JEHOVA be fɛɛn caaman minw di i ma, siga t’a la u ka di i ye. I b’a waleɲuman lɔn sabu a b’a to i k’a latigɛ i yɛrɛ ma i bena o fɛɛnw diyabɔ cogo min na. Bibulu b’a fɔ ko diwɛn ye Ala ka nilifɛn dɔ ye. A yɛrɛ b’a fɔ ko: “Mɔgɔw be dumunibaba labɛn, waasa ka ɲanagwɛ. Duvɛn be mɔgɔ nisɔndiya.” (Waaj. 10:19; Zab. 104:15). Nka, n’a sɔrɔ i y’a kɔrɔsi ko dɔrɔ ye gwɛlɛya lase mɔgɔ dɔw ma. Ka fara o kan, duniɲa kuru bɛɛ kɔnɔ, mɔgɔw ka miiriya tɛ kelen ye dɔrɔmin koo la. O la, mun lo be se ka kerecɛnw dɛmɛ ka desizɔn ɲuman ta o koo la?

An ka jamana ani an lamɔcogo mana kɛ min o min ye, an ka ɲi k’a to Ala ka miiriya k’an ɲɛminɛ an ka desizɔnw na. O bena an nafa ani an bena ninsɔndiyaba sɔrɔ an ka ɲɛnamaya kɔnɔ.

N’a sɔrɔ i y’a kɔrɔsi ko duniɲa kɔnɔ, mɔgɔ caaman ka teli ka minni kɛ ani u b’o kɛ k’a dama tɛmɛ. Dɔw be minni kɛ sabu u b’a miiri ko a b’u fari foni. Dɔ wɛrɛw b’a min walisa ka ɲinɛ u ka gwɛlɛyaw kɔ. Yɔrɔ dɔw la, mɔgɔw b’a jati ko ka dɔrɔ min caaman, o b’a yira ko i ɲaa yɛlɛnin lo wala ko i ye cɛfari ye.

Nka, kerecɛnw b’a to u Danbaga kanutigi ka ladili ɲumanw k’u ɲɛminɛ. Misali la, a b’a fɔ an ye dɔrɔminkojugu nɔfɛkow ye minw ye. Talenw 23:29-35 be min fɔ dɔrɔtɔ ani dɔrɔtɔya nɔfɛko dɔw koo la, n’a sɔrɔ i delila k’o kalan. a Daniel ye diinan mɔgɔkɔrɔ ye ani a be Erɔpu mara la. A hakili b’a la a ka ɲɛnamaya tun be cogo min na sanni a ka kɛ kerecɛn sɔbɛ ye. A ko: “N’ tun ka teli ka dɔrɔ min kojugu ani o y’a to n’ ye desizɔn juguw ta. O kama, kojugubaw ye n’ sɔrɔ ani n’ mana miiri o la o bele be n’ dusu tiɲɛ kosɔbɛ.”

An be se ka desizɔn ɲumanw ta cogo di dɔrɔ koo la ani k’an yɛrɛ tanga dɔrɔminkojugu nɔfɛkow ma? An ka ɲi k’a to Ala ka miiriya k’an ɲɛminɛ an ka desizɔnw n’an ka kɛwalew la.

An k’a filɛ Bibulu be min fɔ dɔrɔ koo la ani fɛɛn min kama dɔw be dɔrɔ min.

Ala ka Kuma t’a fɔ ko ka dɔrɔ min k’a dama kɛɲɛ, o ye koo jugu ye. A yɛrɛ b’a fɔ ko ka diwɛn min, o be se ka mɔgɔ ninsɔn diya. A fɔra yen ko: “I ka dumuni kɛ nisɔndiya la, i nisɔn diyanin k’i ka minni kɛ.” (Waaj. 9:7). Yezu tun be dɔrɔ min tuma kelen kelen. O cogo kelen na, Jehova sagokɛla kantigi wɛrɛw tun b’a min.—Mat. 26:27-29; Luka 7:34; 1 Tim. 5:23.

