N’ wolola saan 1954 Etazini, Sɛn Pol dugu la, Minesota mara la. An tun ye katolikiw ye ani n’ wolobagaw ka koow tun ka fisa dɔɔni. U ye denmisɛn duuru sɔrɔ ani ne lo tun ye filanan ye. N’ denmisɛn tuma, n’ tun be katolikiw ka lakɔli dɔ la ani n’ tun be mɔnpɛricɛ dɛmɛ batoli tuma na. Nka, n’ tun tɛ bɛrɛ lɔn Bibulu koo la. N’ tun b’a miiri ko n’a sɔrɔ Ala dɔ be yen min ye fɛɛn bɛɛ dan, nka n’ tun lanin tɛ katoliki diinan na.

N’ tun be sariyaw kalan kɛra William Mitchell kolɛzi la. N’ saan fɔlɔ yen, Jehova Seere dɔw ye n’ ka daa kɔkɔ. Furuɲɔgɔnw tun lo. N’ tun be faniw kora ani u ko u bena na siɲɛ wɛrɛ. U segira ka na tuma min na, n’ tun be ni ɲiningali fila ye: “Mun na mɔgɔ juguw ka koow be ɲɛ u bolo ka tɛmɛ mɔgɔ ɲumanw kan?” ani “Mɔgɔ be se ka ninsɔndiya sɔbɛ sɔrɔ cogo di?” N’ sɔnna gafe La vérité qui conduit à la vie éternelle ani Bibulu Les Saintes Écritures — Traduction du monde nouveau la. O Bibulu kɔgolo tun ye binkɛnɛman ye ani a tun be mɔgɔ ɲɛɛ sama. N’ sɔnna fana ka bibulukalan kɛ, o  min ye n’ dɛmɛ ka koo caaman faamu. Tuma min na n’ y’a mɛn ko Ala ka Masaya ye gofɛrɛnɛman dɔ ye min bena dugukolo mara, o diyara n’ ye kosɔbɛ. N’ tun ɲɛɛ b’a la ko adamadenw ka gofɛrɛnɛmanw dɛsɛra pewu ka adamadenw mara. U yɛrɛ y’a to tɔɔrɔ, tilenbaliyakow ani koo juguw lo cayara duniɲa kɔnɔ.

Saan 1982 daminɛ na, n’ ye n’ yɛrɛkun di Jehova ma. Kɔfɛ o saan na, n’ batizera tile saba lajɛnba dɔ la. O lajɛnba kɛra boonba dɔ la Sɛn Pol dugu la ani a kuun tun ko: “La vérité du Royaume” (Tiɲɛn, Masaya koo la). Lɔgɔkun kelen o kɔ, n’ segira ka taga o boonba kɔnɔ walisa ka ɛkizamɛn dɔ kɛ janko ka kɛ awoka ye. Ɔkutɔburu daminɛ na, u y’a fɔ n’ ye ko n’ y’o ɛkizamɛn sɔrɔ. O kɔrɔ ko n’ tun be se ka kɛ awoka ye.

O lajɛnba la, n’ ye Mike Richardson kunbɛn. Betɛliden tun lo Buruklini. A y’a fɔ n’ ye ko u ye biro dɔ yɛlɛ sigiyɔrɔsoba la walisa ka Jehova Seerew lafasa kititigɛsow la. N’ hakili jigira Etiyopika ka kumaw na minw be sɔrɔ Kɛwaliw 8:36 kɔnɔ ani n’ ye n’ yɛrɛ ɲininga ko: “Mun be ne bali k’a ɲini ka baara kɛ o biro la?” O la, n’ ye demandi dafa walisa ka baara kɛ Betɛli la.

N’ kɛra Jehova Seere ye minkɛ, o ma diya n’ bangebagaw ye. N’ facɛ tun b’a fɛ k’a lɔn ni n’ kɛra Jehova Seerew ka awoka ye, o bena n’ nafa cogo min na n’ ka baara la. N’ y’a fɔ a ye ko n’ b’a fɛ ka n’ yɛrɛ di le k’o baara kɛ ani ko u bena to ka dolari 75 lo di n’ ma kalo o kalo. O lo tun be di betɛlidenw ma o wagati la.

