1. Min fɔra 2 Korɛntikaw 3:1-3 kɔnɔ, o b’an dɛmɛ cogo di k’a faamu ko nɛɛma lo ka Bibulu kalanden dɔ dɛmɛ a ka ɲɛtaga kɛ fɔɔ ka batize? (Jaa lajɛ ɲɛɛ fɔlɔ kan.)

I KA kafo kɔnɔ, ni balima dɔ ka Bibulu kalanden be batizera, o be mun lo kɛ i la? Siga t’a la, o b’i ninsɔn diya (Mat. 28:19). N’a y’a sɔrɔ ko ele lo ye bibulukalan kɛ n’a ye, i ninsɔn be diya kosɔbɛ! (1 Tes. 2:19, 20). Minw batizera kura ye, olu be komi “sɛbɛ” wala lɛtɛrɛ minw b’u kalanfaw ani kafo kuru bɛɛ kofɔ tɔɔw ye.— 2 Korɛntikaw 3:1-3 kalan.

2. An ka ɲi k’an yɛrɛ ɲininga koo kɔrɔtanin juman lo la ani mun na? b) Bibulukalan ye mun lo ye? (Jukɔrɔla kunnafoni lajɛ.)

² Nisɔndiya lo k’a ye ko saan naani tɛmɛninw na, weleweledalaw ye bibulukalan * miliyɔn tan ɲɔgɔn kɛ kalo o kalo duniɲa kuru bɛɛ kɔnɔ. O saanw na, mɔgɔ 280 000 ni kɔ tun be batize saan o saan. Mɔgɔ miliyɔn caaman minw be bibulukalan kɛra, an be se k’olu fanba dɛmɛ cogo di u ka batize? Jehova bele be sababu dira mɔgɔw ma u ka kɛ ale Seerew ye. O kama, an b’a fɛ k’an seko bɛɛ kɛ k’u dɛmɛ walisa u ka ɲɛtaga kɛ joona joona ka batize. Wagati caaman t’an bolo tugun!—1 Kor. 7:29a; 1 Piyɛri 4:7.

3. An bena mun lo lajɛ barokun nin na ka ɲɛsin bibulukalanw ma?

 ³ Bi, a kɔrɔtanin lo kosɔbɛ an ka mɔgɔw kɛ Krista ka kalandenw ye. O kama, Koow Ɲɛnabɔla Jɛnkulu ye tɔnbolow ɲininga min be se ka kɛ walisa ka Bibulu kalandenw fanba dɛmɛ u ka ɲɛtaga kɛ ka batize. Barokun nin n’a nɔfɛta la, an bena a ye an be se ka kalan min sɔrɔ piyɔniyew, misɔndenw ani kafokulu kɔrɔsibaga kolɔnbagaw fɛ * (Talenw 11:14; 15:22). O barokunw bena a yira kalanfa ni Bibulu kalanden be se ka min kɛ walisa kalanden ka nafa sɔrɔ bɛrɛbɛrɛ kalan na. Barokun nin na, an bena koo duuru lajɛ kalanden kelen kelen bɛɛ ka ɲi ka minw kɛ walisa ka to ka ɲɛtaga kɛ fɔɔ ka batize.

4. An be bibulukalan minw kɛ ni mɔgɔw ye u ka soda la, an ka ɲi ka mun lo lɔn o koo la?

⁴ An balima caaman be bibulukalan kɛ ni mɔgɔw ye u ka soda la. Tiɲɛn lo ko o ye fɛɛrɛ ɲuman ye walisa ka mɔgɔ lasun a k’a mako don Bibulu koo la. Nka, tuma caaman o barow tɛ mɛɛn ani n’a sɔrɔ u tɛ kɛ lɔgɔkun bɛɛ. Walisa ka makodonmɔgɔ dɔ dɛmɛ koɲuman, balima dɔw b’a tigi ka telefɔni nimɔrɔ minɛ. O la, u b’a weele wala ka sms ci a ma walisa ka Bibulu ka miiriya dɔ kofɔ a ye. Balima dɔw be se k’o baro kunkuruninw ɲɔgɔn kɛ ni mɔgɔ dɔw ye kalo caaman kɔnɔ ani u t’o barow yɛlɛma ka kɛ bibulukalan yɛrɛ yɛrɛw ye. Nka, an k’a lɔn ko ni Bibulu kalanden b’o wagati n’o jijali dama lo kɛ a ka bibulukalan kama, a tɛ se ka ɲɛtaga kɛ tiɲɛn na ani ka batize.

