1. Mun lo b’an ninsɔn diya kosɔbɛ?

 JEHOVA b’a fɛ an ka ninsɔndiya sɔrɔ. An b’o lɔn sabu ninsɔndiya ye a ka hakili senu deen faan dɔ lo ye (Gal. 5:22). Ninsɔndiya be mɔgɔ sɔnni na ka tɛmɛ sɔrɔli kan. O kama, n’an b’an seen don bɛrɛbɛrɛ waajuli baara la ani n’an b’an balimaw dɛmɛ cogo caaman na, o b’an ninsɔn diya kosɔbɛ.—Kɛw. 20:35.

2-3. a) Ka kɛɲɛ ni Galatikaw 6:4 ye, koo fila jumanw lo bena an dɛmɛ an ninsɔndiyanin be to Jehova ka baara la? b) An bena mun lo lajɛ barokun nin na?

² Ciden Pol ye koo fila kofɔ Galatikaw 6:4 kɔnɔ, minw bena an dɛmɛ an ninsɔndiyanin be to. (A kalan.) A fɔlɔ, an ka ɲi k’an seko bɛɛ la fisaman lo kɛ Jehova ka baara la. N’an b’o lo kɛra, an ka ɲi ka ninsɔn diya (Mat. 22:36-38). A filanan, an man ɲi k’an yɛrɛ suma ni tɔɔw ye. An ka kɛnɛyako, an ka fɔrɔmasɔn wala an ka setigiya b’a tora an be sera ka min o min kɛ, an ka ɲi ka Jehova waleɲuman lɔn o kosɔn. Fɛɛn o fɛɛn b’an fɛ, ale lo y’o di an ma. Faan wɛrɛ fɛ, ni dɔw be se cidenya baara faan dɔ la ka tɛmɛ an kan, an ka ɲi ka ninsɔn diya sabu u be u ka setigiya kɛra ka Jehova tando. U t’o kɛra k’u yɛrɛ yira wala k’u yɛrɛ dɔrɔn nafa ɲini. O kama, sanni an ka sanga n’u ye, an ka ɲi k’u ladegi le.

³ Barokun nin na, an bena a ye fɛɛn min be se k’an dɛmɛ n’an fari fagara sabu an tɛ sera ka caaman kɛ Jehova ka baara i ko an b’a fɛ cogo min na. An bena a ye fana an be se ka baara fisaman min kɛ n’an ka setigiya ye ani an be se ka kalan min sɔrɔ tɔɔw fɛ.

4. Mun lo be se k’a to mɔgɔ fari be faga? Ɲɛyirali dɔ fɔ.

⁴ An dɔw tɛ sera ka caaman kɛ Jehova ka baara la kɔrɔya wala kɛnɛyako kosɔn ani o b’an fari faga. O koo ɲɔgɔn lo ye Carol sɔrɔ. Wagati dɔ la, a ye nɛɛma sɔrɔ ka taga dɛmɛ don yɔrɔ min na waajulikɛlaw man ca. O wagati la, a tun be bibulukalan kɛ ni mɔgɔ 35 ye ani a ye u caaman dɛmɛ u ye u yɛrɛ kuun di Jehova ma ani ka batize. A tun be nafa caaman sɔrɔla a ka waajuli baara la! O kɔ, a banana ani a tun ka ɲi ka to a ka soo wagati fanba la. A ko: “N’ b’a lɔn ko n’ ka kɛnɛyako kosɔn, n’ tɛ se ka koow kɛ i ko tɔɔw. O bɛɛ n’a ta, n’ b’a jati ko n’ tɛ kerecɛn ɲuman ye i ko olu. N’ b’a fɛ ka min kɛ, n’ tɛ se k’o bɛɛ kɛ ani o be n’ fari faga.” Carol b’a fɛ k’a seko bɛɛ kɛ Jehova ka baara la. O ye koo ɲuman yɛrɛ lo ye! An lanin b’a la ko an ka Ala min be makari, ale dusu ka di kosɔbɛ Carol kɔrɔ sabu a b’a seko bɛɛ lo kɛra.

5. a) N’an fari fagara sabu an tɛ sera ka koo dɔw kɛ, an ka ɲi ka mun lo to an hakili la? b) Balimacɛ min yirala jaaw kan, ale tora k’a seko bɛɛ kɛ Jehova ka baara la cogo di?

