1. Ala y’an dan ka mun lo nege don an na? Jɛɛn juman be o nege ni ninsɔndiya sɔbɛ cɛ?

 NINSƆNDIYA sɔbɛ tɛ dusudiya dama lo ye, o min tɛ mɛɛnta ye. Mɔgɔ be se ka ninsɔndiya sɔbɛ sɔrɔ a sii bɛɛ la. Cogo di do? Yezu y’o ɲɛfɔ a ka kalan na kulu kan. A ko: “Mɔgɔ minw b’a lɔn k’u mako be Ala la, olu dagamunin [wala ninsɔn diyanin] lo.” (Mat. 5:3). Yezu tun b’a lɔn ko Jehova Ala ye adamadenw dan ka Alako nege don u la. O kɔrɔ, u b’a fɛ kosɔbɛ k’u Danbaga lɔn ani k’a bato. Ani komi Jehova ye “Ninsɔndiya Tigi Ala” ye, a sagokɛlaw fana be se ka ninsɔndiya sɔbɛ sɔrɔ.—1 Tim. 1:11, NW.

2-3. a) Ka kɛɲɛ ni Yezu ka kumaw ye, jɔnw lo fana be se ka ninsɔndiya sɔrɔ? b) An bena mun lo lajɛ barokun nin na ani mun na o kɔrɔtanin lo?

² Ni gwɛlɛya si t’an kan, yala o lo b’a to an be ninsɔndiya sɔbɛ sɔrɔ wa? Ayi. Yezu ye kalan min kɛ kulu kan, a ye koo dɔ fɔ min be mɔgɔ kabakoya. A ko “minw be kasira,” olu be se ka ninsɔn diya. N’a sɔrɔ u dusu kasinin lo u ka jurumuw kosɔn wala gwɛlɛyaba dɔw b’u kan. Yezu ko “u be minw tɔɔrɔ u ka tilenninya kosɔn,” wala u be minw “nɛni” sabu u ye Krista ka kalandenw ye, olu fana be se ka ninsɔn diya (Mat. 5:4, 10, 11). Nka, mɔgɔ be se ka ninsɔn diya cogo di o gwɛlɛyaw bɛɛ n’a ta?

³ Yezu tun b’a yirala le ko a ma kɛ komi ni gwɛlɛya si t’an kan, o lo b’a to an be ninsɔn diya sɔbɛ la. Nka, an ka ninsɔndiya be bɔ min na, o ye k’an ka Alako nege wasa ani k’an magwɛrɛ Ala la (Zaki 4:8). An be se k’o kɛ cogo di?  Barokun nin na, an bena koo jɔnjɔn saba lajɛ minw be se k’a to an be ninsɔndiya sɔbɛ sɔrɔ.

4. An ka ɲi ka koo fɔlɔ juman lo kɛ walisa ka ninsɔndiya sɔbɛ sɔrɔ? (Zaburuw 1:1-3).

⁴ KOO FƆLƆ: An ka ɲi k’an yɛrɛ balo Alako ta fan fɛ. Adamadenw ni bɛgɛnw mako be dumuni na walisa ka to niin na. Nka adamadenw dɔrɔn lo mako b’a la k’u yɛrɛ balo Alako ta fan fɛ. O lo kama Yezu ko: “Mɔgɔ te balo ni dumunifɛn dama ye, nga a be balo ni Ala ka kuma fana ye.” (Mat. 4:4). O la, an man ɲi k’a to tile kuru bɛɛ be tɛmɛ n’an ma Ala ka Kuma nafaman kalan, o min ye Bibulu ye. Zaburu sɛbɛbaga dɔ ko ‘Masaba ka sariya koo ka di mɔgɔ min ye ani a be miiri o la suu fara tile kan,’ o tigi dagamunin lo.—Zaburuw 1:1-3 kalan.

5-6. a) An be kalan juman lo sɔrɔ Bibulu kɔnɔ? b) N’an be Bibulu kalan, o b’an dɛmɛ cogo di?

