1. Ka kɛɲɛ ni Filipikaw 2:3 ye, cogo juman na majigilenya b’a to an be jɛnɲɔgɔnya ɲuman kɛ ni tɔɔw ye?

AN BE Jehova ka sariyaw labato ni majigilenya ye sabu an b’a faamu ko Jehova b’a lɔn tuma bɛɛ min ka fisa an ma (Efɛz. 4:22-24). Majigilenya b’an lasun ka Jehova sago kɛ an ɲɛnako fɔlɔ ye ani k’a jati ko tɔɔw ka fisa n’an ye. O lo b’a to an be jɛnɲɔgɔnya ɲuman kɛ ni Jehova n’an kerecɛnɲɔgɔnw ye.—Filipikaw 2:3 kalan.

2. Ciden Pol sɔnna mun lo ma ani an bena mun lo lajɛ barokun nin na?

² Kuncɛbaw lo fanin be Sutana ka duniɲa nin kɔnɔ. * N’an m’an yɛrɛ kɔrɔsi, u be se ka nɔɔ to an kan. Saan kɛmɛkulu fɔlɔ la, a be komi o farati tun be kerecɛn dɔw seen kɔrɔ. O lo kama, ciden Pol ye sɛbɛ ci Ɔrɔmukaw ma ko: “Ne b’a fɔ aw bɛɛ ye ko aw kana aw yɛrɛ boɲa k’a dama tɛmɛ, aw k’aw yɛrɛ majigi.” (Ɔrɔm. 12:3). Pol sɔnna a ma ko an ka ɲi ka bonya la an yɛrɛ kan. Nka, majigilenya bena an dɛmɛ an b’o kɛ k’a dama kɛɲɛ. Barokun nin na, an bena koo saba lajɛ o minw na majigilenya bena an dɛmɛ walisa an kana miiri an yɛrɛ koo la k’a dama tɛmɛ: 1) furu, 2) kunkanbaaraw ani 3) rezo sosiyow.

3. Mun na furuɲɔgɔnw be se ka gwɛlɛyaw sɔrɔ u ka furu kɔnɔ? Dɔw b’a ɲini k’o gwɛlɛyaw ɲɛnabɔ cogo di?

³ Jehova b’a fɛ cɛɛ n’a muso ka ninsɔn diya ɲɔgɔn fɛ u ka furu kɔnɔ. Nka, u be se ka gwɛlɛyaw sɔrɔ u ka furu kɔnɔ sabu u si dafanin tɛ. Pol yɛrɛ y’a sɛbɛ ko minw furula, u bena gwɛlɛya dɔw sɔrɔ (1 Kor. 7:28). Dɔw be sɔsɔli kɛ n’u furuɲɔgɔn ye tuma o tuma. O kama, u be se k’a jati ko u tun man kan ka furu ɲɔgɔn ma. N’u y’a to duniɲa ye nɔɔ to u kan, u ka teli ka miiri u yɛrɛ dɔrɔn lo koo la. A laban, u be se k’a jati ko a ka fisa u k’u ka furu sa walisa ka ninsɔndiya sɔrɔ.

4. An ka ɲi k’an yɛrɛ tanga mun lo ma?

⁴ An kana ta gwɛlɛyaw ma k’a miiri ko an ka furu tɛna ɲɛ an bolo. An b’a lɔn ko Bibulu be furusa daga koo kelenpe min na, o ye ɲamɔgɔya lo ye (Mat. 5:32). O la, ni gwɛlɛyaw b’i ka furu kɔnɔ, kana a to kuncɛbaya b’a kɛ i b’i yɛrɛ ɲininga ko: “Yala ne ka furu be n’ wasara wa? N’ ka kan ni kanuya min ye, yala n’ b’o sɔrɔla wa? Yala n’ tɛna ninsɔndiyaba sɔrɔ ni mɔgɔ wɛrɛ ye wa?” N’i be miiri o cogo la, i be miirila i yɛrɛ dɔrɔn lo koo la. Duniɲa ka hakilitigiya bena i lasun i k’i diyanankow lo kɛ hali n’i ka ɲi k’i ka furu sa. Nka, hakilitigiya min bɔra Ala yɔrɔ, ale b’a fɔ ko: “Mɔgɔ si kana miiri a yɛrɛ la dɔrɔn, aw ka miiri aw tɔɲɔgɔn na fana.” (Filip. 2:4). Jehova t’a fɛ i k’i ka furu sa. Nka, a b’a fɛ ele n’i furuɲɔgɔn ka to ɲɔgɔn fɛ (Mat. 19:6). A b’a fɛ fana i ka miiri ale koo la fɔlɔ, i kana miiri i yɛrɛ dɔrɔn koo la.

