KƐLƐBA filanan tuma na, Naziw ka sɔrɔdasi dɔ pɛrɛnna Jehova Seere dɔw kan ko: “Ni aw banna ka Faransi wala Angletɛri jamanadenw kɛlɛ, an bena aw bɛɛ faga!” Hali k’a sɔrɔ Naziw ka sɔrɔdasiw tun lɔnin lo u gɛrɛfɛ, an balima si ma sɔn ka Jehova ka sariyaw tiɲɛ. U jaa tun ka gwɛlɛ yɛrɛ le! Nin ye ɲɛyirali ɲuman ye, min b’a yira Jehova Seerew be kɛlɛ jati cogo min na: An t’an seen don duniɲa nin ka kɛlɛw la. An t’an seen don kɛlɛkow la, hali ni mɔgɔw ko u bena an fanga n’an banna k’o kɛ.

1. ALA KA JAMA TUN YE SIYA KELEN MƆGƆW LO YE

Galen, Jehova tun ye siya kelen dɔ lo sugandi k’a kɛ a ka jama ye, o min ye Israɛl siya ye. A y’a fɔ Israɛldenw ye ko: “Aw na kɛ ne yɛrɛ taw ye ka tɛmɛn siya tɔw bɛɛ kan.” (Ɛkiz. 19:5, Bible senuma). Ala tun ye jamana tigitigi dɔ di u ma fana. O la, ni Ala tun ko Israɛldenw ka taga siya tɔɔw kɛlɛ, u tun tɛ Jehova sagokɛla wɛrɛw lo kɛlɛ wala k’u faga. a

Bi, Jehova batobaga sɔbɛw be bɔ ‘jamanaw bɛɛ . . . ni siyaw bɛɛ’ la (Yir. 7:9). Ni u tun b’u seen don kɛlɛ la, u tun bena u kerecɛnɲɔgɔnw kɛlɛ ani k’u faga yɛrɛ.

 2. JEHOVA LO TUN BE CII DI ISRAƐLDENW MA KO U KA TAGA KƐLƐ LA

Galen, Jehova lo tun b’a latigɛ fɛɛn min kama Israɛldenw ka ɲi ka taga kɛlɛ la ani u tun ka ɲi k’o kɛ tuma min na. Misali la, a tun ye cii di Israɛldenw ma ko u ka ale ka kiti lase Kanankaw ma u kɛtɔ k’u kɛlɛ. U tun ka ɲi k’o kɛ sabu bɛɛ tun b’a lɔn ko Kanankaw be jinaw lo bato, u tun be kakalayakow kɛ fɔɔ ka dama tɛmɛ ani u tun b’u deenw saraka u ka alaw ye. Jehova tun ko Israɛldenw k’o mɔgɔw halaki ka bɔ layidu jamana kɔnɔ walisa u kana u lasun k’o koo juguw kɛ (Lev. 18:24, 25). Israɛldenw siginin kɔ Layidu jamana na, Ala ye sira di u ma wagati dɔw la u ka u juguw kɛlɛ walisa k’u yɛrɛ lafasa (2 Sam. 5:17-25). Nka, Jehova tun tɛ sɔn abada Israɛldenw k’a latigɛ u yɛrɛ ma ka wuli u juguw kama kɛlɛ la. N’u tun y’o latigɛ u yɛrɛ ma, o tun be bɔnɛba lase u ma.—Nɔnb. 14:41-45; 2 Til. Kib. 35:20-24.

Bi, Jehova t’a ɲini adamadenw fɛ u ka kɛlɛ kɛ. Jamanaw be kɛlɛ kɛ walisa ka mɔgɔw ka fɛtaw lo lafasa, Ala taw tɛ. U be taga kɛlɛ la walisa k’u ka jamana latanga wala ka yɔrɔ wɛrɛ minɛ ka fara a kan. Tuma dɔw la, u be kɛlɛ kɛ nafolo wala politikikow kosɔn, wala k’u ka miiriyaw lafasa. Nka minw b’a fɔ k’u be kɛlɛ kɛra Ala tɔgɔ la walisa k’u ka diinan latanga wala ka Ala juguw faga do? Jehova bena a sagokɛla sɔbɛw latanga ani k’a juguw halaki kɛlɛ nata dɔ lo la, o min ye Arimagedɔn kɛlɛ ye (Yir. 16:14, 16). Mɛlɛkɛw dama lo bena o kɛlɛ kɛ, Ala sagokɛlaw minw be dugukolo kan, olu tɛna u niin don a la.—Yir. 19:11-15.

3. MINW TUN LIMANIYANIN LO ALA LA, ISRAƐLDENW TUN TƐ OLU FAGA

Galen, tuma caaman na minw tun limaniyanin lo Jehova la, Israɛl kɛlɛbolo tun b’olu niin kisi. Jehova tun b’a jati ko minw ka kan ni fagari ye, Israɛldenw tun b’olu dɔrɔn lo faga. An ka misali fila lajɛ. Jehova lo tun ye cii di ko u ka Zeriko dugu halaki.  Nka, Rahab ka limaniya kosɔn, Israɛldenw ma ale n’a somɔgɔw faga (Zozuwe 2:9-16; 6:16, 17). Kɔfɛ fana, Israɛldenw ma Gabawɔnkaw kɛlɛ sabu o dugumɔgɔw y’a yira k’u be siran Ala ɲɛ.—Zozuwe 9:3-9, 17-19.

