1. Ka mɔgɔw dɛmɛ u ka kɛ Krista ka kalandenw ye, o ye baara ye min be mɔgɔw kisi. An b’o lɔn cogo di?

KA MƆGƆW dɛmɛ u ka kɛ Krista ka kalandenw ye, o ye baara ye min be mɔgɔw kisi! An b’o lɔn cogo di? Cikan min be sɔrɔ Matiyo 28:19, 20 kɔnɔ, tuma min na Yezu y’o di a ka kalandenw ma, a ko: “Aw ye taga siyaw bɛɛ kɛ ne ka kalandenw ye k’u batize.” Mun na a kɔrɔtanin lo mɔgɔ ka batize? O kɔrɔtanin lo sabu n’an b’a fɛ ka kisi, fɔɔ an ka batize. Mɔgɔ min b’a fɛ ka batize, o tigi ka ɲi ka la a la ko a be se ka ɲɛnamaya banbali sɔrɔ sabu Yezu sara an kosɔn ani a suu kununa. O lo kama ciden Piyɛri y’a fɔ a kerecɛnɲɔgɔnw ye ko: “Batizeli . . . b’aw kisi bii . . . Yezu Krista ka kununni barika la.” (1 Piyɛri 3:21). O kama ni mɔgɔ batizera kura ye, a be ni jigiya ye ka ɲɛnamaya banbali sɔrɔ.

2. Ka kɛɲɛ ni 2 Timote 4:1, 2 ye, an ka ɲi ka kɛ kalanfa sugu jumanw ye?

² N’an b’a fɛ ka mɔgɔw kɛ Krista ka kalandenw ye, an ka ɲi ka kɛ kalanfa ɲumanw ye (2 Timote 4:1, 2 kalan). Mun na do? Sabu Yezu ye cii di an ma ko: “Aw ye taga siyaw bɛɛ kɛ ne ka kalandenw ye . . . k’u kalan.” Ciden Pol ko i k’i “jija” o baara la, “n’o kɛra, i bena i yɛrɛ kisi ani k’i lamɛnbagaw fana kisi.” O kama, a ko: “I ka mɔgɔ kalancogo kɔlɔsi.” (1 Tim. 4:16). N’an b’a fɛ ka mɔgɔw kɛ Krista ka kalandenw ye, an ka ɲi k’u kalan. O la, an ka ɲi k’an ka mɔgɔw kalancogo fisaya.

3. An bena mun lo lajɛ barokun nin na ka ɲɛsin bibulukalanw ma?

³ An be to ka bibulukalan kɛ ni mɔgɔ miliyɔn caaman ye duniɲa kuru bɛɛ kɔnɔ. I ko an y’a ye barokun tɛmɛnin na cogo min na, an b’a fɛ k’a lɔn an be se k’u fanba dɛmɛ cogo min na u ka batize. Koo duuru be yen kalanfaw ka ɲi  ka minw kɛ walisa ka kalandenw dɛmɛ u ka ɲɛtaga kɛ fɔɔ ka batize. An bena o lo lajɛ barokun nin na.

4. Mun na kalanfa man ɲi ka kuma caaman n’a be bibulukalan kɛra? (Jukɔrɔla kunnafoni fana lajɛ.)

⁴ An be mɔgɔw kalan min na Bibulu kɔnɔ, o ka di an ye kosɔbɛ. O la, an ka teli ka kuma caaman o koo la. Nka, an be Kɔrɔsili Sangaso wala kafo ka Bibulu kalan lo ɲɛminɛna wo, wala n’an be bibulukalan kɛra ni mɔgɔ dɔ ye a ka soo wo, an man ɲi ka kuma caaman. Walisa ka basigi Bibulu kan ka mɔgɔ kalan, kalanfa ka ɲi k’a yɛrɛ minɛ. A be min lɔn vɛrise dɔ wala barokun dɔ koo la, a man ɲi k’a ɲini k’o bɛɛ ɲɛfɔ * (Zan 16:12). I tun be Bibulu ka tiɲɛnkalan minw lɔn i batize tuma ani i be minw lɔn sisan, yala u ye kelen ye wa? N’a sɔrɔ i tun be Bibulu ka kalan jɔnjɔnw dɔrɔn lo faamu i batize tuma na (Eburuw 6:1). I be ni lɔnniya min ye sisan, i ye saan caaman lo kɛ k’o sɔrɔ. O kama, kana a ɲini k’o bɛɛ ɲɛfɔ kalanden kura ye siɲɛ kelen.

