1. Mun na an be se k’a fɔ ko Ibrayima ka jigiya ma kɛ fuu ye?

 JEHOVA y’a daa di a tericɛ Ibrayima ma ko dugukolo kan siyaw bɛɛ bena duga sɔrɔ a kɔmɔgɔ barika la (Zɛnɛzi 15:5; 22:18). Ibrayima tun limaniyanin lo kosɔbɛ Ala la minkɛ, a tun lanin b’a la ko Ala ka layidu bena dafa, siga t’o la. Nka tuma min na Ibrayima tun be ni saan 100 ye ani a muso tun be ni saan 90 ye, deen bele tun tɛ o furuɲɔgɔn kantigiw fɛ (Zɛnɛzi 21:1-7). O bɛɛ n’a ta, Bibulu b’a fɔ ko: “Mɔgɔ tun te se k’a jigi la fɛɛn min kan, [Ibrayima] y’a jigi la o kan. O la, a kɛra siya caaman faa ye, ka kɛɲɛ ni Ala ka fɔta ye.” (Ɔrɔm. 4:18). An b’a lɔn ko Ibrayima jigi tun be min kan, o dafara. A kɛra Isiyaka faa ye, a jigi tun b’a la ka deen min sɔrɔ kabi wagatijan. Mun na Ibrayima tun lanin b’a la ko Jehova bena a ka layidu dafa?

2. Mun na Ibrayima tun lanin b’a la ko Jehova bena a ka layidu dafa?

² Ibrayima tun be jɛnɲɔgɔnya ɲuman kɛra ni Ala ye minkɛ, “a lanin tun b’a la kosɔbɛ ko Ala y’a daa di koo min na,” o bena dafa (Ɔrɔm. 4:21). Ibrayima koo diyara Jehova ye ani a y’a jati mɔgɔ tilennin ye a ka limaniya kosɔn (Zaki 2:23). Ka kɛɲɛ ni Ɔrɔmukaw 4:18 ye, Ibrayima tun limaniyanin lo ani jigiya tun b’a fɛ fana. An k’a filɛ ciden Pol ye min fɔ jigiya koo la Ɔrɔmukaw sapitiri 5nan kɔnɔ.

3. Pol b’an dɛmɛ ka mun lo faamu an ka jigiya koo la?

³ Pol y’a ɲɛfɔ fɛɛn min kama an be se ka la a la ko  “jigi . . . te taga ka mɔgɔ to bololakolon.” (Ɔrɔm. 5:5). An kerecɛnw be ni jigiya min ye, Pol y’an dɛmɛ k’a faamu fana o barika be se ka bonya cogo min na. Ɔrɔmukaw 5:1-5 lajɛtɔ, miiri k’a filɛ i ka jigiya barika bonyana cogo min na wagati tɛmɛtɔ. Barokun nin na, an bena a ye fana i be se k’i ka jigiya barika bonya kosɔbɛ cogo min na ka tɛmɛ sisan kan. An ka kɔn ka kuma jigiya ɲuman dɔ koo la, Pol ko o min tɛ taga ka mɔgɔ to bololakolon.

4. Ɔrɔmukaw 5:1, 2 be kuma mun lo koo la?

⁴ Ɔrɔmukaw 5:1, 2 kalan. Pol y’o kumaw sɛbɛ Ɔrɔmu kafodenw lo ma. O balimaw tun ye lɔnniya sɔrɔ Jehova ni Yezu koo la, u tun limaniyara u la ani u kɛra kerecɛnw ye. O la, u “jatira mɔgɔtilenninw ye jigi [wala limaniya, NW] barika la” ani Ala y’u mɔ ni hakili senu ye. Tiɲɛn na, u ye jigiya ɲuman sɔrɔ ani u tun be se ka la a la ko u jigi be min na, o bena dafa.

