“SUMAN tigɛta ka ca, nga baarakɛlaw man ca. Aw ka forotigi daali a ka baarakɛlaw ci ka taga ka suman tigɛ.” (Luka 10:2). Yezu y’o fɔ a saan 2000 ɲɔgɔn ye nin ye. Bi, o kumaw bɛnnin lo Birimani jamana ka koow ma yɛrɛ le. Mun na do? Sabu mɔgɔ miliyɔn 55 lo be Birimani k’a sɔrɔ weleweledala 4200 dɔrɔn lo be yen.

Nka jamana caaman kɔnɔ, “Forotigi” Jehova ye balimacɛw ni balimamuso caaman lasun u tagara dɛmɛ don waajuli baara la Birimani. O jamana be Azi mara worodugu ni kɔrɔn cɛ. Mun lo y’a to u bɔra u ka jamana na ka taga yen? Mun lo y’u dɛmɛ k’o kɛ? Ani u be duga jumanw lo sɔrɔla o la? An k’o lajɛ.

Kazuhiro tun ye piyɔniye ye Zapɔn. A saan damanin ye nin ye kirikirimasiɲɛ wulila a la. A tun kirinna ani u tagara n’a ye dɔgɔtɔrɔso. Dɔgɔtɔrɔcɛ y’a fɔ a ye ko a man ɲi ka bolifɛn boli saan fila kɔnɔ. O koo ye Kazuhiro hakili ɲagami pewu. Komi piyɔniye baara ka di a ye, a y’a yɛrɛ ɲininga ko: “N’ be se ka to o baara la cogo di?” A ye Jehova deli kosɔbɛ ko a k’ale dɛmɛ ka fɛɛrɛ sɔrɔ ka to piyɔniye baara la.

Kazuhiro ko: “N’ tericɛ dɔ tagara waajuli kɛ Birimani. Kalo kelen n’ bananin kɔ, a y’a mɛn min ye n’ sɔrɔ. A ye n’ weele telefɔni na ko: ‘Mɔgɔw fanba be bisi lo ta Birimani. N’i nana, i bena se k’i ka piyɔniye baara kɛ ani i mako t’a la ka mobili boli i yɛrɛ ma!’ N’ ye n’ ka dɔgɔtɔrɔcɛ ɲininga ni n’ be se ka taga Birimani. A ye min fɔ, o barila n’ na. A ko: ‘Dɔgɔtɔrɔcɛ dɔ bɔra Birimani ka na yan ani a be kunsɛmɛ bana lo furakɛ. N’ bena i yira a la. N’i ka bana wulila o yɔrɔ la, a bena i furakɛ.’ Dɔgɔtɔrɔcɛ ye min fɔ, ne fɛ o tun ye Jehova ka jaabili lo ye.”

Kazuhiro sinna ka e-mail ci Birimani ka Betɛli ma ko ale n’a muso b’a fɛ ka na piyɔniye baara kɛ Birimani. Tile duuru dɔrɔn o kɔ, Betɛli mɔgɔw y’a jaabi ko: “Aw ye na, an mako be piyɔniye caaman na!” Kazuhiro n’a muso Mari y’u ka mobiliw feere. U ye viza sɔrɔ ani ka awiyɔn biye ta. Bi, u ninsɔndiyanin be bobow ka jɛnkulu dɔ dɛmɛna Mandalay dugu la. Kazuhiro ko: “O koo y’a to an lara kosɔbɛ Ala ka layidu la min be sɔrɔ Zaburuw 37:5 kɔnɔ. A fɔra yen ko: ‘E k’i ka koo to Masaba bolo, e k’i jigi la a kan, a bena o ɲanabɔ.’”

Jehova Seere minw be Birimani, olu ye ninsɔndiya sɔrɔ ka lajɛnba kɛrɛnkɛrɛnnin dɔ kɛ u ka jamana na saan 2014. Balima caaman bɔra jamana wɛrɛw la ka na. Balimamuso Monique bɔra Etazini ka na. A be ni saan 34 ye ani a ko: “Lajɛnba kɔ, n’ kɔsegira ani n’ ye Jehova deli ko a k’a yira n’ na n’ ka ɲi ka min kɛ walisa ka baara kɛ a ye bɛrɛbɛrɛ. N’ ye laɲinita minw latigɛ Alako ta fan fɛ, n’ ye baro kɛ ni n’ bangebagaw ye o koo la. An bɛɛ sɔnna ko n’ ka ɲi ka kɔsegi Birimani. Nka, n’ ye wagati ni delili caaman kɛ ka sɔrɔ k’a latigɛ ka kɔsegi yen.” Mun na do? Monique y’o ɲɛfɔ ko:

