1. “Ala ka hɛrɛ” ye mun lo ye ani o b’an nafa cogo di? (Filipikaw 4:6, 7).

 HƐƐRƐ sifa dɔ be yen, duniɲamɔgɔw tɛ min lɔn. O ye “Ala ka hɛrɛ” lo ye, o kɔrɔ hakilisigi, an be min sɔrɔ sabu an be jɛnɲɔgɔnya teriman kɛra ni an sankolola Faa ye. N’an be ni o hɛɛrɛ ye, an b’a ye ko an latanganin lo (Filipikaw 4:6, 7 kalan). O b’a to an be jɛnɲɔgɔnya teriman kɛ ni “Hɛrɛtigi Ala” ye ani a kanubaga tɔɔw ye (1 Tes. 5:23). N’an be an Faa Ala lɔn, k’an jigi la a kan ani ka mɛnni kɛ a fɛ, a ka hɛɛrɛ be se k’an hakili sigi gwɛlɛya wagati la.

2. Mun na an lanin b’a la ko an be se ka “Ala ka hɛrɛ” sɔrɔ?

² Yala an be se ka Ala ka hɛɛrɛ sɔrɔ tiɲɛn na gwɛlɛya nunu bɛɛ n’a ta wa: fɔɲɔbana, kasara, kɛlɛ wala kɔrɔbɔli? O gwɛlɛyaw kelen kelen bɛɛ be se ka siranya bila an na. Nka, Yezu ye a ka kalandenw ladi ko: “Aw hakili kana ɲagami, aw kana siran.” (Zan 14:27). An ninsɔn ka di k’a lɔn ko balima caaman ye Yezu ka ladili sira tagama. Jehova ka dɛmɛ barika la, u ye hakilisigi sɔrɔ gwɛlɛyabaw tuma na.

3. Fɔɲɔbana be se k’an ka hɛɛrɛ nagasi cogo di?

³ Fɔɲɔbana be se k’an ka ɲɛnamaya fanba yɛlɛma pewu! An k’a filɛ COVID-19 fɔɲɔbana ye nɔɔ min to mɔgɔ caaman kan. Sɛgɛsɛgɛri dɔ sen fɛ, u ye mɔgɔ minw ɲininga, u tilan ni kɔ y’a fɔ ko u tun tɛ se ka sinɔgɔ ka ɲɛ fɔɲɔbana tuma na. O wagati la, dɔ farala haminankow, hakiliɲagami banaw, dɔrɔmin, dɔrɔgi ta ani fariyakow kan denbaya kɔnɔ. Mɔgɔ caaman y’a ɲini fana k’u yɛrɛ faga. Ni fɔɲɔbana b’i ka mara la, i be se ka see sɔrɔ cogo di i ka haminankow kan ani ka Ala ka hɛɛrɛ sɔrɔ?

4. Yezu ye kiraya kuma min fɔ laban loonw koo la, an kɛtɔ k’o lɔn, mun na o b’an hakili sigi?

 ⁴ Yezu tun kɔnna k’a fɔ ko laban loonw na, fɔɲɔbanaw bena kɛ “yɔrɔ dɔw la.” (Luka 21:11). An kɛtɔ k’o lɔn, o b’an hakili sigi cogo di? O fɔɲɔbanaw tɛ bari an na. An b’a faamu ko koow be kɛra i ko Yezu tun y’a fɔ cogo min na. O kama, an be tugu Yezu ka ladili kɔ, a ye min di laban wagati mɔgɔw ma. A ko: “Aw hakili kana ɲagami.”—Mat. 24:6.

5. a) Ka kɛɲɛ ni Filipikaw 4:8, 9 ye, an ka ɲi ka delili kɛ mun lo koo la ni fɔɲɔbana be an ka mara la? b) N’i be Bibulu kalangwɛ lamɛn, o bena i nafa cogo di?

