1. Tuma caaman na, Jehova b’a sagokɛlaw ka deliliw jaabi cogo di?

 YALA i b’a lɔn ko Jehova be se ka tɛmɛ i fɛ ka mɔgɔ dɔ ka delili sɔbɛw jaabi wa? I mana kɛ diinan mɔgɔkɔrɔ, kɔrɔsigi ciden, piyɔniye wala weleweledala ye, a be se ka tɛmɛ i fɛ k’o kɛ. A be se ka tɛmɛ kanbele, sunguru, mɔgɔkɔrɔba, balimacɛ wala balimamuso fɛ ka dɔ ka delili jaabi. Ni Jehova kanubaga dɔ ye dɛmɛ ɲini a fɛ, an ka Ala ka teli ka tɛmɛ diinan mɔgɔkɔrɔw wala a sagokɛla kantigi wɛrɛw fɛ ka kɛ a tigi ‘jigi tugula ye.’ (Kɔlɔs. 4:11). Nɛɛmaba lo an fɛ ka baara kɛ Jehova n’an balimaw ye o cogo la! An be se k’an balimaw dɛmɛ ani k’u jigi tugu fɔɲɔbana, kasaraw wala kɔrɔbɔliw tuma na.

2. Mun na a be se ka gwɛlɛya an ma ka tɔɔw dɛmɛ fɔɲɔbana tuma na?

² Fɔɲɔbana tuma na, a be se ka gwɛlɛya an ma ka ɲɔgɔn dɛmɛ. Misali la, n’a sɔrɔ an b’a fɛ ka taga bɔ an teri dɔw ye. Nka n’an y’o kɛ, an latanganin tɛna to. Wari bɛrɛ tɛ minw fɛ, n’a sɔrɔ an b’a fɛ k’u dɔw weele ka na dumuni kɛ an fɛ. Nka, an tɛ se k’o fana kɛ. N’an b’a fɛ ka tɔɔw dɛmɛ, o be se ka gwɛlɛya an ma ni koow man nɔgɔ an yɛrɛ somɔgɔw fɛ. O bɛɛ n’a ta, an b’a fɛ k’an balimaw dɛmɛ. Jehova dusu ka di n’an b’an seko bɛɛ kɛ u ye (Talenw 3:27; 19:17). An be se ka mun lo kɛ k’u dɛmɛ?

3. Diinan mɔgɔkɔrɔ minw be Desi ka kafo kɔnɔ, an be kalan juman lo sɔrɔ u fɛ? (Zeremi 23:4).

³ Diinan mɔgɔkɔrɔw be se ka min kɛ. N’i ye diiman mɔgɔkɔrɔ ye, a ɲini k’i ka kafodenw lɔn koɲuman (Zeremi 23:4 kalan). Desi min kofɔra barokun tɛmɛnin na, ale ko: “Diinan mɔgɔkɔrɔ minw be n’ ka waajuli jɛnkulu kɔnɔ, olu tun be to ka waajuli ani ɲɛnagwɛkow kɛ ni ne  ni balima wɛrɛw ye.” b O kama, tuma min na COVID-19 fɔɲɔbana daminɛna ani Desi somɔgɔ dɔw sara o bana kosɔn, a tun ka nɔgɔ o diinan mɔgɔkɔrɔw ma k’a dɛmɛ.

4. Mun na diinan mɔgɔkɔrɔw sera ka Desi dɛmɛ ani an be kalan juman lo sɔrɔ o la?

⁴ Desi ko: “Komi diinan mɔgɔkɔrɔw tun ye n’ teriw ye, a tun ka nɔgɔ n’ ma ka n’ dusukunnakow ni n’ haminankow fɔ u ye.” Diinan mɔgɔkɔrɔ be kalan juman lo sɔrɔ o la? I janto i ka kafodenw na sanni kasara dɔ ka cun aw kan. Teriya kɛ n’u ye. Fɔɲɔbana tuma na, n’i tɛ se ka taga bɔ u ye, kaan bɔ u ma cogo wɛrɛw la. Desi ko: “Tuma dɔw la, diiman mɔgɔkɔrɔ caaman tun be n’ weele ani ka mesaziw ci n’ ma tile kɔnɔ. U ye vɛrise minw kofɔ, u ye n’ dusukun sɔrɔ kosɔbɛ, k’a sɔrɔ n’ tun b’o vɛrisew lɔn ka ɲɛ.”