5. Kerecɛn mɔlenw be ni jigiya juman lo ye?

⁵ Kɔfɛ, Pol ye lɛtɛrɛ ci Efɛzi kerecɛnw ma u ka jigiya koo la, Ala ye o min di u ma. Ala “ye fɛnɲuman min labɛn a ka mɔgɔw ye,” u tun bena o sɔrɔ (Efɛz. 1:18). Pol y’a ɲɛfɔ fana Kɔlɔsi kererɛnw ye, u tun bena u ka sara sɔrɔ yɔrɔ min na. A ko ‘jigiya bɛ u fɛ sankolo ra.’ (Kɔlɔs. 1:4, 5, Biblu Ala ta Kuma). O la, kerecɛn mɔlenw ka jigiya ye ka lakunu sankolo la walisa ka ɲɛnamaya banbali kɛ o yɔrɔ la ani ka kuntigiya kɛ ni Krista ye.—1 Tes. 4:13-17; Yir. 20:6.

6. Kerecɛn mɔlen dɔ ye mun lo fɔ a ka jigiya koo la?

⁶ Kerecɛn mɔlenw ka jigiya ka di u ye kosɔbɛ. Balimacɛ Frederick Franz ye kerecɛn mɔlen dɔ ye ani a y’a fɔ a be min miiri a ka jigiya koo la. A ko: “An jigi be min kan, o bena dafa, siga t’o la ani an mɔgɔ 144000 kelen kelen bɛɛ bena a ka  sara sɔrɔ. An tun be min miiri, o sara nafa bena bonya ka tɛmɛ o kan fɔɔ ka taga ka na.” Balimacɛ Franz ye Jehova sago kɛ kantigiya la saan caaman kɔnɔ. O kɔ, saan 1991 a y’a fɔ ko: “[An] ka jigiya bele koo ka gwɛlɛ an ma kosɔbɛ. . . . N’an be kɔnɔni kɛra wagatijan kɔnɔ walisa o jigiya ka dafa, a koo be gwɛlɛya an ma kosɔbɛ ka tɛmɛ fɔlɔ kan. Kuun b’a la an k’a makɔnɔ, hali n’an ka ɲi ka kɔnɔni kɛ saan miliyɔn kelen le. An ka jigiya koo ka gwɛlɛ n’ ma kosɔbɛ sisan ka tɛmɛ fɔlɔ kan.”

7-8. Jehova sagokɛlaw fanba be ni jigiya juman lo ye? (Ɔrɔmukaw 8:20, 21).

⁷ Bi, Jehova sagokɛlaw fanba be ni jigiya wɛrɛ lo ye. O ye ka ɲɛnamaya kɛ fɔɔ abada dugukolo kan Ala ka Masaya kɔrɔ. Ibrayima fana tun be n’o jigiya lo ye (Eburuw 11:8-10, 13). Pol kumana o jigiya ɲuman koo la (Ɔrɔmukaw 8:20, 21 kalan). Ala ye layidu minw ta Bibulu kɔnɔ siniɲasigi koo la, i siɲɛ fɔlɔ k’u koo mɛn, u la juman lo diyara i ye ka tɛmɛ? Layidu min ye ko loon dɔ, i bena kɛ mɔgɔ dafanin ye, yala o lo diyara i ye kosɔbɛ wa? Wala i ninsɔn diyara kosɔbɛ k’a lɔn ko loon dɔ, i ka mɔgɔ kanulen minw sara, u bena lakunu alijɛnɛ kɔnɔ dugukolo kan wa? Ala ye jigiya ɲuman min di an ma, o sababu la an bena duga caaman sɔrɔ.

⁸ An ka jigiya ye ka ɲɛnamaya kɛ fɔɔ abada sankolo la wala dugukolo kan wo, an be ni jigiya ɲuman ye min b’a to an be ninsɔn diya. Ani o jigiya barika be se ka bonya kosɔbɛ yɛrɛ. Pol y’a ɲɛfɔ o be se ka kɛ cogo min na. An k’a filɛ a ye min sɛbɛ an ka jigiya koo la. O bena a to an be la a la kosɔbɛ ko an jigi be min kan, o bena dafa.

