Ciden Pol y’a sɛbɛ a diinan mɔgɔkɔrɔ ɲɔgɔn Timote ma ko: “Ne b’a fɔ i ye ka gɛlɛya Ala ni Krisita Yesu ni mɛlɛkɛ ɲɛnatɔmɔlenw ɲɛ na ko i ka o ciw bɛɛ kɛ. I kana mɔgɔ dɔ fisaya dɔ ye, i kana mɔgɔ bɔ mɔgɔ la.”—1 Tim. 5:21, Bible senuma.

An k’a filɛ fɔlɔ o mɛlɛkɛw ma ɲɛsin minw ma. A gwɛnin lo ko mɔgɔ 144000 nunu tɛ. Tuma min na Pol ye Timote sɛbɛ, kerecɛn mɔlenw ka sukununi tun ma daminɛ sankolo la fɔlɔ. Cidenw ni kerecɛn wɛrɛw tun ma kɛ mɛlɛkɛw ye fɔlɔ. O la, u tun tɛ se ka kɛ o “mɛlɛkɛ ɲɛnatɔmɔlenw” ye.—1 Kor. 15:50-54; 1 Tes. 4:13-17; 1 Zan 3:2.

Mɛlɛkɛ minw murutira Jehova ma sanjiba tuma na, olu fana tɛ se ka kɛ “mɛlɛkɛ ɲɛnatɔmɔlenw” ye. O mɛlɛkɛw farala Sutana kan ani u kɛra jinaw ye. U kɛra Yezu juguw ye fana (Zɛnɛzi 6:2; Luka 8:30, 31; 2 Piyɛri 2:4). Sini ma, olu ni Sutana bena fili dingɛ dunba kɔnɔ ka saan 1000 kɛ yen ani o kɔ, u bena halaki.—Zude 6; Yir. 20:1-3, 10.

O la, Pol ye ‘mɛlɛkɛ ɲɛnatɔmɔlen’ minw kofɔ, siga t’a la olu ye mɛlɛkɛ kantigiw lo ye sankolo la. U be baara kɛra “Ala ni Krisita Yesu” ye, olu minw kofɔra fana o vɛrise kɔnɔ.

Mɛlɛkɛ kantigi waa caamanba lo be yen (Eburuw 12:22, 23). A be komi baara kelen lo ma kalifa u bɛɛ ma (Yir. 14:17, 18). Misali la, Jehova delila k’a ɲini mɛlɛkɛ kelen dɔrɔn fɛ a ka Asirikaw ka sɔrɔdasi 185000 faga (2 Mas. 19:35). Nka, a ɲinina mɛlɛkɛ caaman fɛ ko “mɔgɔ minw bɛɛ be kojugu kɛ ka tɔw fana nigɛ k’u bila a la,” u k’olu “woloma k’u bɔ Ala ka mɔgɔw cɛma.” (Mat. 13:39-41). A ɲinina mɛlɛkɛ wɛrɛw fɛ ko Ala ye “mɔgɔ minw woloma k’u kɛ a taw ye,” u k’olu lajɛn sankolo la (Mat. 24:31). Ala ye cii di mɛlɛkɛ wɛrɛw ma fana ko ‘u k’u janto an na an ka siraw bɛɛ kan.’—Zab. 91:11; Mat. 18:10; Matiyo 4:11 lajɛ; Luka 22:43.

‘Mɛlɛkɛ ɲɛnatɔmɔlen’ minw kofɔra 1 Timote 5:21 kɔnɔ, a be komi cii dira olu ma u k’u janto kafow la. Timote fɔlɔ sapitiri 5nan kɔnɔ, Pol ye ladili ɲumanw di diinan mɔgɔkɔrɔw ma k’a yira u ka ɲi k’u ka kunkanbaaraw dafa cogo min na. A y’a yira fana ko kafoden tɔɔw ka ɲi ka bonya la u kan. Pol y’a fɔ diinan mɔgɔkɔrɔw ye ko ‘u kana mɔgɔ dɔ fisaya dɔ ye, u kana mɔgɔ bɔ mɔgɔ la’ ani u ka miiri koɲuman ka sɔrɔ ka desizɔnw ta. O kɔ, a y’a ɲɛfɔ kuun jɔnjɔn min kama u ka ɲi k’o ladili sira tagama. A ko u be baara kɛra u balimaw ye “Ala ni Krisita Yesu ni mɛlɛkɛ ɲɛnatɔmɔlenw ɲɛ na.” O kɔrɔ ko diinan mɔgɔkɔrɔw b’u janto kafodenw na cogo min na, Jehova, Yezu ani mɛlɛkɛ ɲɛnatɔmɔlenw b’o kɔrɔsira. O la, a gwɛnin lo ko Jehova ye cii di mɛlɛkɛ dɔw ma u k’u janto kafow la. Misali la, u be Jehova sagokɛlaw latanga, u b’u dɛmɛ waajuli la ani u ye min kɔrɔsi kafow kɔnɔ, u b’o lase Jehova ma.—Mat. 18:10; Yir. 14:6.