N’ tilara baara dɔ la ka sɔrɔ ka taga Niyɔriki, Buruklini Betɛli la saan 1984. Biro min be Jehova Seerew lafasa kititigɛsow la, u ye n’ bila ka taga yen. N’ ye lɔnniya min sɔrɔ n’ ka baara kɔrɔ la, o tun bena n’ dɛmɛ Betɛli la.

Saan 1983, novanburukalo la, Jehova Seerew ye Stanley teyatiribon san. A be Jɛrse dugu la, Nijɛrse mara la. Balimaw ye sira ɲini walisa k’o teyatiribon ka kuranfɛnw ani a orobinɛw n’a ɲɔgɔnnaw lakuraya. U y’a ɲɛfɔ faamanw ye ko u b’a fɛ ka o boon kɛ Jehova Seerew ka lajɛnba kɛyɔrɔ ye. Nka, o dugu ka sariya tun b’a fɔ ko mɔgɔw ka soow be yɔrɔ minw na, batoli kɛyɔrɔw be se ka kɛ o yɔrɔw dɔrɔn lo la. Stanley teyatiribon do tun be dugu cɛma, jagokɛyɔrɔ dɔ la. O kama, faamanw ma sɔn ka sira di an ma.  Balimaw tagara n’o koo ye kititigɛso wɛrɛ la, nka o kititigɛso ma sɔn.

N’ lɔgɔkun fɔlɔ Betɛli la, ɔriganisasiyɔn tagara n’o koo ye kititigɛsoba la. N’ tun ye baara kɛ Sɛn Pol dugu kititigɛsoba la saan fila kɔnɔ ani n’ tun tilara a ma mɛɛn. O kama, n’ tun be se o kitikow ɲɔgɔn ɲɛnabɔcogo la. An ka awoka dɔ y’a fɔ ko Stanley teyatiribon kɔnɔ, forobako sifa caaman tun be kɛ i n’a fɔ sinemaw ani kɔnsɛriw. O la, mun na a daganin tɛ Alakow ka kɛ yen? Kititigɛsoba y’o koo lajɛ ani a ko joo min b’an fɛ k’an ka Alakow kɛ, Jɛrse dugu m’o labato. Kititigɛsoba ko Jɛrse dugu ka sira di an ma. Jehova ka ɔriganisasiyɔn tun be jijali minw kɛra k’a yɛrɛ lafasa kititigɛsow la, n’ y’ a daminɛ k’a ye Jehova tun b’o dugara cogo min na. A diyara n’ ye kosɔbɛ ka n’ niin don o baara la.

Balimaw ye baaraba kɛ walisa k’o teyatiribon lakuraya ani a kɛra an ka lajɛnbabon ye Jɛrse dugu la. O baara banna a yɛrɛ ma saan kelen bɔ. Minw ye Gilead lakɔli 79nan kɛ, u y’olu ka diplomuw di u ma yen saan 1985, sɛtanburu tile 8. A diyara n’ ye kosɔbɛ ka dɛmɛ don ka Ala ka Masaya ka koow lafasa kititigɛsow la. N’ ye ninsɔndiya min sɔrɔ, n’ ma o ɲɔgɔn sɔrɔ n’ ka baara kɔrɔ la. N’ tun m’a miiri ko Jehova tun bena a to n’ be dɛmɛ don kitiko caaman wɛrɛw la.

K’a ta saan 1980 ka taga se saan 1989 fan fɛ, ni Jehova Seere baliku dɔ tun ko u kana joli don a la, dɔgɔtɔrɔw wala dɔgɔtɔrɔsow tun man teli ka sɔn a ta ma. Kititigɛlaw yɛrɛ tun b’a fɔ ko joo tɛ muso kɔnɔman fɛ fewu ka ban u ka joli don a la. U tun b’a fɔ ko ni joli ma don a la, a tun be se ka sa k’a deen to yen.

Saan 1988, desanburu tile 29, balimamuso Denise Nicoleau joli bɔnna caaman a jiginin kɔ a dencɛ la. Komi a niin tun be farati la, a ka dɔgɔtɔrɔ tun b’a fɛ a k’a to joli ka don a la. Nka a banna. O dugusagwɛ sɔgɔma, dɔgɔtɔrɔso y’a ɲini kititigɛla dɔ fɛ a ka sira di walisa joli ka don o balimamuso la. Kititigɛla m’a ɲini ka balimamuso Nicoleau wala a cɛɛ ka miiriya lɔn. A sinna ka sira di ko joli ka don balimamuso la ani a yɛrɛ m’a sara u la.

