1. An be se ka laɲinita jumanw lo latigɛ Alako ta fan fɛ?

 AN YE kerecɛn sɔbɛw ye minkɛ, an be Jehova kanu kosɔbɛ. An b’a fɛ k’an seko bɛɛ lo kɛ a ka baara la. Walisa k’o kɛ, an ka ɲi ka laɲinitaw latigɛ Alako ta fan fɛ. Misali la, an ka ɲi k’a ɲini ka kɛ ni kerecɛn jogow ye, ka lɔnniya nafaman dɔw sɔrɔ ani k’a ɲini ka tɔɔw dɛmɛ. *

2. Mun na an ka ɲi ka laɲinitaw latigɛ Alako ta fan fɛ ani k’an jija k’u dafa?

² Mun na an ka ɲi k’a ɲini ka ɲɛtaga kɛ Alako ta fan fɛ? A fɔlɔ, an b’a fɛ k’an sankolola Faa kanutigi dusu diya. N’an b’an ka lɔnniya n’an ka setigiya kɛ ka baara kɛ Jehova ye bɛrɛbɛrɛ, o b’a dusu diya. A filanan, an b’a fɛ k’an balimaw dɛmɛ bɛrɛbɛrɛ (1 Tes. 4:9, 10). An mɛɛnna tiɲɛn sira kan cogo o cogo, an bɛɛ be se ka ɲɛtaga kɛ Alako ta fan fɛ. An k’a filɛ an be se k’o kɛ cogo min na.

3. Ka kɛɲɛ ni 1 Timote 4:12-16 ka fɔta ye, ciden Pol ye Timote jija a ka mun lo kɛ?

³ Tuma min na ciden Pol y’a ka lɛtɛrɛ fɔlɔ sɛbɛ Timote ma, o kanbele ɲuman tun ye diinan mɔgɔkɔrɔ kolɔnbaga ye ka ban. O bɛɛ n’a ta, Pol y’a jija ko a ka to ka ɲɛtaga kɛ Alako ta fan fɛ (1 Timote 4:12-16 kalan). N’i miirila Pol ka kumaw na, i bena a kɔrɔsi ko a tun b’a fɛ Timote ka ɲɛtaga kɛ koo fila la. A tun b’a fɛ a ka kɛ ni kerecɛn jogow ye i n’a fɔ kanuya, lanaya ani senumanya. A tun b’a fɛ fana a ka se koo nunu na koɲuman: Ala ka Kuma  kalangwɛ, ka balimaw jija ani k’u kalan. An ka Timote ka koo to an hakili la ani an k’a filɛ n’an be laɲinita bɛnninw latigɛ, o be se k’an dɛmɛ cogo min na ka ɲɛtaga kɛ Alako ta fan fɛ. An be se ka dɔ fara an ka waajuli baara kan cogo minw na, an bena u dɔw lajɛ fana.

4. Ka kɛɲɛ ni Filipikaw 2:19-22 ka fɔta ye, mun lo y’a to Timote kɛra Jehova sagokɛla ye min tun be tɔɔw mako ɲɛ?

⁴ Fɛɛn min y’a to Timote kɛra Jehova sagokɛla ye min tun be tɔɔw mako ɲɛ, o ye a ka kerecɛn jogo kabakomanw lo ye (Filipikaw 2:19-22 kalan). Pol ye min fɔ Timote koo la, o b’an dɛmɛ k’a faamu ko Timote tun ye mɔgɔ majiginin, kantigi, baarakɛla ani lannamɔgɔ ye. A tun be a balimaw kanu ani a tun b’a janto u la kosɔbɛ. O lo kama, Timote koo tun ka di Pol ye ani a ma sigasiga ka kunkanbaarabaw kalifa a ma (1 Kor. 4:17). An fana k’a ɲini ka kɛ ni jogow ye minw ka di Jehova ye. O la, an koo bena diya a ye ani an bena kafodenw mako ɲɛ. —Zab. 25:9; 138:6.

5. a) I be se k’a latigɛ cogo di i b’a fɛ ka kɛ ni kerecɛn jogo min ye? b) Balima sunguru min yirala jaa kan, ale ka laɲinita ye ka makari tɔɔw la. A b’a jijara cogo di k’o laɲinita dafa?