⁵ N’i fari be faga tuma dɔw la sabu i tɛ sera ka koo dɔw kɛ, i yɛrɛ ɲininga ko: “Jehova be mun lo ɲini n’ fɛ?” A b’a fɛ i k’i seko bɛɛ lo kɛ ale ye ka kɛɲɛ n’i ka koow cogoya ye. Miiri nin na: Balimamuso dɔ be ni saan 80 ye. A fari fagara sabu a tɛ sera ka caaman kɛ waajuli la i ko tuma min na a tun be ni saan 40 ye. A b’a miiri ko hali n’a b’a seko bɛɛ lo kɛra, a ka baara tɛ Jehova dusu diya. Nka yala tiɲɛn lo wa? O balimamuso tun b’a seko bɛɛ lo kɛra tuma min na a tun be ni saan 40 ye. Sisan, a be ni saan 80 ye ani a b’a seko bɛɛ lo kɛra fana. O kɔrɔ ko a tora k’a seko bɛɛ lo kɛ tuma bɛɛ. An be baara min kɛra Jehova ye, n’an y’a daminɛ k’a miiri k’o tɛ bɔri kɛ ani k’o tɛ Jehova dusu diya, an ka ɲi ka mun lo kɛ? An k’a to an hakili la ko Jehova yɛrɛ lo b’a latigɛ min be bɔri kɛ ani min b’a dusu diya. N’an b’an seko bɛɛ kɛ Jehova ka baara la, siga t’a la a bena a fɔ an ye ko: “A ɲana.”—Matiyo 25:20-23 lajɛ.

6. An be kalan juman lo sɔrɔ Maria ka koo la?

⁶ An tɛ sera ka min kɛ sanni an ka sinsin o kan, an be sera ka min kɛ, an ka sinsin o lo kan. O la, a tɛna gwɛlɛya an ma ka ninsɔndiya sɔrɔ. An ka balimamuso dɔ ka koo lajɛ min tɔgɔ ko Maria. Bana dɔ b’a la min b’a to a tɛ se ka caaman kɛ waajuli la. A daminɛ na, o tun b’a dusu kasi kosɔbɛ ani a tun b’a jati ko nafa foyi t’ale la. O kɔ, a miirila a ka kafo balimamuso dɔ koo la min tɛ se ka wuli ka bɔ a ka dilan kan kɛnɛyakow kosɔn. Maria y’a latigɛ k’a dɛmɛ. A ko: “N’ ye labɛn kɛ walisa ka waajuli kɛ n’a ye telefɔni ani lɛtɛrɛ sababu fɛ. An tun mana waajuli kɛ ɲɔgɔn fɛ, n’ ninsɔndiyanin ani n’ wasanin lo tun be kɔsegi soo sabu n’ sera ka n’ balimamuso dɛmɛ.” An fana be sera ka min kɛ, n’an be sinsin o lo kan, an bena dɔ fara an ka ninsɔndiya kan. Nka, n’an be se ka caaman kɛ Jehova ye wala n’an be ni setigiya kabakoman ye walisa ka koo dɔw kɛ do?

7. Ciden Piyɛri ye ladili nafaman juman lo di kerecɛnw ma?

⁷ Ciden Piyɛri ka bataki fɔlɔ kɔnɔ, a ye a balimaw ladi ko u be ni setigiya o setigiya ye, u ka baara kɛ n’o ye walisa  k’u kerecɛnɲɔgɔnw jija. A y’a sɛbɛ ko: “Aw kelen kelen bɛɛ ye seko min sɔrɔ Ala fɛ, . . . aw k’o kɛ ka tɔw mako ɲa. O la, aw bena baaraɲuman kɛ ni Ala ka nɛɛma ye.” (1 Piyɛri 4:10). An ka ɲi ka baara kɛ n’an ka setigiya ye bɛrɛbɛrɛ. An man ɲi ka siran k’o bena ɲangoya bila dɔw la wala k’u fari faga. N’o tɛ, an tɛna an seko fisaman kɛ Jehova ka baara la.

