1. Jehova b’a fɛ an ka mun lo kɛ?

 NI FURUƝƆGƆNW ye deen sɔrɔ, o be u ninsɔn diya yɛrɛ le! Nka, hali ni bangebagaw be u ka denɲɛnin kanu, u t’a fɛ a ka to o cogo la. U yɛrɛ bena hami kosɔbɛ n’a tɛ kɔrɔbayara. O cogo kelen na, tuma min na an kɛra Yezu ka kalandenw ye kura ye, Jehova dusu diyara. Nka, a t’a fɛ an ka dan o ma (1 Kor. 3:1). A b’a fɛ an “ka kɛ mɔgɔkɔrɔbaw ye” Alako ta fan fɛ.—1 Kor. 14:20.

2. An bena mun lo lajɛ barokun nin na?

² Ka kɛ mɔgɔkɔrɔba ye Alako ta fan fɛ, o kɔrɔ ko di? An be se ka kɛ o ye cogo di? Dumuni gwiliman b’an dɛmɛ cogo di ka kɛ mɔgɔkɔrɔbaw ye Alako ta fan fɛ? Ani mun na an man ɲi ka la an yɛrɛ la kojugu? An bena o ɲiningaliw jaabi barokun nin na.

KA KƐ MƆGƆKƆRƆBA YE ALAKO TA FAN FƐ, O KƆRƆ KO DI?

3. Ka kɛ mɔgɔkɔrɔba ye Alako ta fan fɛ, o kɔrɔ ko di?

³ Bibulu kɔnɔ, gɛrɛkikan kumaden min bayɛlɛmana ko “mɔgɔkɔrɔba,” o kɔrɔ ko fana mɔgɔ min be ‘taga ɲa,’ a “dafanin” lo wala a “kɔgɔnin” lo a (1 Kor. 2:6). Denɲɛnin be to ka bonya fɔɔ ka taga kɛ mɔgɔkɔrɔba ye. O cogo kelen na, jɛnɲɔgɔnya min be an ni Jehova cɛ, an fana ka ɲi ka to k’o sabati walisa ka kɛ mɔgɔkɔrɔbaw ye Alako ta fan fɛ. Tiɲɛn na, hali n’an y’o laɲinita dafa, an bele ka ɲi ka to ka ɲɛtaga kɛ (1 Tim. 4:15). An bɛɛ be se ka kɛ kerecɛn kɔgɔninw ye, hali kanbelew ni sunguruw yɛrɛ.  Nka mun lo b’a yira ko mɔgɔ kɛra mɔgɔkɔrɔba ye Alako ta fan fɛ?

4. Mun lo b’a yira ko dɔ ye mɔgɔkɔrɔba ye Alako ta fan fɛ?

⁴ Mɔgɔ min ye mɔgɔkɔrɔba ye Alako ta fan fɛ, o tigi be Ala ka sariyaw bɛɛ lo labato. A tɛ dɔw labato ka dɔw to yen. Tiɲɛn lo ko a be fili tuma dɔw la sabu mɔgɔ dafabali lo. Nka, a b’a yira loon o loon ko a be miiri ani ka koow kɛ ka kɛɲɛ ni Ala sago ye. A ye jogo kura ta ani a b’a jija tuma bɛɛ ka koow jati i ko Ala b’u jati cogo min na (Efɛz. 4:22-24). A y’a kɛ a delinanko ye ka basigi Jehova ka sariyaw n’a ka sariyakolow kan ka desizɔn ɲumanw ta. O la, a mako tɛ sariyaw la koo kelen kelen bɛɛ la. N’a ye desizɔn dɔ ta, a b’a jija kosɔbɛ k’o labato.—1 Kor. 9:26, 27.

5. Kerecɛn min ma kɔgɔ Alako ta fan fɛ, mun lo be se k’ale sɔrɔ? (Efɛzikaw 4:14, 15).

⁵ Kerecɛn min ma kɔgɔ Alako ta fan fɛ, u ka teli k’ale lafili ni “kalanjugu sifa bɛɛ” ani “namara” kumaw ye. U be ngalon kumaw ani mɔgɔ lafiliko minw jɛnsɛn telewisɔn, ɛntɛrɛnɛti n’a ɲɔgɔnnaw kan, a ka teli ka la olu la ani kerecɛn murutininw ka teli k’a lafili b (Efɛzikaw 4:14, 15 kalan). O tigi ka teli ka tɔɔw ɲangoya, ka kɛlɛ kɛ n’u ye, ka dimi joona ani a man teli ka to kantigiya la kɔrɔbɔli tuma na.—1 Kor. 3:3.