5. Ka kɛɲɛ ni Efɛzikaw 5:33 ye, cɛɛ n’a muso ka ɲi ka ɲɔgɔn minɛ cogo di?

⁵ Cɛɛ n’a muso ka ɲi ka ɲɔgɔn kanu ani ka ɲɔgɔn bonya (Efɛzikaw 5:33 kalan).  Bibulu b’a fɔ ko an ka to ka mɔgɔw sɔn, sanni k’a ɲini mɔgɔw k’an sɔn (Kɛw. 20:35). Jogo juman lo bena furuɲɔgɔnw dɛmɛ u ka ɲɔgɔn minɛ ni bonya ni kanuya ye? O ye majigilenya lo ye. Furucɛ ni furumuso minw majiginin lo, olu tɛna u yɛrɛ nafa dɔrɔn lo ɲini, nka u bena u “tɔɲɔgɔn ta le ɲini.”—1 Kor. 10:24.

6. Steven ni Stephanie ye min fɔ, o b’i dɛmɛ ka mun lo faamu?

⁶ Majigilenya ye kerecɛn furuɲɔgɔn caaman dɛmɛ ka ninsɔndiyaba sɔrɔ u ka furu kɔnɔ. Furucɛ dɔ tɔgɔ ko Steven, ale ko: “N’aw be jɛn ka koow kɛ, aw bena ɲɔgɔn dɛmɛ fana, sanko gwɛlɛyaw wagati la. Sanni i k’i yɛrɛ ɲininga ko ‘mun lo ka fisa ne ma?’, i bena i yɛrɛ ɲininga ko ‘mun lo ka fisa an ma?’ ” A muso Stephanie fana b’o lo miiri. A ko: “Mɔgɔ si t’a fɛ ka sigi ni mɔgɔ dɔ ye, i ni min tɛ bɛn. Ni sɔsɔli wulila an ni ɲɔgɔn cɛ, an b’a ɲini k’a lɔn koo min nana n’o ye. O kɔ, an be delili kɛ, ka sɛgɛsɛgɛri kɛ ani an be kuma o koo la. Gwɛlɛya min b’an kan, an b’a ɲini k’o lo ɲɛnabɔ sanni ka wuli ɲɔgɔn kama.” Furucɛw ni furumusow bena ninsɔndiyaba sɔrɔ n’u tɛ miiri u yɛrɛ koo la k’a dama tɛmɛ.

7. Ni kunkanbaara kalifara balima dɔ ma, a ka ɲi ka mun lo kɛ?

⁷ Nɛɛma lo an fɛ ka baara kɛ Jehova ye cogo bɛɛ la (Zab. 27:4; 84:11). Ni balimacɛ dɔ sɔnna k’a yɛrɛ di ka baara kɛ Jehova ye bɛrɛbɛrɛ, o ye koo ɲuman ye. Bibulu yɛrɛ b’a fɔ ko: “Ni mɔgɔ dɔ b’a fɛ ka kɛ lanabagaw ta jɛnkuru kɔrɔsibaga ye, o tigi bɛ baaraɲuman le ɲinina.” (1 Tim. 3:1, Biblu Ala ta Kuma). Nka n’u ye kunkanbaara dɔ kalifa a ma, a man ɲi ka miiri a yɛrɛ koo la k’a dama tɛmɛ (Luka 17:7-10). A ka laɲinita ye ka baara kɛ tɔɔw ye ni majigilenya ye.—2 Kor. 12:15.

