BIBULU kɔnɔ, an ‘bɔɲɔgɔnko adamadenw’ ka dusukunnako caaman kofɔra (Zaki 5:17). Ɲɛyirali fɛ, ciden Pol y’a kɔnɔ gwɛ ka min fɔ Ɔrɔmukaw 7:21-24 kɔnɔ, a ka nɔgɔ an fɛ k’o faamu. A ko: “Tuma min na ne b’a fɛ ka koɲuman kɛ, n te se k’o kɛ, fɔɔ kojugu. . . . Ne ye sigɛnbagatɔ ye!” N’an be bondori kɛra an ka dafabaliya kosɔn, o kumaw b’an hakili sigi.

Galatikaw 2:20 kɔnɔ, Pol y’a kɔnɔ gwɛ k’a fɔ fana ko ale lanin b’a la ko Yezu b’ale “kanu fɔɔ k’a yɛrɛ di [ale] kosɔn.” Ele fana b’o lo miiri wa? N’a sɔrɔ i t’o miiri tuma bɛɛ.

N’an b’an yɛrɛ jalaki an ka jurumu tɛmɛninw kosɔn, a be se ka gwɛlɛya an ma ka la a la ko Jehova b’an kanu ani ko a yafara an ma. N’a sɔrɔ a ka gwɛlɛ an ma fana ka la a la ko Yezu y’a yɛrɛ saraka an kelen kelen bɛɛ lo kosɔn. Yala Yezu b’a fɛ tiɲɛn na, an k’a miiri ko ale sara an kosɔn wa? N’o lo, mun lo be se k’an dɛmɛ an ka kunmabɔsara jati o cogo la? An k’o lajɛ.

Yezu b’a fɛ sɔbɛ la an k’a jati ko ale sara an kelen kelen bɛɛ lo kosɔn. An be se ka la o la cogo di? Miiri Luka 23:39-43 kɔnɔkow la. U ye cɛɛ dɔ gwengwe lɔgɔ kan Yezu gɛrɛfɛ. O cɛɛ sɔnna a ma ko ale ye koo jugu kɛ. N’a sɔrɔ a ye kojuguba lo kɛ sabu o wagati la, minw tun be kojugubaw kɛ, olu lo tun be gwengwe ten. O cɛɛ dusu tiɲɛninba ye Yezu deli ko: “N’i nana sigi i ka masaya la tuma min na, i k’i hakili to ne la.”

Yezu ye mun lo kɛ do? Miiri k’a filɛ dimi min tun b’a kan tuma min na a y’a kuun yɛlɛma k’o cɛɛ filɛ. O dimi bɛɛ n’a ta, a ye yɛlɛmisɛn kɛ ani a y’o cɛɛ hakili sigi ko: “Tiɲɛ na, ne b’a fɔ i ye, i bena kɛ ne fɛ arijana na.” Yezu tun be se k’a fɔ a ye dɔrɔn ko: “Mɔgɔ Dencɛ . . . nana . . . k’a yɛrɛ nii di ka kɛ mɔgɔ bɛɛ nii kunmabɔ sara ye.” (Mat. 20:28). Nka, a m’o kɛ. A y’a yira ka gwɛ ko ale ka saraka ɲɛsinna o kojugukɛla fana ma. A ye koow kɛ teriya la, a kɛtɔ k’a fɔ ko “i” ani “ne.” Yezu y’a yira o kojugukɛla tun bena nafa min sɔrɔ ale ka saraka la: A tun bena ɲɛnamaya kɛ alijɛnɛ kɔnɔ dugukolo kan.

Yezu tun bena a niin min saraka, siga t’a la, a tun b’a fɛ o cɛɛ k’a lɔn ko ale fana bena nafa sɔrɔ o la. O cɛɛ tun ye kojugukɛla ye ani a tun ma kɛ Yezu ka kalanden ye. Ni Yezu tun b’a fɛ o cɛɛ ka nafa sɔrɔ ale ka saraka la, siga t’a la, kerecɛn batizenin min be Ala sago kɛra, Yezu b’a fɛ o tigi fana ka nafa sɔrɔ o saraka la. An ka jurumu tɛmɛninw bɛɛ n’a ta, mun lo be se k’an dɛmɛ ka la a la ko Yezu ka saya bena an kelen kelen bɛɛ nafa?