⁵ Jehova b’an kanu minkɛ, a b’a yira an na Bibulu kɔnɔ an ka ɲi ka min kɛ walisa ka ninsɔndiya sɔbɛ sɔrɔ. A b’a yira an na a sagonata ye min ye an koo la. A b’a yira an na fana, an be se k’an magwɛrɛ a la cogo min na ani an ka ɲi ka min kɛ walisa a k’an ka jurumuw yafa. Ani a ye koo ɲuman minw layidu ta an ye siniɲasigi koo la, a y’o fɔ an ye (Zer. 29:11). N’an be Bibulu sɛgɛsɛgɛ, an b’o tiɲɛnkumaw faamu ani o b’an ninsɔn diya kosɔbɛ!

⁶ An b’a lɔn ko ladili nafaman caaman be Bibulu kɔnɔ minw be se k’an dɛmɛ  an ka loon o loon ɲɛnamaya la. N’an y’o ladiliw sira tagama, an be ninsɔndiya sɔbɛ sɔrɔ. Tuma o tuma ni gwɛlɛyaw be ɲini k’i fari faga, wagati caaman ta ka Jehova ka Kuma kalan ani ka miiri a kan. Yezu ko: “Mɔgɔ min be Ala ka kuma lamɛn, k’a bato, o le dagamunin lo.”—Luka 11:28.

7. Mun lo be se k’i dɛmɛ ka nafa sɔrɔ bɛrɛbɛrɛ i ka Bibulu kalan na?

⁷ Ala ka Kuma kalantɔ, wagati ta k’a diyabɔ koɲuman. Misali la, nin koo ɲɔgɔn ma deli k’i sɔrɔ wa? Mɔgɔ dɔ y’i ka diyanye dumuni tobi. Nka komi i tun kɔrɔtɔnin lo kojugu wala i hakili tun siginin tɛ, i y’a kunu kunu dɔrɔn ani i yɛrɛ ma wagati ta k’a diyabɔ. Dumuni kɛnin kɔ, i y’a faamu ko i ye dumuni kɛ joona joona kojugu. I tora ka miiri ko n’i tun y’a lɔn, i tun bena dumuni kɛ dɔɔni dɔɔni ani k’i ka lɔgɔman kelen kelen bɛɛ diyabɔ. O koo ɲɔgɔn be se k’an sɔrɔ n’an be Bibulu kalanna. Tuma dɔw la, an b’a kalan joona joona kojugu fɔɔ an yɛrɛ tɛ wagati ta k’a kɔnɔkumaw diyabɔ. O la n’i be Ala ka Kuma kalanna, wagati ta k’a kalan diyabɔ. Koo minw be kɛra yen, a kɛ i n’a fɔ i b’o yɔrɔ la, a kɛ komi i be mɔgɔw kumakan mɛnna ani i ye min kalan, miiri o kan. N’i y’o kɛ, i bena ninsɔn diya kosɔbɛ.

8. “Jɔncɛ kantigiman” b’a ka kunkanbaara dafara cogo di? (Jukɔrɔla kunnafoni fana lajɛ.)

⁸ Yezu Krista ye “jɔncɛ kantigiman hakiliman” sigi walisa a ka Alako dumuni di an ma wagati bɛnnin na. Ani tiɲɛn fɔ ka di, an balonin lo koɲuman Alako ta fan fɛ b (Mat. 24:45, NW). Jɔncɛ kantigiman be fɛɛn o fɛɛn labɛn an ye, a be basigi Ala ka Kuma lo kan k’o kɛ (1 Tes. 2:13). O cogo la, a b’an dɛmɛ ka Jehova ka miiriyaw faamu Bibulu kɔnɔ. O lo kama an be Kɔrɔsili Sangaso, Réveillez-vous ! ani barokun wɛrɛw kalan jw.org kan. Lajɛn min be kɛ lɔgɔkun kɔnɔ ani min be kɛ wikɛni na, an b’an yɛrɛ labɛn o kama. Videwo min be labɛn kalo o kalo JW Telewisɔn kan, an b’o filɛ. An ka banba ka to ka Bibulu kalan ani k’a sɛgɛsɛgɛ loon o loon. O la, an ka ɲi ka koo filanan min kɛ walisa ka ninsɔndiya sɔbɛ sɔrɔ, an bena se k’o kɛ.

