1. A lakali Yezu y’a ka kabako fɔlɔ kɛ koo minw sen fɛ.

 MIIRI k’a filɛ min kɛra Yezu ka cidenya baara daminɛ na, saan 29 laban fan fɛ. U ye Yezu, a ka kalanden dɔw ani a bamuso Mariyamu weele kɔɲɔya dɔ la Kanaan dugu la. O dugu be Yezu wolodugu Nazarɛti saheli fan fɛ. Mariyamu ye kɔɲɔcɛ n’a muso somɔgɔw teri ye ani n’a sɔrɔ a be dɛmɛ donna ka mɔgɔw ladon kɔɲɔya loon na. Nka fɛti tuma na, diwɛn banna. O koo tun be se ka maloyaba bila kɔɲɔcɛ n’a muso ani u somɔgɔw la. b U tun ye mɔgɔ hakɛ min weele ka na o kɔɲɔya la, n’a sɔrɔ mɔgɔw cayara ka tɛmɛ o kan. O kama, Mariyamu teliyara ka taga a dencɛ sɛgɛrɛ ani k’a fɔ a ye ko: “U ka duvɛn banna.” (Zan 2:1-3). Yezu ye mun lo kɛ do? A ye kabako dɔ kɛ: A ye jii yɛlɛma k’a kɛ “duvɛn diman” ye.—Zan 2:9, 10.

2-3. a) Yezu ye kabako sifa jumanw lo kɛ? b) N’an ye Yezu ka kabakow lajɛ, an bena nafa juman lo sɔrɔ o la?

² Yezu ka cidenya baara la, a ye kabako caaman wɛrɛw kɛ. c See min b’a fɛ ka kabakow kɛ, a tɛmɛna o fɛ ka mɔgɔ waa caamanba dɛmɛ. Misali la, loon dɔ, a ye kabako kɛ ka cɛɛ 5 000 balo ani loon wɛrɛ, a ye cɛɛ 4 000 balo. N’an ye musow ni denmisɛnw fara u kan, n’a sɔrɔ o mɔgɔw bɛɛ lajɛnnin tɛmɛna mɔgɔ 27 000 kan (Mat. 14:15-21; 15:32-38). O wagati fila bɛɛ la, Yezu ye banabagatɔ caaman kɛnɛya fana (Mat. 14:14; 15:30, 31).  Miiri k’a filɛ jama kabakoyara cogo min na tuma min na Yezu ye kabako kɛ k’u kɛnɛya ani k’u balo!

³ Bi, an be se ka kalan caaman sɔrɔ Yezu ka kabakow la. An bena o kalan dɔw lajɛ barokun nin na ani o bena an ka limaniya barika bonya. Yezu y’a yira ko a majiginin lo ani ko a be makari tuma min na a tun be kabakow kɛra. An bena a ye an be se k’a ladegi cogo min na.

4. An be kalan barikamanw sɔrɔ Yezu ka kabakow la jɔn ni jɔn lo koo la?

⁴ An be kalan barikamanw sɔrɔ Yezu ka kabakow la a yɛrɛ n’a Faa koo la. Mun na do? Sabu Jehova lo tun ye setigiya di Yezu ma a k’o kabakow kɛ. Kɛwaliw 10:38 b’a fɔ ko: “Ala ye Nii Senuman ni sebagaya di ale Nazarɛtika Yezu ma, ka jamana bɛɛ munumunu ka to ka koɲuman kɛ mɔgɔw ye, ka mɔgɔw kɛnɛya minw bɛɛ tun be Sutana bolo, bari Ala tun b’a fɛ.” An k’a to an hakili la fana ko Yezu y’a yira cogo dafanin na a ka kumaw n’a ka kɛwalew fɛ ko a n’a Faa ka miiriya n’u dusukunnakow ye kelen ye. Yezu ka kɛwale dɔw ye a ka kabakow ye (Zan 14:9). An be kalan minw sɔrɔ a ka kabakow la, an ka u la saba lajɛ.