8. Ka kɛɲɛ ni 1 Korɛntikaw 4:6, 7 ye, mun na an man ɲi ka waso an ka setigiya kosɔn?

⁸ An ka ɲi ka baara kɛ n’an ka setigiya ye bɛrɛbɛrɛ. Nka, an ka ɲi k’an janto walisa an kana waso o kosɔn (1 Korɛntikaw 4:6, 7 kalan). Misali la, n’a sɔrɔ a ka nɔgɔ i ma kosɔbɛ ka bibulukalan daminɛ ni mɔgɔw ye. N’o lo, baara kɛ n’o setigiya ye. Nka i janto i kana waso o kosɔn. Miiri k’a filɛ ko i ye baro diiman kɛ ni mɔgɔ dɔ ye waajuli la ani i ye bibulukalan daminɛ n’a ye. I kɔrɔtɔnin lo ka na o lakali i ka waajuli jɛnkulu mɔgɔw ye. Nka i sera tuma min na, i y’a ye ko balimamuso dɔ b’a fɔra u ye ko ale ye zurunali di mɔgɔ dɔ ma. Ale ye zurunali di ani ele ye bibulukalan daminɛ. I bena mun lo kɛ do? I b’a lɔn ko i ka wale bena jɛnkulu mɔgɔw jija. Nka, i be se k’o lakali wagati wɛrɛ la. O la, balimamuso min ye zurunali di mɔgɔ ma, i tɛna ale ka ninsɔndiya nagasi. A ka ɲi i ka koow kɛ o cogo la. Nka, i man ɲi k’a dabila abada ka bibulukalan kofɔ mɔgɔw ye. I be ni setigiya min ye, to ka baara kɛ n’o ye!

9. An ka ɲi ka baara kɛ n’an ka setigiya ye cogo di?

⁹ An k’a to an hakili la ko an be ni setigiya o setigiya ye, Ala lo y’o di an ma. An ka ɲi ka baara kɛ n’o setigiya ye ka kafo sabati le, an man ɲi ka tɔgɔ ɲini n’a ye (Filip. 2:3). N’an be baara kɛ n’an fanga n’an ka setigiya ye ka Ala sago kɛ, an bena sababu sɔrɔ ka ninsɔn diya. An tɛna ninsɔn diya sabu an be caaman kɛra ka tɛmɛ tɔɔw kan wala ko an ka fisa n’u ye. Nka, an bena ninsɔn diya sabu Jehova ye setigiya min di an ma, an be baara kɛra n’o ye k’a tando.

10. Mun na a bɛnnin tɛ an k’an yɛrɛ suma ni tɔɔw ye?

¹⁰ N’an m’an yɛrɛ kɔrɔsi, an ka teli k’a daminɛ k’an ka setigiya suma ni mɔgɔ wɛrɛ dɛsɛyɔrɔ ye. Misali la, n’a sɔrɔ balimacɛ dɔ be se forobakalanw dicogo la koɲuman. O y’a ka setigiya ye. A be se k’a miiri ko ale ka fisa ni balimacɛ wɛrɛ  ye min tɛ se forobakalanw dicogo la ka ɲɛ. Nka min tɛ se forobakalanw dicogo la koɲuman, n’a sɔrɔ a be lonanw ladon ka ɲɛ, a be fɔrɔmasɔn ɲuman di a deenw ma wala a kisɛyanin lo waajuli la. An ka setigiyaw tɛ kelen ye. Ninsɔndiya lo k’a ye ko Jehova ye setigiya min di an ma, an bɛɛ be baara kɛra n’o ye k’a sago kɛ ani k’an balimaw dɛmɛ!

11. Mun na an ka ɲi k’an jija ka Yezu ladegi?

¹¹ Tiɲɛn lo ko an man ɲi k’an yɛrɛ suma ni tɔɔw ye. Nka n’an b’a ɲini ka kalan sɔrɔ Jehova sagokɛla kantigiw fɛ, o be se k’an nafa. Misali la, an be se ka kalan sɔrɔ Yezu fɛ. Hali n’an tɛ mɔgɔ dafaninw ye i ko Yezu, an be se k’a ka jogo ɲumanw n’a ka kɛwale ɲumanw ladegi (1 Piyɛri 2:21). N’an b’an seko bɛɛ kɛ ka Yezu ladegi koɲuman, an bena kɛ Jehova sagokɛla ɲumanw ye ani an bena se waajuli kɛcogo la koɲuman.

12-13. An be kalan juman lo sɔrɔ masacɛ Dawuda fɛ?

¹² Bibulu be kuma cɛɛw ni muso kantigi caaman koo la, an be se ka minw ladegi u ka dafabaliya bɛɛ n’a ta (Eburuw 6:12). An ka miiri masacɛ Dawuda koo la. Jehova ko a ‘koo diyara ale ye.’ Bibulu bayɛlɛmani wɛrɛ kɔnɔ, a fɔra ko Dawuda ye Ala “diyanyamɔgɔ” ye (Kɛw. 13:22). Nka Dawuda tun tɛ mɔgɔ dafanin ye. A yɛrɛ ye jurumuba dɔw kɛ. O bɛɛ n’a ta, a ye ɲɛyirali ɲuman ye an fɛ. Mun na do? Sabu tuma min na Ala y’a kolo, a ma joo di a yɛrɛ ma. Nka, a ye ladili barikaman min sɔrɔ, a sɔnna o ma ani a nimisara sɔbɛ la. O kama, Jehova yafara a ma.—Zab. 51:5, 6, 12-14.