9. Walisa ka ninsɔndiya sɔbɛ sɔrɔ, an ka ɲi ka koo filanan juman lo kɛ?

⁹ KOO 2NAN: An ka ɲi ka Jehova ka sariyaw labato. Zaburu sɛbɛbaga dɔ ko: “Mɔgɔ minw bɛɛ be siran Masaba ɲa, n’u be taama ka kɛɲɛ n’a sago ye, olu dagamunin lo.” (Zab. 128:1). Ka siran Jehova ɲɛ, o kɔrɔ ko an b’a bonya kosɔbɛ fɔɔ an t’a fɛ ka koo si kɛ min man di a ye (Talenw 16:6). O la, Jehova ka sariya minw be sɔrɔ Bibulu kɔnɔ ɲuman ni juguman koo la, an be to k’an seko bɛɛ kɛ k’u labato (2 Kor. 7:1). Koo minw ka di Jehova ye, n’an b’o kɛ ani a be koo minw kɔniya an be ban k’o kɛ, an bena ninsɔndiya sɔrɔ.—Zab. 37:27; 97:10; Ɔrɔm. 12:9.

10. Ka kɛɲɛ ni Ɔrɔmukaw 12:2 ye, an ka ɲi ka mun lo kɛ?

¹⁰ Ɔrɔmukaw 12:2 kalan. Mɔgɔ be se k’a lɔn ko joo be Jehova fɛ ka sariyaw sigi ɲuman ni juguman koo la. Nka o dama tɛ bɔri kɛ, o tigi ka ɲi k’o sariyaw labato fana. Misali la, mɔgɔ be se k’a lɔn ko joo be faamanw fɛ k’a latigɛ  ko mɔgɔ man ɲi ka tɛmɛ vitɛsi dɔ kan n’a be bolifɛn kan. Nka n’a sɔrɔ a t’o sariya labato. An ka ɲi k’a yira an ka kokɛcogow fɛ ko an lanin b’a la sɔbɛ la ko ka Jehova ka sariyaw labato, o lo ɲɔgɔn tɛ yen (Talenw 12:28). Dawuda tun b’o lo miiri. A y’a fɔ Jehova koo la ko: “Mɔgɔ be to nii na sira min kan, i y’o don ne seen kɔrɔ. Nisɔndiya le be e ɲakɔrɔ dɔrɔn, nisɔndiya banbali le b’i kɔrɔ.”—Zab. 16:11.

11-12. a) N’an hakili ɲagaminin lo wala n’an fari faganin lo, an ka ɲi k’an janto mun lo la? b) N’an be ɲɛnagwɛkow sugandira, Filipikaw 4:8 be se k’an dɛmɛ cogo di?

¹¹ N’an hakili ɲagaminin lo wala n’an fari faganin lo, n’a sɔrɔ an b’a fɛ ka koo dɔ kɛ min bena a to an tɛ miiri tugun an ka gwɛlɛyaw la. O be faamu, nka an ka ɲi k’an janto walisa an kana koo dɔ kɛ min ka gwo Jehova ye.—Efɛz. 5:10-12, 15-17.