8. Diyotɛrɛfu, Oziyasi ani Abisalɔn ka koo b’an dɛmɛ ka mun lo faamu?

⁸ Bibulu be kuma mɔgɔ dɔw koo la, minw y’u yɛrɛ jati k’a dama tɛmɛ. Diyotɛrɛfu tun t’a seko daan lɔn. O kama, a y’a ɲini ka kɛ “bɛɛ ɲamɔgɔ ye” kafo kɔnɔ (3 Zan 9). Kuncɛbaya y’a to Oziyasi y’a ɲini ka koo dɔ kɛ, Jehova tun ma min ɲini a fɛ (2 Til. Kib. 26:16-21). Abisalɔn tun b’a fɛ ka kɛ masacɛ ye. O kama, a y’a ɲini ka jama lafili walisa u k’a dɛmɛ a k’a ka laɲinita dafa (2 Sam. 15:2-6). I ko o maanaw b’a yira cogo min na, minw b’a fɛ ka tɔgɔba sɔrɔ, olu koo man di Jehova ye (Talenw 25:27). A mɛɛn o mɛɛn, kuncɛbaya ni tɔgɔɲini be na ni makosa ye.—Talenw 16:18.

9. Yezu ye ɲɛyirali juman lo to an ye?

⁹ Yezu tun tɛ i ko Diyotɛrɛfu, Oziyasi ani Abisalɔn. “Ale ni Ala cogo bɛɛ tun ka kan. Nka a ma o ko ta ka nɔrɔ a ra, ko a bɛ a yɛrɛ kaɲa ni Ala ye jagboya ra.” (Filip. 2:6, Biblu Ala ta Kuma). Jehova dɔrɔn lo lɔyɔrɔ ka bon ni Yezu ta ye. O n’a ta bɛɛ, Yezu m’a yɛrɛ jati k’a dama tɛmɛ. A y’a fɔ a ka kalandenw ye ko min be a yɛrɛ kɛ ‘u bɛɛ la dɔgɔmannin ye, o de ye u la mɔgɔba ye.’ (Luka 9:48, Bible senuma). Piyɔniyew, kɔrɔsigi cidenw, diinan mɔgɔkɔrɔw ani kafokulu kɔrɔsibagaw majiginin lo i ko Yezu. Nɛɛmaba lo an fɛ ka baara kɛ n’u ye! N’an majiginin lo, an bena tɔɔw kanu kosɔbɛ. Yezu ko Ala batobaga sɔbɛw be lɔn o kanuya lo fɛ.—Zan 13:35.

10. N’a b’i ɲɛɛ na ko diinan mɔgɔkɔrɔw tɛ kafo ka gwɛlɛyaw ɲɛnabɔra cogo bɛnnin na, i ka ɲi ka mun lo kɛ?

 ¹⁰ N’a b’i ɲɛɛ na ko diinan mɔgɔkɔrɔw tɛ kafo ka gwɛlɛya dɔw ɲɛnabɔra cogo bɛnnin na do? Sanni i ka to ka ŋunuŋunu, a yira ko i majiginin lo, i kɛtɔ ka sɔn u ta ma (Eburuw 13:17). Walisa ka se k’o kɛ, i yɛrɛ ɲininga ko: “Yala kooba lo min ka kan ka ɲɛnabɔ wa? Yala a ɲɛnabɔ wagati lo wa? Yala ne lo ka ɲi k’o koo ɲɛnabɔ wa? Tiɲɛn tiɲɛn na, yala n’ b’a ɲinina kafo kaan bɛnnin ka to wala n’ b’a ɲinina ka tɔgɔba lo sɔrɔ?”

