I b’a lɔn wa?
Mun na siya wɛrɛ mɔgɔw tun be masacɛ Dawuda ka kɛlɛdenw cɛma?
SIYA wɛrɛ mɔgɔ minw tun be Dawuda ka kɛlɛdenw cɛma, u la dɔw ye amonicɛ Selɛki, iticɛ Uri ani mowabucɛ Yitima ye a (1 Til. Kib. 11:39, 41, 46). “Keretikaw ni Peletikaw” ani ‘Gatikaw’ fana tun be Dawuda ka kɛlɛbolo cɛma (2 Sam. 15:18, Biblu Ala ta Kuma). A be komi balimaya tun be Keretikaw, Peletikaw ni Filisitikaw cɛ (Ezek. 25:16). Gatikaw tun be bɔ Gati dugu lo la, o min tun ye Filisitikaw ka dugu dɔ ye.—Zozuwe 13:2, 3; 1 Sam. 6:17, 18.
Mun na Dawuda tun ye siya wɛrɛ mɔgɔ dɔw kɛ a ka kɛlɛdenw ye? A tun lanin b’a la k’u be kantigiya kɛra ale ye ani min yɛrɛ kɔrɔtanin lo ka tɛmɛ, o ye ko u tun be kantigiya kɛra Jehova ye. Misali la, Bibulu ka daɲɛ gafe dɔ b’a fɔ Keretikaw ni Peletikaw koo la ko: “Dawuda ka masaya wagati la, u tora ka kantigiya kɛ a ye hali gwɛlɛyabaw tuma na.” U y’o kɛ cogo di? Tuma min na “Isirayɛlidenw bɛɛ” ye masacɛ Dawuda to yen, ka tugu “mɔgɔkolon . . . Seba” kɔ, Keretikaw ni Peletikaw ma bɔ Dawuda kɔ. U yɛrɛ y’a dɛmɛ ka daan sigi Seba ka murutilikow la (2 Sam. 20:1, 2, 7). Wagati wɛrɛ la, masacɛ Dawuda dencɛ Adoniya y’a ɲini ka masaya bɔsi a la. Nka, Keretikaw ni Peletikaw tora ka kantigiya kɛ Dawuda ye ani u y’a dɛmɛ k’a dencɛ Solomani sigi masaya la. Jehova tun ye Solomani lo sugandi ko a bena sigi masaya la Dawuda nɔɔ na.—1 Mas. 1:24-27, 38, 39.
Gatika Itayi fana tun ye siya wɛrɛ mɔgɔ dɔ ye min ye kantigiya kɛ kosɔbɛ Dawuda ye. Itayi n’a ka kɛlɛkɛcɛ mɔgɔ 600 ye masacɛ Dawuda dɛmɛ, tuma min na a dencɛ Abisalɔn murutira ani a ye Israɛlcɛw lasun u tugura a kɔ. A daminɛ na, Dawuda ko o kɛlɛ tɛ Itayi ta ye sabu lonan lo. Nka Itayi y’a fɔ a ye ko: “Masaba [Jehova] kosɔn, ani ka masacɛ, ne matigi to sii la! Ele masacɛ, ne matigi mana taga yɔrɔ o yɔrɔ, saya lo wo, hɛrɛ lo wo, ne, e ka baaraden be tugu e kɔ.”—2 Sam. 15:6, 18-21.
Itayi ye kantigiya kɛ Dawuda ye, Jehova tun ye ale min sugandi k’a kɛ masacɛ ye.
Hali ni Keretikaw, Peletikaw ani Gatikaw tun ye siya wɛrɛ mɔgɔw ye, u tun sɔnna a ma ko Jehova lo ye tiɲɛn Ala ye ani ko ale lo ye Dawuda sugandi k’a kɛ masacɛ ye. Siga t’a la, Dawuda dusu diyara kosɔbɛ k’a ye k’o cɛɛ kantigiw tun b’a dɛmɛna!
a Ka kɛɲɛ ni Ala ka sariya ye min be sɔrɔ Deteronɔmu 23:4-7 kɔnɔ, Amoniw ni Mowabuw tun man kan ka don Israɛldenw cɛma. A be komi o sariya tun b’a yira le k’o siya mɔgɔw tun tɛ se ka jati i ko Israɛldenw ani Israɛldenw tun be ni nɛɛma minw ye, u tun tɛ se k’u bɛɛ sɔrɔ. Nka koo jugu tun tɛ u ka jɛn ka koow kɛ ni Israɛldenw ye wala ka sigi u cɛma.—Étude perspicace des Écritures gafe fɔlɔ, ɲɛɛ 100nan lajɛ.