“Yezu y’a fɔ a ka kalandenw ye ko n’u b’a fɛ ka koo dɔ kɛ, u ka jatiminɛ kɛ a sɔngɔ la. O la, n’ ye n’ yɛrɛ ɲininga ko: ‘Wari be n’ fɛ ka se ka yɛlɛma Birimani wa? Ni n’ tagara o jamana na, yala n’ bena se ka n’ ka musakaw sara ni n’ ma wagati caaman kɛ baloɲini baara la wa?’” Monique ko: “N’ y’a faamu yɔrɔnin kelen ko wari min be n’ fɛ, o tɛ se k’a to n’ be taga sigi duniɲa faan wɛrɛ la.” Ayiwa, a do sera k’o kɛ cogo di?—Luka 14:28.

Monique ko: “Loon dɔ, n’ ka patɔrɔn ye n’ weele. N’ tun sirannin lo ko a bena n’ bolo bɔ baara la. Nka, o tun tɛ. A ye n’ fo n’ ka baara ɲuman kosɔn ani a ko a bena wari dɔ di n’ ma kado ye. N’ mako tun be wari min na, o wari hakɛ bɛnna o ma yewu!”

Kabi saan 2014, desanburukalo la, Monique be waajuli kɛra Birimani. Monique tagara dɛmɛ don yɔrɔ minw na weleweledalaw man ca minkɛ, a be mun miiri o koo la? A ko: “N’ ninsɔn ka di kosɔbɛ ka kɛ yan. N’ be bibulukalan kɛra ni mɔgɔ saba ye. U dɔ be ni saan 67 ye. A be yɛlɛmisɛn kɛ ni n’ ye tuma bɛɛ ka n’ fo ani ka meleke n’ na. Tuma min na a y’a lɔn ko Ala tɔgɔ ko Jehova, a ninsɔn diyara fɔɔ a ɲɛji jigira. A ko: ‘N’ siɲɛ fɔlɔ lo k’a mɛn ko Ala tɔgɔ ko Jehova. N’ sii ka ca n’i ta ye fɔɔ ka taga ka na nka, i ye n’ kalan koo nafamanba la n’ tun ma deli ka min mɛn.’ Ne yɛrɛ fana ɲɛji jigira ninsɔndiya kosɔn. Ka taga dɛmɛ don yɔrɔ minw na waajulikɛlaw man ca ani ka se ka mɔgɔ dɛmɛ o cogo la, o be mɔgɔ ninsɔndiya kosɔbɛ.” A ma mɛɛn, Monique ye nɛɛma sɔrɔ ka taga Masaya waajulikɛlaw ka lakɔli kɛ.

Fɛɛn wɛrɛ ye mɔgɔ dɔw lasun ka taga Birimani. O ye saan 2013 ka Annuaire ye. O gafe tun be kuma Birimani koo la. Balimamuso Li be ni saan 30 ni kɔ ye ani a tun be Azi mara worodugu ni kɔrɔn cɛ. A tun be baloɲini baara kɛ kudayi. Nka, Annuaire kɔnɔnakow y’a to a ye jatiminɛ kɛ k’a filɛ n’a be se ka taga dɛmɛ don Birimani. A ko: “Lajɛnba kɛrɛnkɛrɛnnin min kɛra Rangoun saan 2014, n’ ye balimacɛ dɔ n’a muso kunbɛn yen. Olu tun bɔra jamana wɛrɛ la ka na waajuli kɛ sinuwakan na Birimani. Komi ne tun b’o kaan fɔ, n’ y’a latigɛ ka yɛlɛma yan walisa ka sinuwa jɛnkulu dɔ dɛmɛ. N’ farala Monique kan, an nana sigi Mandalay. Jehova y’an duga sabu an fila bɛɛ ye baara sɔrɔ lakɔliso dɔ la. An tun be lakɔlidenw kalan tuma kelen kelen. An ye boon dɔ sɔrɔ o lakɔliso gɛrɛfɛ. Funteni ani gwɛlɛya wɛrɛw bɛɛ n’a ta, n’ ninsɔndiyanin lo waajuli baara la yan. Birimani, mɔgɔw be ɲɛnamaya kɛ cogo nɔgɔman na, u be mɔgɔ bonya ani a ka di u ye ka kibaro diiman lamɛn. Ninsɔndiyaba lo k’a ye cogo min na waajuli baara be tagara ɲɛ Jehova sababu la. Ne lanin b’a la kosɔbɛ ko Jehova sago lo ne ka kɛ yan Mandalay.”

