An balimamuso dɔ be Nuvɛli Zelandi ani loon dɔ, a ye videwo dɔ filɛ jw.org kan. O videwo b’a yira ko Jehova be hinɛ ani ko a b’o yira fana (Ezayi 63:7-9). An balimamuso y’a latigɛ k’o videwo sira tagama a kɛtɔ ka mɔgɔ dɔ dɛmɛ cogo tigi dɔ la. Kɔfɛ o loon na, a tagara sannikɛyɔrɔ. A ye muso dɔ ye siyɔrɔ tun tɛ min fɛ ani a y’a fɔ a ye ko ale bena dumuni san ka di a ma. O muso sɔnna. Balimamuso nana dumuni di muso ma tuma min na, a ye seereya kɛ a ye dɔɔni. A basigira sɛbɛnin nin lo kan: Tɔɔrɔ bena ban loon dɔ wa?

Muso y’a daminɛ ka kasi. A y’a ɲɛfɔ ko ale bangebagaw tun ye Jehova Seerew ye ani u y’ale kalan tiɲɛnkalanw na. Nka, a ye tiɲɛn sira bila a saan caaman ye nin ye. A ma mɛɛn, a ye Jehova deli ko a k’ale dɛmɛ ka kɔsegi a ma. An balimamuso ye Bibulu di o muso ma ani muso sɔnna bibulukalan na. a

I ko Jehova, an be se k’a yira mɔgɔw la ko an be hinɛ u la. O mɔgɔw be se ka kɛ an somɔgɔw ani an kerecɛnɲɔgɔnw ye. An be se k’a yira ko an be hinɛ mɔgɔw la fana n’an be sababuw ɲini k’u waaju.