6. Kerecɛn be kɛ mɔgɔkɔrɔba ye cogo min na Alako ta fan fɛ, an be se k’o suma ni mun lo ye? (jaa lajɛ fana).

⁶ An y’a ye ko kerecɛn be kɛ mɔgɔkɔrɔba ye cogo min na Alako ta fan fɛ, Bibulu ko o be i n’a fɔ deen be bonya ka kɛ mɔgɔkɔrɔba ye cogo min na. Denfitinin tɛ koo caaman lɔn. O kama, a mako b’a la mɔgɔkɔrɔba dɔ k’a ɲɛminɛ ani k’a latanga. Misali la, bamusoman dɔ be se k’a denmuso fitinin bolo minɛ walisa ka sira tigɛ. N’o deen kɔrɔbayara dɔɔni, a bamuso be se k’a to a ka sira tigɛ a kelen. Nka, a bena a fɔ a ye ko a ka sira filɛ ka ɲɛ fɔlɔ. N’a kɔrɔbayara, a bena a lɔn a yɛrɛ ma cogo min na a be se k’a yɛrɛ tanga o farati ɲɔgɔn ma. Denfitinin mako be mɔgɔkɔrɔbaw ka  dɛmɛ na walisa k’a yɛrɛ tanga faratiw ma. O cogo kelen na, kerecɛn min tɛ mɔgɔkɔrɔba ye Alako ta fan fɛ, ale mako ka teli ka kɛ kerecɛn kolɔnbagaw ka dɛmɛ na. O la, a bena a yɛrɛ tanga faratiw ma Alako ta fan fɛ ani ka desizɔn ɲumanw ta. Nka ni kerecɛn kolɔnbaga b’a fɛ ka desizɔn dɔ ta, a be jatiminɛ kɛ Bibulu ka sariyakolow kan walisa ka Jehova ka miiriya lɔn o koo la. O kɔ, a b’a ka desizɔn ta ka kɛɲɛ n’o ye.

7. Mɔgɔ min ye mɔgɔkɔrɔba ye Alako ta fan fɛ, yala ale mako be tɔɔw ka dɛmɛ na wa?

⁷ Yala o kɔrɔ ko kerecɛn kolɔnbaga mako tɛ mɔgɔ ka dɛmɛ na abada wa? Ayi, ale fana mako be se ka kɛ dɛmɛ na tuma dɔw la. Nka mɔgɔ min ye denmisɛn ye Alako ta fan fɛ, n’a sɔrɔ ale b’a fɛ tɔɔw k’a fɔ a ye a ka ɲi ka min kɛ wala u ka desizɔnw ta a ye. Faan wɛrɛ fɛ, kerecɛn min ye mɔgɔkɔrɔba ye Alako ta fan fɛ, ale be dɛmɛ ɲini mɔgɔ hakilitigiw ni kolɔnbagaw fɛ. Nka, a b’a lɔn ko “mɔgɔ kelen kelen bɛɛ bena lɔ n’a yɛrɛ kunko ye.”—Gal. 6:5.

8. Koo jumanw lo la kerecɛn kolɔnbagaw be dan na dan na?

⁸ Mɔgɔkɔrɔbaw cogo tɛ kelen ye. O cogo kelen na, kerecɛn minw ye mɔgɔkɔrɔbaw ye Alako ta fan fɛ, olu jogow tɛ kelen ye. Misali la, dɔw ka hakilitigiya ka bon ani dɔ wɛrɛw jaa ka gwɛlɛ kosɔbɛ. Dɔw fana tɛgɛ labilanin lo yɛrɛ le, k’a sɔrɔ dɔw be makari kosɔbɛ le tɔɔw la. Koo kelen na, kerecɛn kolɔnbaga fila ka desizɔnw be se ka kɛ dan na dan na. Nka, o desizɔnw bɛɛ bɛnnin lo ni Bibulu ka sariyakolow ye. O ka teli ka kɛ n’a y’a sɔrɔ ko kerecɛn ka ɲi ka desizɔn dɔ ta ka kɛɲɛ n’a dusukun ye. Hali n’u ka desizɔnw tɛ kelen ye, u tɛ ɲɔgɔn jalaki o kosɔn. Nka u kaan bɛnnin be to.—Ɔrɔm. 14:10; 1 Kor. 1:10.