Jumalon, desanburu tile 30, u ye joli don balimamuso Nicoleau la hali k’a sɔrɔ a cɛɛ ani a somɔgɔ minw tun be n’a ye, olu banna. O loon sufɛ, u ye balimamuso somɔgɔ caaman ani diinan mɔgɔkɔrɔ dɔw minɛ ka don kaso la. U ye u jalaki ko u lɔra ka balimamuso Nicoleau lamini walisa joli kana  don a la. O loon dugusagwɛ, Niyɔriki n’a gɛrɛfɛyɔrɔw ka zurunaliw, telewisɔnw ani arajow y’o mɔgɔw minɛli kofɔ.

Ntɛnɛlon sɔgɔma, n’ ye baro kɛ ni Milton Mollen ye. Ale lo tun ye kititigɛlaw kuntigi ye. N’ y’a fɔ a ye koow kɛra cogo min na. N’ sinsinna a kan ko kititigɛla ye sira di ko joli ka don balimamuso Nicoleau la ani a m’a ɲini k’a ka miiriya lɔn. Kititigɛla Mollen ko n’ ka na a ka biro la o loon wulafɛ walisa an ka baro kɛ o koo la ani sariya minw ɲɛsinna o koo ma. An ka biro ɲɛmɔgɔ, balimacɛ Philip Brumley ye n’ bila sira Mollen ka biro la. Mollen ye dɔgɔtɔrɔso ka awoka fana weele ka na. Sɔsɔli gwanna. Wagati dɔ la, balimacɛ Brumley ye fɛɛn dɔ sɛbɛ papiye kan k’a fɔ n’ ye ko n’ ka n’ kaan jigi. O tun ye ladili ɲuman lo ye sabu n’ dusu tun be gwanna n’ kɛtɔ k’a yira ko joo tɛ dɔgɔtɔrɔso ka awoka fɛ.

Lɛri kelen o kɔ, kititigɛlaw kuntigi Mollen ko u bena a daminɛ k’o koo lo lajɛ o loon dugusagwɛ sɔgɔma. An bɔtɔ Mollen ka biro la, a y’a fɔ ko koow bena gwɛlɛya dɔgɔtɔrɔso ka awoka ma sini. O kɔrɔ ko a tun bena gwɛlɛya a ma k’a yira ko joo tun be dɔgɔtɔrɔso fɛ ka balimamuso Nicoleau waajibiya ka joli don a la. A tun be komi Jehova lo be n’ hakili sigira ko an bena see sɔrɔ o kitiko la. N’ dusu diyara kosɔbɛ k’a ye ko Jehova tun be tɛmɛna an fɛ k’a sago dafa.

Walisa ka se k’an yɛrɛ lafasa, an ye baara kɛ fɔɔ ka dugu tila. Kititigɛso yɔrɔ tun man jan Buruklini Betɛli la. O kama, an ka biro balimaw fanba tagamana ka na. Kititigɛla naani minw tun be yen, u y’an lamɛn ani u ko sira tun man ɲi ka di walisa joli ka don balimamuso Nicoleau la. Kititigɛsoba ye joo di an balimamuso ma. Ani, a y’a fɔ ko ka sira di joli ka don mɔgɔ la k’a sɔrɔ u m’a ɲini k’a tigi ka miiriya lɔn, o bɛnnin tɛ fewu ni sariya ye.

Dɔɔni o kɔ, Niyɔriki kititigɛsoba fana y’a fɔ ko joo be balimamuso Nicoleau fɛ ka ban joli ka don a la. Etazini mara caaman ka kititigɛsobaw ye joo di an ma kitiko naani na ka ɲɛsin joli koo ma, ani nin tun y’a fɔlɔ ye. N’ ye nɛɛma sɔrɔ ka balimaw lafasa o kitikow bɛɛ la. (Koorilen nin lajɛ: “ An ye joo  sɔrɔ kititigɛsobaw la.”) N’ ye Betɛli ka awoka dɔw dɛmɛ ka kitiko wɛrɛw ɲɛnabɔ ka ɲɛsin deen kalifako, furusa, dugukolo ni boon koo ma.