⁵ Ni fɔɲɔbana b’an ka mara la, o be se ka hami ni siranya bila an na. O lo ye balimamuso Desi sɔrɔ. b A facɛfitinin, a facɛfitinin ka deen dɔ ani a ka dɔgɔtɔrɔ sara COVID-19 bana kosɔn. O kɔ, a tun sirannin lo ko o bana bena ale fana minɛ ani ko a bena a yɛlɛma a bamuso la min kɔrɔnin lo. Fɔɲɔbana kosɔn, a tun be siranna ko a ka baara bena tiɲɛ. O kama, a tun b’a yɛrɛ ɲiningara a tun bena se ka dumuni san ani ka luwanse sara cogo min na. O koow tun be hami bila a la fɔɔ a tun tɛ se ka sinɔgɔ sufɛ. Nka Desi hakili sigira kokura. Mun lo y’a dɛmɛ do? A ye Jehova deli ko a k’ale dɛmɛ a hakili ka sigi ani a ka kɛ ni miiriya ɲumanw ye (Filipikaw 4:8, 9 kalan). A tun be Jehova lamɛn Bibulu kalangwɛ lamɛnta sababu fɛ. A ko: “Kalankɛla tun be kuma ni dususuman ye minkɛ, o ye n’ hakili sigi ani ka n’ hakili jigi ko Jehova b’a janto n’ na.”—Zab. 94:19.

6. Kelenna kalan ani kafo ka lajɛnw bena i dɛmɛ cogo di?

⁶ Fɔɲɔbana tuma na, n’a sɔrɔ an ka delinanko dɔw bena yɛlɛma. Nka, kana a to o k’i bali ka kelenna kalan kɛ ani ka taga lajɛnw na. Balima dɔw ka koo lakalila an ka gafew ni videwow kɔnɔ. N’i b’o lajɛ, o bena i hakili jigi ko i balimaw be kantigiya kɛra Jehova ye i ka gwɛlɛyaw ɲɔgɔn bɛɛ n’a ta (1 Piyɛri 5:9). Lajɛnw bena i dɛmɛ i ka to ka miiri jijali kumaw na minw be sɔrɔ Bibulu kɔnɔ. U bena sababu di i ma fana ka tɔɔw jija ani ka jijali sɔrɔ ka bɔ u fɛ (Ɔrɔm. 1:11, 12). Miiri k’a filɛ Jehova y’a sagokɛlaw dɛmɛ cogo min na tuma min na u tun man kɛnɛ, u tun sirannin lo wala u tun b’a miiri ko u be u kelen na. N’i b’o kɛ, i ka limaniya barika bena bonya ani i bena la a la ko a bena ele fana dɛmɛ.

7. I be kalan juman lo sɔrɔ ciden Zan ka koo la?

⁷ I jija ka kumaɲɔgɔnya kɛ n’i balimaw ye. Fɔɲɔbana tuma na, n’a sɔrɔ an ka ɲi ka furancɛ to an ni tɔɔw cɛ, hali an  balimaw yɛrɛ. O be se k’a to an be kɛ ni ciden Zan dusukunnakow ɲɔgɔn ye. A tun b’a fɛ k’a teri Gayusi ye (3 Zan 13, 14). Nka, a sɔnna a ma ko a tun tɛ se k’a ye wagati dɔ la. O kama, Zan y’a seko kɛ, a kɛtɔ ka lɛtɛrɛ ci a ma. Tuma dɔw la, n’i tɛ se ka taga bɔ i balimaw ye, kaan bɔ u ma telefɔni, vidéoconférence wala mesazi sababu fɛ. N’i be to ka kumaɲɔgɔnya kɛ n’i kerecɛnɲɔgɔnw ye, i tɛna a jati ko i b’i kelen na ani i hakili bena sigi. Ni hami b’i la kojugu, kaan bɔ diinan mɔgɔkɔrɔw ma ani sɔn u ka ladili ɲumanw na.—Ezayi 32:1, 2.

8. Ni kasara dɔ kɛra, o be se k’i ka hɛɛrɛ nagasi cogo di?

⁸ Ni sanjiba benna ka tiɲɛni kɛ, ni dugukolo yɛrɛyɛrɛla wala ni tasuma ye tiɲɛni kɛ i ka mara la ka ye, n’a sɔrɔ o ye hamiba bila i la wagatijan kɔnɔ. N’i ka mɔgɔ kanulen dɔ sara wala i ka boon ani i bololafɛn wɛrɛw halakira, n’a sɔrɔ o y’i dusu kasi, k’i jigi tigɛ wala k’i dusu gwan yɛrɛ. O kɔrɔ tɛ ko i be bololafɛnw kanu wala ko i ka limaniya barika man bon. N’an tɛ koow ta cogo ɲuman na gwɛlɛyabaw tuma na, o be faamu (Zɔbu 1:11). Nka gwɛlɛyaw bɛɛ n’a ta, i be se ka hɛɛrɛ sɔrɔ. Cogo di do?