AN BE SE KA KƐ MƆGƆKƆRƆBA YE ALAKO TA FAN FƐ COGO DI?

9. Yala mɔgɔ be sin ka kɛ mɔgɔkɔrɔba ye Alako ta fan fɛ wa? A ɲɛfɔ.

⁹ Wagati tɛmɛtɔ, denɲɛnin be to ka kɔrɔbaya. Nka, wagati tɛmɛtɔ lo t’a to mɔgɔ be sin ka kɛ mɔgɔkɔrɔba ye Alako ta fan fɛ. Misali la, Korɛnti balimaw sɔnna kibaro diiman ma, u batizera, u ye hakili senu sɔrɔ ani ciden Pol ye cikan tigitigi dɔw di u ma (Kɛw. 18:8-11). Nka saan damanin u batizenin kɔ, u caaman bele tun tɛ mɔgɔkɔrɔbaw ye Alako ta fan fɛ (1 Kor. 3:2). An be se ka mun lo kɛ walisa o koo ɲɔgɔn kana an sɔrɔ?

10. An ka ɲi ka mun lo kɛ walisa ka kɔgɔ Alako ta fan fɛ? (Zude 20).

¹⁰ Walisa ka kɔgɔ Alako ta fan fɛ, o nege ka ɲi ka kɛ an yɛrɛ la fɔlɔ. “Kolɔnbaliya” ka di minw ye, olu b’a fɛ ka to o cogo la ani u tɛna kɛ mɔgɔkɔrɔbaw ye Alako ta fan fɛ abada (Talenw 1:22). An t’a fɛ ka kɛ i ko mɔgɔkɔrɔba minw b’a fɛ u bangebagaw lo ka to ka desizɔnw ta u ye. Nka, an be sɔn a ma ko anw lo ka ɲi k’an jija k’an ka jɛnɲɔgɔnya barika bonya ni Jehova ye (Zude 20 kalan). N’i bele b’i jijara ka kɛ mɔgɔkɔrɔba ye Alako ta fan fɛ, Jehova deli a ‘k’o kɛli nigɛ don i la k’a kɛ see di i ma.’—Filip. 2:13.

11. Jehova be dɛmɛ juman lo lase an ma walisa an ka kɛ mɔgɔkɔrɔbaw ye Alako ta fan fɛ? (Efɛzikaw 4:11-13).

¹¹ Jehova t’a ɲini an fɛ an ka kɛ mɔgɔkɔrɔbaw ye Alako ta fan fɛ an yɛrɛ ma. A ye ɲɛminɛbagaw ni kalanfaw di  an ma kafo kɔnɔ minw b’an dɛmɛ ka kɛ “mɔgɔkɔrɔbaw” ye ani “ka kɔgɔ fɔɔ ka kɛ mɔgɔdafaninw ye i n’a fɔ Krista.” (Efɛzikaw 4:11-13 kalan). Jehova b’a ka hakili senu di an ma fana walisa an ka kɛ ni “Krista ka miiriya” ye (1 Kor. 2:14-16). Ka fara o kan, Yezu tun be miiri cogo min na, a ye min fɔ ani a ye min kɛ a ka cidenya baara la dugukolo kan, Ala y’a kɛ u y’o sɛbɛ Evanzili naani kɔnɔ. N’i be Yezu miiricogo n’a ka kokɛcogow ladegi, o bena i dɛmɛ ka kɛ mɔgɔkɔrɔba ye Alako ta fan fɛ.

DUMUNI GWILIMAN NAFA

12. “Krista ka koo minw faamu man gwɛlɛ,” o ye mun lo ye?

¹² Walisa ka kɛ mɔgɔkɔrɔbaw ye Alako ta fan fɛ, “Krista ka koo minw faamu man gwɛlɛ,” an kana dan o ma. O kalan jɔnjɔn dɔw ye nunu ye: nimisali, limaniya, batɛmu ani sukununi (Eburuw 6:1, 2). O ye kerecɛnw ka kalan jɔnjɔn dɔw lo ye. O kama, waajuli kɛtɔ Pantekɔte loon na, ciden Piyɛri y’o kalanw fɔ mɔgɔw ye (Kɛw. 2:32-35, 38). An ka ɲi ka sɔn o kalan jɔnjɔnw ma walisa ka kɛ Krista ka kalandenw ye. Misali la, Pol y’a yira ko n’an lanin tɛ sukununi koo la, an tɛ se k’a fɔ ko an ye kerecɛn sɔbɛ ye (1 Kor. 15:12-14). Nka, an man ɲi ka dan o kalanw ma.

