N’ wolola saan 1955 ani n’ be ni kɔrɔcɛ fila ye. N’ lamɔna Fɛnlandi worodugu fan fɛ dugu dɔ la min be kɔgɔji daa la. O dugu be weele sisan ko Vanta.

N’ bamuso batizera ka kɛ Jehova Seere ye saan damanin sanni n’ ka wolo. Nka, n’ facɛ tun b’a kɛlɛ tiɲɛn diinan kosɔn ani a tun tɛ sɔn a ka bibulukalan kɛ n’an ye wala ka taga n’an ye lajɛnw na. O la, ni n’ facɛ tun bɔra le, a tun be ne ni n’ kɔrɔcɛw kalan Bibulu ka tiɲɛnkalan jɔnjɔnw na.

Kabi n’ denmisɛn tuma n’ y’a latigɛ ka mɛnni kɛ Jehova fɛ. Misali la, tuma min na n’ tun be ni saan wolonfila ye, loon dɔ n’ ka mɛtirimuso dimina n’ kɔrɔ sabu n’ banna ka Fɛnlandikaw ka gato sifa dɔ dumu min dilanna ni joli ye (verilättyjä). A ye n’ tagaw dɛrɛ n’a bolo kelen ye walisa ka n’ daa yɛlɛ ani n’a bolo tɔɔ kelen ye a tun b’a ɲinina k’o gato don n’ daa la ni furusɛti ye. N’ banbara k’o furusɛti gosi ka ben.

Tuma min na n’ tun be ni saan 12 ye, n’ facɛ sara. O kɔ, n’ tun be se ka taga lajɛnw na. Kafo balimaw ye n’ minɛ ni ɲumanya ye ani o ye n’ dɛmɛ ka ɲɛtaga kɛ Alako ta fan fɛ. N’ y’a daminɛ ka Bibulu kalan loon o loon ani ka an ka gafew sɛgɛsɛgɛ koɲuman. O y’a to n’ batizera saan 1969, utikalo tile 8, n’ saan 14.

 Dɔɔni n’ tilanin kɔ lakɔlikalan na, n’ ye piyɔniye baara daminɛ. Lɔgɔkun damanin o kɔ, n’ tagara dɛmɛ don Pilavezi dugu la yɔrɔ min na weleweledalaw man ca. O dugu be Fɛnlandi cɛmancɛ yɔrɔ gɛrɛfɛ.

N’ ye sunguru dɔ kunbɛn Pilavezi dugu la min tɔgɔ ko Sirkka. Ale lo nana kɛ n’ muso kanulen ye. A koo diyara n’ ye sabu a tun majiginin lo ani a tun be Jehova kanu kosɔbɛ. A tun tɛ boli boli bololafɛnw kɔ wala k’a ɲini ka lɔyɔrɔba sɔrɔ. An fila bɛɛ tun b’a fɛ ka baara kɛ Jehova ye bɛrɛbɛrɛ, u tun mana baara o baara kalifa an ma. N’ ye Sirkka furu saan 1974, marisikalo tile 23. Sanni an ka taga ninsɔndiya an ka kɔɲɔya kɔ, an tagara Kartula yɔrɔ min na u mako gwɛlɛ tun be weleweledalaw la.

Kabi an ka furu daminɛ na, Jehova y’a yira an na ko n’an tora k’a ka Masaya ɲini fɔlɔ, a bena a janto an na bololafɛnw ta fan fɛ (Mat. 6:33). Misali la, k’an to Kartula, mobili tun t’an fɛ. A daminɛ na, an tun be taga waajuli kɛ nɛgɛsow lo kan. Nka nɛnɛtuma na, yɔrɔ tun be suma fɔɔ jii tun be kɛ galasi ye. Kafo ka kiin tun ka bon minkɛ an mako tun be mobili la walisa ka waajuli kɛ a bɛɛ kɔnɔ. Nka see tun t’an fɛ ka mobili san.

