1-2. a) Mun lo tun ɲinina Yezu ka ciden saba fɛ ani u y’o koo ta cogo di? b) An bena mun lo lajɛ barokun nin na?

SAAN 32 ka Tɛmɛnkan seli kɔ, ciden Piyɛri, Zaki ani Zan ɲɛɛ lara yelifɛn kabakoman dɔ kan. N’a sɔrɔ o kɛra Ɛrɛmɔn kulujan lo kan. O yɔrɔ la, Yezu cogo yɛlɛmana u ɲɛɛ na. “A ɲada tun be manamana i n’a fɔ tile, a ka fani tun gwɛra parapara.” (Mat. 17:1-4). O yelifɛn laban fan fɛ, cidenw ye Ala kumakan mɛn ko: “Nin ye ne Dencɛ kanunin ye. Ne sagoladen lo, aw ka mɛnni kɛ a fɛ.” (Mat. 17:5). O kɔ, o ciden saba y’a yira u ka ɲɛnamaya kɛcogo fɛ k’u be mɛnni kɛ Yezu fɛ. An b’a fɛ k’u ladegi.

² Barokun tɛmɛnin na, an y’a ye ko n’an be mɛnni kɛ Yezu fɛ, an man ɲi ka koo dɔw kɛ. Barokun nin na, an bena koo fila lajɛ Yezu ko an ka ɲi ka minw kɛ.

3. Ka kɛɲɛ ni Matiyo 7:13, 14 ye, an ka ɲi ka mun lo kɛ?

³ Matiyo 7:13, 14 kalan. A kɔrɔsi ko Yezu kumana sira fila koo la minw donda tɛ kelen ye. Kelen donda ka bon ani tɔɔ kelen donda ka dɔgɔ. Sira sabanan tɛ yen. An ka ɲi k’a latigɛ an yɛrɛ ma, an bena sira min ta. O ye desizɔn kɔrɔtaninba lo ye sabu sira kelenpe dɔrɔn lo be taga ni mɔgɔ ye ɲɛnamaya banbali yɔrɔ la.

4. “Siraba” min kofɔra, o cogoya lakali.

 ⁴ Faranfasi minw b’o sira fila cɛ, an k’o to an hakili la. Mɔgɔ caaman be “siraba” ta sabu a tagama ka nɔgɔ. A fɔ man di, nka mɔgɔ caaman b’a latigɛ ka to o sira kan ani jamaba min b’o sira kan, u b’o ladegi. U tɛ sɔn a ma ko Sutana lo be mɔgɔw lasunna u k’o sira ta ani k’o sira be taga ni mɔgɔ ye halakili yɔrɔ la.—1 Kor. 6:9, 10; 1 Zan 5:19.

5. Dɔw ye jijali jumanw lo kɛ ka “sirafitini” sɔrɔ ani k’a ta?

⁵ Sira filanan ka dɔgɔ ani Yezu ko a sɔrɔbagaw man ca. Mun na do? A kɔrɔsi ko vɛrise nɔfɛta la, Yezu y’a ka kalandenw lasɔmi ngalon kiraw koo la (Mat. 7:15). Mɔgɔ dɔw ko diinan waa caaman lo be yen ani u fanba b’a fɔ k’u ka kalanw ye tiɲɛn ye. Komi diinanw ka ca ten, o ye mɔgɔ miliyɔn caaman fari faga wala k’u hakili ɲagami fɔɔ u yɛrɛ tɛ ɲɛnamaya sira ɲinina tugun. Nka mɔgɔ be se k’o sira sɔrɔ. Yezu ko: “N’aw ye ne ka kuma bato, aw be kɛ n ka kalandenw ye tiɲɛ na. O la, aw bena tiɲɛ lɔn, o tiɲɛ le bena aw kɛ hɔrɔnw ye.” (Zan 8:31, 32). Koo ɲuman lo k’a lɔn ko i ma tugu jamaba kɔ, nka i ye tiɲɛn diinan lo ɲini. I y’a daminɛ ka Ala ka Kuma sɛgɛsɛgɛ koɲuman walisa k’a lɔn Ala be min ɲini an fɛ. Ani, i ye Yezu ka kalanw sira tagama. I y’a faamu fana ko Jehova b’a ɲini an fɛ ko an ka ban ngalon diinanw ka kalanw na ani fɛti minw basiginin lo kafiriyakow kan. Ka fara o kan, i y’a faamu ko Jehova be min ɲini an fɛ, a be se ka gwɛlɛya i ma k’o kɛ ani koo minw man di a ye a man nɔgɔ k’u dabila (Mat. 10:34-36). N’a sɔrɔ a ma nɔgɔya i ma ka yɛlɛmani bɛnninw kɛ. Nka i m’i fari faga sabu i be i sankolola Faa kanu ani i b’a fɛ k’i koo diya a ye. Siga t’a la, i ye a dusu diya yɛrɛ le!—Talenw 27:11.

