1. Jehova sagokɛlaw tun labɛnnin lo cogo di saan kɛmɛkulu fɔlɔ la?

 JEHOVA mana baara kalifa a sagokɛlaw ma, a b’a fɛ u k’o kɛ cogo labɛnnin na (1 Kor. 14:33). Misali la, Jehova sago ye ko kibaro diiman ka fɔ duniɲa kuru bɛɛ la (Mat. 24:14). A ye Yezu lo sigi o baara kun na. Yezu b’a janto walisa o baara ka kɛ cogo labɛnnin na. Saan kɛmɛkulu fɔlɔ la, tuma min na kafow sigira yɔrɔ caaman na, u ye balimacɛ dɔw kɛ diinan mɔgɔkɔrɔw ye walisa u ka cikanw di kafodenw ma ani k’u ɲɛminɛ (Kɛw. 14:23). Cidenw ni cɛkɔrɔba dɔw lo tun ye koow ɲɛnabɔla jɛnkulu ye Zeruzalɛmu. Olu tun be desizɔn dɔw ta ani a tun ɲinina kafow bɛɛ fɛ u k’o labato (Kɛw. 15:2; 16:4). Balimaw tun be cikan minw sɔrɔ, u tun b’o labato minkɛ, “Krista ka jama jigi tun be sabatira ka taga ɲa. Loon o loon, dɔ tun be fara u kan.”—Kɛw. 16:5.

2. Kabi saan 1919, Jehova b’a sagokɛlaw ɲɛminɛna ani k’u balo Alako ta fan fɛ cogo di?

² Jehova b’a sagokɛlaw ɲɛminɛna halibi. Kabi saan 1919, a ka dɛmɛ barika la, Yezu be tɛmɛ kerecɛn mɔlenw jɛnkulu dennin dɔ fɛ ka waajuli baara labɛn ani ka dumuni di a ka kalandenw ma Alako ta fan fɛ a (Luka 12:42). A gwɛnin lo ko Jehova be o jɛnkulu ka baara dugara.—Ezayi 60:22; 65:13, 14.

3-4. a) Misali dɔ fɔ min b’a yira ko an labɛnnin lo minkɛ, o b’an nafa. b) An bena mun lo lajɛ barokun nin na?

 ³ N’an tun labɛnnin tɛ, Yezu ye baara min kalifa an ma, an tun tɛna se k’o kɛ (Mat. 28:19, 20). Miiri k’a filɛ, ni balimaw tun tɛ labɛnw kɛ walisa an ka waajuli kɛ kafo ka kiinw bɛɛ kɔnɔ, bɛɛ tun bena waajuli kɛ yɔrɔ min k’a diya. An tun bena waajuli kɛ kiin dɔw la siɲɛ caaman na ka dɔw to yen. An labɛnnin lo minkɛ, i ɲɛɛ b’a la o b’an nafa cogo wɛrɛ minw na wa?

⁴ Yezu y’a ka kalandenw labɛn tuma min na a tun be dugukolo kan. O cogo kelen na, a bele be Ala sagokɛlaw labɛnna bi. Barokun nin na, an bena Yezu ka misali lajɛ ani Jehova ka ɔriganisasiyɔn be tugura o kɔ cogo min na. An bena a ye fana an be se k’a yira cogo min na ko an lanin be o ɔriganisasiyɔn na.

AN KA ƆRIGANISASIYƆN BE YEZU LO LADEGIRA

5. An be Yezu ladegi cogo minw na, u dɔ ye juman ye? (Zan 8:28).

⁵ Yezu y’a sankolola Faa lo ladegi a ka kumaw n’a ka kɛtaw la. Jehova ka ɔriganisasiyɔn be Yezu ladegi. A be basigi Ala ka Kuma kan walisa ka cikanw di an ma ani k’an dɛmɛ ka ɲuman ni juguman lɔn ka bɔ ɲɔgɔn na (Zan 8:28 kalan; 2 Tim. 3:16, 17). A b’an hakili jigi tuma o tuma ko an ka to ka Ala ka Kuma kalan ani k’a sira tagama. N’an b’o ladili sira tagama o b’an nafa cogo di?

6. Bibulu sɛgɛsɛgɛri b’an nafa cogo jɔnjɔn minw na, u dɔ ye juman ye?

⁶ N’an be tɛmɛ an ka gafew fɛ ka Bibulu sɛgɛsɛgɛ, o b’an nafa kosɔbɛ. Misali la, ɔriganisasiyɔn be cikan minw di an ma, an be se k’a filɛ n’u basiginin lo Bibulu lo kan. N’an y’a ye k’o cikanw basiginin be Bibulu kan, o b’a to an be la kosɔbɛ Jehova ka ɔriganisasiyɔn na.—Ɔrɔm. 12:2.