5. Diinan mɔgɔkɔrɔw be se k’a lɔn cogo di balimaw mako be min na ani k’u dɛmɛ?

⁵ I be se ka tɛmɛ fɛɛrɛ minw fɛ k’a lɔn i balimaw mako be min na, u dɔ ye k’u ɲininga nɛmɛnɛmɛ (Talenw 20:5). Yala dumuni bɛrɛ, fura ani u makoɲɛfɛn wɛrɛw b’u fɛ wa? Yala u ka baara be farati la wala wari bɛrɛ t’u fɛ k’u ka luwanse sara wa? Ni gofɛrɛnɛman be dɛmɛ lase mɔgɔw ma, yala an balimaw mako b’a la an k’u dɛmɛ walisa u k’o sɔrɔ wa? Balimaw ye Desi dɛmɛ bololafɛnw ta fan fɛ. Nka, diinan mɔgɔkɔrɔw ye dɛmɛ min lase a ma dusukunnakow ani Alako ta fan fɛ, o yɛrɛ lo y’a dɛmɛ kosɔbɛ k’a ka gwɛlɛyaw muɲu. A ko: “Diinan mɔgɔkɔrɔw ye delili kɛ ni n’ ye. N’ hakili t’a la tugun u ye min fɔ tigitigi, nka o koo ye min kɛ n’ na, n’ hakili b’o lo la. A tun be komi Jehova b’a fɔra n’ ye le ko: ‘I t’i kelen.’ ”—Ezayi 41:10, 13.

6. Kafoden caaman be se ka mun lo kɛ ka tɔɔw dɛmɛ? (Jaa lajɛ.)

⁶ Tɔɔw be se ka min kɛ. An jigi b’a la ko diiman mɔgɔkɔrɔw bena u janto kafodenw na. Nka, Jehova b’a ɲini an kelen kelen bɛɛ lo fɛ an ka tɔɔw jija ani k’u dɛmɛ (Gal. 6:10). Hali n’an ye koo dennin dɔ lo kɛ k’a yira banabagatɔ dɔ la ko an b’a kanu, o be se k’a jija kosɔbɛ. Misali la, deen dɔ be se ka fɛɛn dɔ sɛbɛ karti dɔ kan wala ka desɛn kɛ k’a ci balima dɔ ma walisa k’a jija. Kanbele wala sunguru dɔ be se ka taga balimamuso dɔ ka boliboliw kɛ wala ka koo wɛrɛ kɛ a ye. Kafoden wɛrɛw be se ka dumuni tobi  banabagatɔ dɔ ye ani ka taga a di a ma a ka soo. Tiɲɛn na, ni fɔɲɔbana dɔ jɛnsɛnna, kafoden kelen kelen bɛɛ mako be jijali la. Lajɛnw bannin kɔ, n’a sɔrɔ an be se ka to dɔɔni walisa ka baro kɛ ni balimaw ye ɲɛda ni ɲɛda wala vidéoconférence sababu fɛ. Diinan mɔgɔkɔrɔw fana mako be jijali la. Fɔɲɔbana tuma na, u bolo degunnin lo ka tɛmɛ sanga ni wagati bɛɛ kan. O kama, balima dɔw ye lɛtɛrɛ ci u dɔw ma k’u fo u ka baara ɲuman kosɔn. N’an b’an seko kɛ ka to ka “ɲɔgɔn jigi tugu, ani ka ɲɔgɔn dɛmɛ,” o ka ɲi yɛrɛ le!—1 Tes. 5:11.

7. Mun lo se ka gwɛlɛya kasara dɔ bannin kɔ?

⁷ Kasara dɔ be se ka mɔgɔ ka ɲɛnamaya nagasi pewu yɔrɔnin kelen. Dɔw be bɔnɛ u bololafɛnw, u ka boon, hali u ka mɔgɔ kanulenw yɛrɛ la. O kojugubaw b’an balimaw fana sɔrɔ. An be se k’u dɛmɛ cogo di?

8. Diinan mɔgɔkɔrɔw ni sotigiw be se ka mun lo kɛ ka kɔn kasara dɔ ɲɛ?

⁸ Diinan mɔgɔkɔrɔw be se ka min kɛ. Diinan mɔgɔkɔrɔw, aw y’aw balimaw dɛmɛ u ka kɔn k’u yɛrɛ labɛn sanni kasara dɔ ka kɛ. A’ y’a fɔ kafodenw bɛɛ ye u ka ɲi ka min kɛ walisa u latanganin ka to ani u be se ka kaan bɔ diiman mɔgɔkɔrɔw ma cogo min na. Margaret min kofɔra barokun tɛmɛnin na, ale ko: “Kafo ka mako dɔ la, an ka diinan mɔgɔkɔrɔw y’an lasɔmi ko kongojɛni ka teli ka kɛ wagati min na, o bele ma ban. U ko ni faamanw ye cii di ko an ka boli ka bɔ an ka soo, wala ni farati b’an seen kɔrɔ, an ka sin k’an yɛrɛ ɲini.” O fɔra an ye wagati bɛnnin na sabu lɔgɔkun duuru o kɔ, kongojɛni dɔ kɛra, min ye mɔgɔ caaman niin bila farati la. Denbayamɔgɔ kelen kelen bɛɛ ka ɲi ka min kɛ, sotigi ka ɲi ka kuma o koo la gwa kɔnɔ batoli la. Ni ele n’i deenw labɛnnin lo, aw hakili ka teli ka sigi kasara tuma na.

