Kalanbagaw ka ɲiningaliw
Zaburuw 145:2 kɔnɔ, Dawuda y’a sɛbɛ ko ale bena Ala tɔgɔ tando “badaa-badaa.” (Bible senuma). Yala a tun b’a miirila le ko ale tɛna sa ka ye wa?
Ayi, a tun t’o lo miirila.
Dawuda y’a sɛbɛ o vɛrise kɔnɔ ko: “Ne na . . . i tɔgɔ tanu tuma bɛɛ badaa-badaa.” (Zab. 145:2, Bible senuma). A y’a sɛbɛ vɛrise wɛrɛ kɔnɔ ko: “Ne bena i bato ni kɔnɔgwɛ ye, Matigi ne ka Ala. Ne bena to ka boɲa la i tɔgɔ kan kudayi.”—Zab. 86:12.
Tuma min na Dawuda y’o kumaw sɛbɛ, a tun t’a miirila le ko ale tɛna sa abada. A tun b’a kala ma ko jurumu kosɔn, Jehova y’a latigɛ ko adamadenw be sa. A tun b’a lɔn ko ale yɛrɛ ye jurumutɔ ye (Zɛnɛzi 3:3, 17-19; Zab. 51:6, 7). A tun b’a kala ma ko hali k’a sɔrɔ mɔgɔ dɔw tun koo ka di Ala ye, u sara. U dɔw ye Ibrayima, Isiyaka ani Yakuba ye. A tun b’a lɔn ko ale fana bena sa loon dɔ (Zab. 37:25; 39:4). A ye min sɛbɛ Zaburuw 145:2 kɔnɔ, o b’a yira ko a tun b’a fɛ ani a tun cɛsirinin lo ka Ala tando fɔɔ abada, o kɔrɔ a sii bɛɛ la.—2 Sam. 7:12.
Tuma dɔw la, Dawuda ye koo dɔw sɛbɛ minw ɲɛsinna a yɛrɛ ma i ko a yirala cogo min na Zaburuw 18, 51 ani 52nan ka dadonkumaw na. Zaburuw 23nan na, Dawuda ko Jehova be i ko sagadɛndɛla min b’an ɲɛminɛ, ka lafiya di an ma ani k’an latanga. Dawuda tun ye o sagadɛndɛla ɲɔgɔn lo ye ani a tun b’a fɛ ka Ala sago kɛ a “sii bɛɛ la.”—Zab. 23:6.
A to i hakili la fana ko Jehova lo ye hakili senu di Dawuda ma a ye o kumaw bɛɛ sɛbɛ. A ye koo minw sɛbɛ, u dɔw tun ye kiraya kumaw ye minw tun bena dafa wagatijan nataw la. Misali la, Zaburuw 110nan na, Dawuda kumana wagati dɔ koo la. O wagati la, a Matigi tun bena “sigi [Ala] kinibolo” la sankolo la ani setigiyaba tun bena di a ma. Walisa ka mun kɛ do? Walisa ka kuntigiya kɛ a juguw kan ani ka “siyaw kiti” dugukolo kan. Masiya tun bena kɛ Dawuda bɔnsɔn ye. A tun bena to sankolo la ka dugukolo mara ani ka kɛ “sarakalasebaga ye waati bɛɛ.” (Zab. 110:1-6). Yezu y’a yira ko Zaburuw 110nan ka kiraya kuma ɲɛsinna ale lo ma ani ko o kiraya kuma bena dafa sini ma.—Mat. 22:41-45.
Koo minw tun bena kɛ Dawuda ka wagati la ani tuma min na a tun bena kunu ka bɔ saya la walisa ka Jehova tando fɔɔ abada, a y’o sɛbɛ hakili senu barika la. O la, Zaburuw 37:10, 11, 29 ɲɛsinna a sɛbɛwagati ani wagati nataw fana lo ma. O vɛrisew kɔnɔkow dafara galen Israɛl jamana na ani u bena dafa sini ma tuma min na Ala bena a ka layiduw dafa.—Kɔrɔsili Sangaso nin na, barokun nin dakun 8nan lajɛ: “I bena kɛ ni ne ye alijɛnɛ na.”
O la, Zaburuw 145:2 ani vɛrise wɛrɛw b’a yira ko Dawuda tun b’a fɛ ka Jehova tando Israɛl jamana na galen fɔɔ ka taga se a saya ma. O vɛrisew b’a yira fana Dawuda bena min kɛ sini ma tuma min na Jehova bena a suu kunu.
