k’o kɛ. Cogo di do?

⁶ Cogo jumanw na Jehova b’a kɛ a sago ka dafa? A fɔlɔ, a b’a fɛ ka kɛ min o min ye walisa k’a sagonata dafa, a be se ka kɛ o ye (Ɛkizɔdi 3:13, 14 kalan). O ye Ala ka jogo kabakomanw dɔ ye ani an ka gafew be to k’an jija an ka miiri o jogo koo la. A filanan, Jehova b’a fɛ a sagokɛla dafabaliw ka kɛ min o min ye walisa k’a bato ani k’a sagonata dafa, a be se k’a kɛ u be kɛ o ye (Ezayi 64:7 kalan). O cogow lo la Jehova b’a  sagonata dafa. Foyi tɛ se k’a bali k’a ka laɲinita dafa.—Ezayi 46:10, 11.

7. An be se ka mun lo kɛ walisa ka to k’an sankolola Faa waleɲuman lɔn kosɔbɛ?

⁷ An sankolola Faa ye koo minw kɛ ani a y’an dɛmɛ an sera ka koo minw kɛ, an ka to ka miiri o la. O cogo la, an bena to k’a waleɲuman lɔn kosɔbɛ. Ɲɛyirali fɛ, n’an be miiri a ka danfɛnw bɛɛ koo la, a ka kokɛtaw b’an kabakoya yɛrɛ le! (Zab. 8:4, 5). Jehova y’an dɛmɛ an sera ka min kɛ walisa k’a sago dafa, an ka to ka miiri o la fana. O bena an lasun ka bonya la a kan kosɔbɛ. Tiɲɛn na, Jehova tɔgɔ ye siranyatɔgɔba ye! O tɔgɔ b’a yira an Faa ye Ala sifa min ye, a ye koo minw bɛɛ kɛ ani a bena koo minw bɛɛ kɛ.—Zab. 89:8, 9.

8. Ka kɛɲɛ ni Deteronɔmu 32:2, 3 ye, Jehova b’a fɛ a sagokɛlaw ka mun lo kɛ n’a tɔgɔ ye?

⁸ Dɔɔni sanni Israɛldenw ka don layidu jamana kɔnɔ, Jehova ko Musa ka dɔnkili dɔ kumadenw sɛbɛ. A ko a ka Israɛldenw degi o dɔnkili la fana (Deter.31:19). N’an be miiri Deteronɔmu 32:2, 3 kɔnɔnakumaw kan, an b’a faamu ko Jehova t’a fɛ a tɔgɔ ka kɛ gundo ye. (A kalan.) A t’a fɛ fana mɔgɔw ka ban k’ale tɔgɔ weele sabu u b’a jati k’o tɔgɔ ka senu kojugu. Nka, a b’a fɛ bɛɛ k’o tɔgɔ lɔn! Musa ye Israɛldenw kalan Jehova n’a tɔgɔ nɔɔrɔman koo la. O tun ye nɛɛmaba ye u fɛ! Musa ye Israɛldenw kalan min na, o y’u ka limaniya barika bonya ani k’u jija. O y’u nafa i ko sanji musumusu be yiriw ni biinw nafa cogo min na. An be se ka mun lo kɛ walisa an ka kalanw k’an lamɛnbagaw nafa o cogo la?

9. An be se ka dɛmɛ don cogo di walisa ka Jehova tɔgɔ saniya?

⁹ N’an be waajuli kɛra soo ni soo wala jamayɔrɔw la, an be se ka Jehova tɔgɔ yira mɔgɔw la Bibulu kɔnɔ. An ka sɛbɛw cɛ ka ɲi, an ka videwow ka di ani fɛɛn minw b’an ka site web kan, u be nɔɔrɔ la Jehova kan. An be se k’o fɛɛnw yira mɔgɔw la. An be se ka sababuw sɔrɔ baarakɛyɔrɔ la, lakɔliso wala n’an be tagara voyazi la k’an ka Ala kanulen n’a ka jogow kofɔ mɔgɔw ye. Jehova sagonata ye min ye adamadenw ani dugukolo koo la, an be se k’o fɔ tɔɔw ye. N’a sɔrɔ a bena kɛ u siɲɛ fɔlɔ ye k’a faamu ko Jehova b’an kanu kosɔbɛ. N’an be tiɲɛn fɔ mɔgɔw ye an Faa kanutigi koo la, an be dɛmɛ don walisa a tɔgɔ ka saniya. An be mɔgɔw dɛmɛ u k’a faamu ko u y’u kalan min na Jehova koo la, o ye ngalon lo ye. An b’u kalan min na ka bɔ Bibulu kɔnɔ, fɛɛn si tɛ mɔgɔ barika bonya ka se o ma.—Ezayi 65:13, 14.

