Daliluw b’a yira ko Yezu kɛra sarakalasebagaw Kuntigiba ye a batize tuma na saan 29 Krista tile la (K.T.L.). Dalilu jumanw lo b’o yira? Yezu y’a yira a ka batɛmu fɛ ko ale labɛnnin lo ka Ala “sago” kɛ. O kɔrɔ, k’a niin saraka k’a kɛ kunmabɔsara ye (Gal. 1:4; Eburuw 10:5-10). Jehova sago be jati i ko sarakabɔlan. Tuma min na Yezu y’a niin di, a kɛra komi a y’a saraka o sarakabɔlan lo kan. O sarakabɔlan sigira sen kan Yezu batize tuma na. Jehova ye labɛn dɔ bila sen kan walisa an ka se ka batoli senuman lase ale ma Yezu ka kunmabɔsara sababu la. O labɛn be jati i ko Alabatosoba. O Alabatosoba fana sigira sen kan Yezu batize tuma na. Sarakabɔlan tun ye fɛɛn kɔrɔtaninba ye Alabatosoba kɔnɔ. Jehova sago fana kɔrɔtanin lo kosɔbɛ a ka labɛn na, a ye min kɛ batoli senuman kosɔn.—Mat. 3:16, 17; Eburuw 5:4-6.

An y’a ye ko Jehova ye labɛn min kɛ batoli senuman kama, o bilara sen kan ani a be komi Alabatosoba. Alabatosoba do mako be sarakalasebagaw kuntigi la. Ala ye Yezu mɔ ni “Nii Senuman ni sebagaya” ye o kama (Kɛw. 10:37, 38; Mariki 1:9-11). An b’a lɔn cogo di ko Yezu kɛra sarakalasebagaw Kuntigiba ye ka kɔn a saya n’a sukununi ɲɛ? Arɔn ani sarakalasebagaw kuntigiba minw tugura a kɔ, u ka koo b’an dɛmɛ k’o ɲiningali jaabi.

Ka kɛɲɛ ni Musa ka sariya ye, sarakalasebagaw kuntigi dɔrɔn lo tun be se ka don fanibugu ka Yɔrɔ Senumanw ka Senuman kɔnɔ. O kelen tun lo ni Alabatosoba ta ye. Cɛtigɛfani dɔ tun be Yɔrɔ Senumanw ka Senuman ni Yɔrɔ Senuman cɛ. Sarakalasebagaw kuntigi tun be don Yɔrɔ Senumanw ka Senuman na hakɛ yafalon dɔrɔn lo la (Eburuw 9:1-3, 6, 7). Arɔn ani sarakalasebagaw kuntigiba minw tugura a kɔ, olu kɛra sarakalasebagaw kuntigiw ye fɔlɔ ka sɔrɔ ka tɛmɛ fanibugu “cɛtigɛ fani [yɛrɛ yɛrɛ] cɛma.” Yezu fana kɛra sarakalasebagaw Kuntigiba ye fɔlɔ ka sɔrɔ ka sa. O kɔ, a tɛmɛna “cɛtigɛ fani cɛma min y’a yɛrɛ farisogo ye” ka taga sankolo la (Eburuw 10:20). O lo kama ciden Pol ko Yezu nana kɛ “sarakalasebagaw kuntigiba” ye fɔlɔ. O kɔ, a “donna fanibon min kɔnɔ, o nafa ka bon, a dafanin lo ka tɛmɛ fɔlɔ kan; mɔgɔ boro m’a lɔ.” Ani a donna “sankolo yɛrɛ” kɔnɔ.—Eburuw 9:11, 24, Biblu Ala ta Kuma.

Layidu kura sigira sen kan tuma juman? Koo saba tun ka ɲi ka kɛ walisa o layidu ka sigi sen kan. O koow daminɛna tuma min na Yezu yɛlɛla sankolo la ani a y’a niin dafanin sɔngɔ di Ala ma. O kɛra cogo di do?

A fɔlɔ, Yezu tagara lɔ Ala ɲɛɛ kɔrɔ. A 2nan, a y’a niin min saraka, a y’o sɔngɔ di Jehova ma. A 3nan, Jehova sɔnna o la. N’o koow tun ma kɛ, layidu kura tun tɛ se ka sigi sen kan.

Yezu y’a niin min saraka, Bibulu t’a fɔ an ye wagati tigitigi min na Jehova sɔnna o sɔngɔ la. An t’a lɔn fana layidu kura sigira sen kan wagati tigitigi min na. Nka, an b’a lɔn ko Yezu yɛlɛla sankolo la tile 10 ka kɔn Pantekɔte loon ɲɛ (Kɛw. 1:3). Yezu y’a niin min saraka, a y’o sɔngɔ di Jehova ma tuma dɔ la o wagati kunkurunin cɛ, ani Jehova sɔnna o la (Eburuw 9:12). Min kɛra saan 33 (K.T.L.) Pantekɔte loon na, o b’o lo yira ka gwɛ (Kɛw. 2:1-4, 32, 33). A gwɛnin lo k’o wagati la, layidu kura tun be sen kan.

Miiriya jɔnjɔn ye min ye, o ye ko Yezu y’a niin min saraka, a y’o sɔngɔ di Jehova ma ani Jehova sɔnna o la. O kɔ le, layidu kura sigira sen kan. Kabi o tuma, a be sen kan ani Yezu ye sarakalasebagaw Kuntigiba ye min ye o layidu kura soronanikɛla ye.—Eburuw 7:25; 8:1-3, 6; 9:13-15.