9. Yezu y’an labɛn cogo di kasaraw kama?

⁹ Yezu ka kiraya kumaw to i hakili la. Dɔw b’a miiri ko kasara tɛna u sɔrɔ ka ye. Nka, an b’a lɔn ko kasara caaman bena kɛ an ka wagati la ani ko u dɔw be se k’an sɔrɔ. Yezu y’a fɔ a ka kalandenw ye ko sanni laban ka se, “dugukolo bena yɛrɛyɛrɛ kosɔbɛ yɔrɔ dɔw la” ani kasara wɛrɛw bena kɛ (Luka 21:11). A y’a fɔ fana ko “kojugu bena fanga sɔrɔ” ani an ɲɛɛ b’o lo la bi. Misali la, mɔgɔfaga, fariyakow ani benkannikow be kɛ (Mat. 24:12). Jehova banna minw na, Yezu m’a fɔ ko o koo juguw bena olu dɔrɔn lo sɔrɔ. Tiɲɛn na, kasaraw ye Jehova sagokɛla kantigi caaman sɔrɔ (Ezayi 57:1; 2 Kor. 11:25). N’a sɔrɔ Jehova tɛna kabakow kɛ walisa k’an latanga kasaraw bɛɛ ma. Nka an mako be dɛmɛ min na, a bena o di an ma walisa an hakili siginin ka to ani an ka to hɛɛrɛ la.

10. N’an b’an yɛrɛ labɛn kasaraw kama sisan, mun na o b’a yira ko an limaniyanin lo? (Talenw 22:3).

¹⁰ A bena nɔgɔya an ma an hakili siginin ka to kasara tuma na, n’an kɔnna k’an yɛrɛ labɛn o kama. Nka n’an y’o kɛ, yala o b’a yira ko an limaniyanin tɛ Jehova la wa? Ayi dɛ! Tiɲɛn na, n’an b’an yɛrɛ labɛn kasara dɔ kama, o b’a yira ko an lanin b’a la ko see be Jehova k’a janto an na. Cogo di do? Ala ka Kuma b’an ladi ko an k’an yɛrɛ labɛn kasaraw kama, minw be se ka kɛ an ka mara la (Talenw 22:3 kalan). Ala ka ɔriganisasiyɔn b’an lasɔmi siɲɛ caaman an k’an yɛrɛ labɛn kasaraw kama. A be tɛmɛ an ka zurunaliw, kafo ka lajɛnw ani kunnafoni bɛnninw fɛ k’o kɛ. c Yala an jigi lanin be Jehova kan wa? N’o lo, an bena o ladiliw sira tagama sisan yɛrɛ, sanni kasara dɔ ka kɛ.

11. I be kalan juman lo sɔrɔ Margaret ka koo la?

¹¹ An ka balimamuso Margaret ka koo lajɛ. Kongo tun be jɛnina a ka mara la ani o kama, faamanw ko a ka bɔ a ka soo ka taga yɔrɔ wɛrɛ la. Komi mɔgɔ caaman tun be bolila wagati kelen na, mobili caaman tun be sira kan ani mɔgɔ  si tun tɛ se ka taga ɲɛ. Yɔrɔ bɛɛ tun ye sisi ye ani Margaret tun tɛ se ka bɔ a ka mobili kɔnɔ wagati dɔ la. Nka, a kisira sabu a tun kɔnna k’a yɛrɛ labɛn. Karti dɔ tun b’a ka sakɔsi kɔnɔ min tun be se k’a dɛmɛ k’a lɔn a bena sira min ta. A yɛrɛ tun kɔnna k’o sira ta k’a filɛ walisa koow ka nɔgɔya a ma kasara tuma na. Margaret kɔnna k’a yɛrɛ labɛn minkɛ, a kisira.