6. Ka kɛɲɛ ni Zaburuw 119:9, 10, 45, 133 ye, mun lo be se k’an dɛmɛ ka to sirafitinin kan?

⁶ N’an y’a daminɛ ka sirafitinin ta, mun lo be se k’an dɛmɛ ka to a kan? An ka ɲɛyirali dɔ lajɛ. Sira dennin minw be tɛmɛ kuluyɔrɔw la, tuma caaman na u be nigɛ dɔw don don o siraw gɛrɛnw na. O nigɛw kuun ye ka mobili n’a bolibaga latanga. U be mobili bolibaga dɛmɛ a kana taga sira gɛrɛn na kojugu wala ka bɔ sira kan. Mɔgɔ si t’a jati k’o nigɛw donnin ye koo jugu ye! Jehova ka sariya minw be Bibulu kɔnɔ, u be komi o nigɛw. U b’an dɛmɛ ka to sirafitinin kan.—Zaburuw 119:9, 10, 45, 133 kalan.

7. Kanbelew ni sunguruw ka ɲi ka sirafitinin jati cogo di?

⁷ Kanbelew ni sunguruw, yala aw b’a jati tuma dɔw la ko Jehova ka sariyaw b’aw bali k’aw sago kɛ wa? Sutana b’a fɛ aw k’o lo miiri. Minw ye siraba ta ani a be komi u be ɲɛnamaya diyabɔra, Sutana b’a fɛ aw ka ɲɛbɔ olu fɛ. A b’a fɛ aw k’a miiri ko aw tɛ ɲɛnamaya diyabɔra a ɲɛɛ ma i ko aw ka lakɔli filankuruw wala aw be mɔgɔ minw ye ɛntɛrɛnɛti kan. Sutana b’a fɛ fana aw k’a miiri ko Jehova ka sariyaw b’aw balila ka ɲɛnamaya diyabɔ a ɲɛɛ ma. * Aw ka nin to aw hakili la: Minw be Sutana ka sira kan, a t’a fɛ olu k’a lɔn fɛɛn min be u  kɔnɔna o sira laban na. Nka minw be to ɲɛnamaya sira kan, Jehova kɔni be olu dɛmɛ u k’a faamu bɛrɛbɛrɛ a ye fɛɛn min labɛn u ye.—Zab. 37:29; Ezayi 35:5, 6; 65:21-23.

