Kɔrɔsili Sangaso minw bɔra ɲina, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

Ka “hakilikura” sɔrɔ, o kɔrɔ ko di? (Ɔrɔm. 12:2).

O kɔrɔ tɛ ka koo ɲumanw dɔrɔn kɛ an ka ɲɛnamaya kɔnɔ. Nka, an ka ɲi k’an yɛrɛ sɛgɛsɛgɛ k’a filɛ an ye mɔgɔ sifa min ye ani ka yɛlɛmani bɛnninw kɛ. O la, an bena an seko bɛɛ kɛ walisa ka Ala ka sariyaw labato.—w23.01, ɲɛɛ 8-9.

An be se ka koow kɛ k’a dama kɛɲɛ cogo di duniɲa ka koow lajɛtɔ?

Koo minw be kɛra duniɲa kɔnɔ bi, a ka di an ye k’a filɛ u be Bibulu ka kiraya kumaw dafara cogo min na. Nka, an man ɲi k’a ɲini k’a fɔ koow bena kɛ cogo min na sabu o be se ka na ni farali ye kafo kɔnɔ. Jehova ka ɔriganisasiyɔn ye min fɔ o koo la, an ka ɲi k’an ka barow basigi o lo kan (1 Kor. 1:10).—w23.02, ɲɛɛ 16.

Yezu ka batɛmu n’a ka kalandenw ta be dan na ɲɔgɔn na koo jumanw lo la?

Yezu wolola siya min na, o siya tun y’a yɛrɛkun di Ala ma. O kama, a mako tun t’a la k’a yɛrɛkun di Jehova ma i ko anw. Yezu dafanin lo ani a ma jurumu si kɛ. O kama, a mako tun t’a la ka nimisa jurumu dɔ kosɔn.—w23.03, ɲɛɛ 5.

An be se ka sababu di tɔɔw ma cogo di u ka lakalitaw kɛ lajɛnw na?

An ka to ka lakalita surunw kɛ walisa mɔgɔ wɛrɛw ka se k’u daa don baro la. Ani an k’an janto an kana hakilinata caaman kofɔ. O la, tɔɔw fana bena se ka dɔ fɔ.—w23.04, ɲɛɛ 23.

“Sira senuman” min kofɔra Ezayi 35:8 kɔnɔ, o ye mun lo ye?

O tɛ sira yɛrɛ yɛrɛ ye. Tuma min na Yahutuw bɔra Babilɔni ka kɔsegi u faso la, a tun be komi u ye sira kɛrɛnkɛrɛnnin dɔ lo ta. An ka wagati la do? Saan kɛmɛkulu caaman ka kɔn saan 1919 ɲɛ, cɛɛ dɔw ye baaraba kɛ k’o sira labɛn. Misali la, u ye Bibulu bayɛlɛma ani k’a bɔ papiye kan. Ala sagokɛlaw be tagamana “Sira senuman” kan, o min be taga n’u ye alijɛnɛ kɔnɔ Alako ta fan fɛ ani sini ma, u bena Ala ka Masaya ka dugaw sɔrɔ.—w23.05, ɲɛɛ 15-19.

Talenw sapitiri 9nan be ladili di ka ɲɛsin muso fila jumanw lo ma?

Talenw ka kitabu be kuma nalomanmuso dɔ koo la. Minw be sɔn a ka welekan ma, olu be jigi “lahara le,” o kɔrɔ, kaburu kɔnɔ. O kitabu be kuma fana “lɔnniya [wala hakilitigiya, NW]” sɔbɛ koo la, o min sumana ni muso wɛrɛ ye. O muso ka welekan be mɔgɔ bila “hakilitigiyasira” ani ɲɛnamaya banbali sira kan (Talenw 9:1, 6, 13, 18).—w23.06, ɲɛɛ 22-24.

Ala ye Lɔti minɛ cogo min na, o b’a yira cogo di ko a majiginin lo ani a sabalinin lo?

Jehova ko Lɔti ka boli ka bɔ Sodɔmu ka taga kuluyɔrɔw la. Tuma min na Lɔti ye Jehova deli ko a k’a to ale be taga Sowari, Jehova sɔnna.—w23.07, ɲɛɛ 21.

Muso be se ka mun lo kɛ n’a cɛɛ be porno filɛ?

A ka ɲi k’a to a hakili la ko ale nɔɔ tɛ. A be jɛnɲɔgɔnya min kɛra ni Jehova ye, a ka ɲi ka sinsin o kan. A ka ɲi fana ka to ka miiri muso dɔw ka maana kan minw kofɔra Bibulu kɔnɔ ani u ye dususalo sɔrɔ Jehova fɛ. Ani, koo minw be se ka pornofilɛ nege don a cɛɛ la, a be se k’a dɛmɛ a b’a yɔrɔ janya u la.—w23.08, ɲɛɛ 14-17.

Ni dɔ y’an ka lannakow sɔsɔ, hakilitigiya be se k’an dɛmɛ cogo di an be koow kɛ ni dususuman ye?

A tigi ye ɲiningali min kɛ, an k’a jati ko o b’an dɛmɛ k’a faamu a ka miiriya ye min ye ani fɛɛn min kɔrɔtanin lo a fɛ. O la, an bena se k’a jaabi ni dususuman ye.—w23.09, ɲɛɛ 17.

An be se ka fanga sɔrɔ cogo minw na, Mariyamu ka koo be mun lo yira an na o koo la?

Tuma min na Mariyamu y’a lɔn ko ale bena kɛ Masiya bamuso ye, tɔɔw y’a barika bonya. Gabiriyɛli ni Elizabɛti y’a jija Alako ta fan fɛ. An kerecɛnɲɔgɔnw be se ka an fana barika bonya.—w23.10, ɲɛɛ 15.

Jehova be se k’an ka deliliw jaabi cogo di?

A y’a daa di ko a bena an ka deliliw lamɛn ani a b’a filɛ n’u bɛnnin lo n’a sago ye (Zer. 29:12). Mɔgɔw be se k’a deli koo dɔ la ani a t’u jaabi cogo kelen na, nka a bena an dɛmɛ tuma bɛɛ.—w23.11, ɲɛɛ 21-22.

Ɔrɔmukaw 5:2 be kuma “jigi” koo la. O la, mun na jigi kofɔra tugun vɛrise 4nan na?

Ni mɔgɔ ye kibaro diiman mɛn, n’a sɔrɔ a jigi b’a la ka ɲɛnamaya kɛ alijɛnɛ kɔnɔ dugukolo kan. Nka, a mana kɔrɔbɔliw sɔrɔ, n’a y’u muɲu ani a y’a ye ko a koo ka di Ala ye, a ka jigiya barika be bonya kosɔbɛ ani a b’a jati ko Ala ka layiduw ɲɛsinna ale ma.—w23.12, ɲɛɛ 12-13.