⁵ Laɲinita tigitigi dɔ latigɛ. Delili kɛ ani miiri k’a filɛ i ka ɲi k’i ka jogo minw fisaya. Jogo tigitigi dɔ sugandi i b’a fɛ ka min fisaya. Misali la, i be se k’i jija ka makari kosɔbɛ tɔɔw la wala i be se k’a ɲini n’i dusu bɛɛ ye k’i balimaw dɛmɛ. Wala, i be se k’i jija kosɔbɛ ka kɛ hɛɛrɛkɛla ye ani ka yafa tɔɔw ma bɛrɛbɛrɛ. I be se fana ka ladiliw ɲini i teri sɔbɛ dɔ fɛ o koo la.—Talenw 27:6.

6. I be se k’i jija cogo di k’i ka jogo dɔ fisaya?

⁶ I jija k’i ka laɲinita dafa. I be se k’o kɛ cogo di? Misali la, i b’a fɛ ka i jogo min fisaya, sɛgɛsɛgɛri kɛ koɲuman o kan. Miiri k’a filɛ ko i b’a fɛ k’i jija ka yafa kosɔbɛ tɔɔw ma. Mɔgɔ dɔw kofɔra Bibulu kɔnɔ ani u yafara tɔɔw ma n’u dusu bɛɛ ye, nka dɔ wɛrɛw ma yafa. I be se k’a daminɛ k’u ka maana kalan ani ka miiri o kan. An ka Yezu ka ɲɛyirali lajɛ. A tun be yafa tɔɔw ma n’a dusu bɛɛ ye (Luka 7:47, 48). A tun tɛ sinsin u ka filiw kan. U be se min na, a tun be sinsin o lo  kan. Nka Fariziɲɛ minw tun be Yezu ka wagati la, olu tun b’u “yɛrɛ fisaya mɔgɔ tɔw ma.” (Luka 18:9, Biblu Ala ta Kuma). N’i miirila o ɲɛyiraliw la, i yɛrɛ ɲininga ko: “N’ be mun lo ye tɔɔw la? N’ b’a latigɛ ka sinsin u ka jogo jumanw lo kan?” N’a ka gwɛlɛ i ma ka yafa mɔgɔ dɔ ma, i jija k’a tigi ka jogo ɲumanw bɛɛ sɛbɛ. O kɔ, i yɛrɛ ɲininga ko: “Yezu b’o tigi jati cogo di? Yala a tun bena yafa a ma wa?” N’an y’o kɛ, an ka miiriya be se ka yɛlɛma a tigi koo la. A daminɛ na, n’a sɔrɔ an ka ɲi k’an jija kosɔbɛ walisa ka yafa mɔgɔ dɔ ma min y’an hakɛ ta. Nka n’an tora ka yɛlɛmaniw kɛ, a laban an bena se ka yafa a ma n’an dusu bɛɛ ye.

7. Ka kɛɲɛ ni Talenw 22:29 ye, Jehova be tɛmɛ baarakɛla setigiw fɛ cogo di k’a ka baara kɛ?

⁷ I be se ka laɲinita wɛrɛ min latigɛ, o ye k’a ɲini ka kɛ ni lɔnniya wala setigiya nafaman dɔ ye. Miiri k’a filɛ u mako be baarakɛla caamanba minw na walisa ka Betɛli boonw, lajɛnba kɛyɔrɔw ani Masaya Boonw lɔ. O baarakɛla caaman y’u ka lɔnniya sɔrɔ, u kɛtɔ ka baara kɛ ni balima kolɔnbagaw ye. I ko a yirala jaa kan cogo min na, balimacɛw ni balimamusow be baara dɔw degira walisa ka se ka lajɛnba kɛyɔrɔw ani Masaya Boonw ladon. O cogo la ani cogo wɛrɛw la, Jehova Ala min ye “waati bɛɛ Masa” ye ani Yezu Krista min ye “masaw ka Masa” ye, olu be tɛmɛ o baarakɛla setigiw fɛ ka koobaw kɛ (1 Tim. 1:17; 6:15; Talenw 22:29 kalan). An b’a fɛ k’an sɔbɛ don baara la ani ka tɛmɛ an ka lɔnniya fɛ ka nɔɔrɔ la Jehova kan sanni ka nɔɔrɔ la an yɛrɛ kan.—Zan 8:54.