5. Yezu ye mun lo fɔ Luka 14:27-33 kɔnɔ, an be se ka tɛmɛ min fɛ k’an ka Bibulu kalandenw dɛmɛ?

⁵ Yezu tɛmɛna ɲɛyirali dɔ fɛ k’a yira mɔgɔ ka ɲi ka min kɛ walisa ka kɛ ale ka kalanden ye. A kumana cɛɛ dɔ koo la min b’a fɛ ka sangaso lɔ ani masacɛ dɔ, min b’a fɛ ka taga kɛlɛ la. Yezu ko min b’a fɛ ka sangaso lɔ, a ka ɲi ka “sigi fɔlɔ k’a lɔsɔngɔ jati k’a filɛ” n’a bena se k’o baara laban. A y’a fɔ fana ko masacɛ min b’a fɛ ka taga kɛlɛ la, a ka ɲi ka “sigi fɔlɔ ka miiri k’a filɛ” n’a ka kɛlɛbolo be se k’o kɛ (Luka 14:27-33 kalan). O cogo kelen na, Yezu tun b’a lɔn ko mɔgɔ min b’a fɛ ka kɛ ale ka kalanden ye,  o tigi ka ɲi ka miiri koɲuman k’a filɛ o kɔrɔ ye min ye. O kama, an ka ɲi k’an ka Bibulu kalandenw jija u ka bibulukalan kɛ n’an ye lɔgɔkun o lɔgɔkun. An be se k’o kɛ cogo di?

6. An ka ɲi k’an jija ka mun lo kɛ walisa an ka Bibulu kalandenw ka ɲɛtaga kɛ?

⁶ I be bibulukalan minw kɛ ni mɔgɔw ye u ka soda la, a daminɛ ka dɔ fara o wagati kan. Ɲɛyirali fɛ, i be se ka baro kɛ n’a tigi ye vɛrise fila kan sanni ka dan vɛrise kelen ma. N’a tigi tora ka kalan kɛ n’i ye ka mɛɛn dɔɔni, i be se k’a ɲininga n’aw be se ka sigi yɔrɔ dɔ la walisa ka taga ɲɛ ni baro ye. A tigi bena min fɔ, o bena a yira n’a be bibulukalan ta sɔbɛ la. Walisa k’a dɛmɛ a ka ɲɛtaga kɛ joona joona, i be se k’a ɲininga n’a b’a fɛ aw ka bibulukalan kɛ siɲɛ fila lɔgɔkun kɔnɔ. Nka, ka bibulukalan kɛ ni mɔgɔ dɔ ye siɲɛ kelen wala fila lɔgɔkun kɔnɔ, o dama tɛ bɔri kɛ.

7. Kalanfa be se k’a yɛrɛ labɛn koɲuman cogo di kalan kelen kelen bɛɛ kama?

⁷ Komi i ye kalanfa ye, i ka ɲi k’i yɛrɛ labɛn koɲuman kalan kelen kelen bɛɛ kama. I be se k’a daminɛ ka dakunw kalan ani ka vɛrisew lajɛ. Miiriya jɔnjɔnw to i hakili la. Miiri koo nunu na: kalansen ka barokun, cɛtigɛw, kalan ka ɲiningaliw, a fɔra ko vɛrise minw ka kalan, jaaw ani videwo minw be se ka kalanden dɛmɛ ka barokun faamu. O kɔ, miiri i ka Bibulu kalanden na. A filɛ cogo min na i be se ka kalan ɲɛfɔ a ye ka gwɛ walisa a ka se k’a faamu cogo nɔgɔman na ani k’a sira tagama.—Neemi 8:8; Talenw15:28a.