10. N’an be bibulukalan kɛra ni mɔgɔw ye, mun na an man ɲi k’u kalan dɔrɔn Ala ka sariyaw la?

¹⁰ N’an be bibulukalan kɛra ni mɔgɔw ye, an b’a fɛ k’u dɛmɛ u ka Jehova tɔgɔ lɔn ani u k’a weele. An b’a fɛ k’u dɛmɛ fana u ka Jehova lɔn kosɔbɛ. Yala an bena se k’o kɛ n’an b’u kalan dɔrɔn Ala ka sariyaw n’a ka cikanw na wa? Bibulu kalanden ɲuman be se ka Ala ka sariyaw lɔn ani u koo yɛrɛ be se ka diya a ye. Nka, yala a bena mɛnni kɛ Jehova fɛ sabu a b’a kanu wa? A to i hakili la ko Adama ni Awa tun be Ala ka sariya lɔn. Nka, u tun t’o sariya Dibaga kanu sɔbɛ la (Zɛnɛzi 3:1-6). O la, an man ɲi ka mɔgɔw kalan dɔrɔn Ala ka cikanw n’a ka sariya tilenninw na.

11. N’an b’an ka Bibulu kalandenw kalanna Ala ka sariyaw la, an be se k’u dɛmɛ cogo di walisa u k’o sariyaw Dibaga kanu?

¹¹ Jehova ka sariyaw b’an nafa tuma bɛɛ (Zab. 119:97, 111, 112). Nka, n’a sɔrɔ an ka Bibulu kalandenw tɛna u jati o cogo la, n’u  m’a faamu ko Jehova y’o sariyaw sigi sabu a b’an kanu. O la, an be se k’u ɲininga ko: “Ele fɛ, mun na Ala b’a ɲini a sagokɛlaw fɛ u ka koo dɔ kɛ wala u kana a kɛ? O be mun lo yira an na a koo la?” An ka Bibulu kalandenw dɛmɛ u ka miiri Jehova koo la ani an k’u dɛmɛ a tɔgɔ nɔɔrɔman koo ka diya u ye sɔbɛ la. N’an y’o kɛ, an ka teli k’u dusukun sɔrɔ ani Ala ka sariyaw koo bena diya u ye. Nka o dɔrɔn tɛ, u bena o sariyaw Dibaga fana kanu (Zab. 119:68). U ka limaniya barika bena bonya ani u bena se ka kɔrɔbɔliba nataw muɲu.—1 Kor. 3:12-15.

