Kɔrɔsili Sangaso minw bɔra ɲina, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

Jehova be ɲɛyirali juman lo di an ma musow minɛcogo koo la?

A tɛ cɛɛw fisaya musow ye. A b’u bɛɛ kanu cogo kelen na. A be musow lamɛn ani a b’a janto u dusukunnakow n’u haminankow la. Ani a b’a yira ko a lanin lo musow la, a kɛtɔ k’a ka baara kalifa u ma.—w24.01, ɲɛɛ 15-16.

Efɛzikaw 5:7 b’a fɔ ko: “Aw kana jɛn n’u ye fewu.” An be se k’o vɛrise sira tagama cogo di?

Mɔgɔ minw b’a to a be gwɛlɛya an ma ka Jehova ka sariyaw labato, ciden Pol tun b’an lasɔmina ko an kana jɛn n’olu lo ye. An be jɛnɲɔgɔnya kɛ ni mɔgɔ minw ye yɛrɛyɛrɛ la ani rezo sosiyow kan, olu dɔw be se ka kɛ jɛnɲɔgɔn juguw ye.—w24.03, ɲɛɛ 22-23.

An ka ɲi k’an yɛrɛ tanga ngalon sifa jumanw lo ma?

An balima dɔw be se ka fɛɛn dɔw ci an ma wala ka koo dɔw lakali an ye, nka u m’a sɛgɛsɛgɛ k’a filɛ ni tiɲɛn lo. Dɔw fana be se ka ngalon kumaw ci an ma e-mail la, k’a sɔrɔ an m’o ɲini u fɛ. An be se k’o ngalon kumaw mɛn fana kerecɛn murutininw fɛ minw b’a kɛ komi u b’u mako don Bibulu la. An ka ɲi k’an yɛrɛ kɔrɔsi o ngalon kumaw ma.—w24.04, ɲɛɛ 12.

Masacɛ Solomani, Sodɔmu ni Gomɔrɛ dugumɔgɔw ani minw sara sanjiba wagati la, Jehova bena olu kiti cogo min na, an be mun lɔn ani an tɛ mun lɔn u koo la?

An tɛ se k’a fɔ tigitigi ko Jehova y’a latigɛ k’o mɔgɔw suu tɛna kunu. Nka, an b’a lɔn ko a be koo bɛɛ lɔn ani a be makari kosɔbɛ.—w24.05, ɲɛɛ 3-4.

Ala ye “tangakabakuru” ye minkɛ, an be se ka la mun lo la? (Deter. 32:4).

An be se ka Jehova kɛ an dogoyɔrɔ ye. Kantigi lo ani a tɛna an to yen abada. A b’a ka layiduw dafa tuma bɛɛ. A tɛ yɛlɛma, a jogow n’a sagonata fana tɛ yɛlɛma abada!—w24.06, ɲɛɛ 26-28.

Mun lo bena i dɛmɛ i ka deli i ka kafo kura la?

N’i y’i jigi la Jehova kan, a bena i dɛmɛ i ko a y’a sagokɛlaw dɛmɛ cogo min na galen. Kana i ka kafo kura suma ni kɔrɔman ye. I niin don bɛrɛbɛrɛ i ka kafo kura ka koow la ani i jija ka teri kuraw sɔrɔ.—w24.07, ɲɛɛ 26-28.

Yezu ka talen saba minw be sɔrɔ Matiyo sapitiri 25 kɔnɔ, an be kalan jumanw lo sɔrɔ u la?

A ye talen min la sagaw ni baaw koo la, o b’a yira ka gwɛ ko a kɔrɔtanin lo an ka kɛ kantigiw ye. Talen min lara npogotigi hakilitigiw ni hakilintanw koo la, o b’a yira ko an labɛnnin ka ɲi ka to ani ka to ɲɛɛ na. A ka talen na wari talanw koo la, a y’a yira ko a kɔrɔtanin lo an k’an timinandiya Jehova ka baara la.—w24.09, ɲɛɛ 20-24.

Solomani tun ye Alabatosoba min lɔ, a bulonda jɔ janya tun be cogo di?

Kitabu kɔrɔkɔrɔ dɔw la, a fɔra 2 Tilew Kibaru 3:4 kɔnɔ ko “nɔnkɔn 120,” o kɔrɔ, mɛtɛrɛ 53. Nka, kitabu kɔrɔkɔrɔ wɛrɛw kɔnɔ fana, a fɔra ko o bulonda jɔ janya ye “nɔnkɔn 20” ye. O be bɛn mɛtɛrɛ 9 ɲɔgɔn ma. A be komi o mɛtɛrɛ 9 lo be bɛn ni Alabatosoba kogow bonya ye.—w24.10, ɲɛɛ 31.

1 Timote 3:12 b’a fɔ ko kɔrɔsigi ciden ka ɲi ka kɛ “musokelentigi ye.” O kɔrɔ ko di?

O kɔrɔ ko a ka ɲi ka muso kelen dɔrɔn lo furu ani a man ɲi ka kakalayakow kɛ abada. Ka fara o kan, a man ɲi ka ɲɛbɔ muso wɛrɛ fɛ.—w24.11, ɲɛɛ 19.

Mun na an be se k’a fɔ ko Yezu ye min fɔ Zan 6:53 kɔnɔ, a tun t’a yirala le mɔgɔw ka ɲi ka min kɛ Matigi ka surafana tuma na?

Zan 6:53 kɔnɔ, Yezu y’a fɔ jamaba dɔ ye ko u ka ɲi k’ale farisogo dumu ani k’a joli min. A y’o fɔ saan 32 Krista tile la Galile. A tun be kumana Yahutuw jamaba dɔ lo fɛ minw tun ka ɲi ka limaniya a la. Nka saan kelen o kɔ le, a ye Matigi ka surafana sigi sen kan Zeruzalɛmu. O sen fɛ, mɔgɔ minw tun bena masaya kɛ n’a ye sankolo la, a kumana n’olu dɔw lo ye.—w24.12, ɲɛɛ 10-11.