9. Diinan mɔgɔkɔrɔw be se ka mun lo kɛ ka kɔn kasara dɔ ɲɛ ani o kɔ?

⁹ N’i ye waajuli jɛnkulu dɔ kɔrɔsibaga ye, i janto ko i be ni jɛnkulu mɔgɔw bɛɛ ka telefɔni nimɔrɔ n’u ka ladɛrɛsi ɲuman ye lisi dɔ kan. Kana kɔnɔni kɛ kasara dɔ ka cun aw kan ka sɔrɔ k’o kɛ. Tuma kelen kelen, a filɛ n’o nimɔrɔw n’o ladɛrɛsiw ma yɛlɛma. O la, ni kasara dɔ kɛra, i bena se ka kaan bɔ weleweledala kelen kelen bɛɛ ma k’a filɛ a mako be dɛmɛ min na. Sin k’o fɔ diinan mɔgɔkɔrɔw jɛnkulu ka koow labɛnbaga ye ani ale fana bena kaan bɔ kafokulu kɔrɔsibaga ma. N’aw bɛɛ jɛnna ka baara kɛ ɲɔgɔn fɛ, aw bena se k’aw balimaw dɛmɛ cogo fisaman na. Kongojɛni kɔ, Margaret ka kafokulu kɔrɔsibaga tora ɲɛɛ na lɛri 36 kɔnɔ. A bolo tun degunnin lo ka diinan mɔgɔkɔrɔ tɔɔw dɛmɛ u ka kaan bɔ ani k’u janto balima 450 la minw bolila ka bɔ u ka soo (2 Kor. 11:27). O la, minw bɛɛ mako tun be siyɔrɔ la, u y’o sɔrɔ.

10. Mun na diinan mɔgɔkɔrɔw b’a jati ko a kɔrɔtanin lo u ka balimaw jija ani k’u janto u la Alako ta fan fɛ? (Zan 21:15).

¹⁰ Diinan mɔgɔkɔrɔw ka kunkanbaara lo k’u balimaw jija Alako ta fan fɛ ani ka dusukasibagatɔw dɛmɛ (1 Piyɛri 5:2). Kasara tuma na, u ka ɲi k’u janto ko balima kelen kelen bɛɛ latanganin lo ani ko u be ni dumuni, faniw ani siyɔrɔ ye. Nka kalo caaman o kɔ, minw kisira, n’a sɔrɔ u mako bena kɛ jijali ni dɛmɛ na Alako ta fan fɛ (Zan 21:15 kalan). Harold ye tɔnbolo dɔ ka kɔmite mɔgɔ dɔ ye ani kasara cunna balima minw kan, a y’u caaman kunbɛn. A ko: “Ka se k’u ka dusukasi muɲu, o be wagati ta. Koow be  se k’a daminɛ ka kɛ i ko fɔlɔ la u fɛ. Nka n’a sɔrɔ u bena to ka miiri u ka mɔgɔ kanulen dɔ saya la, u bololafɛn dɔ la min koo tun gwɛlɛ u ma wala faratiba dɔ koo la min tun b’u seen kɔrɔ o wagati la. N’u tora ka miiri o koow la, o be se k’a to u dusu be kasi tugun. Nka, o kɔrɔ tɛ ko u limaniyanin tɛ, u ka dusukunnakow be faamu.”

11. N’a sɔrɔ denbayamɔgɔw mako be dɛmɛ juman lo la wagatijan kɔnɔ?

¹¹ Diinan mɔgɔkɔrɔw be ladili nin sira tagama: “Minw be kasi, aw ye kasi ni olu ye.” (Ɔrɔm. 12:15). Minw kisira, olu mako b’a la diinan mɔgɔkɔrɔw k’u hakili sigi ko Jehova n’u kerecɛnɲɔgɔnw bele b’u kanu. Diinan mɔgɔkɔrɔw bena a ɲini ka denbayamɔgɔw dɛmɛ u ka to ni delinanko ɲumanw ye Alako ta fan fɛ, i n’a fɔ ka delili kɛ, ka Ala ka Kuma sɛgɛsɛgɛ, ka taga lajɛnw na ani ka waajuli kɛ. Kasara tɛ se ka fɛɛn minw tiɲɛ, u be se ka bangebagaw jija fana u k’u deenw dɛmɛ u k’o fɛɛnw kɛ u ɲɛnako fɔlɔ ye. Bangebagaw, a’ y’aw deenw hakili jigi ko Jehova bena kɛ u Teri ye tuma bɛɛ ani ko a bena u dɛmɛ tuma o tuma. A’ y’a ɲɛfɔ u ye fana ko u be ni denbayamɔgɔw ye duniɲa kuru bɛɛ kɔnɔ minw labɛnnin lo k’u dɛmɛ.—1 Piyɛri 2:17.