12. Wagati dɔ la, mun lo y’a to Dawuda kɛra kɔnɔ fila tigi ye? O nɔfɛkow kɛra mun lo ye?

¹² Zaburuw 86:11 kɔnɔ, Dawuda y’a fɔ Jehova ye ko: “Ne jusukun kɛ jusukun kelen ye.” O kumaw fana kɔrɔtanin lo kosɔbɛ. Dawuda ka ɲɛnamaya la, a y’a ye ko a ka nɔgɔ ka kɛ kɔnɔ fila tigi ye. Loon dɔ, a tun b’a ka sanbon kan ani a ye cɛɛ wɛrɛ muso ye a be kora. O muso tɔgɔ ko Batiseba. O wagati la, yala Dawuda tun be Jehova bato ni dusukun kelen ye, wala a tun ye kɔnɔ fila tigi ye? A tun be Jehova ka sariya nin lɔn: “Aw ɲaa kana bɔ aw mɔgɔɲɔgɔn muso fɛ.” (Ɛkiz. 20:17). O n’a ta bɛɛ, a tora ka Batiseba filɛ. Dawuda kɛra kɔnɔ fila tigi ye: A tun be Batiseba fɛ ani a tun b’a fɛ fana k’a koo diya Jehova ye. Kabi wagatijan, Dawuda tun be Jehova kanu ani a tun be ni Ala ɲɛsiran ye. Nka, a y’a to a ka nege juguw ye see sɔrɔ a kan. O kama, a ye kojugubaw kɛ. O y’a to a ye Jehova tɔgɔ nɔgɔ ani ka tɔɔrɔba lase mɔgɔ jalakibaliw ma i n’a fɔ a somɔgɔw.—2 Sam. 11:1-5, 14-17; 12:7-12.

13. An b’a lɔn cogo di ko Dawuda ye Jehova bato n’a dusu bɛɛ ye kokura?

¹³ Jehova ye Dawuda kolo ani Dawuda ye jɛnɲɔgɔnya ɲuman kɛ n’a ye kokura (2 Sam. 12:13; Zab. 51:4-6, 19). Dawuda ye gwɛlɛya minw sɔrɔ tuma min na a tun tɛ Jehova batora n’a dusu bɛɛ ye, a hakili tora o la. A ye min sɛbɛ Zaburuw 86:11 kɔnɔ, o be se ka bayɛlɛma fana ko: “N’ dɛmɛ n’ k’i bato ni n’ dusu bɛɛ ye.” Yala Jehova ye Dawuda dɛmɛ a k’a bato n’a dusu bɛɛ ye wa? Ɔnhɔn, sabu Ala ka Kuma b’a fɔ ko Dawuda tugura Jehova “Ala kɔ ni a jusukun bɛɛ ye.”—1 Mas. 11:4, Biblu Ala ta Kuma; 1 Mas. 15:3.

14. An ka ɲi k’an yɛrɛ ɲininga mun lo la ani mun na?

¹⁴ Dawuda ka koo b’an jija ani k’an  lasɔmi. A ye jurumuba min kɛ, o ye lasɔmini ye Ala sagokɛlaw fɛ bi. An be Jehova batora a mɛɛnna wo, a ma mɛɛn wo, a ka ɲi an k’an yɛrɛ ɲininga ko: “Yala n’ jijanin lo walisa Sutana kana se ka n’ bali ka Jehova bato ni n’ dusu bɛɛ ye wa?”

15. N’an ye jaa dɔ ye min be kakalayako nege don an na, Ala ɲɛsiran be se k’an dɛmɛ cogo di?

¹⁵ Ɲɛyirali fɛ, n’i ye jaa dɔ ye telewisɔn wala ɛntɛrɛnɛti kan min be se ka kakalayako nege don i la, i be mun lo kɛ? A ka nɔgɔ k’a miiri k’o jaa wala o filimu tɛ porno lo ye tigitigi. Nka, kɔni Sutana tɛ tɛmɛna o lo fɛ k’i bali ka Jehova bato n’i dusu bɛɛ ye? (2 Kor. 2:11). An be se k’o jaa suma ni jende fitinin ye mɔgɔ be lɔgɔ belebeleba ci ni min ye. A daminɛ na, a tigi be nɔɔ fitinin kɛ lɔgɔ kan n’o jende dadiman ye. O kɔ, a be to ka jende jigi lɔgɔ kan fɔɔ a be taga fɛrɛn. Jaa minw be kakalayako nege don mɔgɔ la, o be se ka kɛ i n’a fɔ o jende fitinin dadiman. A daminɛ na, a be se ka kɛ dɔ ɲɛɛ na ko farati si t’a la k’o jaaw filɛ. Nka dɔɔni dɔɔni, o be se k’a to a tigi be Jehova hakɛ ta. O la, kana a to fɛɛn bɛnbali si ka don i hakili la! To ka Jehova bato ni dusukun kelen ye ani kɛ ni Ala ɲɛsiran ye!