9-10. Pol ka koo b’a yira ko mun lo bena kerecɛnw sɔrɔ? (Ɔrɔmukaw 5:3; jaaw lajɛ fana).

⁹ Ɔrɔmukaw 5:3 kalan. Pol ko kɔrɔbɔli be se k’a to an ka jigiya barika be  bonya. Yala o b’i kabakoya wa? Tiɲɛn na, Krista ka kalandenw bɛɛ bena kɔrɔbɔli sɔrɔ. An ka Pol ka koo lajɛ. A y’a fɔ Tesalonikaw ye ko: “An tun b’aw cɛma tuma min na, an tun b’a fɔra aw ye ko an ka kan ka tɔɔrɔ. O le kɛra.” (1 Tes. 3:4). Ani a y’a fɔ Korɛntikaw ye ko: “Tɔɔrɔ min y’an sɔrɔ . . . an t’a fɛ k’aw to o lɔnbaliya la. . . . An yɛrɛ tun t’a miiri ko an bena to nii na.”—2 Kor. 1:8; 11:23-27.

¹⁰ Bi fana, kerecɛnw b’a lɔn ko u bena kɔrɔbɔli sɔrɔ (2 Tim. 3:12). Ele do? Yala i ye kɔrɔbɔli sɔrɔ sabu i limaniyara Yezu la ani i kɛra a ka kalanden dɔ ye wa? N’a sɔrɔ i teriw n’i somɔgɔw y’i lɔgɔbɔ. N’a sɔrɔ u yɛrɛ fariyara i ma. Wala a be se ka kɛ ko i ka patɔrɔn wala i baarakɛɲɔgɔnw y’i kɛlɛ sabu i ye hɔɔrɔn ye (Eburuw 13:18). Yala i ka jamana faamanw y’i kɛlɛ sabu i y’i ka jigiya kofɔ tɔɔw ye wa? An ka kɔrɔbɔli mana kɛ min o min ye, Pol ko an ka ninsɔn diya. Mun na do?

11. Mun na an ka ɲi k’an jija ka kɔrɔbɔli sifa bɛɛ muɲu?

¹¹ An be se ka ninsɔn diya hali ni kɔrɔbɔli b’an kan sabu an b’a lɔn ko o be se k’an dɛmɛ ka kɛ ni jogo ɲuman dɔ ye. Ɔrɔmukaw 5:3 b’a fɔ ko “tɔɔrɔ be na ni muɲuli ye.” Kerecɛnw bɛɛ be kɔrɔbɔli sɔrɔ. O la, an bɛɛ mako be muɲuli la. An ka ɲi k’an jija ka kɔrɔbɔli sifa bɛɛ muɲu. An jigi be min kan, n’an b’a fɛ k’o sɔrɔ, fɔɔ an ka muɲuli kɛ ani ka to ka Jehova sago kɛ. Yezu tun be miirila mɔgɔ dɔw lo la tuma min na a kumana kisɛw koo la minw benna farayɔrɔ la. An t’a fɛ ka kɛ i n’a fɔ olu. A daminɛ na, o mɔgɔw be sɔn Ala ka Kuma ma ni ninsɔndiya ye. Nka ‘ni gwɛlɛya nana, walima ni mɔgɔw b’u tɔɔrɔ,’ u be Ala sago kɛli dabila (Mat. 13:5, 6, 20, 21). Tiɲɛn lo ko kɔrɔbɔli wala tɔɔrɔ tɛ ninsɔndiyako ye. Nka n’an b’u muɲu ani ka to ka Jehova sago kɛ, o b’an nafa. Cogo di do?