8. I be se k’a latigɛ cogo di i b’a fɛ ka kɛ ni setigiya min ye?

⁸ Laɲinita tigitigi dɔ latigɛ. I b’a fɛ ka kɛ ni lɔnniya wala setigiya juman lo ye? I ka kafo ka diinan mɔgɔkɔrɔw ɲininga i be se k’a ɲini ka kɛ ni setigiya min ye. I be se ka kafokulu kɔrɔsibaga ɲininga o la fana. Misali la, n’u ko i k’i kumacogo ani mɔgɔw kalancogo fisaya, a ɲini u fɛ u k’i dɛmɛ k’a lɔn i be se ka kumacogo fɛɛrɛ tigitigi min fisaya. O kɔ, i jija kosɔbɛ k’o fisaya. I be se k’o kɛ cogo di do?

9. I be se ka mun lo kɛ walisa ka lɔnniya wala setigiya dɔ sɔrɔ?

⁹ I jija k’i ka laɲinita dafa. Miiri k’a filɛ ko i b’a fɛ ka kɛ kalankɛla ɲuman ye. I be se ka kitabunin nin sɛgɛsɛgɛ koɲuman: I jija kalangwɛ ni mɔgɔw kalancogo la. N’a sɔrɔ i ka ɲi ka kalan dɔ kɛ kerecɛnw ka ɲɛnamaya n’u ka waajuli baara lajɛn na. N’o lo, i be se k’a ɲini balimacɛ kolɔnbaga dɔ fɛ a ka kɔn k’i ka kalan lamɛn ani a k’a fɔ i ye i be se k’o kalan fisaya cogo min na. Kɔn k’i yɛrɛ labɛn i ka kalan kama. O la, mɔgɔw bena a ye ko i ye baarakɛla ni lannamɔgɔ ye.—Talenw 21:5; 2 Kor. 8:22.

10. Ɲɛyirali dɔ fɔ min b’a yira cogo min na an be se k’a ɲini ka kɛ ni setigiya dɔ ye.

¹⁰ Nka n’i ka laɲinita ye ka koo dɔ kɛ min ka gwɛlɛ i ma do? Kana i fari faga! Balimacɛ dɔ tɔgɔ ko Garry ani a tun ka gwɛlɛ ale ma kosɔbɛ ka kalangwɛ kɛ. A hakili b’a la ko a tun mana a ɲini ka kalangwɛ kɛ ni kaanba ye kafo ka lajɛnw na, a tun be maloya yɛrɛ le. Nka, a tora k’a jija kosɔbɛ k’a ka kalangwɛ kɛcogo fisaya. Sisan a ko ale ye fɔrɔmasɔn min sɔrɔ, o sababu la a be sera ka kalanw kɛ Masaya Boonw, kafokulu ka lajɛnbaw ani tile saba lajɛnbaw la!

11. Mun lo bena an dɛmɛ ka caaman kɛ Jehova ka baara la i ko Timote?

 ¹¹ Yala Timote kɛra kalanfa ŋana wala kalankɛla ye min ɲɔgɔn tɛ yen wa? Bibulu t’o fɔ. Nka a tora ka Pol ka ladiliw sira tagama minkɛ, a sera k’a ka kunkanbaaraw dafa koɲuman (2 Tim. 3:10). Lɔnniya wala setigiya minw b’an fɛ, n’an fana tora k’o fisaya, an bena se ka caaman kɛ Jehova ka baara la.

12. Tɔɔw ye i dɛmɛ cogo di?

¹² Tɔɔw be koo caaman kɛ k’an dɛmɛ. N’an be dɔgɔtɔrɔso, an dusu ka di ni diinan mɔgɔkɔrɔw be na bɔ an ye. O be se ka kɛ CLH balimaw wala minw be taga bɔ balima banabagatɔw ye dɔgɔtɔrɔso (GVM). Ni gwɛlɛya dɔ b’an kan, an dusu ka di ni diinan mɔgɔkɔrɔ kanutigi dɔ be wagati ta k’an lamɛn ani k’an dusu saalo. N’a sɔrɔ an mako b’a la ka Bibulu kalanden dɔ dɛmɛ. An dusu ka di ni piyɔniye kolɔnbaga dɔ y’an bila sira o bibulukalan na ani ka ladiliw di an ma. O balimaw bɛɛ dusu ka di k’an dɛmɛ. An fana be se k’o ninsɔndiya ɲɔgɔn sɔrɔ n’an b’an yɛrɛ labila k’an balimaw dɛmɛ. Yezu y’a fɔ ko: “Nisɔndiya be mɔgɔ sɔnni na ka tɛmɛ sɔrɔli kan.” (Kɛw. 20:35). N’i b’a fɛ ka caaman kɛ Jehova ka baara la o cogo la wala cogo wɛrɛw la, mun lo bena i dɛmɛ k’i ka laɲinitaw dafa?