7. Yezu ye waajuli kɛ mun lo koo la ani Jehova ka ɔriganisasiyɔn b’a ladegi cogo di?

⁷ Yezu ye “Ala ka masaya kibaru diman” lo fɔ mɔgɔw ye (Luka 4:43, 44). A y’a fɔ a ka kalandenw ye ko olu fana ka to ka Ala ka Masaya kofɔ (Luka 9:1, 2; 10:8, 9). Bi, minw bɛɛ be Jehova ka ɔriganisasiyɔn kɔnɔ, u be Masaya kibaro diiman fɔ u mana kɛ yɔrɔ o yɔrɔ ani u ka kunkanbaara mana kɛ min o min ye.

8. An be ni nɛɛma juman lo ye?

⁸ Nɛɛma lo fɛ an fɛ ka Ala ka Masaya kibaro diiman fɔ tɔɔw ye! Bɛɛ lo tɛ ni o nɛɛma ye. Misali la, tuma min na Yezu tun be dugukolo kan, a ma sɔn jinaw ka seereya kɛ ale koo la (Luka 4:41). Bi, ni mɔgɔ b’a fɛ ka waajuli kɛ ni Jehova sagokɛlaw ye, a ka ɲi ka kɔn ka sarati dɔw dafa. An be ni nɛɛma min ye ka waajuli kɛ, an b’a yira ko o ka di an ye, n’an be seereya kɛ tuma o tuma ani yɔrɔ o yɔrɔ n’o be se ka kɛ. I ko Yezu, an ka laɲinita ye ka Masaya tiɲɛn kisɛw dan mɔgɔw dusukun na ani k’u sɔn jii la.—Mat. 13:3, 23; 1 Kor. 3:6.

9. Jehova ka ɔriganisasiyɔn be mɔgɔw dɛmɛ cogo di u ka Ala tɔgɔ lɔn?

⁹ Yezu ye mɔgɔw dɛmɛ ka Ala tɔgɔ lɔn. Delili dɔ la, a y’a fɔ a sankolola Faa ye ko: “Ne ye i tɔgɔ jira u la.” (Zan 17:26, Bible senuma). I ko Yezu, Jehova ka ɔriganisasiyɔn b’a seko bɛɛ kɛ ka mɔgɔw dɛmɛ u ka Ala tɔgɔ lɔn. O  ɔriganisasiyɔn be tɛmɛ sababu minw fɛ k’o kɛ, u dɔ ye La Bible. Traduction du monde nouveau lo ye. Ala tɔgɔ tun be sɔrɔ yɔrɔ minw na Bibulu sɛbɛtuma na, u y’a sɛbɛ yen o Bibulu bayɛlɛmani kɔnɔ. O Bibulu bayɛlɛmani kuturu bɛɛ wala a yɔrɔ dɔw be sɔrɔ kaan 270 ni kɔ la. N’i b’a fɛ k’a lɔn fɛɛn min kama u ye Ala tɔgɔ sɛbɛ o Bibulu bayɛlɛmani kɔnɔ ani u y’o kɛ cogo min na, Appendice A4 ni A5 lajɛ a kɔnɔ. I be se ka Appendice C fana lajɛ Bible d’étude kɔnɔ. Dalilu caaman be sɔrɔ a kɔnɔ minw b’a yira ko Ala tɔgɔ ka ɲi ka sɔrɔ Gɛrɛkikan sɛbɛninw kɔnɔ siɲɛ 237.

10. Muso dɔ ye min fɔ, i be kalan juman lo sɔrɔ o la?

¹⁰ I ko Yezu, an b’a fɛ ka mɔgɔ caamanba dɛmɛ u ka Ala tɔgɔ lɔn. Muso dɔ be ni saan 67 ye ani a be Birimani jamana na. Tuma min na a y’a lɔn ko tɔgɔ be Ala la, a ɲɛji jigira ani a ko: “N’ siɲɛ fɔlɔ lo k’a mɛn ko Ala tɔgɔ ko Jehova. . . . I ye n’ dɛmɛ ka koo kɔrɔtaninba dɔ lo lɔn, n’ tun tɛ se ka min lɔn n’ yɛrɛ ma.” I ko o muso ka koo b’a yira cogo min na, ka Ala tɔgɔ lɔn, o be se ka nɔɔba to mɔgɔ kɔnɔgwɛw kan.