11. Ka kɛɲɛ ni Efɛzikaw 4:2, 3 ye, n’an be baara kɛ Jehova ye ni majigilenya ye, nafa jumanw b’o la?

¹¹ Majigilenya kɔrɔtanin lo Jehova fɛ ka tɛmɛ setigiya kan. N’an be se baara la koɲuman, o ka di a ye. Nka min kɔrɔtanin lo a fɛ, o ye ko an kaan bɛnnin ka to. O kama, i seko bɛɛ kɛ ka baara kɛ Jehova ye ni majigilenya ye. N’i b’o kɛ, i bena kafo ka kelenya sabati (Efɛzikaw 4:2, 3 kalan). I seko bɛɛ kɛ fana waajuli baara la. To ka sababuw ɲini ka ɲumanya kɛ tɔɔw ye. Bɛɛ ladon ka ɲɛ hali minw tɛ ni kunkanbaaraw ye kafo kɔnɔ (Mat. 6:1-4; Luka 14:12-14). N’i b’i majigi ka baara kɛ kafo kɔnɔ, tɔɔw bena a ye ko setigiya b’i fɛ. Nka o dɔrɔn tɛ, u bena a ye fana ko i majiginin lo.

12. Yala Bibulu b’an jija an ka kɛ ni teriw ye wa? A ɲɛfɔ.

¹² Jehova b’a fɛ an ka wagati diiman kɛ n’an teriw n’an somɔgɔw ye (Zab. 133:1). Teri ɲumanw tun be Yezu fɛ (Zan 15:15). Nafa minw b’a la ka kɛ ni teri sɔbɛw ye,  Bibulu b’o yira (Talenw 17:17; 18:24). A b’a fɔ ko a man ɲi an ka to an kelen na (Talenw 18:1). Mɔgɔ caaman fɛ, u be se ka teri caaman sɔrɔ rezo sosiyow sababu fɛ ani o b’a to u t’a jati ko u b’u kelen na. Nka, an ka ɲi ka kɔrɔsili kɛ n’an be rezo sosiyow kan.

13. Minw be rezo sosiyow kan, mun na u dɔw b’a jati ko u b’u kelen na ani hakiliɲagami bana ka teli k’u minɛ?

¹³ Mɔgɔ dɔw be wagati caaman kɛ rezo sosiyow kan ka tɔɔw ka lakalitaw n’u ka fotow filɛ. Sɛgɛsɛgɛriw y’a yira k’o mɔgɔw ka teli k’a jati ko u b’u kelen na ani hakiliɲagami bana ka teli k’u minɛ. Mun na do? Sabu mɔgɔw be wagati diiman minw kɛ, u ka teli k’o fotow lo bila rezo sosiyow kan. U b’u yɛrɛ n’u teriw ka foto cɛɲumaninw lo sugandi ani u tagara yɔrɔ ɲuman minw na. Mɔgɔ min b’o fotow filɛ, o tigi be se k’a miiri ko ale kɔni tɛ ninsɔndiya foyi sɔrɔla a ka ɲɛnamaya kɔnɔ. Balimamuso dɔ be ni saan 19 ye ani a ko: “Tuma min na n’ y’a ye ko tɔɔw be ɲɛnagwɛkow kɛ wikɛniw na k’a sɔrɔ ne be soo ɲɛnafin na, n’ ka ninsɔndiya y’a daminɛ ka nagasi.”

14. Ladili min be sɔrɔ 1 Piyɛri 3:8 kɔnɔ, o b’an dɛmɛ cogo di ka baara kɛ ni rezo sosiyow ye ni hakilitigiya ye?

¹⁴ An be se ka baara ɲuman kɛ ni rezo sosiyow ye. Ɲɛyirali fɛ, an be se ka tɛmɛ o fɛ ka to ka kumaɲɔgɔnya kɛ n’an somɔgɔw n’an teriw ye. Nka, mɔgɔw be fotow wala videwo minw bila rezo sosiyow kan, o kuun ye k’u yɛrɛ yira. I m’o kɔrɔsi wa? A kɛra komi u b’a fɔra le ko: “A’ ye n’ filɛ.” Dɔw yɛrɛ be kuma nɔgɔninw wala malobaliya kumaw fɔ rezo sosiyow kan u yɛrɛ ka fotow wala mɔgɔ wɛrɛw taw koo la. Kerecɛnw man ɲi k’o koow ɲɔgɔn kɛ sabu Bibulu b’u jija u k’u yɛrɛ majigi ani u k’u janto tɔɔw dusukunnakow la.—1 Piyɛri 3:8 kalan.