12. Cikan minw be di an ma walisa an latanganin ka to, mun na an ka ɲi k’u sira tagama?

¹² Walisa k’an latanga ani koow ka kɛ cogo bɛnnin na, n’a sɔrɔ faamanw bena a ɲini an fɛ an ka kuwurufe (couvre-feu) sariya labato, an ka boli ka bɔ an ka soo wala an ka koo tigitigi wɛrɛw kɛ. Mɔgɔ dɔw tɛ teliya ka cikanw labato wala u be koow bila wagati wɛrɛ la sabu u t’a fɛ ka taga k’u bololafɛnw to yen. Nka kerecɛnw be koow ta cogo di? Bibulu b’a fɔ ko: “Aw k’aw yɛrɛ majigi diɲɛ faamaw bɛɛ ye Matigi kosɔn, aw k’aw yɛrɛ majigi jamanatigi ye bari jamana ka koo be ale lo bolo. An’a ka lasigidenw ye, bari olu ye see sɔrɔ a fɛ.” (1 Piyɛri 2:13, 14). Ala ka ɔriganisasiyɔn fana be cikanw di an ma walisa an latanganin ka to. U be to k’an hakili jigi tuma o tuma ko an be baara kɛ ni telefɔni nimɔrɔ min ye, an k’o di diinan mɔgɔkɔrɔw ma walisa u ka se ka kaan bɔ an ma kasara tuma na. Yala i y’o kɛ wa? U be se ka cikanw di an ma fana ka ɲɛsin koo nunu ma: ka to an ka soo, k’an ka soo to yen ka boli ka taga yɔrɔ wɛrɛ la, an makoɲɛfɛn jɔnjɔnw sɔrɔcogo wala tuma min na ani cogo min na an be se ka dɛmɛ lase tɔɔw ma. N’an m’o cikanw labato, an be se k’an yɛrɛ ani diinan mɔgɔkɔrɔw niin bila farati la. A to i hakili la k’o cɛɛ kantigiw b’u janto an na (Eburuw 13:17). Margaret ko: “N’ lanin b’a la kosɔbɛ ko n’ ye diinan mɔgɔkɔrɔw ani ɔriganisasiyɔn ka cikanw labato minkɛ, o lo ye n’ niin kisi.”

13. Kerecɛn caaman minw bolila ka taga yɔrɔ wɛrɛ la, mun lo y’u dɛmɛ u ninsɔndiyanin tora ani u ka hɛɛrɛ ma nagasi?

¹³ Balima caaman bɔra u ka yɔrɔ la ka taga sigi yɔrɔ wɛrɛw la kasara, marifakɛlɛ wala bɛnbaliyakow kosɔn. U b’u seko bɛɛ kɛ ka deli u ka yɔrɔ kura la ani u be sin k’u seen don Alakow la. I ko saan kɛmɛkulu  fɔlɔ kerecɛn minw tun jɛnsɛnna kɔrɔbɔli kosɔn, o balimaw be tora ka “kibaru diman fɔ.” (Kɛw. 8:4). Waajuli baara b’u dɛmɛ u ka to ka miiri Ala ka Masaya koo la sanni ka to ka miiri u ka gwɛlɛyaw koo la. O la, u ninsɔndiyanin tora ani u ka hɛɛrɛ ma nagasi.

14. Kɔrɔbɔli be se k’an ka hɛɛrɛ nagasi cogo di?

¹⁴ Ni kɔrɔbɔli b’an kan, an be se ka bɔnɛ fɛɛn caaman na minw tun ka teli k’an hakili sigi. N’an be se ka ɲɔgɔn lajɛn, ka waajuli kɛ an sago la, k’an ka loon o loon koow kɛ ani an tɛ siran ko u bena an minɛ k’an don kaso la, o b’an ninsɔn diya. N’an tɛ se k’o koow kɛ tugun, o be se k’a to an be hami ani an be siran sinikow ɲɛ. O tɛ koo jugu ye. Nka, an k’an janto sabu Yezu y’a yira ko kɔrɔbɔli be se k’a ka kalandenw kunnatiɲɛ (Zan 16:1, 2). O la, an be se ka to hɛɛrɛ la cogo di kɔrɔbɔli tuma na?