12. N’an be kɔrɔbɔli muɲu, o b’an nafa cogo di?

¹² Kalanden Zaki y’a yira nafa minw b’a la ka kɔrɔbɔliw muɲu. A y’a sɛbɛ ko: “Muɲuli nin ka dafa, waasa aw ka kɛ mɔgɔdafaninw ye, ani fiɲɛ kana sɔrɔ aw la fewu.” (Zaki 1:2-4). Zaki ko muɲuli be ni baara wala laɲinita dɔ ye k’a dafa. Muɲuli be se k’i dɛmɛ ka kɛ ni jogo nunu ye bɛrɛbɛrɛ: limaniya, k’i jigi la Ala kan ani ka kɔnɔni kɛ. Nka o dɔrɔn tɛ, n’an be kɔrɔbɔliw muɲu, nafaba wɛrɛ b’o la.

13-14. N’an be muɲuli kɛ, nafa juman lo b’o la ani o be mun lo kɛ an ka jigiya la? (Ɔrɔmukaw 5:4).

¹³ Ɔrɔmukaw 5:4 kalan. b Pol ko “muɲuli b’a to an koo be diya Ala ye.” O la, n’i be muɲuli kɛ, i koo be diya a ye. O kɔrɔ tɛ ko ni gwɛlɛyaw b’i kan, o ka di Jehova ye. Nka, a dusu ka di sabu i be muɲuli kɛra kantigiya la. K’a lɔn ko n’an be muɲuli kɛ, o ka di Jehova ye, o b’an jija kosɔbɛ!—Zab. 5:13.

¹⁴ A to i hakili la ko Ibrayima ye kɔrɔbɔliw muɲu ani o y’a to a koo diyara Ala ye. Jehova y’a weele a teri ani k’a jati mɔgɔ tilennin ye (Zɛnɛzi 15:6; Ɔrɔm. 4:13, 22). Jehova be se ka an fana jati o cogo la. An be baara caaman minw kɛ Jehova ye wala an be ni kunkanbaara minw ye, o lo t’a to an koo be diya a ye. An koo be diya a ye sabu an be muɲuli kɛra ni kantigiya ye. An sanda, an ka koow cogoya wala an ka setigiya mana kɛ min o min ye, an bɛɛ be se ka muɲuli kɛ. Yala i be kɔrɔbɔli dɔ muɲuna sisan ni  kantigiya ye wa? N’o lo, a lɔn ko Jehova ninsɔn ka di i kɔrɔ. K’a lɔn ko an koo ka di Jehova ye, o be se ka nɔɔba to an kan. O be kɛ sababu ye an ka jigiya be sabati.

15. Pol kumana koo wɛrɛ juman lo la ani mun na o be se ka dɔw kabakoya?

¹⁵ Pol y’a ɲɛfɔ ko n’an be kɔrɔbɔliw muɲu koɲuman, an koo be diya Jehova ye. A ko: “N’an koo diyara Ala ye, an be jigiya sɔrɔ.” (Ɔrɔm. 5:4, NW). A y’a fɔ fana ko: “Jigi . . . te taga ka mɔgɔ to bololakolon.” (Ɔrɔm. 5:5). O kumaw be se ka dɔw kabakoya. Mun na do? Sabu Ɔrɔmukaw 5:2 kɔnɔ, Pol tun y’a fɔ ka ban ko Ɔrɔmu kerecɛnw be ni jigiya ye. U jigi tun b’a la ka ninyɔrɔ sɔrɔ “Ala ka nɔɔrɔ” la. O kama, dɔw be se ka ɲiningali kɛ ko: “N’o kerecɛnw tun be ni jigiya ye ka ban, mun na Pol kumana jigiya koo la Ɔrɔmukaw 5:4, 5 kɔnɔ?”

