1. Mun na Jehova y’a yɛrɛ suma ni denbatigi ye?

“MUSO be ɲinɛ a ka denɲɛnin kɔ wa?” Jehova lo y’o ɲiningali kɛ kira Ezayi ka wagati la. O kɔ, a y’a fɔ a ka jama ye ko: “Hali ni muso be ɲinɛ a deenw kɔ, ne te ɲinɛ i kɔ.” (Ezayi 49:15). Jehova man teli k’a yɛrɛ suma ni denbatigi ye. Nka nin sen fɛ, a y’o kɛ walisa k’a yira ko ale b’a sagokɛlaw kanu kosɔbɛ i ko muso b’a deen kanu cogo min na. Jasmin ko: “N’i y’i deen denbaya kɛ, aw kanu be don ɲɔgɔn na kosɔbɛ ani o kanuya be mɛɛn aw sii bɛɛ la.” Denbatigi caaman sɔnna a ma k’o ye tiɲɛn ye.

2. Ni Jehova sagokɛla dɔ y’a yɔrɔ janya a la, o be mun lo kɛ Jehova la?

² Hali ni Jehova sagokɛla kelen ye lajɛntaga ni waajuli dabila, Jehova b’o kala ma. O la, miiri k’a filɛ a dusu be kasi cogo min na k’a ye ko saan o saan, a sagokɛla waa caaman be suma Alako ta fan fɛ. *

3. Jehova be mun lo fɛ?

³ Balima minw sumana Alako ta fan fɛ, u caaman be kɔsegi Jehova ma ani an ninsɔn ka di o kosɔn! Jehova b’a fɛ u k’o lo kɛ, an fana b’o lo fɛ (1 Piyɛri 2:25). An be se k’u dɛmɛ cogo di u ka kɔsegi Jehova ma? Sanni an k’o ɲiningali jaabi, an k’a filɛ fɔlɔ fɛɛn min kama dɔw be lajɛntaga ni waajuli dabila.

4. Mun lo ye dɔw sɔrɔ u ka baloɲini baara kosɔn?

⁴ Dɔw y’a to u ka baloɲini baara kɛra u ɲɛnako fɔlɔ ye. Balimacɛ Hung * be Azi worodugu ni kɔrɔn cɛ ani a ko: “N’ y’a to n’ ka baloɲini baara ye n’ kuun bɛɛ ta. N’ ye hakilintanya kɛ k’a miiri ko ni n’ ye wari caaman sɔrɔ, n’ bena se ka Jehova sago kɛ bɛrɛbɛrɛ. O la, n’ tora ka baara kɛ lɛri caaman kɔnɔ. N’ tun ka teli ka fɔn lajɛnw na fɔɔ a laban, n’ ye lajɛntaga dabila pewu. A be komi duniɲa kɔnɔ, koow labɛnna walisa ka mɔgɔw yɔrɔ janya Ala la dɔɔni dɔɔni.”

5. Gwɛlɛyaw ye mun lo kɛ balimamuso dɔ la?

⁵ Balima dɔw fari fagara gwɛlɛyaw kosɔn. Anne be bɔ Garande Beretaɲi ani a be ni denmisɛn duuru ye. A ko: “N’ deen dɔ wolola ni bana jugu dɔ ye. Kɔfɛ, n’ denmuso dɔ gwɛnna ka bɔ kafo kɔnɔ ani hakiliɲagami bana ye n’ dencɛ dɔ minɛ. O koow ye n’ hakili ɲagami fɔɔ n’ ye lajɛntaga ni waajuli dabila. A laban, n’ sumana Alako ta fan fɛ.” An be miiri kosɔbɛ Anne n’a ka denbayamɔgɔw koo la ani u ka gwɛlɛyaw ɲɔgɔn be mɔgɔ minw kan!

6. Ni mɔgɔ ma Kɔlɔsikaw 3:13 ka ladili sira tagama, o be se k’a tigi yɔrɔ janya Jehova sagokɛlaw la cogo di?

⁶ Kɔlɔsikaw 3:13 kalan. Ala sagokɛla dɔw dusu tiɲɛna balima dɔw ka kɛwalew kosɔn. Ciden Pol ko tuma dɔw la, an balima dɔ be se ka “koo dɔ kɛ min ma bɛn” an ma. A yɛrɛ be se ka tilenbaliyako kɛ an na. N’an m’an yɛrɛ kɔrɔsi, an ka teli ka dimi mara an kɔnɔ. A laban, o dimi be se k’a to an b’an yɔrɔ janya Jehova sagokɛlaw la. An ka balimacɛ Pablo ka koo lajɛ. A be Ameriki worodugu fan fɛ. U bagara a ma ko a ye koo jugu dɔ kɛ. O kama, a bɔnɛna kunkanbaara dɔ la kafo kɔnɔ. Pablo y’o koo ta cogo di? A ko: “N’ dusu gwanna ani dɔɔni dɔɔni, n’ ye n’ yɔrɔ janya kafo la.”