5. a) Ka kɛɲɛ ni 1 Tesalonikaw 2:13 ye, an b’a fɛ an ka kalanden ka mun lo faamu a ka bibulukalan na? b) Kalanden ye min faamu, an be se k’a jija cogo di a ka kuma o koo la?

⁵ An b’a fɛ an ka Bibulu kalanden k’a faamu ko an b’a kalanna min na, o bɔra Bibulu lo kɔnɔ (1 Tesalonikaw 2:13 kalan). An be se k’o kɛ cogo di? Kalanden ye min faamu, a jija a ka kuma o koo la. Kana to ka vɛrisew ɲɛfɔ tuma bɛɛ kalanden ye. Nka, to k’a ɲini a fɛ ale yɛrɛ k’u dɔw ɲɛfɔ i ye. A dɛmɛ a k’a ye Bibulu ka sariyaw ɲɛsinna a ma cogo min na. N’aw ye vɛrise dɔ kalan, a ɲininga koo dɔw la minw bena a to a b’a ka miiriya fɔ o vɛrise koo la (Luka 10:25-28). Ɲɛyirali fɛ, a ɲininga ko: “Jehova ka jogo dɔ yirala cogo di vɛrise nin kɔnɔ?” “O vɛrise be se k’i nafa cogo di?” “I ye min kalan, i be mun lo miiri o koo la?” (Talenw 20:5). Kalanden be koo caaman minw faamu, o lo kɔrɔtanin tɛ kosɔbɛ. Nka, o koow ka di a ye ani a b’u sira tagama cogo min na, o lo kɔrɔtanin lo kosɔbɛ.

6. Mun na a ka ɲi an k’a to weleweledala kolɔnbaga dɔ k’an bila sira ka taga an ka bibulukalan kɛ?

⁶ Yala i b’a to weleweledala kolɔnbaga dɔ k’i bila sira ka taga i ka bibulukalan kɛ wa? N’o lo, i ye bibulukalan kɛ ani i ye baara kɛ ni Bibulu ye cogo min na, i be se k’a tigi ɲininga a k’a ka miiriya  fɔ i ye o koo la. N’i b’a fɛ ka mɔgɔw kalancogo fisaya, fɔɔ i k’i majigi (Kɛwaliw 18:24-26 lajɛ). I be se k’o weleweledala ɲininga fana ni kalanden be kalan faamuna. N’i ka ɲi ka taga yɔrɔ dɔ lɔgɔkun kelen wala lɔgɔkun damanin, i be se k’a ɲini o weleweledala fɛ a k’i ka bibulukalan kɛ i ye. O la, o bibulukalan bena to ka kɛ tuma o tuma ani kalanden bena a faamu ko a ka bibulukalan kɔrɔtanin lo. Kana a miiri abada k’o bibulukalan ye “ele dɔrɔn” ta lo ye ani ko mɔgɔ wɛrɛ tɛ se k’o kalan kɛ. Min ka fisa kalanden ma, ele b’o lo fɛ. I b’a fɛ a ka to ka dɔ fara a ka lɔnniya kan tiɲɛn koo la tuma o tuma.