16. Ni koo jugu nege donna an na, an ka ɲi k’an yɛrɛ ɲininga mun lo la?

¹⁶ Jaa minw be kakalayako nege don mɔgɔ la, k’o niin bɔ a la, Sutana be tɛmɛ fɛɛn wɛrɛw fɛ k’an lasun ka koo jugu kɛ. An b’o kɔrɔbɔli ta cogo di? A ka nɔgɔ k’a miiri k’o fɛɛnw tɛ kojuguba ye. An be se k’a miiri ko: “U tɛna n’ gwɛn ka bɔ kafo kɔnɔ o kosɔn. O kɔrɔ ko kojuguba tɛ.” O miiriya bɛnnin tɛ fewu! A ka ɲi an k’an yɛrɛ ɲininga ko: “Yala Sutana tɛ tɛmɛna o kɔrɔbɔli lo fɛ walisa ka n’ bali ka Jehova  bato ni n’ dusu bɛɛ ye wa? Ni n’ y’a to n’ ka nege juguw ye see sɔrɔ n’ kan, yala n’ tɛna Jehova tɔgɔ nɔgɔ wa? Yala o kɛwale bena a to n’ be n’ magwɛrɛ Ala la, wala a bena a to n’ be n’ yɔrɔ janya a la le?” Miiri o ɲiningaliw la. Hakilitigiya deli Jehova fɛ walisa k’u jaabi ni kɔnɔgwɛ ye (Zaki 1:5). N’i y’o kɛ, o bena i latanga kosɔbɛ. O bena i dɛmɛ ka lɔ kelen kan kɔrɔbɔliw ɲɛ i ko Yezu. A ko: “Taga ka bɔ yan Sutana.”—Mat. 4:10.

17. Mun na an man ɲi ka kɛ kɔnɔ fila tigiw ye? A ɲɛfɔ.

¹⁷ A man ɲi an ka kɛ kɔnɔ fila tigi ye. Miiri k’a filɛ ko spɔr jɛnkulu dɔ kɔnɔ, bɛɛn tɛ yen. Dɔw b’a fɛ olu dama lo ka tɔgɔba sɔrɔ, dɔ wɛrɛw t’a fɛ ka spɔr sariyaw labato. Dɔw fana tɛ bonya la fewu u ɲɛminɛbaga kan. O jɛnkulu man teli ka see sɔrɔ. Nka jɛnkulu mɔgɔ minw kaan bɛnnin lo, olu lo ka teli ka see sɔrɔ. I dusukun be se ka kɛ i k’o jɛnkulu, n’i ka miiriyaw, i negelakow ani i dusukunnakow bɛɛ la, Jehova sago kɛli lo y’i ɲɛnako fɔlɔ ye. A to i hakili la ko Sutana b’a fɛ i ka kɛ kɔnɔ fila tigi ye. A b’a fɛ i ka miiriyaw, i negelakow ani i dusukunnakow kana bɛn kelen ma ani u ka Jehova ka sariyaw kɛlɛ. Nka, ele ka ɲi ka Jehova bato n’i dusu bɛɛ ye (Mat. 22:36-38). Kana a to abada Sutana k’a to i be kɛ kɔnɔ fila tigi ye!

18. Ka kɛɲɛ ni Mise 4:5 ye, i jijanin lo ka mun lo kɛ?

¹⁸ I ko Dawuda, Jehova deli ko: “Ne jusukun kɛ jusukun kelen ye, ka i tɔgɔ ɲasiran don ne ra.” I seko bɛɛ kɛ walisa ka koow kɛ ka kɛɲɛ n’o delili ye. Loon o loon, i mana desizɔn o desizɔn ta, i jija k’a yira o fɛ ko i be bonyaba la Jehova tɔgɔ senuman kan. O la, e min ye Jehova Seere ye, i bena nɔɔrɔ la a tɔgɔ kan (Talenw 27:11). I ko kira Mise, an bɛɛ bena se k’a fɔ ko: “An kɔni, an na taama Matigi, an ka Ala tɔgɔ la don o don fo badaa.”—Mise 4:5, Bible senuma.