13. Eburuw 5:14 be kuma dumuni gwiliman min koo la, o be se k’an nafa cogo di? (jaa lajɛ fana).

¹³ Dumuni gwiliman be dan na kalanw na minw faamu man gwɛlɛ sabu o tɛ dan Jehova ka sariyaw dɔrɔn ma nka, a ka sariyakolow fana niin b’a la. O sariyakolow b’an dɛmɛ ka Jehova ka miiriya faamu. Walisa o dumuni k’an nafa, an ka ɲi ka Bibulu sɛgɛsɛgɛ, ka miiri a kan ani k’an seko bɛɛ kɛ k’a sira tagama. N’an b’o kɛ, an b’an yɛrɛ degi ka desizɔnw ta minw ka di Jehova ye. c—Eburuw 5:14 kalan.

14. Pol ye Korɛntikaw dɛmɛ cogo di u kɛra mɔgɔkɔrɔbaw ye Alako ta fan fɛ?

¹⁴ Kerecɛn minw tɛ mɔgɔkɔrɔbaw ye Alako ta fan fɛ, a man nɔgɔ olu ma ka desizɔn ɲuman ta ni Bibulu ka sariya tigitigi dɔ ɲɛsinnin tɛ u ka koo ma. O koo  ɲɔgɔn na, dɔw be se k’a miiri ko min k’u diya u be se k’o kɛ. Dɔw be se ka ɲiningali kɛ ni sariya dɔ be yen, k’a sɔrɔ u mako tɛ sariya si la o koo la. Misali la, a be komi Korɛnti kerecɛnw ye Pol ɲininga ni sariya dɔ be yen min b’a yira n’u ka ɲi ka josɔn dumuni kɛ wala n’u man ɲi k’a kɛ. Sanni a k’a fɔ u ye u ka ɲi ka min kɛ, a ko u kelen kelen bɛɛ lo ka ɲi k’o koo latigɛ ka kɛɲɛ n’u dusukun ye. A basigira Bibulu ka sariyakolow kan k’u dɛmɛ u k’a lɔn ko u kelen kelen bɛɛ be se ka desizɔn ta min t’u dusukun kɛlɛ ani min tɛna tɔɔw kunnatiɲɛ (1 Kor. 8:4, 7-9). O cogo la, Pol tun be Korɛntikaw dɛmɛna le u ka kɔgɔ Alako ta fan fɛ. O la, u tun bena hakili sɔrɔ ka koow latigɛ u yɛrɛ ma sanni ka sariyaw ɲini koo bɛɛ la wala k’a to tɔɔw k’a fɔ u ye u ka ɲi ka min kɛ.

15. Pol ye Eburu kerecɛnw dɛmɛ cogo di walisa u ka ɲɛtaga kɛ Alako ta fan fɛ?

¹⁵ An be kalan nafaman wɛrɛ sɔrɔ Pol ka lɛtɛrɛ la a ye min ci Eburu kerecɛnw ma. O kerecɛn dɔw ma to ka ɲɛtaga kɛ. Nka, u segira ka kɛ “denɲɛninw ye minw be siin min. [U] te se dumuni gwiliman kɔrɔ.” (Eburuw 5:12). Jehova tun b’u kalanna fɛɛn kura minw na u ka kafo kɔnɔ, u ma sɔn o ma ani u m’a ɲini k’o faamu (Talenw 4:18). Misali la, Yahutu caaman bele tun be Musa ka sariya labato ani u tun be tɔɔw jija u k’o kɛ. K’a sɔrɔ saan 30 ɲɔgɔn ka kɔn o ɲɛ, Krista ka saraka tun ye daan sigi o sariya la (Ɔrɔm. 10:4; Titi 1:10). Tiɲɛn na, o saanw bɛɛ la, kerecɛnw ye wagati caaman sɔrɔ walisa k’a faamu ko u mako t’a la tugun ka Musa ka sariya labato! O lo kama, Pol tun b’a ɲinina k’u dɛmɛ u ka sɔn kalanw ma minw faamu man nɔgɔ. A ka lɛtɛrɛ y’u dɛmɛ u k’a lɔn ko Yezu ye Jehova batoli kɛcogo min sigi sen kan, o ka fisa ni Musa ka sariya ye fɔɔ ka taga ka na. A y’u dɛmɛ fana ka jagwɛlɛya sɔrɔ walisa ka to ka waajuli kɛ, hali k’a sɔrɔ Yahutuw tun b’u kɛlɛla.—Eburuw 10:19-23.