16. An ka jigiya y’a daminɛ ka bonya cogo di? (jaaw lajɛ fana).

¹⁶ Walisa ka Pol ka kumaw faamu, an ka ɲi k’a to an hakili la ko an ka jigiya barika be se ka bonya. Misali la, jigiya kuma ɲuman minw be sɔrɔ Ala ka Kuma kɔnɔ, yala i hakili b’a la siɲɛ fɔlɔ min na i y’u mɛn wa? N’a sɔrɔ i tun b’a miiri ko ka ɲɛnamaya kɛ fɔɔ abada alijɛnɛ kɔnɔ dugukolo kan, o ye koo ɲumanba lo ye, nka i tun ma la a la n’o be se ka kɛ. Dɔ tora ka fara i ka lɔnniya kan Jehova n’a ka layiduw koo la minkɛ, i lara a la kosɔbɛ ko o layidu bena dafa.

17. I be ni jigiya min ye, o barika bonyana cogo di i batizenin kɔ?

¹⁷ Hali i batizenin kɔ, i tora ka dɔ fara i ka lɔnniya kan Jehova koo la ani k’a kanu kosɔbɛ minkɛ, i ka jigiya barika tora ka bonya (Eburuw 5:13–6:1). N’a sɔrɔ i y’a ye ko Ɔrɔmukaw 5:2-4 kɔnɔkumaw ye tiɲɛn ye. Kɔrɔbɔli caaman tun b’i kan, nka i sera k’u  muɲu ani i y’a ye ko i koo ka di Ala ye. I b’a lɔn ko i koo ka di a ye minkɛ, i lanin b’a la kosɔbɛ sisan ko a ye layidu ta fɛɛn minw koo la, i bena u sɔrɔ. I ka jigiya barika bonyana ka tɛmɛ fɔlɔ kan. Tiɲɛnko lo i ɲɛɛ na ani i b’a jati ko o ɲɛsinna i ma. O jigiya b’i dusukun sɔrɔ sisan ka tɛmɛ fɔlɔ kan. A be nɔɔ to i ka ɲɛnamaya faan bɛɛ kan, i n’a fɔ i ka desizɔnw, i b’i ka denbayamɔgɔw minɛ cogo min na ani hali i be baara min kɛ n’i ka wagati ye.

18. Jehova ye garanti juman lo di?

¹⁸ I ye jigiya min sɔrɔ tuma min na i y’a lɔn ko i koo ka di Ala ye, ciden Pol ye koo kɔrɔtaninba dɔ fɔ ka ɲɛsin o ma. A b’i hakili sigi ko i jigi be min kan, i bena o sɔrɔ. Mun na i be se ka la o la? Hakili senu barika la, Pol ye garanti nin di kerecɛnw ma: “Jigi do te taga ka mɔgɔ to bololakolon, bari Ala y’an kanu cogo min na, o b’an dusu la Nii Senuman barika la, a y’ale min d’an ma.” (Ɔrɔm. 5:5). O la, kuun b’a la i ka la a la ko i jigi be min na, i bena o sɔrɔ, siga t’o la.

19. I be se ka la mun lo la i ka jigiya koo la?

¹⁹ Miiri Ibrayima koo la tugun: Jehova ye layidu ta a ye, a koo diyara a ye ani a y’a jati a teri ye. Ibrayima ka jigiya ma kɛ fuu ye. Bibulu b’a fɔ ko: “Ibrayima muɲuna ka kɔnɔni kɛ. Ala y’a daa d’a ma koo min na, a y’o sɔrɔ.” (Eburuw 6:15; 11:9, 18; Ɔrɔm. 4:20-22). O la, Ibrayima jigi ma tigɛ. Ele fana be se ka la a la ko n’i tora kantigiya la, i jigi be min kan, i bena o sɔrɔ. I ka jigiya ye tiɲɛnko ye. A b’i ninsɔn diya ani i jigi tɛ tigɛ! (Ɔrɔm. 12:12). Pol y’a sɛbɛ ko: “Ala min be mɔgɔ jigi tugu, ale k’a kɛ aw be nisɔndiya kosɔbɛ, ka hɛrɛ kɛ aw ye aw ka lanaya kosɔn, janko aw ka jigisɔbɛ sɔrɔ Nii Senuman barika la.”—Ɔrɔm. 15:13.