TO K’A YIRA KO I LANIN LO AN KA ƆRIGANISASIYƆN NA

11. Diinan mɔgɔkɔrɔw be se k’a yira cogo di ko u lanin lo Jehova ka ɔriganisasiyɔn na? (jaa lajɛ fana).

¹¹ Diinan mɔgɔkɔrɔw be se k’a yira cogo minw na ko u lanin lo Jehova ka ɔriganisasiyɔn na, u dɔ ye juman ye? N’u ye cikan dɔ sɔrɔ, u ka ɲi k’a kalan koɲuman ani k’u seko bɛɛ kɛ k’a sira tagama. Misali la, u be cikanw sɔrɔ minw b’a yira u ka ɲi ka lajɛnw ni delili kɛ cogo min na, ani ka Krista ka sagakulu ladon. Ni diinan mɔgɔkɔrɔw be ɔriganisasiyɔn ka cikanw labato, balimaw b’a ye ko Jehova b’u kanu ani ko a b’a janto u la.

12. a) Mun na an ka ɲi ka mɛnni kɛ an ɲɛminɛbagaw fɛ? (Eburuw 13:7, 17). b) Mun na an ka ɲi k’an ɲɛminɛbagaw jogo ɲumanw lo filɛ?

¹² N’an ye cikanw sɔrɔ ka bɔ diinan mɔgɔkɔrɔw fɛ, an ka ɲi ka sɔn k’u sira tagama. N’an b’o kɛ, a bena nɔgɔya u ma k’u ka baara kɛ. Bibulu b’an jija ko an ka mɛnni kɛ an ɲɛminɛbagaw fɛ ani ko an k’an majigi u ye (Eburuw 13:7, 17 kalan). O be se ka gwɛlɛya an ma tuma dɔw la. Mun na do? Sabu u ye cɛɛ dafabaliw lo ye. Nka, n’an b’u ka jogo juguw filɛ ka ɲinɛ u ka jogo ɲumanw kɔ, a kɛra komi an b’an juguw sago lo kɛra. Cogo juman do? An juguw t’a fɛ an ka la a la ko Jehova be tɛmɛna an ka ɔriganisasiyɔn lo fɛ k’an ɲɛminɛ. O la, n’an be ni miiriya jugu ye diinan mɔgɔkɔrɔw koo la, n’a sɔrɔ an bena a daminɛ ka koo jugu miiri an ka ɔriganisasiyɔn fana koo la ani o bena a to an tɛ la a la tugun. An be se ka mun lo kɛ walisa k’an juguw ka ngalon kumaw lɔn ani ka ban u la?

KANA A TO TƆƆW K’A KƐ I BE SIGASIGA AN KA ƆRIGANISASIYƆN NA

13. Ala juguw b’a ɲini cogo di k’a ka ɔriganisasiyɔn tɔgɔ tiɲɛ?

¹³ An ka ɔriganisasiyɔn be koo ɲuman minw kɛ, Ala juguw be koo bɛɛ lajɛnnin kɛ walisa mɔgɔw k’o jati koo jugu ye. Misali la, Bibulu y’an dɛmɛ k’a faamu ko Jehova b’a fɛ a sagokɛlaw ka saniya farisogo, tagamacogo ani Alako ta fan fɛ. A b’a fɔ ko mɔgɔ o mɔgɔ be to ka koo  jugu kɛ ani a t’a fɛ k’o dabila, o tigi tɛ se ka to kafo kɔnɔ (1 Kor. 5:11-13; 6:9, 10). An b’o cikan labato. O kama, an juguw b’a fɔ ko an tɛ mɔgɔw kanu, an b’u jalaki ani ko mɔgɔ o mɔgɔ tɛ koow kɛ i ko anw, an tɛ jɛn n’o tigi ye.

14. U be ngalon minw la an ka ɔriganisasiyɔn kan, u bɔra jɔn lo yɔrɔ?

¹⁴ A lɔn tigi min b’an ka ɔriganisasiyɔn kɛlɛla. U be ngalon minw la o ɔriganisasiyɔn kan, u bɔra Sutana lo yɔrɔ. Ale lo ye “galon faa ye.” (Zan 8:44; Zɛnɛzi 3:1-5). O kama, an tɛ bari an na k’a ye ko a be mɔgɔw lasun ka ngalon jɛnsɛn an ka ɔriganisasiyɔn koo la. A y’o lo kɛ saan kɛmɛkulu fɔlɔ la.