15. Mun na an man ɲi ka siran kɔrɔbɔli ɲɛ? (Zan 15:20; 16:33).

¹⁵ Ala ka Kuma b’a fɔ an ye ko: “Mɔgɔ minw bɛɛ b’a fɛ ka jɛn ni Yezu Krista ye ka kɛ Alaɲasiranbagaw ye sɔbɛ la, olu bena tɔɔrɔ sɔrɔ.” (2 Tim. 3:12). A tun ka gwɛlɛ balimacɛ Andrei fɛ ka sɔn o ma tuma min na bali sigira an ka baara kan a ka jamana na. A tun be to ka miiri ko: “Jehova Seerew ka ca yan. U be se k’an bɛɛ minɛ cogo di?” Nka, sanni o miiriyaw ka Andrei hakili sigi, u tun b’a hakili ɲagami le. Balima wɛrɛw ye koow to Jehova bolo ani u m’a miiri ko polisiw tɛna olu minɛ. U tun b’a lɔn k’o be se ka kɛ, nka u hakili tun ɲagaminin tɛ i ko Andrei. O kama, Andrei y’a latigɛ ka koow jati i k’o balimaw ani k’a jigi la Ala kan. Dɔɔni o kɔ, a hakili sigira ani sisan, a ninsɔn ka di gwɛlɛyaw bɛɛ n’a ta. An fana hakili be se ka sigi o cogo la. Yezu y’an lasɔmi ko an bena kɔrɔbɔliw sɔrɔ, nka a y’an hakili sigi fana ko an be se ka to kantigiya la.—Zan 15:20; 16:33 kalan.

16. Kɔrɔbɔli tuma na, an ka ɲi ka cikan juman lo labato?

¹⁶ Ni faamanw ye bali sigi an ka baara wala a faan caaman kan, n’a sɔrɔ an bena cikanw sɔrɔ ka bɔ Betɛli ani diinan  mɔgɔkɔrɔw fɛ. O kuun ye k’an latanga, k’an dɛmɛ an ka to ka dumuni sɔrɔ Alako ta fan fɛ ani k’an dɛmɛ an ka to k’an seko bɛɛ kɛ waajuli baara la. I jija kosɔbɛ k’o cikanw labato hali n’i t’a faamu bɛrɛbɛrɛ u dira kuun min kama (Zaki 3:17). Ka fara o kan, joo tɛ mɔgɔ minw fɛ ka kunnafoni dɔw sɔrɔ an balimaw wala kafo ka baaraw koo la, kana o di u ma abada.—Waaj. 3:7.

17. I ko cidenw saan kɛmɛkulu fɔlɔ la, an cɛsirinin lo ka mun lo kɛ?

¹⁷ Kuun jɔnjɔn minw kama Sutana be Ala sagokɛlaw kɛlɛ, u dɔ ye ko u be “seereya” kɛ Yezu koo la (Yir. 12:17, Bible senuma). Kana a to Sutana n’a ka duniɲa ka siranya bila i la. Ka waajuli kɛ ani ka mɔgɔw kalan kɔrɔbɔli bɛɛ n’a ta, o be ninsɔndiya ni hɛɛrɛ di an ma. Saan kɛmɛkulu fɔlɔ la, Yahutuw ka faamanw y’a fɔ ka gwɛlɛya cidenw ye ko u ka waajuli dabila. Nka, o cɛɛ kantigiw y’a latigɛ ka mɛnni kɛ Ala fɛ. U tora ka waajuli kɛ ani o y’a to u ninsɔn diyara (Kɛw. 5:27-29, 41, 42). Tiɲɛn lo ko ni bali sigira an ka baara kan, an ka ɲi ka waajuli kɛ nɛmɛnɛmɛ (Mat. 10:16). Nka n’an tora k’an seko bɛɛ kɛ, an bena hɛɛrɛ sɔrɔ sabu an be Jehova dusu diyara ani an be kisili kibaro lasera mɔgɔw ma.

18. An be se ka hɛɛrɛ sɔbɛ sɔrɔ jɔn lo fɛ?

¹⁸ A to i hakili la ko an be se ka hɛɛrɛ sɔrɔ gwɛlɛyabaw bɛɛ n’a ta. O wagatiw la, an k’a to an hakili la ko an mako be Ala ka hɛɛrɛ lo la ani Jehova kelenpe lo be se k’o di an ma. I jigi la a kan koo nunu bɛɛ n’a ta: fɔɲɔbana, kasara wala kɔrɔbɔliw. I magwɛrɛnin ka to a ka ɔriganisasiyɔn na. Siniɲasigi ɲuman min b’i kɔnɔna, to ka miiri o la. O la, “hɛrɛtigi Ala bena to [n’i] ye.” (Filip. 4:9). Barokun nata la, an bena a ye an be se k’an balimaw dɛmɛ cogo min na u ka Ala ka hɛɛrɛ sɔrɔ gwɛlɛyaw tuma na.