Loon dɔ, n’ kɔrɔcɛ dɔ nana cun an kan ani a y’a ka mobili di an ma. O mobili asiransi tun sarala ka ban. O kama, an tun ka ɲi ka esansi dɔrɔn lo san k’a don a kɔnɔ. Sisan, an mako tun be mobili min na, an y’o sɔrɔ.

Jehova y’a yira ko ale ka kunkanbaara lo k’a janto an na bololafɛnw ta fan fɛ. An tun ka ɲi ka min kɛ, o ye ka a ka Masaya kɛ an ɲɛnako fɔlɔ ye.

Saan 1978, tuma min na an tun be piyɔniyew ka lakɔli kɛra, Raimo Kuokkanen a tun ye an ka kalanfa dɔ ye. Ale y’an jija ko an ka demandi dɔ dafa walisa ka taga Gilead lakɔli la. An y’a daminɛ ka angilikan degi sabu an tun b’a fɛ k’o lakɔli kɛ. Nka saan 1980, sanni an yɛrɛ k’o demandi dafa, u y’an weele ka na baara kɛ Fɛnlandi Betɛli la. O wagati la, u tun tɛ betɛlidenw weele Gilead lakɔli la. Nka Jehova tun b’a jati ko  yɔrɔ min ka fisa an ma, an tun b’a fɛ ka baara kɛ o yɔrɔ lo la. An tun t’a fɛ ka baara kɛ an yɛrɛ ɲɛnayɔrɔ la. O kama, an sɔnna ka taga Betɛli la. Nka, an tora ka angilikan degi sabu mɔgɔ tɛ koo lɔn, n’a sɔrɔ loon dɔ an tun bena sababu sɔrɔ ka taga Gilead lakɔli la.

Saan damanin o kɔ, Koow Ɲɛnabɔla Jɛnkulu ko betɛlidenw fana be se ka Gilead lakɔli kɛ. An sinna k’an ka demandiw dafa. Nka o kɔrɔ tun tɛ ko an ninsɔn tun man di Betɛli la dɛ. An ninsɔn tun ka di kosɔbɛ! Nka, an tun b’a fɛ ka fɔrɔmasɔn ɲuman sɔrɔ le walisa ka taga dɛmɛ don yɔrɔ min na weleweledalaw man ca. U y’an weele Gilead klasi 79nan na ani saan 1985 sɛtanburu la, an y’an ka diplomuw sɔrɔ. U y’an ci ka taga Kolɔnbi jamana na.

U y’an ci ka taga Kolɔnbi Betɛli la le fɔlɔ. N’ tun be n’ seko bɛɛ kɛra n’ ka Betɛli baara la. Nka saan kelen kɛnin kɔ yen, n’ y’a ye ko an mako tun b’a la ka yɛlɛmani dɔ dɛ. N’ y’a ɲini u k’an ci ka taga yɔrɔ wɛrɛ la. O lo kɛra n’ siɲɛ fɔlɔ ani a laban ye k’o ɲɔgɔn ɲini. O kɔ, u y’an ci ka taga misɔndenya baara la Neyiva dugu la, Wila mara la.

Waajuli baara ka di n’ ye yɛrɛ le! Tuma min na n’ tun ye piyɔniye ye Fɛnlandi ani n’ tun ye cɛgwana ye, tuma dɔw la n’ tun b’a daminɛ ka waajuli kɛ sɔgɔma joona fɔɔ ka taga suu ko. An furunin kura ye, ne ni Sirkka tun be tile kuru bɛɛ kɛ waajuli la. N’an tun tagara waajuli kɛ yɔrɔjanw na, tuma dɔw la an tun be si an ka mobili kɔnɔ. O tun be dɔ bɔ sira janya na ani o tun b’a to an be waajuli daminɛ joona o loon dugusagwɛ.