¹² Ciden Pol ye lɛtɛrɛ min ci Filipikaw ma, a y’u jija a kɔnɔ ko u ka to ka miiri koo nunu lo la: “Tilenninya, ni koo gwɛnin, ni koo diman, ani kunkɔrɔtako.” (Filipikaw 4:8 kalan). Hali ni Pol tun tɛ kumana ɲɛnagwɛkow lo la, a ye min sɛbɛ, an ka ɲi k’an janto o la n’an be ɲɛnagwɛkow sugandira. Pol ye min fɔ, o be se ka ɲɛsin koo nunu ma: dɔnkiliw, filimuw, gafew wala videwo tulonw. N’an b’an janto Pol ka ladili la o fɛɛnw suganditɔ, o bena an dɛmɛ k’a lɔn minw bɛnnin lo Ala ɲɛɛ kɔrɔ ani minw bɛnnin tɛ. Jehova ka sariyaw kɔrɔtanin lo kosɔbɛ ani an b’a fɛ ka ɲɛnamaya kɛ ka kɛɲɛ n’u ye (Zab. 119:1-3). N’an b’o kɛ, koo wɛrɛ min b’a to an be ninsɔndiya sɔbɛ sɔrɔ, an bena se k’o kɛ ni dusukun ɲuman ye.—Kɛw. 23:1.

13. An ka ɲi ka koo 3nan juman lo kɛ walisa ka ninsɔndiya sɔbɛ sɔrɔ? (Zan 4:23, 24).

¹³ KOO 3NAN: A to Jehova batoli ka kɛ i ɲɛnako fɔlɔ ye. Komi Jehova ye an Danbaga ye, a ka kan n’an ka batoli ye (Yir. 4:11; 14:6, 7). O la Jehova be sɔn batoli min ma, an ka ɲi k’o kɛ an ɲɛnako fɔlɔ ye. A b’a fɛ an k’ale bato tiɲɛn ani niin na (Zan 4:23, 24 kalan). An b’a fɛ Ala ka hakili senu k’an ɲɛminɛ an ka batoli la walisa a ka bɛn ni Bibulu ka tiɲɛnkalanw ye. Jehova batoli ka ɲi ka kɛ an ɲɛnako fɔlɔ ye, hali n’an be yɔrɔ min na bali sigira an ka batoli kan wala a faan dɔw kan. Bi bi nin na, u ye an balima 100 ni kɔ minɛ k’u don kaso la sabu u ye Jehova Seerew ye. c O bɛɛ n’a ta, u ninsɔn diyanin b’u seko bɛɛ kɛra ka delili ni kelenna kalan kɛ ani ka Ala n’a ka Masaya kofɔ tɔɔw ye! U b’an nɛnina wo, u b’an tɔɔrɔla wo, an ninsɔn diyanin be se ka to sabu an b’a lɔn ko Jehova be n’an ye ani ko a bena an duga.—Zaki 1:12; 1 Piyɛri 4:14.

14. Mun lo ye balima kanbele dɔ sɔrɔ Tajikistan jamana na ani mun na do?

¹⁴ An ye koo saba minw lajɛ ka tɛmɛ, n’an b’u kɛ, o be se k’a to an be ninsɔndiya sɔbɛ sɔrɔ, an ka koow cogoya mana kɛ min o min ye. Balima dɔw ka koo b’o lo yira. Misali la, an k’a filɛ min ye Jovidon Bobojonov sɔrɔ. A be ni saan 19 ye ani a be Tajikistan jamana na. Komi a banna ka sɔrɔdasiya kɛ, u y’a minɛ fanga la a ka soo ka taga a don kaso la  kalo caaman kɔnɔ. O kɛra saan 2019, ɔkutɔburu tile 4. U tun b’a minɛ i n’a fɔ mɔgɔfagala. U ye tilenbaliya min kɛ a la, jamana caaman ka kunnafonidilaw kumana o koo la. U ko sɔrɔdasiw y’a bugɔ walisa k’a waajibiya a ka kali ko a bena sɔrɔdasiya kɛ ani ka kantigiya kɛ u ye. O kɔ, kititigɛso ye jalaki ben a kan ani u tagara n’a ye fanga baarakɛyɔrɔ dɔ la. A laban, peresidan ko ale yafara a ma ani a ko u k’a bɔ kaso la. O wagati bɛɛ la, Jovidon tora kantigiya la ani a ninsɔn diyanin tora. Mun lo y’a dɛmɛ do? A tora k’a ka Alako nege wasa tuma bɛɛ.