15. Bibulu b’an dɛmɛ cogo di walisa an kana an yɛrɛ yira?

¹⁵ N’i be to ka taga rezo sosiyow kan, i yɛrɛ ɲininga ko: “Ne be lakalitaw, fotow wala videwo minw bila yen, yala o b’a to mɔgɔw b’a miiri ko n’ be n’ yɛrɛ yirala  le wa? Yala o be se k’a to tɔɔw be n’ ɲangoya wa?” Bibulu b’a fɔ ko: “Farisogo nigɛlakow, ɲadenw ka miyɛntɔya, jigimafakojugu, o koo nunu si te bɔ Faa Ala fɛ do, o bɛɛ be bɔ diɲɛ na le.” (1 Zan 2:16). Kumaden min bayɛlɛmana ko “jigimafakojugu,” Bibulu bayɛlɛmani wɛrɛ kɔnɔ, a fɔra ko “yɛrɛjiranciya.” Kerecɛnw man ɲi k’a ɲini ka tɔgɔba sɔrɔ. U be tugu Bibulu ka ladili nin kɔ: “An kana kɛ tɔgɔɲinilaw ye gwansan, ka to k’an tɔɲɔgɔnw darabɔ. An ɲaa kana bɔ an tɔɲɔgɔnw ka fɛɛnw na.” (Gal. 5:26). N’an majiginin lo, an tɛna a ɲini k’an yɛrɛ yira i ko duniɲamɔgɔw b’a kɛ cogo min na.

16. Mun na an man ɲi ka kuncɛbaya kɛ?

¹⁶ An ka ɲi k’an yɛrɛ majigi. Kuncɛbaw kɔni, olu b’u “yɛrɛ boɲa k’a dama tɛmɛ.” (Ɔrɔm. 12:3). U yadanin lo ani kɛlɛ ka di u ye. U ka miiriyaw n’u ka kɛwalew fɛ, u ka teli ka koo jugu kɛ u yɛrɛ wala tɔɔw la. N’u m’u miiricogo yɛlɛma, Sutana ka teli k’u hakili dibi ani k’u lafili (2 Kor. 4:4; 11:3). Nka, mɔgɔ majiginin t’a yɛrɛ bonya k’a dama tɛmɛ. A b’a yɛrɛ jati k’a dama kɛɲɛ ani a be sɔn a ma ko tɔɔw ka fisa n’ale ye koo caaman na (Filip. 2:3). A b’a lɔn ko “yɛrɛboɲala ka koo man di Ala ye. Nga a be nɛɛma kɛ mɔgɔmajigininw ye.” (1 Piyɛri 5:5). Mɔgɔ majigininw t’a fɛ u koo ka gwoya Jehova ye.

17. An ka ɲi ka mun lo kɛ walisa an majiginin ka to?

¹⁷ Walisa an majiginin ka to, an ka ɲi ka Bibulu ka ladili nin sira tagama: “Aw ye aw jogokɔrɔ bɛɛ dabila . . . ka jogokura ta.” O tɛ ɲɛ jijali kɔ. An ka ɲi ka Yezu ka ɲɛyirali lajɛ ani k’a ɲini k’a ladegi bɛrɛbɛrɛ (Kɔlɔs. 3:9, 10; 1 Piyɛri 2:21). N’an b’o kɛ, o bena an nafa kosɔbɛ. N’an majiginin lo, an ka denbaya bena kɛ hɛɛrɛ la ani an bena kafo ka kelenya sabati. An bena a lɔn fana cogo min na an be se k’an yɛrɛ tanga koo bɛnbaliw ma rezo sosiyow kan. Min yɛrɛ kɔrɔtanin lo ka tɛmɛ, o ye ko an koo bena diya Jehova ye ani a bena an duga.