An tun ye ninsɔndiya min sɔrɔ waajuli baara la a daminɛ na, an kɛnin misɔndenw ye an y’o ninsɔndiya sɔrɔ kokura. An ka kafodenw cayara ani Kolɔnbi balimaw tun b’an bonya, u tun b’an kanu ani u tun b’an waleɲuman lɔn.

An tun b’an ka misɔndenya baara kɛra Neyiva dugu la. Gɛrɛfɛ dugu dɔw la, Jehova Seerew tun tɛ yen. N’ tun be jɔɔrɔla kosɔbɛ kibaro diiman tun bena se o yɔrɔw la cogo min na. Nka, sɔrɔdasi murutininw ka kɛlɛ kosɔn, mɔgɔ min tɛ dugulen ye farati tun b’a la a ka taga yen. O kama, n’ ye delili kɛ ko dugulen dɔ ka kɛ Jehova Seere ye. Ne fɛ, o tigi tun ka ɲi ka tiɲɛn lɔn k’a siginin to Neyiva dugu la. N’ ye delili kɛ fana ko a tigi batizenin kɔ, a ka kɛ kerecɛn kolɔnbaga ye ani a ka kɔsegi a wolodugu la walisa ka waajuli kɛ yen. N’ tun be min miirila, n’ tun m’a lɔn ko fɛɛrɛ ɲumanba dɔ be Jehova fɛ ka tɛmɛ o kan.

Dɔɔni o kɔ, n’ ye bibulukalan daminɛ ni kanbele dɔ ye min tɔgɔ ko Fernando González. A tun siginin lo Alzesiras dugu la ani Jehova Seerew tun tɛ dugu minw na, o dɔ lo. Fernando tun be to ka kilomɛtɛrɛ 50 ni kɔ kɛ ka na baara kɛ Neyiva dugu la. A tun b’a yɛrɛ labɛn koɲuman kalan kelen kelen bɛɛ kama ani a sinna k’a daminɛ ka na lajɛnw bɛɛ la. Lɔgɔkun min na Fernando ye bibulukalan daminɛ, a seginin a wolodugu la a ye mɔgɔw lajɛn ani a tun ye min faamu a y’o fɔ u ye. A tora k’o kɛ tuma o tuma.

 Kalo wɔɔrɔ a ka bibulukalan daminɛnin kɔ, Fernando baptizera saan 1990 zanwiyekalo la. O kɔ, a kɛra kudayi piyɔniye ye. Sisan, Betɛli tun be se ka dan na piyɔniyew ci ka taga Alzesiras dugu la sabu duguden dɔ tun kɛra Jehova Seere ye. Saan 1992 feburukalo la, kafo dɔ sigira yen.

Yala Fernando tun be waajuli kɛ a wolodugu dɔrɔn lo la wa? Ayi! A furunin kɔ, ale n’a muso yɛlɛmana San Visɛnte dɛl Kaguwan dugu la. Jehova Seere si tun tɛ yen o dugu la fana. U ye dɛmɛ don ka kafo dɔ sigi yen. Saan 2002, u ye Fernando kɛ kafokulu kɔrɔsibaga ye. Ale n’a muso Olga bele b’o baara la fɔɔ ka na se bi ma.

O koo ye n’ dɛmɛ k’a faamu ko a kɔrɔtanin lo kosɔbɛ an ka delili kɛ ka ɲɛsin koo tigitigi dɔw ma an ka cidenya baara koo la. An tɛ se ka min kɛ, Jehova be se k’o kɛ sabu ale lo ye Forotigi ye, anw tɛ.—Mat. 9:38.