KANA LA I YƐRƐ LA KOJUGU

16. N’an kɛra kerecɛn kɔgɔninw ye, an ka ɲi ka mun lo kɛ ka fara o kan?

¹⁶ An ka ɲi ka banba ka kɛ kerecɛn kɔgɔninw ye. Nka an ka ɲi k’an jija fana  ka to a ye. O kama, an man ɲi ka la an yɛrɛ la kojugu (1 Kor. 10:12). An ka ɲi k’an “yɛrɛ sɛgɛsɛgɛ k’a filɛ” n’an bele be ɲɛtaga kɛra Alako ta fan fɛ.—2 Kor. 13:5.

17. Pol ye lɛtɛrɛ min ci Kɔlɔsikaw ma, o b’a yira cogo di ko a kɔrɔtanin lo an ka to mɔgɔkɔrɔbaw ye Alako ta fan fɛ?

¹⁷ Kɔlɔsikaw ka lɛtɛrɛ kɔnɔ, Pol y’a yira ka gwɛ tugun ko a kɔrɔtanin lo an ka to mɔgɔkɔrɔbaw ye Alako ta fan fɛ. Hali n’u tun ye mɔgɔkɔrɔbaw ye ka ban Alako ta fan, Pol ko u k’u yɛrɛ kɔrɔsi walisa duniɲamɔgɔw ka miiriya kana u lafili (Kɔlɔs. 2:6-10). Epafarasi fana tun be Kɔlɔsi kafodenw lɔn ka ɲɛ. A tun be to ka delili kɛ walisa u “ka se ka kɔgɔ Ala koo la.” (Kɔlɔs. 4:12). An be se ka kalan juman lo sɔrɔ o koo la? Pol ni Epafarasi fila bɛɛ y’a faamu ko walisa ka to mɔgɔkɔrɔbaw ye Alako ta fan fɛ, an ka ɲi ka jijaliw kɛ ani ka Ala ka dɛmɛ ɲini. Kɔlɔsikaw ka gwɛlɛyaw bɛɛ n’a ta, Pol ni Epafarasi tun b’a fɛ u ka to mɔgɔkɔrɔbaw ye Alako ta fan fɛ, o kɔrɔ kerecɛn kolɔnbagaw.

18. Mun lo be se ka kerecɛn kɔgɔnin sɔrɔ? (jaa lajɛ fana).

¹⁸ Pol ye Eburuw lasɔmi ko ni kerecɛn kɔgɔnin m’a janto, Ala be se ka ban a la pewu. Kerecɛn dusukun be se ka gwɛlɛya fɔɔ a tɛ se ka nimisa tugun ani ka Ala ka yafali sɔrɔ. An be Ala fo sabu Eburuw ka koo tun ma se o bɛɛ ma (Eburuw 6:4-9). Nka bi, ni mɔgɔ dɔ tun sumana Alako ta fan fɛ, wala a gwɛnna ka bɔ kafo kɔnɔ ani kɔfɛ a nimisara do? A y’a yɛrɛ majigi ka nimisa minkɛ, o b’a yira ko Ala be ban mɔgɔ minw na pewu, a be dan na olu la. Tiɲɛn na, n’a segira Jehova ma, a mako b’a ka dɛmɛ na (Ezek. 34:15, 16). O la, diinan mɔgɔkɔrɔw be se k’a ɲini kerecɛn kolɔnbaga dɔ fɛ a k’a dɛmɛ walisa a ka jɛnɲɔgɔnya ɲuman kɛ ni Jehova ye kokura.

19. An ka ɲi ka kɛ ni laɲinita juman lo ye?

¹⁹ N’i b’i jijara ka kɛ mɔgɔkɔrɔba ye Alako ta fan fɛ, a lɔn ko i be se k’o laɲinita dafa! Bibulu ka tiɲɛnkalan minw faamu man nɔgɔ, to k’a ɲini k’o lɔn ani ka Jehova miiricogo ladegi kosɔbɛ. N’i kɛra kerecɛn kolɔnbaga ye ka ban, i seko bɛɛ kɛ ka to ka ɲɛtaga kɛ fɔɔ abada!