7. Ni mɔgɔ dusukun b’a kɛlɛ kojugu, o be se ka nɔɔ juman lo to a tigi kan?

⁷ Ni mɔgɔ dɔ ye jurumuba kɛ, a dusukun be se k’a kɛlɛ wagatijan kɔnɔ. A yɛrɛ be se k’a miiri ko a man kan ni Ala ka kanuya ye tugun. Hali n’a nimisara ani Ala yafara a ma, a be se k’a miiri ko ale man kan ka kɛ Ala sagokɛla dɔ ye tugun. Balimacɛ Francisco tun b’o lo miiri. A ko: “U ye n’ kolo sabu n’ ye kakalayako kɛ. A daminɛ na, n’ tun be to ka taga lajɛnw na. Nka kɔfɛ, n’ hakili ɲagamina ani n’ tun b’a jati ko n’ man kan ka kɛ Jehova sagokɛla dɔ ye. N’ dusukun tun be n’ kɛlɛ kojugu ani n’ tun b’a miiri ko Jehova ma yafa n’ ma. A laban, n’ ye lajɛntaga ni waajuli dabila.” Koo minw be se k’a to mɔgɔ b’a yɔrɔ janya Jehova la, an kumana u dɔw koo la. O koow be balima minw kan, i be mun lo miiri u koo la? Yala u hinɛ b’i minɛ wa? Min yɛrɛ kɔrɔtanin lo kosɔbɛ, Jehova be mun lo miiri u koo la?

8. Jehova sagokɛla minw ye lajɛntaga ni waajuli dabila, yala a be ɲinɛ u kɔ wa? A ɲɛfɔ.

⁸ Jehova sagokɛla minw ye lajɛntaga ni waajuli dabila, a tɛ ɲinɛ u kɔ. U ye baara min kɛ a ye, a tɛ ɲinɛ o fana kɔ (Eburuw 6:10). Kira Ezayi ye ɲɛyirali ɲuman dɔ kofɔ walisa k’a yira Jehova b’a janto a ka mɔgɔw la cogo min na. A y’a sɛbɛ ko: “A b’a ka mɔgɔw kɔlɔsi i  ko begɛndɛndɛbaga. A be sagadenw minɛ k’u ta a disi la.” (Ezayi 40:11). Jehova min ye sagadɛndɛla ɲumanba ye, ale be mun lo miiri n’a sagokɛla dɔ y’a sago kɛli dabila? Yezu y’o yira tuma min na a y’a ka kalandenw ɲininga ko: “Aw ka miiri la, ni saga kɛmɛ be mɔgɔ dɔ fɛ, ni olu dɔ tununa, sagatigi nin tena saga bi kɔnɔntɔn ni kɔnɔntɔn to kulu kan ka taga kelen nin yaala wa? Ne b’a fɔ aw ye ko n’a y’a ye, a nisɔn bena diya ale kosɔn ka tɛmɛ bi kɔnɔntɔn ni kɔnɔntɔn nunu kan.”—Mat. 18:12, 13.

9. Bibulu sɛbɛwagati la, sagadɛndɛla ɲuman tun b’a ka sagadenw minɛ cogo di? (Jaa lajɛ ɲɛɛ fɔlɔ kan.)

⁹ Mun na a bɛnnin lo an ka Jehova suma ni sagadɛndɛla ye? O bɛnnin lo sabu Bibulu sɛbɛwagati la, sagadɛndɛla ɲuman tun b’a janto kosɔbɛ a ka sagadenw na. Ɲɛyirali fɛ, Dawuda ye jara ni urusi wara faga walisa k’a ka sagakulu latanga (1 Sam. 17:34, 35). Hali ni sagadɛndɛla ɲuman ka sagaden kelen dɔrɔn lo tununa, a b’o kala ma (Zan 10:3, 14). O sagadɛndɛla be sɔn k’a ka saga 99 to wɛɛrɛ la wala k’u kalifa sagadɛndɛla wɛrɛ ma ani ka taga a ka sagaden kelen yɔrɔ ɲini. Yezu y’o ɲɛyirali ta walisa k’an kalan tiɲɛn nafaman nin na: “Aw Faa min be sankolo la, a t’a fɛ denmisɛn nunu dɔ ka tunu.”—Mat. 18:14.