8. Ka kɛɲɛ ni Pol ka fɔta ye Kɔlɔsikaw 1:9, 10 kɔnɔ, an be se ka mun lo deli Jehova fɛ kalanden koo la?

⁸ Kalan labɛntɔ, Jehova deli kalanden n’a makoyaw koo la. Jehova deli a k’i dɛmɛ i ka kalan basigi Bibulu kan ani ka kalanden dusu sɔrɔ (Kɔlɔsikaw 1:​9, 10 kalan). A be se ka gwɛlɛya kalanden ma ka koo o koo faamu ani ka sɔn a ma, kɔn ka miiri o la. A to i hakili la ko i ka laɲinita ye k’a dɛmɛ a ka ɲɛtaga kɛ ka batize.

9. Kalanfa be se ka kalanden dɛmɛ cogo di a k’a yɛrɛ labɛn a ka kalan kama? A ɲɛfɔ.

⁹ N’i be to ka bibulukalan kɛ ni kalanden ye tuma o tuma, an jigi b’a la ko Jehova ni Yezu ye min bɛɛ kɛ, a bena u waleɲuman lɔn o kosɔn. A bena a ɲini fana ka dɔ lɔn tugun u koo la (Mat. 5:​3, 6). Walisa bibulukalan ka kalanden  nafa bɛrɛbɛrɛ, a ka ɲi k’a kuun don a la. O kama, a ɲɛfɔ a ye ko a kɔrɔtanin lo kosɔbɛ a k’a yɛrɛ labɛn kalan kelen kelen bɛɛ kama. Walisa k’o kɛ, a ka dakunw kalan fɔlɔ ani ka miiri k’a filɛ a be se k’o dakunw ka miiriyaw sira tagama cogo min na. I be se k’a dɛmɛ cogo di? Kalansen dɔ labɛn ni kalanden ye walisa a k’a lɔn a be kɛ cogo min na. * A yira a la a be se ka kalan ka ɲiningaliw jaabiliw sɔrɔ cogo min na. A yira a la fana ko n’a be miiriyaw wala kumaden jɔnjɔnw kɔrɔ ci, o bena a dɛmɛ k’a hakili to jaabili la. A ɲini a fɛ a ka jaabiliw di a yɛrɛ kumacogo la. O la, i bena se k’a lɔn n’a ye kalan faamu koɲuman. Nka, i be se ka kalanden jija a ka koo wɛrɛ kɛ tugun.

10. Mun na a kɔrɔtanin lo kalanden ka Bibulu kalan loon o loon? A ka ɲi ka mun lo kɛ walisa ka nafa sɔrɔ bɛrɛbɛrɛ a ka Bibulu kalangwɛ la?

¹⁰ Ka fara a ka bibulukalan kan lɔgɔkun o lɔgɔkun, kalanden ka ɲi ka koo dɔw kɛ a yɛrɛ ma loon o loon minw be se k’a nafa. A ka ɲi ka kumaɲɔgɔnya kɛ ni Jehova ye. A be se k’o kɛ cogo di? A kɛtɔ ka Jehova lamɛn ani ka kuma n’a ye. A be se ka Ala lamɛn n’a be Bibulu kalan loon o loon (Zozuwe 1:8; Zab. 1:1-3). “Bibulu kalangwɛ porogramu” dɔ be sɔrɔ jw.org kan ani a be se ka bɔ papiye kan. * A yira kalanden na a be se ka baara kɛ n’o ye cogo min na. Walisa k’a dɛmɛ a ka nafa sɔrɔ bɛrɛbɛrɛ a ka Bibulu kalangwɛ la, a be kalan min sɔrɔla Jehova koo la, a jija a ka miiri o kan. A jija fana a k’a filɛ a be se k’o sira tagama cogo min na.—Kɛw. 17:11; Zaki 1:25.