8. Kanbelew ni sunguruw be kalan juman lo sɔrɔ Olaf ka koo la?

⁸ An k’a filɛ aw be se ka kalan min sɔrɔ balima kanbele dɔ ka koo la. A tɔgɔ ko Olaf. * A ka klasidenw tun b’a lasun a ka kakalayakow kɛ. A y’a ɲɛfɔ u ye ko Jehova Seerew be Bibulu ka sariyaw labato u minw ɲɔgɔn tɛ yen tagamacogo ta fan fɛ. A ka klasi sunguru dɔw y’o mɛn minkɛ, u y’a kɔrɔbɔ, u kɛtɔ ka koo bɛɛ lajɛnin kɛ walisa a ka la n’olu ye. Nka, Olaf lɔra kelen kan. O koo dɔrɔn lo tun tɛ kɔrɔbɔli ye a fɛ. A ko: “N’ ka kalanfaw y’a ɲini ka n’ lasun n’ ka taga inivɛrisite la walisa mɔgɔw ka bonyaba la n’ kan. U ko n’o tɛ, n’ tɛna baara ɲuman sɔrɔ ani ka ninsɔndiya sɔrɔ n’ ka ɲɛnamaya la.” Mun lo ye Olaf  dɛmɛ ka ban u ta ma? A ko: “N’ ye teriya sɔbɛ kɛ ni n’ ka kafomɔgɔw ye. U kɛra i n’a fɔ n’ somɔgɔw. N’ y’a daminɛ fana ka Bibulu sɛgɛsɛgɛ koɲuman. N’ tun mana o kɛ, n’ tun be la a la kosɔbɛ ko n’ be tiɲɛn diinan lo la. O y’a to n’ tun cɛsirinin lo ka Jehova sago kɛ.”

9. Minw b’a fɛ ka to sirafitinin kan, olu ka ɲi ka mun lo kɛ?

⁹ Sutana b’a fɛ k’i lasun i ka ɲɛnamaya sira bila. A b’a fɛ i ka tugu mɔgɔw fanba kɔ ani ka siraba ta min be taga ni “mɔgɔ ye halakiyɔrɔ la.” (Mat. 7:13). Nka, an bena to sirafitinin kan n’an tora ka mɛnni kɛ Yezu fɛ ani n’an b’a jati ko an latanganin lo o sira kan. Sisan, an ka koo wɛrɛ lajɛ Yezu ko an ka ɲi ka min kɛ.

10. Ka kɛɲɛ ni Matiyo 5:23, 24 ye, Yezu ko an ka ɲi ka mun lo kɛ?

¹⁰ Matiyo 5:23, 24 kalan. Yahutu minw tun be Yezu lamɛnna, Yezu ye koo dɔ lakali min kɔrɔtanin lo kosɔbɛ u fɛ. Miiri k’a filɛ: Mɔgɔ dɔ tagara Alabatosoba la ani a labɛnnin lo k’a ka bɛgɛn di sarakalasebaga dɔ ma walisa a k’a kɛ saraka ye. O wagati yɛrɛ la, a hakili jigira ko a balima dɔ diminin be a kɔrɔ. A ka ɲi k’a ka saraka bila fɔlɔ ani “ka taga.” Mun na do? Sabu a tun ka ɲi ka koo kɔrɔtaninba dɔ kɛ fɔlɔ ka sɔrɔ ka na a ka saraka bɔ Jehova ye. Yezu y’a fɔ ka gwɛ ko: “Taga yafa daali [i balima] fɛ” fɔlɔ.

11. Yakuba ye jijali min kɛ walisa ka hɛɛrɛ kɛ ni Ezawu ye, o lakali.

¹¹ An be kalan nafaman sɔrɔ cɛmɔgɔba Yakuba fɛ hɛɛrɛ kɛcogo koo la. Yakuba bɔra a wolodugu la ka taga jamana wɛrɛ la. Saan 20 ɲɔgɔn o kɔ, Ala tɛmɛna mɛlɛkɛ dɔ fɛ k’a fɔ a ye ko a ka kɔsegi a wolodugu la (Zɛnɛzi 31:11, 13, 38). Nka o yɔrɔ la, a kɔrɔcɛ Ezawu tun b’a fɛ k’a faga (Zɛnɛzi 27:41). “Yakuba siranna kosɔbɛ, a hakili ɲagamina.” N’a sɔrɔ a tun b’a miiri ko a kɔrɔcɛ bele diminin be a kɔrɔ (Zɛnɛzi 32:8). Yakuba ye mun lo kɛ walisa ka hɛɛrɛ kɛ n’a balimacɛ ye? A fɔlɔ, a ye Jehova deli o koo la n’a dusu bɛɛ ye. O kɔ, a ye bonyafɛn caaman ci Ezawu ma (Zɛnɛzi 32:10-16). A laban, tuma min na a ye Ezawu ye, a ye bonya la a kan. A y’a kunbiri gwan duguma Ezawu ɲɛɛ kɔrɔ. A m’o kɛ siɲɛ kelen wala siɲɛ fila dɔrɔn dɛ, nka fɔɔ siɲɛ wolonfila! Yakuba y’a yɛrɛ majigi ani ka koow kɛ ni bonya ye minkɛ, a ye hɛɛrɛ kɛ n’a balimacɛ ye.—Zɛnɛzi 33:3, 4.