Minw be taga dɛmɛ don waajuli baara la yɔrɔ wɛrɛ la, u caaman y’a ye ko delili barika ka bon. An ka kuma Jumpei n’a muso Nao koo la. Jumpei be ni  saan 37 ye ani a muso be ni saan 35 ye. U tun be bobow ka kafo dɔ kɔnɔ Zapɔn. Mun na u yɛlɛmana Birimani? Jumpei ko: “Balimacɛ dɔ bɔra an ka kafo kɔnɔ ka yɛlɛma Birimani. Ne ni n’ muso ka laɲinita tun ye ka taga dɛmɛ don jamana wɛrɛ la. Hali ni wari bɛrɛ tun t’an fɛ, an fana yɛlɛmana yan saan 2010, mɛkalo la. Balimaw y’an bisimila ni dusudiya ye!” Ka waajuli kɛ bobow kumacogo la Birimani, balimacɛ Jumpei be mun lo miiri o koo la? A ko: “Mɔgɔ caaman b’u mako don! N’an ye videwow yira bobow kumacogo la, o ka di tulogwerenw ye kosɔbɛ. An dusu ka di kosɔbɛ sabu an y’a latigɛ ka na baara kɛ Jehova ye yan!”

Jumpei ni Nao y’u ka wariko ɲɛnabɔ cogo di do? Jumpei ko: “Saan saba kɔ, an ka wari fanba tun banna ani wari bɛrɛ tun t’an fɛ ka se k’an ka boon sara saan nata la. Ne ni n’ muso ye delili kɛ siɲɛ caaman n’an dusukun bɛɛ ye. Betɛli ye lɛtɛrɛ dɔ ci an ma ko an ka kɛ dan na piyɔniyew ye wagati damanin kɔnɔ. O barila an na yɛrɛ le! An y’an jigi la Jehova kan ani an y’a ye ko a m’an to yen fewu! A y’a janto an na koo bɛɛ la.” A ma mɛɛn, Jumpei n’a muso fana ye Masaya waajulikɛlaw ka lakɔli kɛ.

Balimacɛ Simone be ni saan 43 ye, a be bɔ Itali. A muso Anna be ni saan 37 ye ani ale be bɔ Nuvɛli Zelandi. Anna ko saan 2013 ka Annuaire lo y’u lasun u yɛlɛmana Birimani. Simone ko: “Nɛɛmaba lo an fɛ ka kɛ yan Birimani. Mɔgɔ be ɲɛnamaya kɛ cogo nɔgɔman na ani n’ be se ka wagati caaman kɛ Jehova ka baara la. Ka dɛmɛ don yɔrɔ minw na waajulikɛlaw man ca ani k’a ye Jehova b’a janto an na cogo min na, o b’an ninsɔn diya yɛrɛ le.” (Zab. 121:5). Anna ko: “Ne ma deli k’o ninsɔndiya ɲɔgɔn sɔrɔ. An be ɲɛnamaya kɛ cogo nɔgɔman na. Ne ni n’ cɛɛ be wagati caaman kɛ ɲɔgɔn fɛ ani o y’an ka jɛnɲɔgɔnya sabati. An ye teri sɔbɛw sɔrɔ fana. Mɔgɔw tɛ ni miiriya juguw ye Jehova Seerew koo la ani u b’u mako don kosɔbɛ kibaro diiman na!” Cogo di do?

Anna ko: “Loon dɔ lɔgɔfiyɛ la, n’ ye inivɛrisite sunguru dɔ waaju ani n’ ye labɛn kɛ ka segi ka taga bɔ a ye. Tuma min na n’ segira ka taga, a tun y’a terimuso dɔ weele ka na. Siɲɛ wɛrɛ, a y’a terimuso wɛrɛw weele ka fara u kan. Kɔfɛ, a ye dɔ wɛrɛw weele tugun ka fara u kan. Sisan, n’ be bibulukalan kɛra n’u mɔgɔ duuru ye.” Simone ko: “Mɔgɔw b’an minɛ teriya la ani u b’a fɛ k’a lɔn an be min fɔra. U caaman b’u mako don kibaro diiman na. An yɛrɛ tɛ wagati sɔrɔ k’u bɛɛ dɛmɛ Alako ta fan fɛ.”