5. Mun lo tun be Yezu lasun ka kabakow kɛ? (Matiyo 20:30-34).

⁵ A fɔlɔ, Yezu n’a Faa b’an kanu kosɔbɛ. Ka Yezu to dugukolo kan, a y’a yira ko a be mɔgɔw kanu kosɔbɛ a kɛtɔ ka kabakow kɛ walisa ka u ka tɔɔrɔkow nɔgɔya. Loon dɔ, fiyentɔcɛ fila y’a deli ko a ka olu kɛnɛya (Matiyo 20:30-34 kalan). A kɔrɔsi ko u “hinɛ donna” Yezu la ani o kɔ, a y’u kɛnɛya. Gɛrɛkikan kumaden min bayɛlɛmana yan ko “hinɛ donna,” o kɔrɔ ko Yezu dusu kasira kosɔbɛ tuma min na a y’o cɛɛw ye u be tɔɔrɔla. O b’a yira ko Yezu be mɔgɔw kanu ani o lo y’a lasun fana ka dumuni di kɔngɔtɔw ma ani ka kunatɔ dɔ kɛnɛya (Mat. 15:32; Mariki 1:41). An be se ka la a la ko Jehova Ala min be “makari” kosɔbɛ, ale n’a Dencɛ b’an kanu yɛrɛ le! N’an be tɔɔrɔla, o be u dusu tiɲɛ (Luka 1:78; 1 Piyɛri 5:7). Gwɛlɛya minw be adamadenw tɔɔrɔla, siga t’a la u kɔrɔtɔnin lo ka daan sigi u bɛɛ la!

6. Ala ye setigiya juman lo di Yezu ma?

⁶ A filanan, Ala ye see di Yezu ma a ka adamadenw ka gwɛlɛyaw bɛɛ ɲɛnabɔ. Yezu y’a yira a ka kabakow fɛ ko see b’a ye ka gwɛlɛyaw ɲɛnabɔ an tɛ se ka minw ɲɛnabɔ an yɛrɛ ma. An ye jurumu min sɔrɔ cɛɛn ye, o lo ye an ka gwɛlɛyaw sababu ye ani see be Yezu ye k’an hɔɔrɔnya ka bɔ o la. O jurumu nɔfɛko dɔw ye bana ni saya ye (Mat. 9:1-6; Ɔrɔm. 5:12, 18, 19). Yezu ye kabako minw kɛ, u b’a yira ko a be se ka banabagatɔ “sifa bɛɛ” kɛnɛya ani ka suuw yɛrɛ kunu (Mat. 4:23; Zan 11:43, 44). See b’a ye fana ka sanfɔɲɔbaw mala ani ka jinaw gwɛn ka bɔ mɔgɔw la (Mariki 4:37-39; Luka 8:2). K’a ye ko Jehova ye o setigiya kabakoman di a Dencɛ ma, o b’an hakili sigi yɛrɛ le!

7-8. a) Yezu ka kabakow b’a to an lanin be mun lo la? b) I kɔrɔtɔnin lo Yezu ka kabako juman lo kɛ duniɲa kura kɔnɔ?

⁷ A sabanan, an lanin b’a la kosɔbɛ ko Ala ka Masaya bena dugaw lase an ma. Yezu ye kabako minw kɛ k’a to dugukolo kan, o b’an dɛmɛ k’a faamu ko k’a to sankolola Masaya kun na, a bena kabako caaman kɛ ka tɛmɛ fɔlɔ taw kan. An k’a  filɛ an bena ɲɛnamaya kɛ cogo min na yanni dɔɔni, Krista ka kuntigiya kɔrɔ. An bena kɛnɛya dafanin sɔrɔ sabu banaw ani koo o koo be adamadenw tɔɔrɔ, Yezu bena u bɛɛ ban (Ezayi 33:24; 35:5, 6; Yir. 21:3, 4). Kɔngɔ tɛna an tɔɔrɔ tugun ani balawokow fana tɛna kɛ tugun (Ezayi 25:6; Mariki 4:41). An ka mɔgɔ kanulen minw sara, an bena ninsɔndiya kosɔbɛ k’u bisimila tuma min na u suu bena kunu (Zan 5:28, 29). Ele kɔrɔtɔnin lo Yezu ka kabako juman lo kɛ duniɲa kura kɔnɔ?

