O koo ɲɔgɔn na, komi cɛman ye muso wɛrɛ furu, kafodenw b’a jati ko daan sigira a ka furu kɔrɔ la ani ko a ka furu kura lo be sen kan. Walisa k’a faamu fɛɛn min kama an b’o fɔ, an k’a filɛ Yezu ye min fɔ mɔgɔ dɔ koo la min y’a muso furu sa ani ka muso wɛrɛ furu.

Matiyo 19:9 kɔnɔ, Yezu y’a yira koo kelenpe min kama mɔgɔ be se k’a ka furu sa ani ka segi ka furu tugun. A ko: “Mɔgɔ o mɔgɔ y’a ka muso furu sa, ni ɲamɔgɔya sababu tɛ, ka dɔ wɛrɛ ta, o tigi ye kakalaya kɛ.” Yezu ka kumaw b’an dɛmɛ k’a faamu ko 1) Bibulu kɔnɔ, koo kelenpe min kama mɔgɔ be se k’a ka furu sa, o ye ɲamɔgɔya lo ye. 2) Ni cɛɛ dɔ y’a muso furu sa ni ɲamɔgɔya sababu tɛ ani ka muso wɛrɛ furu, o cɛɛ ye kakalaya kɛ. *

Yala Yezu ka kumaw kɔrɔ ko cɛɛ min ye kakalaya kɛ ani k’a muso furu sa, Bibulu be sira di a ma a ka muso wɛrɛ furu wa? Ayi, a ka kuma kɔrɔ t’o ye! Ni furucɛ dɔ ye kakalaya kɛ, a furumuso jalakibali lo b’a latigɛ n’a bena yafa a ma wala n’a tɛna yafa a ma. N’a banna ka yafa ani u y’u ka furusa sɛbɛ sɔrɔ faamanw fɛ, u fila bɛɛ be se ka furu mɔgɔ wɛrɛ ma.

Faan wɛrɛ fɛ, n’a sɔrɔ furuɲɔgɔn jalakibali b’a fɛ sɔbɛ la k’u ka furu latanga. O la, a b’a yira ko a b’a fɛ ka yafa a cɛɛ ma. Nka cɛɛ min ye kakalaya kɛ, n’ale banna a muso ka yafali ma ani a ye furusasɛbɛ sɔrɔ faamanw fɛ do? Musoman labɛnnin lo ka yafa a cɛɛ ma ani ka to furu kɔnɔ minkɛ, ka kɛɲɛ ni Bibulu ka fɔta ye a daganin tɛ cɛman ka muso wɛrɛ furu. N’a ye tulogwɛlɛya kɛ ani ka muso wɛrɛ furu, a ye kakalaya lo kɛ tugun. O kama, kafo ka diinan mɔgɔkɔrɔw ka ɲi ka kiti wɛrɛ tigɛ a kan.—1 Kor. 5:1, 2; 6:9, 10.

Ni cɛɛ ye muso wɛrɛ furu k’a sɔrɔ o daganin tɛ ni Bibulu ka fɔta ye, kafodenw be a ka furu kɔrɔ ni furu kura jati cogo di? Ka kɛɲɛ ni Bibulu ka fɔta ye, yala a ka furu kɔrɔ bele be sen kan wa? Yala furuɲɔgɔn jalakibali bele be se k’a latigɛ ka yafa a cɛɛ ma wala ka ban ka yafa a ma wa? Yala furu kura ka ɲi ka jati kakalaya furu ye wa?

Fɔlɔ la, kafo tun be o furu kura jati kakalaya furu ye, n’a y’a sɔrɔ ko furuɲɔgɔn jalakibali be sii la, a ma furu mɔgɔ wɛrɛ ma ani a ma ɲamɔgɔya kɛ. Nka, tuma min na Yezu tun be kumana cɛɛ dɔ koo la min y’a muso furu sa ani ka muso wɛrɛ furu, a tun tɛ kumana o cɛɛ furuɲɔgɔn jalakibali lo koo la. A y’a ɲɛfɔ le ko ni cɛɛ dɔ y’a muso furu sa k’a sɔrɔ Bibulu ka fɔta la o daganin tɛ ani a ye muso wɛrɛ furu, o tigi ye kakalaya lo kɛ. O koo ɲɔgɔn na, Yezu be o furusa ni o furu  kura jati kakalaya ye ani u be daan sigi furu kɔrɔ la.