13. N’an be laɲinita dɔ latigɛra an yɛrɛ ye, an ka ɲi ka mun lo to an hakili la?

¹³ Kana laɲinita latigɛ i yɛrɛ ye min gwɛnin tɛ. Misali la, n’a sɔrɔ i y’a latigɛ ka caaman kɛ kafo kɔnɔ. Nka, a be se ka gwɛlɛya i ma k’a lɔn i be se k’o dafa cogo min na. N’a sɔrɔ i tɛna se k’a lɔn fana tuma min na i sera k’o dafa. O kama, laɲinita tigitigi dɔ latigɛ i yɛrɛ ye min gwɛnin lo. I yɛrɛ be se k’o laɲinita sɛbɛ ani i b’a fɛ k’a dafa cogo min na.

14. N’an be laɲinitaw latigɛra, mun na an ka ɲi ka koow kɛ ka dama kɛɲɛ?

¹⁴ An ka ɲi ka koow kɛ ka dama kɛɲɛ fana n’an be laɲinitaw latigɛra. Mun na do? Sabu an ka koow cogoya be se ka yɛlɛma. An ka misali dɔ lajɛ: Ciden Pol ye dɛmɛ don ka kafo kura dɔ juu sigi Tesaloniki dugu la. N’a sɔrɔ a ka laɲinita tun ye ka to yen walisa k’o  kerecɛn kuraw dɛmɛ. Nka, a kɛlɛbagaw y’a waajibiya ka dugu bila (Kɛw. 17:1-5, 10). Ni Pol tun tora Tesaloniki, a tun bena a balimaw niin bila farati la. Nka, a m’a fari faga. Koow yɛlɛmana minkɛ, a ye koow kɛ ka kɛɲɛ n’o ye. Kɔfɛ, a ye Timote ci ka taga Tesaloniki balima kuraw ka limaniya sabati (1 Tes. 3:1-3). Siga t’a la, Tesalonikaw ninsɔn diyara kosɔbɛ sabu Timote labɛnnin tun lo ka taga yɔrɔ o yɔrɔ balimaw mako be a ka dɛmɛ na.

15. N’an ka koow cogoya yɛlɛmana, an ka laɲinitaw be se ka yɛlɛma cogo di?

¹⁵ Koo min ye Pol sɔrɔ Tesaloniki, an be se ka kalan sɔrɔ o la. An be se ka laɲinita dɔ latigɛ, nka n’an ka koow cogoya yɛlɛmana, o be se k’an bali k’o laɲinita dafa (Waaj. 9:11). N’o koo ɲɔgɔn y’i sɔrɔ, sɔn ka laɲinita wɛrɛ latigɛ i be se ka min dafa. Balimacɛ Ted n’a muso Hiedi y’o lo kɛ. Kɛnɛyakow kosɔn, u ye Betɛli baara dabila. Nka, u be Jehova kanu minkɛ, o y’u lasun ka fɛɛrɛ wɛrɛw ɲini walisa ka dɔ fara u ka cidenya baara kan. A daminɛ na, u kɛra kudayi piyɔniyew ye. Kɔfɛ, u kɛra dan na piyɔniyew ye ani Ted ye fɔrɔmasɔn sɔrɔ ka kɛ kafokulu kɔrɔsibaga kankɔrɔsigi ye. O kɔ, a latigɛra ko ni mɔgɔ sera sii hakɛ dɔ ma, a tɛ se ka kɛ kafokulu kɔrɔsibaga ye tugun. Ted ni Hiedi y’a faamu ko u tɛ se k’o nɛɛma baara sɔrɔ tugun. Hali n’u dusu tun tiɲɛna, u tun b’a lɔn ko u be se ka Jehova sago kɛ cogo wɛrɛw la. Ted ko: “O y’an dɛmɛ k’a faamu ko an man ɲi k’an ɲɛɛ lɔnin to nɛɛma baara kelen kan.”