⁸ Kabakow kɛtɔ, Yezu tun b’a yira ko a majiginin lo ani ko a be makari. A ka ɲi an fana k’a ɲini ka kɛ n’o jogow ye. An ka misali fila lajɛ. Koo minw kɛra kɔɲɔya dɔ la Kanaan dugu la, an k’a daminɛ n’o ye.

9. Yezu ye mun lo kɛ kɔɲɔya dɔ la? (Zan 2:6-10).

⁹ Zan 2:6-10 kalan. Tuma min na diwɛn dɛsɛra kɔɲɔya nin na, yala Yezu tun waajibiyanin lo ka koo dɔ kɛ wa? Ayi. Kiraya kuma si tun t’a fɔ ko Masiya bena diwɛn kɛ kabako dɔ sen fɛ. Nka miiri k’a filɛ a tun bena min kɛ i la ni ele ka kɔɲɔya lo la minnifɛn tun fɔnna. N’a sɔrɔ kɔɲɔcɛ n’a muso ani u somɔgɔw hinɛ donna Yezu la. A tun t’a fɛ u ka maloya. O kama, a ye kabako dɔ kɛ i ko an kɔnna k’a ye cogo min na. Yezu ye jii litiri 390 ɲɔgɔn yɛlɛma k’a kɛ diwɛn diiman  ye. N’a sɔrɔ a y’o jii caaman yɛlɛma k’a kɛ diwɛn ye walisa dɔ ka to kɔɲɔcɛ n’a muso ani u somɔgɔw ye kɔfɛ. Min tora, u yɛrɛ tun be se k’o feere ani k’o wari di kɔɲɔcɛ n’a muso ma. Siga t’a la, kɔɲɔcɛ n’a muso ninsɔn diyara yɛrɛ le!

10. Yezu ka kabako min lakalila Zan sapitiri 2nan na, kunnafoni jɔnjɔn jumanw lo be sɔrɔ o koo la? (Jaa lajɛ fana.)

¹⁰ Yezu ka kabako min lakalila Zan sapitiri 2nan na, an ka kunnafoni jɔnjɔn dɔw lajɛ o koo la. Yala i y’a kɔrɔsi ko Yezu yɛrɛ lo ma dagaw fa jii la wa? A m’a yɛrɛ yira, nka, a y’a ɲini baaradenw lo fɛ u k’o dagaw fa jii la (vɛrise 6, 7). Ani tuma min na a y’o jii yɛlɛma k’a kɛ diwɛn ye, ale yɛrɛ lo m’o ta ka taga a di kɔɲɔya ɲɛmɔgɔ ma. Nka, a y’a ɲini baaradenw lo fɛ u k’o kɛ (vɛrise 8). Ani Yezu ma diwɛn bɔ jifilen na ka taga lɔ mɔgɔw ɲɛfɛ ka to k’a yɛrɛ yira ko: “N’ ye diwɛn min kɛ sisan, aw t’o nɛnɛ k’a filɛ!”

11. An be kalan juman lo sɔrɔ Yezu ka kabako la?

¹¹ Yezu ye kabako min kɛ ka jii yɛlɛma k’a kɛ diwɛn ye, an be kalan juman lo sɔrɔ o la? O b’an kalan majigilenya koo la. Yezu m’a yɛrɛ yira o kabako kosɔn. Tiɲɛn na, a yɛrɛ ma deli ka waso abada a ka kɛtaw kosɔn. Nka a majiginin lo minkɛ, tuma o tuma, a tun be nɔɔrɔ bɛɛ la a Faa lo kan ani k’a yira ko a Faa lo y’o setigiya di ale ma (Zan 5:19, 30; 8:28). N’an be Yezu ladegi, an bena an yɛrɛ majigi ani an tɛna waso. An be baara o baara kɛra Jehova ye, an kana waso o kosɔn. Nka, nɛɛma min b’an fɛ ka baara kɛ a ye, an ka waso o lo kosɔn sabu Jehova Ala ɲɔgɔn tɛ yen (Zer. 9:22, 23). Tiɲɛn na, an tɛ se ka foyi si kɛ ni Jehova ka dɛmɛ barika tɛ. O la, a ka kan ni nɔɔrɔ min ye, an k’o la a kan.—1 Kor. 1:26-31.