15. Ka Jovidon to kaso la, a tun b’a yɛrɛ balo cogo di Alako ta fan fɛ?

¹⁵ Ka Jovidon to kaso la, a tun b’a yɛrɛ balo Alako ta fan fɛ, hali k’a sɔrɔ Bibulu wala an ka gafe si tun t’a fɛ. A sera k’o kɛ cogo di? A ka kafo balimaw tun be to ka dumuni don saki dɔw kɔnɔ ka n’a di a ma. U tun be tilera kalan ka vɛrise sɛbɛ o sakiw kan. O cogo la, a tun be Bibulu kalan ani ka miiri a kan loon o loon. A bɔnin kɔ kaso la, a ye ladili nin di balimaw ma minw ma kɔrɔbɔlibaw sɔrɔ fɔlɔ. A ko: “Aw be se ka Jehova bato aw sago la minkɛ, a kɔrɔtanin lo kosɔbɛ aw  ka tɛmɛ o sababu fɛ bɛrɛbɛrɛ ka dɔ fara aw ka lɔnniya kan Jehova koo la, aw kɛtɔ k’a ka Kuma n’an ka gafew kalan.”

16. Jovidon tora ka miiri mun lo la?

¹⁶ An balimacɛ Jovidon tun be to ka Jehova ka sariyaw labato. A tun tɛ miiri koo juguw la ani a tun tɛ koo juguw kɛ fana. Nka, a tun be to ka miiri Jehova lo koo la ani koo minw kɔrɔtanin lo a ɲɛɛ kɔrɔ. A tun be to ka Ala ka danfɛnw cɛɲi lajɛ ani o tun b’a kabakoya. Sɔgɔma o sɔgɔma, kɔnɔninw ka dɔnkililakan lo tun b’a kunu. Sufɛ, a tun be kalo ni lolow lajɛ. A ko: “O fɛɛnw ye Jehova ka nilifɛnw lo ye. U ye n’ jija ani ka n’ ninsɔn diya.” Jehova be Alako dumuni ani fɛɛn wɛrɛ minw di an ma, n’an be a waleɲuman lɔn o kosɔn, o b’an ninsɔn diya. O ninsɔndiya be se k’an barika bonya walisa an ka se ka muɲuli kɛ.

17. Jovidon ka kɔrɔbɔli ɲɔgɔn be mɔgɔ min kan, 1 Piyɛri 1:6, 7 kɔnɔnakumaw ɲɛsinna o tigi ma cogo di?

¹⁷ Jovidon tun be Jehova batoli kɛ a ɲɛnako fɔlɔ ye fana. A tun b’a lɔn ko a kɔrɔtanin lo a ka kantigiya kɛ tiɲɛn Ala ye. Yezu ko: “I ka Matigi i ka Ala bato, ka baara kɛ ale kelenpe ye.” (Luka 4:8). Sɔrɔdasiw n’u ɲɛmɔgɔw tun b’a fɛ Jovidon k’a ka diinan to yen. Nka a m’o kɛ, a tora ka Jehova deli loon o loon suu fara tile kan, a k’ale dɛmɛ ka to kantigiya la. Tilenbaliyakow bɛɛ n’a ta, Jovidon ma bɔ Jehova kɔ abada! Sisan, a ninsɔn ka di kosɔbɛ sabu kɔrɔbɔli y’a ka limaniya barika bonya. A tun tɛ n’o limaniya barikaman ɲɔgɔn ye sanni u k’a minɛ fanga la, k’a bugɔ ani k’a don kaso la.—1 Piyɛri 1:6, 7 kalan.

18. An ninsɔn diyanin be se ka to cogo di?

¹⁸ Jehova b’a lɔn an mako be min na walisa ka ninsɔndiya sɔbɛ la. Koo saba minw be se k’a to mɔgɔ be ninsɔndiya sɔbɛ sɔrɔ, n’i y’u kɛ, i ninsɔn diyanin bena to gwɛlɛyabaw bɛɛ n’a ta. O la, ele fana bena se k’a fɔ ko: “Masaba [Jehova] ye jama min ka Ala ye, ale dagamuna.”—Zab. 144:15.