10. Ka kɛɲɛ ni Ezekiyɛli 34:11-16 ka fɔta ye, Jehova ye layidu ta ko a bena mun lo kɛ a ka sagaden tununinw ye?

¹⁰ Jehova b’an kelen kelen bɛɛ kanu, hali sagaden minw y’u yɔrɔ janya sagakulu la. A tɛmɛna kira Ezekiyɛli fɛ ka layidu ta ko ale ka sagaden minw tununa, ale bena u yɔrɔ ɲini ani a bena u dɛmɛ u ka jɛnɲɔgɔnya ɲuman kɛ n’ale ye kokura. A ye koo tigitigi dɔw kofɔ a tun bena minw kɛ walisa k’u kisi. Israɛlden sagadɛndɛla tun b’o ɲɔgɔn lo kɛ n’a ka sagaden dɔ tununa (Ezekiyɛli 34:11-16 kalan). A fɔlɔ, a tun be wagati caaman ta  ani ka jijalibaw kɛ k’a ka sagaden yɔrɔ ɲini. A filanan, n’a tun y’a ye, a b’a ta ka na n’a ye sagakulu cɛma. A sabanan, n’o sagaden tun mandimina wala ni kɔngɔ b’a la, sagadɛndɛla tun b’a janto a la kosɔbɛ. A tun b’a ta, k’a joliw furakɛ ani ka dumuni di a ma. Ni Ala sagokɛla dɔ y’a yɔrɔ janya kafo la, diinan mɔgɔkɔrɔw fana ka ɲi k’o ɲɔgɔn lo kɛ sabu “Ala y’a ka sagakulu” kalifa olu lo ma (1 Piyɛri 5:2, 3). U b’o tigi yɔrɔ ɲini, k’a dɛmɛ a ka kɔsegi kafo kɔnɔ ani a mako be min na Alako ta fan fɛ, u b’o di a ma ni kanuya ye. *

11. Sagadɛndɛla ɲuman be mun lo faamu?

¹¹ Sagadɛndɛla ɲuman b’a faamu ko a ka sagaw be se ka tunu. Ni saga dɔ y’a yɔrɔ janya sagakulu la, sagadɛndɛla tɛ fariya a ma. Ala sagokɛla dɔw y’u yɔrɔ janya a la wagati dɔ kɔnɔ. An k’a filɛ a y’u minɛ cogo min na.

12. Jehova ye Zonasi minɛ cogo di?

¹² Jehova tun ye cii min kalifa kira Zonasi ma, a bolila o ɲɛ. O bɛɛ n’a ta, Jehova ma ban a la. I ko sagadɛndɛla ɲuman, a ye Zonasi kisi. Zonasi mako tun be fanga min na walisa k’a ka cii dafa, Jehova y’o di a ma (Zonasi 2:8; 3:1, 2). Kɔfɛ, a tɛmɛna galamansun dɔ fɛ k’a yira Zonasi la ko ale be adamaden kelen kelen bɛɛ niin jati fɛɛn nafamanba ye (Zonasi 4:10, 11). An be kalan juman lo sɔrɔ o la? Ni balima dɔ sumana Alako ta fan fɛ, diinan mɔgɔkɔrɔw man ɲi k’u mako bɔ a la. Nka, u ka ɲi k’a ɲini k’a faamu fɛɛn min kama a y’a yɔrɔ janya kafo la. N’a kɔsegira Jehova ma, diinan mɔgɔkɔrɔw be to k’u ka kanuya yira a la ani k’u janto a la.

13. Jehova ye Zaburuw 73nan sɛbɛbaga minɛ cogo min na, an be kalan juman lo sɔrɔ o la?

¹³ A tun be Zaburuw 73nan sɛbɛbaga ɲɛɛ na ko mɔgɔ juguw be fɛntigiyara ka taga. O kama, a fari fagara. A tun b’a yɛrɛ ɲiningara ni nafa be Ala sago kɛli la (Zab.  73:12, 13, 16). Jehova y’o koo ta cogo di? Jehova m’a jalaki. A y’a kɛ o Zaburu sɛbɛbaga y’a ka kumaw sɛbɛ Bibulu kɔnɔ. Kɔfɛ, a y’a faamu ko Jehova ka teriya nafa ka bon ka tɛmɛ fɛɛn bɛɛ kan. A y’a faamu fana k’o lo b’a to an be kuun bɛrɛ sɔrɔ an ka ɲɛnamaya la (Zab. 73:23, 24, 26, 28). An be kalan juman lo sɔrɔ o la? Minw b’u yɛrɛ ɲininga ni nafa be Jehova sago kɛli la, diinan mɔgɔkɔrɔw man ɲi ka sin k’u jalaki. Nka, u ka ɲi k’a ɲini k’a faamu fɛɛn min kama u be sigasigara. O kɔ le, u be se ka basigi Bibulu kan k’u jija.