Bi, jamana minw be wuli ɲɔgɔn kama kɛlɛ la, u tɛ mɔgɔ limaniyaninw niin kisi. Ani tuma caaman na, u be mɔgɔ jalakibaliw faga.

4. ISRAƐLDENW TUN BE KƐLƐ KƐ KA KƐƝƐ NI ALA KA SARIYAW YE

Galen, Jehova tun b’a ɲini Israɛl kɛlɛdenw fɛ u ka kɛlɛ kɛ ka kɛɲɛ n’ale ka sariyaw ye. Misali la, tuma dɔw la a tun b’a ɲini u fɛ ko n’u tagara dugu dɔ kama, u k’a ɲini ka “bɛɛn” sigi fɔlɔ (Deter. 20:10). Jehova tun b’a ɲini fana Israɛl sɔrɔdasiw fɛ u saniyanin ka to ani u k’a ka sariyaw labato tagamacogo ta fan fɛ (Deter. 23:10-15). Israɛl gɛrɛfɛ siyaw ka kɛlɛdenw tun mana dugu o dugu minɛ, u tun be musow waajibiya ka la n’u ye. Jehova ko Israɛldenw man kan k’o kɛ. N’u tun ye musow minɛ jɔnya la kɛlɛ tuma na, u tun tɛ se k’u furu ni kalo kelen ma tɛmɛ.—Deter. 21:10-13.

Bi, jamana ɲɛmɔgɔ caaman bɛnna kelen ma walisa ka sariya dɔw sigi, ka ɲɛsin kɛlɛ koo ma. Hali n’o kuun ye ka jamanadenw latanga, a fɔ man di nka u caaman t’o sariyaw labato.

5. ALA TUN B’A KA MƆGƆW DƐMƐ KƐLƐ LA

Galen, Jehova tun be Israɛldenw dɛmɛ kɛlɛ la ani tuma caaman na, a tun be kabakow kɛ walisa u ka see sɔrɔ. Misali la, Jehova ye Israɛldenw dɛmɛ cogo di walisa u ka see sɔrɔ Zeriko dugu kan? Ka kɛɲɛ ni Jehova ka cikan ye, Israɛldenw “pɛrɛnna kosɔbɛ” ani “dugu laminikogo benna.” O y’a to u sera k’o dugu minɛ cogo nɔgɔman na (Zozuwe 6:20). Israɛldenw ye see sɔrɔ Amoriw kan cogo di? “Sanbɛrɛbabaw tora ka bɔ Masaba fɛ ka jigi u kan . . . Bɛrɛ nunu ye mɔgɔ minw faga, olu cayara ni Isirayɛlidenw ye minw faga ni murujan ye.”—Zozuwe 10:6-11.

KERECƐN SƆBƐW YE HƐƐRƐKƐLAW YE

I ko an y’a ye cogo min na, an ka koo be dan na ni Israɛldenw ta ye galen. Nka, o dɔrɔn kama tɛ an tɛ taga kɛlɛ la. Kuun wɛrɛw be yen. Misali la, Ala tun y’a fɔ ko ale ye mɔgɔ minw kalan, u “tena kɛlɛkɛcogo dege,” kaan tɛ k’u seen don kɛlɛ la (Ezayi 2:2-4). Ka fara o kan, Krista ko ale ka kalandenw “te diɲɛ ta ye.” O kɔrɔ ko u t’u seen don duniɲa ka kɛlɛkow la.—Zan 15:19.

Krista y’u jija u kana daan o dɔrɔn ma. A y’a fɔ ko koo o koo be se k’u lasun ka dimi mara, k’u dusu gwan ani ka kɛlɛ kɛ, u k’u mabɔ o la (Mat. 5:21, 22). Ani a y’a fɔ a ka kalandenw ye ko u ka kɛ “hɛrɛɲinibagaw” ye ani ko u k’u juguw kanu.—Mat. 5:9, 44.

An kelen kelen be se k’o kɛ cogo di? N’a sɔrɔ an t’a fɛ k’an seen don kɛlɛ si la, nka yala an be kafoden dɔ jati an jugu ye wa? N’o lo, an k’an jija k’o miiriya ɲɔgɔn wɔgɔbi k’a bɔ an dusu la pewu!—Zaki 4:1, 11.

Sanni an k’an seen don jamanaw ka kɛlɛw la, an b’an jija ka to hɛɛrɛ la an ni ɲɔgɔn cɛ ani ka ɲɔgɔn kanu (Zan 13:34, 35). Jehova ko loon dɔ, a bena kɛlɛw ban pewu pewu! K’an to o loon makɔnɔni na, an ka banba an kana an seen don duniɲa ka kɛlɛkow la.—Zab. 46:10.