Saan 1990, u ko n’ ka kɛ kɔrɔsibaga tagamakɛla ye. An ka kafokulu fɔlɔ tun ye Bogota lo ye, Kolɔnbi faaman dugu. An tun be siranna ka taga yen. Ne ni n’ muso ye mɔgɔ gwansanw ye ani an tɛ ni setigiya kɛrɛnkɛrɛnnin ye. An ma deli duguba sigi la fana. Nka layidu min be Filipikaw 2:13 kɔnɔ, Jehova y’o dafa an koo la. A fɔra yen ko: “Ala ye koɲuman min latigɛ, a be aw dɛmɛna tuma bɛɛ k’o kɛli nigɛ don aw la k’a kɛ see di aw ma.”

Kɔfɛ, u y’an ci ka taga kafokulu wɛrɛ la Medelin mara la. N’ kɔnna k’o yɔrɔ lo kofɔ aw ye a daminɛ na. O yɔrɔ la, mɔgɔw ka teli ka fariyakow ye siraw kan fɔɔ a tɛ foyi kɛ u la tugun. Loon dɔ, n’ tun be bibulukalan kɛra ni mɔgɔ dɔ ye a ka soo ani u y’a daminɛ ka marifa ci kɛnɛma. N’ tun sirannin lo fɔɔ n’ tun b’a fɛ ka la duguma. Nka Bibulu kalanden tora ka dakunw kalan i n’a fɔ foyi tɛ kɛra. A tilanin kalan na, a ye sira deli ka bɔ. Dɔɔni o kɔ, a kɔsegira ka na ni denmisɛn fila ye ani a hakili siginin y’a fɔ ko: “Hakɛ to dɛ, n’ tagara n’ deenw lo yɔrɔ ɲini.”

An kɛra farati la wagati wɛrɛw la fana. Loon dɔ an tun be waajuli kɛra soo ni soo ani n’ muso siranninba tora ka boli ka na n’ fɛ. A ko dɔ ye mugu ci ale kan. N’ siranna kosɔbɛ. Kɔfɛ, an y’a faamu ko u tun tɛ mugu cira n’ muso lo kan. Nka mɔgɔ min tun be tɛmɛna a gɛrɛfɛ, u tun b’ale lo cira.

Fariyako minw tun be kɛ siraw kan, a laban, o tun tɛ siranya bila an na ten tugun. O yɔrɔ balimaw tun be o koow ɲɔgɔn ani koo wɛrɛw muɲu minw ka jugu n’o ye. U ka koo y’an jija. An y’a faamu ko komi Jehova b’u dɛmɛna, a bena an fana dɛmɛ. O yɔrɔ diinan mɔgɔkɔrɔw tun be ladili minw di an ma, an tun b’o sira tagama, an tun b’an janto an yɛrɛ la ani ka koow tɔɔ to Jehova bolo.

Tiɲɛn lo ko koo dɔw tun man jugu i ko an tun b’a miiri cogo min na. Loon dɔ, n’ tagara bɔ mɔgɔ dɔ ye a ka soo. An tun siginin lo boon na ani a tun be komi n’ be muso fila  kaan mɛnna kɛnɛma u be ɲɔgɔn nɛnina. N’ tun t’a fɛ k’o sɔsɔli kumaw lamɛn, nka n’ barokɛɲɔgɔn ko an ka bɔ lukɛnɛ na. N’ tun be min jatira sɔsɔli ye, an bɔnin, n’ y’a ye k’o tɛ. Kɔnɔni fila (perroquets) lo tun be u gɛrɛfɛmɔgɔw ladegira.

Saan 1997, u ko n’ ka kɛ kalanfa ye Cidenyabaara degeli Lakɔli la. b A ka di n’ ye kosɔbɛ ka Ala ka Mara lakɔliw kɛ. Nka n’ tun ma deli ka miiri abada ko loon dɔ, n’ bena nɛɛma sɔrɔ ka kɛ kalanfa ye o lakɔli dɔ la.