12. An be se ka Yezu ka majigilenya ladegi cogo wɛrɛ juman na? Ɲɛyirali dɔ fɔ.

¹² An k’a filɛ an be se ka Yezu ka majigilenya ladegi cogo wɛrɛ min na. Miiri nin na: Diinan mɔgɔkɔrɔ dɔ ye wagati caaman ta ka kɔrɔsigi ciden kanbele dɔ dɛmɛ k’a ka forobakalan fɔlɔ labɛn. O dɛmɛ sababu la, o kɔrɔsigi ciden ka forobakalan diyara kafodenw bɛɛ ye ani a y’u jija. Lajɛn bannin kɔ, dɔ gwɛrɛla diinan mɔgɔkɔrɔ nin na ani k’a fɔ a ye ko: “Karimasina ka forobakalan diyara dɛ! Tiɲɛn tɛ?” Yala kuun b’a la o diinan mɔgɔkɔrɔ k’a fɔ ko: “Tiɲɛn lo, nka n’ ye wagati caaman lo kɛ k’a dɛmɛ.” Wala a ka fisa a k’a fɔ ni majigilenya ye ko: “Tiɲɛn lo, a diyara yɛrɛ le ani n’ dusu ka di a kɔrɔ!” An be koo ɲuman minw kɛ tɔɔw ye, n’an majiginin lo, an tɛna a yira mɔgɔw la ko an lo y’o kɛ. An dusu bena diya sabu an b’a lɔn ko an be koo ɲuman minw kɛ, Jehova ɲɛɛ b’o la ani o ka di a ye (Matiyo 6:2-4 lajɛ; Eburuw 13:16). Tiɲɛn na, n’an be Yezu ka majigilenya ladegi, o ka di Jehova ye. —1 Piyɛri 5:6.

13. Yezu ye mun lo ye Nayin dugu gɛrɛfɛ? A ye mun lo kɛ? (Luka 7:11-15).

¹³ Luka 7:11-15 kalan. Miiri k’a filɛ min kɛra saan fila ɲɔgɔn Yezu ka cidenya baara daminɛnin kɔ. A tun be tagara Nayin dugu la. O dugu be Galile mara la, Sunamu dugu gɛrɛfɛ. O yɔrɔ lo la kira Elize tun ye muso dɔ dencɛ suu kunu (2 Mas. 4:32-37). Yezu surunyatɔ dugu donda la, a ye mɔgɔ dɔw kunbɛn u be bɔra ni suu dɔ ye. Dusukasiba tun  lo sabu firiyamuso dɔ dencɛ kelenpe lo sara. Nka o muso tun t’a kelen, dugumɔgɔ caaman be tugura a kɔ. Yezu ye u lalɔ ani a ye koo kabakoman dɔ kɛ o muso dusu kasinin ye. A y’o muso dencɛ suu kunu! Yezu ye sukununi saba minw kɛ ani u kofɔra Evanziliw kɔnɔ, nin lo ye u la fɔlɔ ye.

14. Maana min be Luka sapitiri 7nan kɔnɔ, a kunnafoni jɔnjɔn dɔw ye jumanw ye? (Jaa lajɛ fana.)

¹⁴ Maana min be Luka sapitiri 7nan kɔnɔ, an k’o kunnafoni jɔnjɔn dɔw lajɛ. I y’a kɔrɔsi ko Yezu ye “muso nin ye” a b’a dencɛ suu kasira ani o kɔ le, “a hinɛ donn’a la kosɔbɛ” wa? (13). N’a sɔrɔ Yezu y’o muso ye a be tagamana a dencɛ suu gɛrɛfɛ n’a be kasira. Yezu ye min ye, o y’a to o muso hinɛ donna a la kosɔbɛ. A makari ma Yezu minɛ dɔrɔn, nka a y’o yira fana. A kumana a fɛ. Siga t’a la, a y’o kɛ ni kaan diiman ye walisa k’a hakili sigi. A ko: “Kana kasi tugu.” O kɔ, a y’a bɔ a yɛrɛ la ka koo dɔ kɛ. A ye o muso dencɛ suu kunu ani a y’a fɔ muso ye ko a k’a “deen minɛ ka taga.”—Vɛrise 14 ani 15.