14. Mun na Eli mako tun be dɛmɛ na? Jehova y’a dɛmɛ cogo di?

¹⁴ Kira Eli bolila masamuso Zezabɛli ɲɛ (1 Mas. 19:1-3). A tun b’a miiri ko Jehova ka kira si tɛ yen tugun ale kɔ ani ko ale ka baara bɛɛ kɛra fuu ye. A dusu kasira fɔɔ a tun b’a fɛ ka sa (1 Mas. 19:4, 10). Jehova ma Eli jalaki. Nka, a y’a hakili sigi ko a t’a kelen na ani ko a be se k’a jigi la ale ka sebagaya kan. A ko baara caaman bele b’ale fɛ ka kalifa a ma. Eli y’a dusukunnakow fɔ ani Jehova y’a lamɛn koɲuman. A ye kunkanbaara kura dɔw kalifa a ma fana (1 Mas. 19:11-16, 18). An be kalan juman lo sɔrɔ o la? An kelen kelen bɛɛ, sanko diinan mɔgɔkɔrɔw, ka ɲi ka Jehova sagokɛlaw minɛ ni ɲumanya ye. N’a sɔrɔ koo dɔ ye balima dɔ dusu gwan wala a b’a jati ko ale man kan ni Jehova ka yafali ye.  N’a tigi b’a dusukunnakow fɔra, diinan mɔgɔkɔrɔw ka ɲi k’a lamɛn koɲuman. O kɔ, u ka ɲi k’a hakili sigi ko Jehova b’a kanu.

15. Ka kɛɲɛ ni Zan 6:39 ye, Yezu tun b’a Faa ka sagadenw jati cogo di?

¹⁵ Jehova b’a fɛ an k’a ka sagaden tununinw jati cogo di? Yezu ye ɲɛyirali ɲuman ye an fɛ o koo la. A tun b’a lɔn ko Jehova ka sagaden kelen kelen bɛɛ koo ka gwɛlɛ a ma. O kama, Israɛlden “minw be i n’a fɔ saga tununinw,” a y’a seko bɛɛ kɛ k’olu dɛmɛ walisa u ka kɔsegi Jehova ma (Mat. 15:24; Luka 19:9, 10). Yezu ye sagadɛndɛla ɲuman ye minkɛ, a y’a seko bɛɛ kɛ walisa Jehova ka sagaden si kana tunu.—Zan 6:39 kalan.

16-17. Minw y’u yɔrɔ janya Jehova la, dɛmɛ min ka kan ka lase olu ma, diinan mɔgɔkɔrɔw ka ɲi k’o jati cogo di? (Koorilen nin lajɛ: “ Sagaden tununin dusukunnakow.”)

¹⁶ Ciden Pol ye Efɛzi kafo ka diinan mɔgɔkɔrɔw jija u ka Yezu ladegi. A ko: “An ka kan ka . . . dɛsɛbagatɔw dɛmɛ. O la, an hakili be to Matigi Yezu yɛrɛ ka dalakuma nin na ko: ‘Nisɔndiya be mɔgɔ sɔnni na ka tɛmɛ sɔrɔli kan.’ ” (Kɛw. 20:17, 35). Tiɲɛn na, diinan mɔgɔkɔrɔw be ni kunkanbaaraba ye, o min ye k’u janto Ala sagokɛlaw la. Diinan mɔgɔkɔrɔ dɔ tɔgɔ ko Salvador ani a be Ɛsipaɲi. A ko: “Ni n’ miirila k’a ye Jehova b’a janto a ka sagaden tununinw na cogo min na, o be n’ lasun ka n’ seko bɛɛ kɛ k’u dɛmɛ. N’ b’a lɔn ko Jehova b’a fɛ n’ ka n’ janto u la.”

¹⁷ Minw kofɔra Barokun nin na ani u tun y’u yɔrɔ janya Jehova la, u bɛɛ ye dɛmɛ sɔrɔ ka kɔsegi Jehova ma. Nka, mɔgɔ wɛrɛw bele ma kɔsegi a ma ani u fanba b’a fɛ k’o kɛ. An ka ɲi ka min kɛ k’u dɛmɛ, barokun nata bena o walawala.