N’ ye balimamuso Dawn lɔn tuma min na, a ka furu tun sara ani deen saba tun b’a fɛ. A tun be baara kɛ walisa k’u mako wasa ani piyɔniye tun lo. Koow tun man nɔgɔ a fɛ, nka a tun cɛsirinin lo Jehova sago kɛli la. O ye n’ kabakoya kosɔbɛ. Saan 1992, an ye lajɛnba dɔ kɛ Niyɔriki dugu la min kuun tun ko: “Porteurs de lumière” (Yeelen bɔlaw). O yɔrɔ lo la n’ y’a ɲini a fɛ an ka teriya kɛ furu kama. Saan kelen o kɔ, n’ y’a furu. Ka muso sɔrɔ Jehova ka koow ye min ɲɛnako fɔlɔ ye ani yɛlɛkoko ka di min ye, o ye Jehova ka duga lo ye. Tiɲɛn na, an ye wagati min bɛɛ kɛ ɲɔgɔn fɛ, Dawn ye koo ɲuman kɛ n’ ye yɛrɛ le!—Talenw 31:12.

An furutuma na, denmisɛnw tun be ni saan 11, 13, ani 16 ye. N’ tun b’a fɛ ka kɛ faa ɲuman ye u fɛ. O kama, ladili minw be sɔrɔ an ka gafew kɔnɔ lamɔdenw koo la, n’ ye u kalan koɲuman ani k’u sira tagama. Saanw tɛmɛtɔ, an ye gwɛlɛyaw sɔrɔ. Nka, n’ ninsɔn diyara k’a ye ko denmisɛnw ye n’ jati u teri sɔbɛ n’u faa kanulen ye. A tun ka di an ye k’a to an deenw teri caaman ka na wagati kɛ n’u ye an ka soo.

Saan 2013, ne ni Dawn tagara Wiskɔnsini walisa k’an bangebagaw ladon sabu u tun kɔrɔla. N’ kabakoyara k’a ye ko u m’a ɲini n’ fɛ n’ ka baara lalɔ Betɛli la. U ko n’ bele ka to ka dɛmɛ don tuma dɔw la ka ɔriganisasiyɔn ka kitikow ɲɛnabɔ.

Saan 2018 sɛtanburukalo la, n’ y’a kɔrɔsi ko tuma caaman, a tun be kɛ komi kagari be n’ kaan na. An ka dɔgɔtɔrɔ ye n’ filɛ, nka a m’a lɔn min tun be n’ na. Kɔfɛ, dɔgɔtɔrɔ wɛrɛ ko n’ ka taga dɔgɔtɔrɔ dɔ fɛ min be fasaw furakɛ. Saan 2019, zanwiyekalo la, o dɔgɔtɔrɔ ko a be komi fasa bana dɔ lo be n’ na min man teli ka mɔgɔ minɛ. A ko a bena laban ka n’ fasaw faga.

Tile saba o kɔ, n’ tun be n’ diyanye spɔr kɛra ani n’ benna ka n’ kinibolo kari. N’ tun b’o spɔr kɛ kabi tumajan ani n’ tun be se a la kosɔbɛ. N’ y’a faamu ko n’ tun tɛ sera n’ yɛrɛ kɔrɔ tugun. A barila n’ na k’a ye ko n’ ka bana juguyara joona joona. A tun ka gwɛlɛ n’ ma ka kuma, ka tagama ani ka dumuni kunu.

N’ ninsɔn ka di kosɔbɛ sabu n’ sera ka Jehova ka ɔriganisasiyɔn lafasa kitikow la. Dɔgɔtɔrɔw, awokaw ani kititigɛlaw be zurunali minw kalan, n’ ye nɛɛma sɔrɔ fana ka barokun caaman sɛbɛ u kɔnɔ. N’ tagara fana jamana caaman na ka kalanw kɛ walisa k’a yira ko joo be Jehova Seerew fɛ ka ban joli la ani ka sɔn furakɛcogo wɛrɛw la. O n’a ta bɛɛ, ka kɛɲɛ ni Luka 17:10 ye, n’ b’a jati ko: ‘Ne ye baaraden gwansan le ye. N’ tun ka kan ka min kɛ, n’ ka o le kɛ.’—Biblu Ala ta Kuma.