15. An be kalan juman lo sɔrɔ Yezu ka kabako la?

¹⁵ Yezu ye kabako min kɛ k’o firiyamuso dencɛ suu kunu, an be kalan juman lo sɔrɔ o la? A b’an dɛmɛ k’a faamu ko an ka ɲi k’a yira ko an be hinɛ sukasibagatɔw la. Tiɲɛn lo ko an tɛ se ka suu kunu i ko Yezu y’a kɛ cogo min na. Nka i ko Yezu, an be se ka kɔrɔsili kɛ ani ka hinɛ sukasibagatɔw la. Misali la, an be se k’a bɔ an yɛrɛ la ka koo dɔ fɔ wala ka koo dɔ kɛ walisa k’u dɛmɛ ani k’u dusu saalo d (Talenw 17:17; 2 Kor. 1:3, 4; 1 Piyɛri 3:8). N’an ye kuma dennin dɔ fɔ wala ka koo dennin dɔ kɛ, o dama be se k’u dɛmɛ kosɔbɛ.

16. I ko a yirala jaa kan cogo min na, i be kalan juman lo sɔrɔ denba dɔ ka koo la min deen sara a ma mɛɛn?

¹⁶ An ka wale dɔ lajɛ. A saan damanin  ye nin ye, tuma min na u tun be dɔnkili lara Masaya Boon kɔnɔ, balimamuso dɔ y’a ye ko denba dɔ be kasira a gɛrɛfɛ. Dɔnkili tun be kumana sukununi jigiya koo la ani o muso denmuso fitinin tun sara a ma mɛɛn. Balimamuso tun b’o kala ma minkɛ, a sinna ka taga lɔ a kɔrɔ ani k’a bolo meleke a la. U ye dɔnkili tɔɔ la ɲɔgɔn fɛ. O denba y’a fɔ kɔfɛ ko: “Balimaw kanu donna n’ na kosɔbɛ.” O denba ninsɔn diyara kosɔbɛ sabu a nana lajɛn na. A ko: “Mɔgɔ be dɛmɛ sɔrɔ yɔrɔ min na, o ye Masaya Boon le ye.” Sukasibagatɔw be i ko “mɔgɔ jigitigɛninw.” (Zab. 34:19). O la, an be koo o koo kɛ hali ni koo fitinin lo walisa k’a yira ko an be hinɛ u la, an ka la a la ko Jehova b’o kɔrɔsi ani o ka di a ye.

17. An ye mun lo ye barokun nin na?

¹⁷ Evanziliw yɔrɔ minw be Yezu ka kabakow lakali, n’an ye sɛgɛsɛgɛri kɛ u kan, o bena an jija kosɔbɛ. O maanaw b’a yira an na ko Jehova ni Yezu b’an kanu kosɔbɛ, ko see be Yezu ye ka duniɲa ka gwɛlɛyaw bɛɛ ɲɛnabɔ ani ko an be se ka la Ala ka layiduw la siniɲasigi koo la. O layiduw bena dafa yanni dɔɔni tuma min na Ala ka Masaya bena dugukolo mara. N’an be sɛgɛsɛgɛri kɛra o maanaw kan, an ka miiri k’a filɛ an be se ka Yezu ka jogow ladegi cogo minw na. N’a sɔrɔ i be se k’a latigɛ ka kelenna kalan wala gwa kɔnɔ batoli kɛ Yezu ka kabako wɛrɛw kan. A filɛ i be kalan minw sɔrɔ u la ani o kɔ, o kofɔ tɔɔw ye. N’i y’o kɛ, i bena u jija yɛrɛ le!—Ɔrɔm. 1:11, 12.

18. An bena mun lo lajɛ barokun nata la?

¹⁸ Yezu ye sukununi minw kɛ, u la saba lo lakalila Bibulu kɔnɔ. A y’a ka sukununi sabanan kɛ a ka cidenya baara laban fan fɛ. O sukununi tun be dan na tɔɔw la. Mun na do? Sabu a y’a teri sɔbɛ dɔ lo lakunu ani a suu tun ye tile naani kɛ kaburu kɔnɔ. An be kalan jumanw lo sɔrɔ o kabako la? Ani an be se k’an ka limaniya barika bonya cogo di sukununi jigiya koo la? An bena o ɲiningaliw jaabi barokun nata la.