7. Mun lo be se ka Bibulu kalanden dɛmɛ walisa kalan ka diya a ye kosɔbɛ?

⁷ Bibulu kalanden ka ɲi k’a ye ko Bibulu ka kalanw ka di i ye ani ko i lanin b’u la (1 Tes. 1:5). O la, a be min kalanna, o ka teli ka diya a ye kosɔbɛ. N’a bɛnnin lo, i be se k’a fɔ a ye Bibulu ka sariyakolow ye ele yɛrɛ nafa cogo min na. O la, a bena a faamu k’o sariyakolow be se k’ale fana nafa.

8. I ka ɲi ka koo wɛrɛ juman lo kɛ k’i ka Bibulu kalanden dɛmɛ ani mun na i ka ɲi k’o kɛ?

⁸ Minw ye Bibulu kalanden ka gwɛlɛyaw ɲɔgɔn sɔrɔ ani u ye see sɔrɔ u kan, olu dɔw kofɔ a ye kalan kɛtɔ. Kafoden minw ka ɲɛyirali be se ka kalanden nafa, i be se k’a ɲini olu dɔ fɛ a k’i bila sira o kalan na. Ɲɛyirali ɲumanw fana be sɔrɔ jw.org kan yɔrɔ nin na: “La Bible transforme des vies.” * O barokunw n’o videwow bena kalanden dɛmɛ a k’a faamu ko hakilitigiyako lo a ka Bibulu ka sariyakolow sira tagama.

9. Kalanden be min kalanna, i be se k’a jija cogo di a k’o fɔ a somɔgɔw n’a teriw ye?

⁹ Ni Bibulu kalanden furunin lo, yala a furuɲɔgɔn fana be bibulukalan kɛra wa? N’o tɛ, a ɲini a fɛ a ka fara aw kan ka bibulukalan kɛ. Kalanden be min kalanna, a jija a k’o fɔ a somɔgɔw n’a teriw ye (Zan 1:40-45). I be se k’o kɛ cogo di do? I be se k’a ɲininga ko: “I bena miiriya nin ɲɛfɔ i somɔgɔ dɔ ye cogo di?” wala “I bena basigi vɛrise juman lo kan k’o  ɲɛfɔ i teri dɔ ye?” O cogo la, i be fɔrɔmasɔn lo dira kalanden ma walisa a ka kɛ kalanfa ye. O la, n’a ye saratiw dafa, a be se k’a daminɛ ka waajuli kɛ i ko weleweledala min ma batize. I be se k’a ɲininga n’a be dɔ lɔn min b’a fɛ ka bibulukalan kɛ. N’a be mɔgɔ dɔ lɔn, sin ka kaan bɔ o tigi ma ani bibulukalan kofɔ a ye. Videwo nin yira a la: An be bibulukalan kɛ ni mɔgɔw ye cogo di? *

10. Ka kɛɲɛ ni 1 Tesalonikaw 2:7, 8 ye, kalanfa be se ka Pol ladegi cogo di?

¹⁰ Kalanfa ka ɲi k’a yira a ka kalanden na ko a b’a mako don a la kosɔbɛ. A ka ɲi k’a jati ko kalanden be se ka kɛ a balima kerecɛn dɔ ye (1 Tesalonikaw 2:7, 8 kalan). A man nɔgɔ kalandenw fɛ k’u teriw to yen duniɲa kɔnɔ ani ka yɛlɛmani bɛnninw kɛ walisa ka Jehova sago kɛ. O la, an ka ɲi ka kalandenw dɛmɛ u ka teri sɔbɛw sɔrɔ kafo kɔnɔ. Kɛ i ka kalanden teri ye i kɛtɔ ka wagati kɛ n’a ye bibulukalan tuma na ani wagati wɛrɛw la. I be se k’a weele telefɔni na, ka sms ci a ma wala ka taga bɔ a ye loon wɛrɛw la walisa k’a yira ko i b’i janto a la sɔbɛ la.