Hali ni Ala ka Kuma tɛ dɔrɔmin haramuya, a b’a yira ka gwɛ ko dɔrɔminkojugu man ɲi. A b’a fɔ ka gwɛ ko: “Aw kana fa duvɛn na.” (Efɛz. 5:18). A yɛrɛ b’a fɔ ko “dɔrɔtɔw . . . tena Ala ka masaya sɔrɔ.” (1 Kor. 6:10). Tiɲɛn na, Jehova be dɔrɔminkojugu ni dɔrɔtɔya haramuya. An gɛrɛfɛmɔgɔw be dɔrɔmin jati cogo min na, sanni an ka koow kɛ ka kɛɲɛ n’o ye, an be an ka desizɔnw ta ka kɛɲɛ ni Ala sago ye.

Dɔw b’a miiri ko u be se ka dɔrɔ caaman min ani u yɛrɛ tɛ su. Nka, faratiba b’o la. Bibulu b’a fɔ ka gwɛ ko “mɔgɔ o mɔgɔ bɛ [dɔrɔ] caman min,” o tigi be se ka jurumubaw kɛ ani ale ni Jehova ka jɛnɲɔgɔnya be se ka nagasi (Talenw 20:1, Bible senuma). Yezu yɛrɛ y’an lasɔmi ko “dɔrɔminkojugu” be se ka mɔgɔ bali ka don Ala ka duniɲa kura kɔnɔ (Luka 21:34-36, NW). O la, farati min be  dɔrɔmin na, mun lo be se ka kerecɛn dɛmɛ a k’a yɛrɛ tanga o ma?

N’i b’a to i lamɔcogo lo k’i lasun ka desizɔnw ta dɔrɔmin koo la, farati b’o la. Ka ɲɛsin dumuni ani minni koo ma, kerecɛnw be koow kɛ ni hakilitigiya ye, u kɛtɔ ka Ala sago kɛ. Bibulu b’an hakili jigi ko: “Aw be dumuni kɛra wo, aw be minni kɛra wo, aw be fɛɛn o fɛɛn kɛ, aw k’o bɛɛ kɛ ka boɲa la Ala kan.” (1 Kor. 10:31). O la, an ka ɲi ka miiri Bibulu ka sariyakolo dɔw la ani k’an yɛrɛ ɲininga ko:

N’ be dɔrɔ min walisa ka n’ koo diya tɔɔw ye le wa? Ɛkizɔdi 23:2 b’a fɔ ko: “Aw kana tugu jama kɔ.” Jehova tun be Israɛldenw lasɔmina le ko u kana tugu mɔgɔw kɔ minw tɛ ale sago kɛ. O lasɔminikan ɲɛsinna kerecɛnw fana ma bi. N’an y’a to tɔɔw ka nɔɔ jugu to an ka miiriya n’an ka desizɔnw kan dɔrɔmin koo la, n’a sɔrɔ an bena a daminɛ ka Jehova ka sariyaw tiɲɛ ani k’an yɔrɔ janya a la.—Ɔrɔm. 12:2.

Yala n’ be dɔrɔ min walisa k’a yira ko fanga be n’ na kosɔbɛ wa? Yɔrɔ dɔw la, a daganin lo ka dɔrɔ min kojugu ani tuma caaman na (1 Piyɛri 4:3). Nka a kɔrɔsi 1 Korɛntikaw 16:13 b’an jija an ka min kɛ: “Aw labɛnnin ka to, aw ye jija aw jigi ka to Ala kan kosɔbɛ, aw ka kɛ mɔgɔ jagwɛlɛnw ye, ani ka barika don aw yɛrɛ la.” Yala dɔrɔ be se ka barika don mɔgɔ la tiɲɛn na wa? Ayi dɛ, a be mɔgɔ fari faga le! A be mɔgɔ bali ka miiri koɲuman ani ka desizɔn ɲuman ta. O la, ka dɔrɔ min kojugu, o t’a yira ko mɔgɔ barika ka bon dɛ! O b’a yira ko a barika ka dɔgɔ le! Ezayi 28:7 be kuma mɔgɔ dɔw koo la, dɔrɔ ye minw ɲanamini, u be talontalonna ani u hakili ɲagaminin lo.