Yezu ye cii di Pol ma ko a ka waajuli kɛ. O y’a dɛmɛ k’a faamu ko Yezu sara ale  kosɔn. Cogo di do? Pol y’a ɲɛfɔ ko: “Ne be barika la an Matigi Yezu Krista ye, ale min ye fanga di n ma. A ye ne jati mɔgɔsɔbɛ ye ka n don a ka baara la. Fɔlɔfɔlɔ ne min tun b’a tɔgɔ cɛn, ka Alaɲasiranbagaw tɔɔrɔ, ani ne tun ka fari.” (1 Tim. 1:12-14). Yezu ye cii min kalifa Pol ma, o y’a hakili sigi ko Yezu makarila a la, ko a b’a kanu ani ko a lanin b’a la. Yezu ye cii di an kelen kelen fana ma ko an ka waajuli kɛ (Mat. 28:19, 20). Yala o cii be se k’an dɛmɛ k’a faamu ko Yezu sara an fana kosɔn wa?

Albert tun gwɛnna ka bɔ kafo kɔnɔ. A ye saan 34 ɲɔgɔn kɛ ani a segira Jehova ma a ma mɛɛn. A ko: “N’ hakili be n’ ka jurumu na tuma bɛɛ. Nka ni n’ be waajuli kɛra, n’ b’a jati i ko Pol, ko Yezu lo y’o baara kalifa n’ ma. O b’a to n’ ninsɔn be diya kosɔbɛ. N’ be n’ yɛrɛ, n’ ka ɲɛnamaya ani n’ ka siniɲasigi filɛ ni ɲɛɛ ɲuman ye.”—Zab. 51:5.

Allan ye kojugubaw kɛ ani mɔgɔ fariman tun lo. Kɔfɛ, a ye tiɲɛn lɔn ani a ko: “N’ ye koo jugu minw bɛɛ kɛ, n’ bele be to ka miiri u la. Tuma dɔw la, o be n’ hakili ɲagami. Nka, n’ be Jehova fo sabu a b’a to ne ɲɔgɔn jurumukɛla be kibaro diiman lase mɔgɔw ma. Ni n’ y’a ye ko mɔgɔw be sɔnna kibaro diiman na, o be n’ hakili jigi ko Jehova ka ɲi kosɔbɛ ani ko a be mɔgɔw kanu sɔbɛ la. Minw ye koo jugu kɛ, n’ b’a ye ko Jehova be tɛmɛna ne fɛ k’olu dɛmɛ.”

Waajuli ye baara ɲuman ye ani a b’a to an be kɛ ni miiriya ɲumanw ye. A b’a to fana an be la a la ko Yezu makarila an na, a b’an kanu ani a lanin b’an na.

K’an to Sutana ka duniɲa juguman nin kɔnɔ, n’a sɔrɔ an dusukun bena to k’an jalaki an ka koo jugu tɛmɛninw kosɔn. Mun lo bena an dɛmɛ ka see sɔrɔ an dusukunnakow kan?

Jean sunguru tuma, a tun be koo ɲuman kɛ soo ani Masaya Boon na. Nka, yɔrɔ wɛrɛw la, a tun be kɛ mɔgɔ wɛrɛ ye. Sisan, a be to k’a yɛrɛ jalaki o filankafoya kosɔn. A ko: “K’a lɔn ko ‘Ala ka bon n’an kɔnɔnako ye,’ o ka di n’ ye kosɔbɛ.” (1 Zan 3:19, 20). I ko Jean, k’a lɔn ko Jehova ni Yezu b’a faamu ko an ye jurumutɔw ye, o b’an hakili sigi. Kana ɲinɛ k’u ma kunmabɔsara di mɔgɔ dafaninw kosɔn. Nka, mɔgɔ dafabali minw nimisanin lo, u ye kunmabɔsara di ni kanuya ye olu lo kosɔn.—1 Tim. 1:15.

Yezu ye mɔgɔ dafabaliw minɛ cogo min na, delili kɛ ani miiri o la. I jija waajuli la fana. O la, i bena la a la ko Yezu sara ele fana kosɔn. I ko Pol, i bena se k’a fɔ ko: “[Yezu] ye ne kanu fɔɔ k’a yɛrɛ di ne kosɔn.”