11. An b’a fɛ an ka Bibulu kalandenw ka mun lo sɔrɔ kafo kɔnɔ ani mun na?

¹¹ A be fɔ ko “deen ye dugumɔgɔw bɛɛ ta ye.” An be se k’a fɔ fana ko “Bibulu kalanden ye kafomɔgɔw bɛɛ ta ye.” O lo kama, kalanfa ɲumanw b’u ka kalandenw dɛmɛ u ka kafoden tɔɔw lɔn. O kafodenw be se k’u dɛmɛ u k’u magwɛrɛ kosɔbɛ Jehova la. O la, a bena diya o kalandenw ye ka jɛn ni Jehova sagokɛlaw ye. Olu be se k’u dɛmɛ u ka kɛ Jehova teri sɔbɛw ye ani k’u jija ni gwɛlɛyaw b’u kan. An b’a fɛ kalanden kelen kelen bɛɛ k’a jati ko ale ye kafoden dɔ ye ani ko a ye Jehova ka denbayamɔgɔ dɔ fana ye. Kanuya b’o denbaya kɔnɔ ani an b’a fɛ o denbaya koo ka diya kalanden ye. O la, minw t’a dɛmɛ ka Jehova kanu, a tɛna gwɛlɛya a ma ka faran olu la (Talenw 13:20). Hali n’a teri kɔrɔw banna a la, a bena a lɔn ko a be se ka teri sɔbɛw sɔrɔ Jehova ka ɔriganisasiyɔn kɔnɔ.—Mariki 10:29, 30; 1 Piyɛri 4:4.

12. Mun na an ka ɲi ka kuma yɛrɛkundili ni batɛmu koo la n’an ka kalanden ye?

¹² I kɔnɔ gwɛ ka kuma kalanden fɛ yɛrɛkundili ni batɛmu koo la.  An be bibulukalan kɛ ni mɔgɔw ye kuun min kama, o ye k’u dɛmɛ u ka batize ka kɛ Krista ka kalandenw ye. Kalo damanin bibulukalan daminɛnin kɔ, ni kalanden y’a daminɛ ka na lajɛnw na, a ka ɲi k’a faamu ko kalan kuun ye k’a dɛmɛ a ka kɛ Jehova sagokɛla dɔ ye.

13. Bibulu kalanden ka ɲi ka sarati jumanw lo dafa walisa ka batize?

¹³ Dɔɔni dɔɔni, Bibulu kalanden sɔbɛ be saratiw dafa ani ka batize! A fɔlɔ, a be lɔnniya sɔrɔ Jehova koo la, k’a kanu ani ka limaniya a la (Zan 3:16; 17:3). O kɔ, a be teriya kɛ ni Jehova ni kafodenw ye (Eburuw 10:24, 25; Zaki 4:8). Kalanden be kɛwale juguw dabila ani a be nimisa a ka jurumuw na (Kɛw. 3:19). O wagati kelen na, a ka limaniya b’a lasun k’a ka lannakow fɔ tɔɔw ye (2 Kor. 4:13). O kɔ, a b’a yɛrɛ kuun di Jehova ma ani ka batize (1 Piyɛri 3:21; 4:2). A ka batɛmu loon na, bɛɛ ninsɔn be diya! Ni kalanden b’o saratiw kelen kelen bɛɛ dafara, to k’i kɔnɔ gwɛ k’a tando ani k’a jija walisa a ka batɛmu sarati tɔɔw dafa.

14. Kalanfa be se k’a lɔn cogo di ni kalanden be ɲɛtaga kɛra?

¹⁴ An ka ɲi ka muɲu n’an be kalanden dɛmɛna a ka ɲɛtaga kɛ walisa k’a yɛrɛkun di Jehova ma ani ka batize. Nka, ni kalan sera hakɛ dɔ ma, an ka ɲi k’a ɲini k’a lɔn n’a tigi b’a fɛ ka Jehova Ala sago kɛ. Yala i ye koo dɔw kɔrɔsi minw b’a yira ko kalanden b’a jijara ka Yezu ka cikanw labato wa? Wala a b’a fɛ ka lɔnniya dɔrɔn lo sɔrɔ Bibulu kɔnɔ?