Ni cɛɛ dɔ ye a muso furu sa ani ka muso wɛrɛ furu, a muso jalakibali tɛ se ka yafa a ma tugun wala ka ban ka yafa. Kuun t’a la muso k’a yɛrɛ sɛgɛn k’a ɲini k’a lɔn n’a bena yafa wala n’a tɛna yafa. Ka fara o kan, furuɲɔgɔn jalakibali be sii la wala a sara wo, a furula mɔgɔ wɛrɛ ma wala a ma furu wo, a ye kakalaya kɛ wala a m’o kɛ wo, kafodenw b’o furu jati cogo min na, o tɛ yɛlɛma. *

An ye ɲɛyirali min lajɛ dakun tɛmɛninw na, cɛman ye kakalaya kɛ ani o y’a to u ka furu sara. Nka ni cɛɛ ma kakalaya kɛ, nka a ye u ka furu sa faamanw fɛ ani ka muso wɛrɛ furu do? Wala ni cɛɛ ye kakalaya kɛ u ka furu sanin kɔ le ani ka muso wɛrɛ furu k’a sɔrɔ a muso tun sɔnna ka yafa a ma do? O ɲɛyiraliw bɛɛ la, cɛman kɛtɔ k’u ka furu sa ani ka muso wɛrɛ furu, a ye kakalaya lo kɛ. O be daan sigi furu kɔrɔ la. Sariya sira fɛ, furu kura lo be sen kan. O ɲɛfɔra saan 1980, feburukalo tile 15nan ka Kɔrɔsili Sangaso ɲɛɛ 31 ani 32nan na faransɛkan na ko: “Sisan a ye furu kura siri ani a tɛ se ka daan sigi o la ten dɔrɔn ani ka segi a muso kɔrɔ ma. Furusa, kakalaya ani furu kura ye daan sigi furu kɔrɔ la.”

O faamuyali kura kɔrɔ tɛ ko kerecɛnw tɛ furu jati fɛɛn senuman ye tugun ani ko kakalaya tɛ jurumuba ye. Ni cɛɛ dɔ ye a muso furu sa k’a sɔrɔ Bibulu ka fɔta la o daganin tɛ ani a ye muso wɛrɛ furu do? Diinan mɔgɔkɔrɔw bena kiti tigɛ a kan ko a ye kakalaya kɛ (ni a furumuso kura fana ye Jehova batobaga ye, kiti bena tigɛ ale fana kan ko a ye kakalaya kɛ). Hali n’o furu tɛ jati kakalaya furu ye, nɛɛma baara kɛrɛnkɛrɛnninw tɛna kalifa o cɛɛ ma yanni saan caaman cɛ. Nɛɛma baara bena se ka kalifa a ma ni mɔgɔw dusu tiɲɛnin tɛ a kɔrɔ tugun o koo jugu kosɔn wala n’u t’a jati tugun ko a man kan ni bonya ye. Misali la, o balimacɛ y’a muso kɔrɔ min janfa ani a tagara ka denmisɛn minw to yen, diinan mɔgɔkɔrɔw ka ɲi k’u janto olu ka koow cogoya n’u dusukunnakow la. U ka ɲi k’o kɛ fɔlɔ ka sɔrɔ k’a filɛ n’u be se ka nɛɛma baara dɔ kalifa o balimacɛ ma.—Mal. 2:14-16.

Ni kerecɛn y’a ɲɛɛ tugu Bibulu ka fɔta kan k’a ka furu sa ani ka mɔgɔ wɛrɛ furu, o nɔfɛkow ka jugu. O kama, hakilitigiyako lo kerecɛnw ka Jehova ladegi ani u ka furu jati koo senuman ye.—Waaj. 5:4, 5; Eburuw 13:4.