12. An be kalan juman lo sɔrɔ Yakuba ka koo la?

¹² Yakuba y’a yɛrɛ labɛn cogo min na k’a balimacɛ kunbɛn ani a ye koow kɛ cogo min na, an be kalan sɔrɔ o la. Yakuba ye dɛmɛ ɲini Jehova fɛ ni majigilenya ye. O kɔ, a ye koow kɛ ka kɛɲɛ n’a ka delili ye. A y’a seko fisaman kɛ walisa ka hɛɛrɛ kɛ n’a balimacɛ ye. Tuma min na u ye ɲɔgɔn kunbɛn, mɔgɔ min filila ani tiɲɛn be min fɛ, Yakuba m’a sɔsɔli kɛ ni Ezawu ye o koo la. A ka laɲinita tun ye ka hɛɛrɛ kɛ n’a balimacɛ ye. An be se ka Yakuba ladegi cogo di?

13-14. N’an donna balima dɔ gasi la, an ka ɲi ka mun lo kɛ?

¹³ An minw be ɲɛnamaya sira kan, an b’a fɛ hɛɛrɛ ka to an ni an balimaw cɛ (Ɔrɔm. 12:18). N’an y’a ye ko an donna an balima dɔ gasi la, an ka ɲi ka mun lo  kɛ do? I ko Yakuba, an ka ɲi ka Jehova deli n’an dusu bɛɛ ye. An be se k’a deli a k’an dɛmɛ walisa an ka hɛɛrɛ sigi n’an balima ye.

¹⁴ An ka ɲi ka wagati ta fana k’an yɛrɛ sɛgɛsɛgɛ. An be se k’an yɛrɛ ɲininga ko: “Yala ne be sɔn k’a fɔ ko n’ filila wa? Yala n’ be sɔn ka n’ yɛrɛ majigi ka yafa deli ani ka hɛɛrɛ kɛ ni n’ balima ye wa? Jehova ni Yezu bena mun lo miiri ne koo la ni n’ y’a bɔ n’ yɛrɛ la ka hɛɛrɛ kɛ ni n’ balima ye?” An ka jaabiliw be se k’an lasun ka mɛnni kɛ Yezu fɛ ani k’an yɛrɛ majigi ka kuma n’an balima ye walisa ka hɛɛrɛ sigi an ni ɲɔgɔn cɛ. An be se ka Yakuba ladegi o koo la.

15. Sariyakolo min be sɔrɔ Efɛzikaw 4:2, 3 kɔnɔ, n’an b’o sira tagama, o b’an dɛmɛ cogo di ka hɛɛrɛ kɛ n’an balima ye?

¹⁵ Miiri k’a filɛ min tun bena kɛ ni Yakuba tun y’a daminɛ ka sɔsɔli kɛ ni Ezawu ye walisa k’a lɔn mɔgɔ min filila ani joo be tigi min fɛ! U ka kumaɲɔgɔnya tun tɛna ban hɛɛrɛ la. N’an fana tagara bɔ an balima ye walisa ka hɛɛrɛ sigi n’a ye, an ka ɲi k’o kɛ ni majigilenya ye (Efɛzikaw 4:2, 3 kalan). Talenw 18:19 b’a fɔ ko: “U donna balima min gasi la, ka gwɛrɛ ale la, o ka gwɛlɛ ka tɛmɛ ka don dugu barikaman kɔnɔ. Ka dugu barikaman minɛ, o ka nɔgɔ ni o sɔsɔli banni ye.” N’an b’an yɛrɛ majigi ka yafa deli o be se k’a to an balima be sɔn ka hɛɛrɛ kɛ n’an ye.