15. Mun lo bena a yira kalanfa la ko kalanden be ɲɛtaga kɛra?

¹⁵ Tuma o tuma, to k’a filɛ n’i ka Bibulu kalanden be ɲɛtaga kɛra. Yala a b’a dusukunnakow fɔ Jehova koo la wa? A be Jehova deli wa? (Zab. 116:1, 2). A ka di a ye ka Bibulu kalan wa? (Zab. 119:97). A be taga lajɛnw na tuma o tuma wa? (Zab. 22:23). A ye yɛlɛmaniw don a ka ɲɛnamaya kɛcogo la wa? (Zab. 119:112). A ye min kalan, yala a y’a daminɛ k’o fɔ a somɔgɔw n’a teriw ye wa? (Zab. 9:2). Min yɛrɛ kɔrɔtanin lo ka  tɛmɛ, yala a b’a fɛ ka kɛ Jehova Seere dɔ ye wa? (Zab. 40:9). Ni kalanden tɛ ɲɛtaga kɛra o koo nunu si la, a ɲini nɛmɛnɛmɛ k’a lɔn fɛɛn min kama. O kɔ, i kɔnɔ gwɛ ka kuma n’a ye o koo la ni dususuman ye. *

16. Mun lo be se k’a yira ko an ka ɲi ka bibulukalan dɔ lalɔ?

¹⁶ Tuma o tuma, to k’a filɛ n’i bele ka ɲi ka to ka bibulukalan dɔ kɛ wala n’i ka ɲi k’a lalɔ. I yɛrɛ ɲininga ko: “Yala kalanden t’a ka kalan labɛn wa? A t’a fɛ ka na lajɛnw na wa? A bele be ni delinanko juguw ye wa? A bele be ngalon diinan dɔ la wa?” N’o ɲiningaliw jaabiliw ye ɔnhɔn ye, kuun t’a la i ka to ka bibulukalan kɛ n’o tigi ye. N’o tɛ, a bena kɛ komi i b’a fɛ ka mɔgɔ dɔ degi jii la min t’a fɛ k’a yɛrɛ ɲigi! Bibulu kalanden be min kalanna, n’o man di a ye ani a t’a fɛ ka yɛlɛmaniw kɛ, a ka fisa i k’a ka bibulukalan lalɔ.

17. Ka kɛɲɛ ni 1 Timote 4:16 ye, kalanfaw bɛɛ ka ɲi ka mun lo kɛ?

¹⁷ Kunkanbaara min dira an ma ko an ka mɔgɔw kɛ Krista ka kalandenw ye, an b’o ta sɔbɛ la. O la, an b’a fɛ k’an ka Bibulu kalandenw dɛmɛ u ka ɲɛtaga kɛ fɔɔ ka batize. O lo kama, an bena an ka kalan basigi Bibulu kan, an bena kalan kɛ ni dusudiya ye ani k’a yira ko an lanin lo Bibulu ka fɔta la. An bena kalanden jija fana a ka teriya kɛ ni kafodenw ye, an bena kuma a fɛ yɛrɛkundili ni batɛmu koo la ani an bena to k’an yɛrɛ ɲininga tuma o tuma k’a filɛ ni kalanden be ɲɛtaga kɛra. (Koorilen nin lajɛ ɲɛɛ 13nan kan: “ Kalanfa ka ɲi ka min kɛ walisa ka kalanden dɛmɛ a ka ɲɛtaga kɛ fɔɔ ka batize.”) An ninsɔn ka di k’an niin don o baara la, o min be mɔgɔ niin kisi! An k’an jija k’an seko bɛɛ kɛ walisa ka bibulukalanw kɛ minw be ɲɛtaga kɛ fɔɔ ka batize.