11. Kalanden be se ka delili kɛcogo ɲuman degi cogo di? Mun na a kɔrɔtanin lo a ka Jehova deli tuma o tuma?

¹¹ I ka Bibulu kalanden jija a ka kuma Jehova fɛ, a kɛtɔ k’a deli loon o loon. Kalan kelen kelen bɛɛ daminɛ na ani a laban na, delili kɛ n’i dusu bɛɛ ye ani kalanden kofɔ delili la. A kɛtɔ k’i ka deliliw lamɛn, a bena a lɔn a be se ka delili kɛ n’a dusu bɛɛ ye cogo min na. A bena a lɔn fana ko a ka ɲi ka Jehova Ala lo deli Yezu Krista tɔgɔ la (Mat. 6:9; Zan 15:16). Ni kalanden be Bibulu kalan loon o loon (o kɔrɔ n’a be Jehova lamɛn) ani n’a be delili kɛ (o kɔrɔ n’a be kuma Jehova fɛ), miiri k’a filɛ o bena a dɛmɛ cogo min na a k’a magwɛrɛ kosɔbɛ Ala la! (Zaki 4:8).  N’a y’o kɛ a delinanko ye, o bena a dɛmɛ ka ɲɛtaga kɛ fɔɔ k’a yɛrɛkun di Jehova ma ani ka batize.

12. I be se ka Bibulu kalanden dɛmɛ cogo di a ka teriya kɛ ni Jehova ye?

¹² Kalanden be min kalan, a ka ɲi k’o faamu. Nka o dɔrɔn tɛ, o ka ɲi k’a dusukun sɔrɔ fana. Mun na do? Sabu an dusukun lo b’an lasun ka koow kɛ. An dusukun ɲɛsinna an negelakow, an ka miiriyaw ani an dusukunnakow lo ma. Yezu ye mɔgɔw kalan koo caaman na ani a tun ka di u ye k’a ka kalanw lamɛn. Mɔgɔw tugura a kɔ sabu a ka kalanw tun b’u dusukun sɔrɔ fana (Luka 24:15, 27, 32). I ka kalanden ka ɲi ka Jehova jati i ko mɔgɔ yɛrɛ yɛrɛ, a be se ka jɛnɲɔgɔnya ɲuman kɛ ni min ye. A ka ɲi ka Jehova jati fana a Faa, a ka Ala ani a Teri ye (Zab. 25:4, 5). Bibulukalan wagati la, Jehova ka jogo ɲumanw bɔ kɛnɛ kan (Ɛkiz. 34:5, 6; 1 Piyɛri 5:6, 7). O kɛ n’i be barokun o barokun lajɛra ni kalanden ye. A dɛmɛ walisa Jehova ka jogo ɲumanw ka diya a ye. U dɔw ye kanuya, ɲumanya ani makari ye. Yezu y’a fɔ ko ka Jehova “i ka Ala kanu,” o “le ye cii fɔlɔ ye, ani o koo le ka gwɛlɛ fana.” (Mat. 22:37, 38). I ka kalanden dɛmɛ a ka Ala kanu kosɔbɛ.

13. Ɲɛyirali fɛ, an be se k’an ka Bibulu kalanden dɛmɛ cogo di a ka dɔ lɔn Jehova ka jogo ɲumanw koo la?

¹³ N’i be baro kɛra ni kalanden ye, a ɲɛfɔ a ye fɛɛn min kama Jehova koo ka di i ye. O be se ka kalanden dɛmɛ a k’a faamu ko ale fana ka ɲi ka Jehova kanu ani ka teriya kɛ n’a ye (Zab. 73:28). Ɲɛyirali fɛ, n’a sɔrɔ kumasen dɔ be sɔrɔ kalankɛ gafe wala vɛrise dɔ kɔnɔ min be Jehova ka kanuya, hakilitigiya, tilenninya ani a ka sebagaya kofɔ ani o y’i dusukun sɔrɔ. N’o lo, o kofɔ i ka kalanden ye. A to a k’a lɔn ko o koo fana lo y’a to an sankolola Faa koo ka di i ye. Koo wɛrɛ be yen Bibulu kalandenw bɛɛ ka ɲi ka min kɛ walisa ka ɲɛtaga kɛ fɔɔ ka batize.