Kɔfɛ, n’ kɛra distriki kɔrɔsibaga ye. Nka tuma min na o baara lalɔra, n’ kɔsegira kafokulu kɔrɔsili baara la. O la, saan 30 ni kɔ kɔnɔ, n’ ninsɔn diyara ka kɛ Ala ka Mara lakɔli kalanfa ani kɔrɔsibaga tagamakɛla ye. O kunkanbaaraw kɛra duga caaman sababu ye n’ fɛ. Nka u tun man nɔgɔ tuma bɛɛ. A’ y’a to n’ k’o ɲɛfɔ aw ye.

N’ tɛ koow bila ka suma. O ye n’ dɛmɛ ka see sɔrɔ gwɛlɛya caaman kan. Nka tuma dɔw la walisa ka koo dɔw ɲɛnabɔ kafo kɔnɔ, n’ tun be ja kelen kan. Loon dɔ, n’ y’a fɔ balima dɔw ye ka gwɛlɛya ko u ka ɲi k’a yira tɔɔw la ko u b’u kanu ani ka koow kɛ ka dama kɛɲɛ. A fɔ man di nka, o wagati yɛrɛ lo la n’ tun tɛ n’o jogow ye.—Ɔrɔm. 7:21-23.

N’ ka filiw kosɔn, n’ fari tun be faga kosɔbɛ tuma dɔw la (Ɔrɔm. 7:24). Loon dɔ, n’ y’a fɔ Jehova ye delili la ko a ka fisa n’ ka misɔndenya baara dabila ani ka kɔsegi Fɛnlandi. O loon sufɛ, n’ tagara kafo dɔ ka lajɛn na. N’ ye jijali minw sɔrɔ yen, o y’a to n’ lara a la ko n’ ka ɲi ka to n’ ka misɔndenya baara la ani ka to k’a ɲini ka see sɔrɔ n’ ka dafabaliyakow kan. Jehova ye n’ ka delili jaabi ka gwɛ cogo min na, halibi ni n’ miirila o la, o be kabakoya. Ka fara o kan, a ye n’ dɛmɛ ni ɲumanya ye cogo min na n’ ye see sɔrɔ n’ ka barikantanyaw kan, n’ b’a waleɲuman lɔn kosɔbɛ o kosɔn.

Ne ni Sirkka be Jehova waleɲuman lɔn kosɔbɛ sabu a y’an dɛmɛ an sera k’an ka ɲɛnamaya fanba kɛ kudayi cidenya baara la. N’ b’a waleɲuman lɔn kosɔbɛ fana sabu a ye muso kanutigi ni kantigi di n’ ma o saanw bɛɛ la.

Yanni dɔɔni, n’ bena saan 70 sɔrɔ ani n’ tɛna kɛ Ala ka Mara lakɔli kalanfa ani kafokulu kɔrɔsibaga ye tugun. Nka, o tɛ n’ fari faga. Mun na do? Sabu n’ lanin b’a la kosɔbɛ ko min be nɔɔrɔ la Jehova kan ka tɛmɛ, o ye ko an k’a bato ni majigilenya ye ani kanuya ni waleɲumanlɔn lo k’an lasun k’a tando (Mise 6:8; Mariki 12:32-34). Walisa ka nɔɔrɔ la Jehova kan, an mako t’a la ka kɛ ni kunkanbaaraba ye.

N’ ye kunkanbaara minw sɔrɔ, ni n’ miirila u la, n’ b’a faamu ko u m’o kalifa n’ ma sabu n’ tun ka fisa ni tɔɔw ye wala ko n’ tun be ni setigiya kabakoman dɔ ye. Ayi, n’ tun man kan n’o ye! Nka Jehova y’o kalifa n’ ma a ka nɛɛma lo kosɔn. N’ ka barikantanya bɛɛ n’a ta, a y’o kunkanbaaraw kalifa n’ ma. N’ b’a lɔn ko n’ sera k’u dafa Jehova ka dɛmɛ dɔrɔn lo sababu la. O cogo la, n’ ka barikantanya ye nɔɔrɔ la Ala ka setigiya kan.—2 Kor. 12:9.