16. An ka ɲi ka miiri mun lo la ani mun na do?

¹⁶ An bena min fɔ ani an bena o fɔ cogo min na an balima ye, a ka ɲi an ka miiri koɲuman o la fana. An labɛnnin kɔ, an ka ɲi ka taga kuma n’an balima ye. An ka laɲinita ye ka jɛnɲɔgɔnya ɲuman sigi an ni ɲɔgɔn cɛ kokura. A be se ka kuma dɔw fɔ a daminɛ na minw be digi an na. O koo ɲɔgɔn be se k’a to an be dimi joona wala k’a ɲini ka joo di an yɛrɛ ma. Nka, yala o bena hɛɛrɛ sigi an n’an balima cɛ wa? Ayi dɛ! A to i hakili la ko ka hɛɛrɛ sigi i n’i balima cɛ, o kɔrɔtanin lo ka tɛmɛ k’a ɲini k’a lɔn mɔgɔ min filila ani joo be tigi min fɛ.—1 Kor. 6:7.

17. I be kalan juman lo sɔrɔ Gilbert ka koo la?

¹⁷ Balimacɛ dɔ min tɔgɔ ko Gilbert,  ale ye jijaliba kɛ walisa ka kɛ hɛɛrɛkɛla ye. A ko: “N’ ye gwɛlɛyaba dɔ sɔrɔ ni n’ denmuso ye. Saan fila ni kɔ kɔnɔ, n’ ye n’ jija sɔbɛ la ka n’ kɔnɔgwɛ ka kuma a fɛ ni dususuman ye. N’ y’o kɛ walisa jɛnɲɔgɔnya ɲuman ka kɛ an ni ɲɔgɔn cɛ kokura.” Gilbert ye mun lo kɛ ka fara o kan? A ko: “Tuma o tuma sanni an ka kuma, n’ tun be delili kɛ ani n’ tun b’a to n’ hakili la ko n’ man ɲi k’a to n’ dusu be gwan n’a ye kuma bɛnbaliw fɔ. N’ tun ka ɲi ka sɔn ka to ka yafa a ma. N’ y’a faamu ko n’ man ɲi k’a ɲini k’a yira ko joo be n’ fɛ. Nka, n’ ka kunkanbaara ye k’a to hɛɛrɛ ka kɛ.” Mun lo sɔrɔla o la do? Gilbert ko: “Bi, n’ dusu lafiyanin lo sabu n’ be jɛnɲɔgɔnya ɲuman kɛra ni n’ somɔgɔw bɛɛ ye.”

18-19. N’an donna mɔgɔ dɔ gasi la, an ka ɲi k’an jija ka mun lo kɛ ani mun na do?

¹⁸ Ayiwa, n’an y’a ye ko an donna balima dɔ gasi la, an ka ɲi k’an jija ka mun lo kɛ do? I ko Yezu y’a ɲini an fɛ cogo min na, an ka hɛɛrɛ sigi an n’an balima cɛ. An ka o kofɔ Jehova ye delili la ani ka hakili senu deli a fɛ walisa o k’an dɛmɛ ka hɛɛrɛ sigi n’an balima ye. N’an y’o kɛ, an ninsɔn bena diya ani an bena a yira o sen fɛ fana ko an be mɛnni kɛra Yezu fɛ.—Mat. 5:9.

¹⁹ An be Jehova waleɲuman lɔn sabu a be tɛmɛ a ka “jama kuntigi” Yezu fɛ ka ladiliw di an ma ni kanuya ye (Efɛz. 5:23). I ko ciden Piyɛri, Zaki ani Zan, an k’an cɛsiri “ka mɛnni kɛ a fɛ.” (Mat. 17:5). An y’a ye an be se k’o kɛ cogo min na an kɛtɔ ka hɛɛrɛ kɛ n’an balima kerecɛn dɔ ye, an donna min gasi la. N’an b’o kɛ ani n’an be to ɲɛnamaya sirafitinin kan, an bena duga caaman sɔrɔ kabini sisan ani sini ma, an bena hɛɛrɛ banbali sɔrɔ!