Fanga sɔbɛ be bɔ Jehova lo yɔrɔ. Walisa k’o sɔrɔ, an ‘labɛnnin ka ɲi ka to’ ani an ka ɲi k’an jija janko an “jigi ka to Ala kan kosɔbɛ.” (Zab. 18:33). An b’o kɛ an kɛtɔ k’an yɛrɛ tanga faratiw ma ani ka desizɔnw ta minw tɛna an ni Jehova ka jɛnɲɔgɔnya nagasi. Yezu tun be jɛnɲɔgɔnya barikaman kɛ ni Jehova ye. Mɔgɔ caaman tun be bonya la a kan sabu a jaa tun ka gwɛlɛ ani a tun cɛsirinin lo ka koo tilennin kɛ.

 Yala n’ be dɔrɔ min walisa ka ɲinɛ n’ ka gwɛlɛyaw kɔ wa? Hakili senu barika la, Zaburu sɛbɛbaga dɔ y’a fɔ ko: “Ne ka haminako tun ka ca kosɔbɛ tuma min na, [Jehova] ye ne jigi tugu, ne nisɔndiyara.” (Zab. 94:19). Ni koo dɔ b’i hakili ɲagamina, dɛmɛ ɲini Jehova fɛ, kana i yɛrɛ bila dɔrɔmin na. Fɛɛrɛ ɲuman dɔ ye ka to ka Jehova deli tuma o tuma. Mɔgɔ dɔw y’a kɔrɔsi ko ka ladili ɲumanw ɲini u teri kolɔnbaga dɔ fɛ kafo kɔnɔ, nafa b’o fana na. Sanni dɔrɔmin k’i dɛmɛ i k’i ka gwɛlɛyaw ɲɛnabɔ, a b’a to i cɛsirinin tɛ tugun ka koo tilennin kɛ (Oze 4:11). An kumana Daniel min koo la, ale ko: “N’ tun be hami kojugu ani n’ tun be to ka n’ yɛrɛ jalaki. Walisa ka see sɔrɔ o miiriyaw kan, n’ tun be dɔrɔ min. Nka, n’ ka gwɛlɛyaw tora ka juguya ka taga le. N’ bɔnɛna n’ teriw la ani n’ tun tɛ danbe la n’ yɛrɛ kan tugun.” A laban mun lo ye Daniel dɛmɛ? A ko: “N’ y’a faamu ko n’ mako tun be Jehova ka dɛmɛ lo la, dɔrɔ tɛ. Jehova ka dɛmɛ barika la, n’ sera ka n’ ka gwɛlɛyaw muɲu ani ka see sɔrɔ u kan.” Tiɲɛn na, Jehova labilanin lo tuma bɛɛ k’an dɛmɛ, hali n’a b’an ɲɛɛ na ko an ka gwɛlɛyaw tɛ se ka ɲɛnabɔ.—Filip. 4:6, 7; 1 Piyɛri 5:7.

N’i be dɔrɔ min tuma dɔw la, i be se k’i yɛrɛ sɛgɛsɛgɛ k’a filɛ n’i ka ɲi ka yɛlɛmani dɔw kɛ, i kɛtɔ k’i yɛrɛ ɲininga ko: “Yala n’ somɔgɔ wala n’ teri sɔbɛ dɔ delila ka kuma n’ fɛ n’ ka dɔrɔmin koo la wa?” N’o lo, n’a sɔrɔ o b’a yira ko i y’a daminɛ ka kɛ ni delinanko jugu ye i ɲina ma. “Yala n’ be dɔrɔ min sisan ka tɛmɛ fɔlɔ kan wa?” O be se ka mɔgɔ dɔ sɔrɔ min b’a daminɛna ka kɛ dɔrɔ ka jɔɔn ye. “Ni n’ ma dɔrɔ min tile damanin wala tile caaman kɔnɔ, yala o ka gwɛlɛ n’ ma wa?” N’o lo, n’a sɔrɔ dɔrɔ kɛra delinanko jugu ye i fɛ wala i kɛra a ka jɔɔn ye. N’a sɔrɔ i mako b’a la dɔgɔtɔrɔ dɔ k’i dɛmɛ k’o delinanko jugu dabila.