14. Eburuw 10:24, 25 be mun lo fɔ lajɛnw koo la min be se ka Bibulu kalanden dɛmɛ a ka ɲɛtaga kɛ?

¹⁴ An bɛɛ b’a fɛ an ka kalandenw ka ɲɛtaga kɛ fɔɔ ka batize. An be se k’u dɛmɛ cogo ɲuman minw na, u la dɔ ye k’u jija u ka to ka na kafo ka lajɛnw na. Kalanfa kolɔnbagaw y’a fɔ ko kalanden minw  be sin k’a daminɛ ka na lajɛnw na, olu be ɲɛtaga kɛ joona joona (Zab. 111:1). Kalanfa dɔw b’a ɲɛfɔ u ka kalandenw ye ko u bena koo caaman faamu Bibulu kɔnɔ. U bena min faamu, o tilancɛ bena bɔ u ka bibulukalan na ani tilan wɛrɛ be sɔrɔ lajɛnw na. Eburuw 10:24, 25 kalan n’i ka kalanden ye. O kɔ, a ɲɛfɔ a ye a bena nafa minw sɔrɔ n’a nana lajɛnw na. Videwo nin yira a la: Mun lo be kɛ an ka Masaya boonw kɔnɔ? * A dɛmɛ a k’a jija walisa a kana fɔn lajɛn si la.

15. An be se ka Bibulu kalanden jija cogo di a ka na lajɛnw na tuma o tuma?

¹⁵ N’i ka Bibulu kalanden ma deli ka na lajɛn si la wala n’a be to ka na tuma kelen kelen dɔrɔn le, i be se ka mun lo kɛ do? I ye min faamu lajɛn na kɔsa la, o fɔ a ye ni dusudiya ye. N’a y’a ye i be min miiri lajɛnw koo la, n’a sɔrɔ o bena a lasun ka na. Kɔrɔsili Sangaso wala Lajɛnsɛbɛ min be lajɛra o kalo la, o di a ma. A yira a la fɛɛn minw bena lajɛ lajɛn nata la ani a ɲininga min bena diya a ye u bɛɛ la. I ka kalanden siɲɛ fɔlɔ ka na lajɛn na, a bena min ye ani ka min mɛn, o ka ɲi ni diinan wɛrɛw ka kalanw n’u ka kɛtaw ye fɔɔ ka taga ka na (1 Kor. 14:24, 25). A bena mɔgɔ wɛrɛw kunbɛn a be se ka minw ka ɲɛyirali ɲuman ladegi ani minw be se k’a dɛmɛ ka ɲɛtaga kɛ fɔɔ ka batize.

16. An ka ɲi ka mun lo kɛ walisa ka Bibulu kalandenw dɛmɛ u ka ɲɛtaga kɛ fɔɔ ka batize? An bena mun lo lajɛ barokun nata la?

¹⁶ An be se k’an ka Bibulu kalandenw dɛmɛ cogo di u ka ɲɛtaga kɛ fɔɔ ka batize? An be se ka Bibulu kalanden kelen kelen bɛɛ dɛmɛ a k’a ka kalan ta sɔbɛ la. An b’o kɛ n’an b’a jija a ka kalan kɛ lɔgɔkun o lɔgɔkun ani a k’a yɛrɛ labɛn kalan kelen kelen bɛɛ kama. An k’a jija fana a ka kumaɲɔgɔnya kɛ ni Jehova ye loon o loon ani a ka teriya kɛ n’a ye. An k’a jija a ka to ka na kafo ka lajɛnw na fana. (Koorilen nin lajɛ ɲɛɛ 12nan kan: “ Bibulu kalanden ka ɲi ka min kɛ walisa ka ɲɛtaga kɛ fɔɔ ka batize.”) Koo duuru wɛrɛw be yen kalanfaw ka ɲi ka minw kɛ walisa ka kalandenw dɛmɛ u ka ɲɛtaga kɛ fɔɔ ka batize. An bena o lo lajɛ barokun nata la.