16. Galatikaw 6:4 b’an dɛmɛ ka mun lo faamu?

¹⁶ Koo minw be kɛra an ka ɲɛnamaya kɔnɔ, see t’an ye u bɛɛ kan. O kama, a kɔrɔtanin lo an kana a miiri ko an ka kunkanbaaraw lo b’a to nafa be kɛ an na Jehova ɲɛɛ kɔrɔ. Ni kunkanbaaraw kalifara dɔw ma, an man ɲi k’an yɛrɛ suma n’u ye. Hiedi ko: “N’i b’i ka ɲɛnamaya suma ni tɔɔw ta ye, o be i ka ninsɔndiya nagasi.” (Galatikaw 6:4 kalan). A kɔrɔtanin lo an ka fɛɛrɛw ɲini ka tɔɔw dɛmɛ ani ka Jehova sago kɛ. *

17. I be se ka mun lo kɛ walisa nɛɛma baaraw ka kalifa i ma?

¹⁷ I bena se ka caaman kɛ Jehova ka baara la, n’i be i ka ɲɛnamaya kɛ cogo nɔgɔman na ani n’i tɛ juru ta ni waajibiko tɛ. Laɲinita denninw latigɛ i yɛrɛ ye  minw bena i dɛmɛ k’i ka laɲinitabaw dafa. Misali la, n’i ka laɲinita jɔnjɔn ye ka kɛ kudayi piyɔniye ye, yala i be se ka kɛ piyɔniye kɔrɔsigi ye kalo o kalo kabi sisan wa? N’a sɔrɔ i ka laɲinita ye ka kɛ kɔrɔsigi ciden ye. N’o lo, i be se k’a ɲini ka wagati caaman kɛ waajuli baara la ani ka to ka taga bɔ i ka kafodenw ye minw man kɛnɛ ani minw kɔrɔla. I be fɔrɔmasɔn min sɔrɔla sisan, o be se k’a to i be nɛɛma baara wɛrɛw sɔrɔ loon nataw la. O la, baara o baara mana kalifa i ma, i seko bɛɛ kɛ o baara la.—Ɔrɔm. 12:11.

18. I be kalan juman lo sɔrɔ Beverley ka koo la? (Jaa lajɛn fana).

¹⁸ Hali n’an kɔrɔla cogo o cogo, an be se ka laɲinitaw latigɛ an yɛrɛ ye ani k’u dafa. An ka balimamuso dɔ ka koo lajɛ min tɔgɔ ko Beverley ani a be ni saan 75 ye. Banajugu dɔ b’a la min b’a to tagama ka gwɛlɛ a ma. Nka, a tun b’a fɛ k’a seen don bɛrɛbɛrɛ Hakilijigi lajɛn ka kanpaɲi na. O kama, a ye laɲinita tigitigi dɔw latigɛ a yɛrɛ ye. Tuma min na a y’a ka laɲinitaw dafa, a ninsɔn diyara kosɔbɛ. A ye jijali minw kɛ, o ye tɔɔw jija ka baaraba kɛ waajuli la. An balima mɔgɔkɔrɔbaw ka koow cogoya kosɔn, u tɛ se ka caaman kɛ Jehova ka baara la. Nka, u be sera ka min kɛ, o ka di Jehova ye kosɔbɛ.—Zab. 71:17, 18.

19. An be se ka laɲinita minw latigɛ Alako ta fan fɛ, u dɔw kofɔ.

¹⁹ Laɲinitaw latigɛ i be se ka minw dafa. A ɲini ka kɛ ni jogow ye minw bena a to i koo be diya Jehova ye. A ɲini ka lɔnniya wala setigiya dɔw sɔrɔ minw bena i dɛmɛ ka baara kɛ bɛrɛbɛrɛ Jehova n’a ka ɔriganisasiyɔn ye. Fɛɛrɛw ɲini k’i balimaw dɛmɛ bɛrɛbɛrɛ. * I ko Timote, Jehova ka dɛmɛ barika la, “mɔgɔw bɛɛ ben’a ye ko i jijanin lo.”—1 Tim. 4:15.