Dɔrɔ be se ka gwɛlɛya caaman lase mɔgɔ ma minkɛ, kerecɛn dɔw y’a latigɛ k’u tɛna dɔrɔ min fewu. Dɔ wɛrɛw be se k’a latigɛ ko u tɛ dɔrɔ min sabu a man di u daa le dɔrɔn. N’i teri dɔ y’a latigɛ ko a tɛna dɔrɔ min, i be se k’a minɛ ni ɲumanya ye i kɛtɔ ka sɔn a ka desizɔn ma ani kana a kɔrɔfɔ.

 Wala n’a sɔrɔ i y’a faamu ko hakilitigiyako lo ka koo dɔw latigɛ i ka dɔrɔmin koo la. Kerecɛn be se k’a latigɛ a bena dɔrɔ hakɛ min min wala a bena a min wagati minw na. A be se k’a latigɛ k’a min siɲɛ kelen lɔgɔkun kɔnɔ wala dɔɔni dumuniw tuma na. Dɔw y’a latigɛ u bena dɔrɔ sifa minw min. Misali la, u y’a latigɛ ka diwɛn wala biyɛri dɔɔni min. Nka u ko u tɛna likɛri fariman wala dɔrɔ fariman ɲagaminin min. Ni mɔgɔ dɔ ye koo dɔw latigɛ a ka dɔrɔmin koo la, a ka nɔgɔ a fɛ k’o labato. Ni kerecɛn kolɔnbaga dɔ y’o koo ɲɔgɔn latigɛ ani a cɛsirinin lo ka koow kɛ ka kɛɲɛ n’o ye, a man ɲi ka maloya o kosɔn.

N’an be desizɔn tara dɔrɔ koo la, an ka ɲi k’an janto tɔɔw la fana. Ɔrɔmukaw 14:21 b’a fɔ ko: “Fɛɛn min ka fisa, i kana josɔnsogo ɲimi, i kana dɔrɔ min, fɛɛn o fɛɛn min be se ka kɛ sababu ye k’i balima kunnacɛn, i kana o kɛ.” I be se k’o ladili sira tagama cogo di? A yira i balimaw na ko i b’u kanu. N’i y’a ye ko ka dɔrɔ min koo dɔ sen fɛ, o be se k’i balima dɔ kɔnɔ gwan, kanuya bena i lasun i kana a min o wagati la. O la, i b’a yira ko i b’i janto tɔɔw dusukunnakow la ani ko i b’olu nafa lo ɲini, ele ta tɛ.—1 Kor. 10:24.

Ka fara o kan, ni faamanw ye sariya dɔw sigi dɔrɔ koo la, an ka ɲi k’u labato. U be se k’a fɔ ko mɔgɔ ka ɲi ka sii hakɛ dɔ sɔrɔ ka sɔrɔ ka dɔrɔ min. Wala ko a daganin tɛ ka dɔrɔ min ani ka bolifɛn boli wala ka baara kɛ ni mansi dɔw ye.—Ɔrɔm. 13:1-5.

Jehova ye nilifɛn ɲuman caaman di an ma. U la dɔ ye ko a ye see di an ma k’a latigɛ an yɛrɛ ma an bena u diyabɔ cogo min na. Misali la, an be se k’a latigɛ an yɛrɛ ma an bena min dumu ani an bena min min. An k’a yira ko an b’o nilifɛn jati fɛɛn nafamanba ye, an kɛtɔ ka desizɔnw ta minw bena an sankolola Faa dusu diya.