15. Diinan kuntigiw ye mun lo kɛ Yezu n’a ka kalandenw na?

¹⁵ Ala Dencɛ Yezu tun dafanin lo ani a ye kabakobaw kɛ. O bɛɛ n’a ta, Sutana tɛmɛna mɔgɔ dɔw fɛ ka ngalon caaman jɛnsɛn a koo la. Misali la, diinan kuntigiw y’a fɔ mɔgɔw ye ko Yezu be jinaw gwɛnna ni setigiya min ye, o bɔra “jinaw kuntigi” lo fɛ (Mariki 3:22). Tuma min na Yezu tun be kititigɛlaw ɲɛfɛ, diinan kuntigiw y’a jalaki ko a ye Ala tɔgɔ tiɲɛ ani u ye jama lasun u k’a fɔ ko Yezu ka kan ka faga (Mat. 27:20). Kɔfɛ, tuma min na Krista ka kalandenw tun be waajuli kɛra, u kɛlɛbagaw ye mɔgɔw “kɔnɔnasu” walisa u ka wuli u kama (Kɛw. 14:2, 19). Ka ɲɛsin Kɛwaliw 14:2 ma, saan 1998, desanburu tile fɔlɔ ka Kɔrɔsili Sangaso y’a ɲɛfɔ ko: “Yahutu minw tun be kerecɛnw kɛlɛla, olu ma ban kibaro diiman ma dɔrɔn. Nka, u ye kojugubaw fɔ fana u koo la walisa mɔgɔw kana u lamɛn an u k’u kɔniya.”

16. An ka ɲi k’an hakili jigi mun lo la n’an ye ngalon kumaw mɛn?

 ¹⁶ Sutana m’a ka ngalontigɛ dabila. Bi, a bele be ‘diɲɛ ɲagamina’ n’a ka ngalonw ye (Yir. 12:9). N’i ye ngalon kumaw mɛn an ka ɔriganisasiyɔn wala an ɲɛminɛbagaw koo la, a to i hakili ko Ala juguw ye min kɛ Yezu ni kerecɛn fɔlɔw la. Yezu tun ko mɔgɔw bena Jehova sagokɛlaw kɛlɛ ani ka ngalon la u kan. Bi, o lo be kɛra jaatika (Mat. 5:11, 12). N’an be ngalon kumaw bɔyɔrɔ lɔn ani an be sin k’an yɛrɛ tanga o ma, o tɛna an lafili. An be se k’an yɛrɛ tanga o ma cogo di?

17. An be se ka mun lo kɛ walisa ngalon kumaw kana an kunnatiɲɛ? (2 Timote 1:13; koorilen nin fana lajɛ: “ An ka ɲi ka mun lo kɛ n’an ye ngalon kumaw mɛn?”).

¹⁷ Ban ngalon kumaw ma. Ciden Pol y’a yira ka gwɛ an ka ɲi ka min kɛ n’an ye ngalon kumaw mɛn. A y’a fɔ Timote ye ko a ka “ban siirinkolonw ni kumakolonw ma.” (1 Tim. 1:3, 4; 4:7). Misali la, deen fitinin be se ka fɛɛn dɔ ta duguma k’a don a daa la. Nka, mɔgɔkɔrɔba tɛna sɔn k’o kɛ abada sabu a b’a lɔn k’o be se k’a bana. An be ban ngalon kumaw ma sabu an b’u bɔyɔrɔ lɔn. Nka, an be “kumaɲuman” dɔrɔn lo lamɛn.—2 Timote 1:13 kalan.

18. An be se k’a yira cogo di ko an lanin lo Jehova ka ɔriganisasiyɔn na?

¹⁸ Jehova ka ɔriganisasiyɔn be Yezu ladegi cogo caaman minw na, an y’u la saba dɔrɔn lo lajɛ. N’i be Bibulu sɛgɛsɛgɛra, a ɲini k’a lɔn ɔriganisasiyɔn be Yezu ladegi cogo wɛrɛ minw na. Kafoden tɔɔw dɛmɛ walisa u ka la ɔriganisasiyɔn na bɛrɛbɛrɛ. Jehova be tɛmɛ o ɔriganisasiyɔn lo fɛ k’a sago dafa. To k’a yira ko i lanin lo o ɔriganisasiyɔn na, i kɛtɔ k’i magwɛrɛnin to a la ani ka to ka baara kɛ kantigiya la Jehova ye (Zab. 37:28). Nɛɛma lo an fɛ ka kɛ Jehova sagokɛla kantigiw cɛma, o minw be ɲɔgɔn kanu. An ka to k’a yira tuma bɛɛ ko an b’a waleɲuman lɔn o kosɔn.