Mɔgɔ be se ka koo tigitigi juman lo kɛ ka sɔrɔ k’a latigɛ ka na sigi Birimani? Mizuho be bɔ Zapɔn ani a ko: “Kabi wagatijan, ne ni n’ cɛɛ Sachio tun b’a fɛ ka taga yɔrɔ min na waajulikɛlaw man ca. Nka an tun bena taga min? An ye saan 2013 ka Annuaire  kalan. Wale diiman minw lakalila Birimani koo la, u y’an dusu sɔrɔ fɔɔ an ye jatiminɛ kɛ k’a filɛ n’an be se ka yɛlɛma yen.” Sachio ko: “An y’a latigɛ ka taga lɔgɔkun kelen kɛ Rangoun, Birimani ka faamadugu la walisa k’o yɔrɔ lajɛ. An ye wagati kunkurunin min kɛ yen, o y’a to an y’a latigɛ ka yɛlɛma Birimani.”

Rodney n’a muso Jane be ni saan 50 ni kɔ ye ani u be bɔ Ɔsitarali. Olu n’u dencɛ Jordan ani u denmuso Danica be dɛmɛ donna Birimani kabi saan 2010. Rodney ko: “An kabakoyara kosɔbɛ k’a ye ko Alako nege gwannin be mɔgɔ caaman na. Ne be denbaya tɔɔw jija u k’a ɲini ka taga dɛmɛ don yɔrɔ wɛrɛ la i n’a fɔ Birimani.” Mun na do? “Jɛnɲɔgɔnya min b’an ni Jehova cɛ, o sabatira cogo min na, a tɛ se ka fɔ! Kanbelew ni sunguru caaman ka laɲinita ye ka mobili, telefɔni, baara n’a ɲɔgɔnnafɛnw sɔrɔ. An deenw b’u ka wagati fanba ta ka kumaden kuraw degi walisa ka waajuli kɛ. Minw tɛ Bibulu lɔn, an deenw b’u yɛrɛ degi ka hakilijagabɔ kɛ n’olu ye. U b’a ɲini ka lakalitaw kɛ kafo ka lajɛnw na ani u bolo degunnin lo Alako caaman wɛrɛw la minw be mɔgɔ ninsɔn diya.”

Oliver be ni saan 37 ye ani a be bɔ Etazini. A y’a ɲɛfɔ fɛɛn min kama a be mɔgɔw jija u ka taga dɛmɛ don yɔrɔ wɛrɛ la. A ko: “Ka bɔ n’ faso la ka taga baara kɛ Jehova ye jamana wɛrɛ la, o ye n’ nafa kosɔbɛ. O y’a to n’ limaniyara kosɔbɛ Jehova la ani n’ be se ka n’ jigi la a kan koo bɛɛ la. N’ be baara kɛra ni minw ye, n’ tun tɛ u lɔn. Nka, an ka lannakow y’an kaan bɛn k’an kɛ kelen ye. Ala ka Masaya dɔrɔn lo be se k’o kɛ.” Bi, Oliver n’a muso Anna bele be sinuwaw ka kafo kɔnɔ ani u be waajuli kɛra ni kisɛya ye.

Balimamuso Trazel be ni saan 52 ye ani a be bɔ Ɔsitarali. A be dɛmɛ donna Birimani kabi saan 2004. A ko: “Minw bɛɛ be se, n’ b’u jija kosɔbɛ u ka taga dɛmɛ don yɔrɔ minw na waajulikɛlaw man ca. Ne y’a faamu ko n’i b’a fɛ ka baara kɛ Jehova ye, a b’i duga i ka jijaliw kosɔn. Sisan, n’ ninsɔndiyanin lo ani n’ ka ɲɛnamaya be n’ wasa cogo min na, a tɛ se ka fɔ!”

An jigi b’a la ko minw be dɛmɛ donna Birimani, u ka lakalita diimanw bena aw jija aw ka taga mɔgɔ kɔnɔgwɛw dɛmɛ yɔrɔ minw na kibaro diiman ma se fɔlɔ. Tiɲɛn na, minw be dɛmɛ donna Birimani, olu be welekan lase i ma ko: “Sabari ka na an dɛmɛ!”