¹³ An be se ka kalan sɔrɔ Dawuda fɛ n’an b’an yɛrɛ ɲininga ko: “N’ be ladiliw ta cogo di? N’ be sin ka sɔn n’ ka filiw ma wala n’ b’a ɲini ka joo di n’ yɛrɛ ma? N’ ka teli ka tɔɔw jalaki wa? Yala n’ be n’ jija kosɔbɛ walisa n’ kana n’ ka fili ɲɔgɔn kɛ wa?” I be se ka i yɛrɛ ɲininga o la n’i be Bibulu ka maanaw kalanna cɛɛw ni muso kantigi wɛrɛw koo la. I ka gwɛlɛya ɲɔgɔn tun b’u kan wa? U y’a yira ko u be ni jogo ɲuman jumanw lo ye? O maana kelen kelen bɛɛ kalantɔ, i yɛrɛ ɲininga ko: “N’ be se ka o sagokɛla kantigi ladegi ka ɲɛ cogo di?”

14. N’an be miiri an kerecɛnɲɔgɔnw ka ɲɛyirali koo la, o be se k’an nafa cogo di?

¹⁴ An kerecɛnɲɔgɔnw mana kɛ denmisɛnw wala mɔgɔkɔrɔbaw ye, n’an  be miiri u ka ɲɛyirali la, o bena an nafa. Miiri i ka kafoden dɔ la min be muɲuli kɛra kantigiya la. N’a sɔrɔ a filankuruw wala a somɔgɔw b’a kɛlɛla, wala a man kɛnɛ. I b’a jati k’o kafoden be ni jogo ɲumanw ye i b’a fɛ ka kɛ ni minw ye wa? N’i be miiri a ka ɲɛyirali ɲuman na, i bena kalan nafamanw sɔrɔ minw bena i dɛmɛ k’i ka gwɛlɛyaw muɲu. An ninsɔn ka di kosɔbɛ k’a ye k’o balimaw ye ɲɛyirali ɲumanw ye an fɛ limaniya koo la!—Eburuw 13:7; Zaki 1:2, 3.

15. Ciden Pol ye ladili juman lo di min be se k’an dɛmɛ an ka to ka ninsɔn diya Jehova ka baara la?

¹⁵ Walisa ka hɛɛrɛ ni kelenya sabati kafo kɔnɔ, an kelen kelen bɛɛ ka ɲi k’an seko fisaman lo kɛ. An ka kerecɛn fɔlɔw ka koo lajɛ. U tun tɛ ni setigiya kelen ye ani baara min tun kalifara u ma, o tun tɛ kelen ye (1 Kor. 12:4, 7-11). Nka u ma sanga ni ɲɔgɔn ye wala ka ɲɔgɔn kɛlɛ o kosɔn. Pol y’u kelen kelen bɛɛ jija ko u k’u seko bɛɛ kɛ “janko Krista farisogo ka barika sɔrɔ.” Pol ye bataki min ci Efɛzi balimaw ma, a y’a fɔ yen ko ni farisogo yɔrɔw bɛɛ be baara kɛ ka ɲɛ, “farisogo bɛɛ lajɛnnin be boɲa ka barika sɔrɔ kanuya la.” (Efɛz. 4:1-3, 11, 12, 16). Minw ye Pol ka ladili sira tagama, olu ye hɛɛrɛ ni kelenya sabati u ni ɲɔgɔn cɛ. An b’o ɲɔgɔn lo kɔrɔsi an ka kafow kɔnɔ bi.

16. An ka ɲi k’an jija ka mun lo kɛ? (Eburuw 6:10).

¹⁶ An k’an jija an kana to k’an yɛrɛ suma ni tɔɔw ye. Nka, an ka kalan sɔrɔ Yezu fɛ ani an k’an jija k’a jogow ladegi. Mɔgɔ limaniyanin minw kofɔra Bibulu kɔnɔ ani minw be yen an ka wagati la, an k’a ɲini ka kalan sɔrɔ olu fana fɛ. N’an tora k’an seko fisaman kɛ Jehova ka baara la, an ka la a la ko, “a tena ɲinɛ o si kɔ” sabu a tɛ tilenbali ye (Eburuw 6:10 kalan). An ka to ka ninsɔn diya Jehova ka baara la sabu a dusu ka di an kɔrɔ n’a y’a ye ko an b’an seko fisaman lo kɛra a ka baara.