12. Kasara cunna minw kan, tɔɔw be se k’u dɛmɛ cogo di? (Jaa lajɛ.)

¹² Tɔɔw be se ka min kɛ. Ni kasara dɔ kɛra i ka yɔrɔ gɛrɛfɛ, diinan mɔgɔkɔrɔw ɲininga i be se ka dɛmɛ don cogo min na. Minw bolila k’u ka soo to yen wala balima minw nana dɛmɛ don, n’a sɔrɔ i be se ka siyɔrɔ di u ma wagati dɔ la. I be se ka dumuni ani fɛɛn wɛrɛw di weleweledalaw ma minw mako be dɛmɛ na. Balawo kɛra yɔrɔ min na n’o yɔrɔ ka jan n’i ka soo ye, i bele be se ka dɛmɛ don. Cogo di do? I kɛtɔ ka delili kɛ kasaratɔw ye (2 Kor. 1:8-11). I be se ka dɛmɛ don, i kɛtɔ ka nili kɛ duniɲa kuru bɛɛ waajuli baara kama (2 Kor. 8:2-5). Balawo kɛra yɔrɔ min na, ni see b’i ye ka taga dɛmɛ don o yɔrɔ la, kaan bɔ diinan mɔgɔkɔrɔw ma. N’u ko i be se ka taga, n’a sɔrɔ u bena fɔrɔmasɔn di i ma walisa i ka se ka dɛmɛ don cogo fisaman na.

13. Jamana minw na bali sigira an ka baara kan, gwɛlɛya jumanw lo be an balimaw kan yen?

¹³ Jamana minw na bali sigira an ka  baara kan, kɔrɔbɔliw b’a to ɲɛnamaya ka gwɛlɛ balimaw fɛ. Ka fara o kan, wariko gwɛlɛya ni banaw b’o balimaw kan ani u ka mɔgɔ kanulenw fana be sa. Nka o bali kosɔn, balima minw mako be jijali la, n’a sɔrɔ diinan mɔgɔkɔrɔw tɛ se ka taga bɔ u ye wala ka kumaɲɔgɔnya kɛ n’u ye u sago la. O gwɛlɛya lo tun be Andrei kan min kofɔra barokun tɛmɛnin na. A ka waajuli jɛnkulu kɔnɔ, wariko gwɛlɛya tun be balimamuso dɔ kan. O kɔ, a ye aksidan kɛ n’a ka mobili ye. O kama a tun ka ɲi ka operasɔn caaman kɛ ani a tun tɛ se ka baara kɛ. Bali ani fɔɲɔbana bɛɛ n’a ta, balimaw y’u seko kɛ k’a dɛmɛ ani Jehova y’a ye u ye min kɛ.

14. Ni diinan mɔgɔkɔrɔw b’u jigi la Jehova kan, u be se ka kɛ ɲɛyirali ɲumanw ye tɔɔw fɛ cogo di?

¹⁴ Diinan mɔgɔkɔrɔw be se ka min kɛ. Andrei ye delili kɛ ani a y’a seko kɛ. Jehova y’a ka delili jaabi cogo di? A ye balima caaman lasun u tagara bɔ o balimamuso ye walisa k’a dɛmɛ. Ni balimamuso tun ka ɲi ka taga dɔgɔtɔrɔso la, balima dɔw tun b’a ta ka taga n’a ye. Dɔw fana y’a dɛmɛ ni wari ye. Jehova ye u lasun u y’u seko bɛɛ kɛ. A y’a janto fana balimamuso k’a makoɲɛfɛnw bɛɛ sɔrɔ, o balimaw bɛɛ lajɛnnin ka dɛmɛ sababu fɛ (Eburuw 13:16). Diinan mɔgɔkɔrɔw, ni bali sigira an ka baara kan aw ka jamana na, aw ye dɛmɛ ɲini balima wɛrɛw fɛ (Zer. 36:5, 6). Min yɛrɛ kɔrɔtanin lo kosɔbɛ, aw y’aw jigi la Jehova kan. A be se k’aw dɛmɛ aw k’aw janto balimaw na.

15. Ni kɔrɔbɔli b’an kan, an be se ka to kelenya la cogo di n’an balimaw ye?

¹⁵ Tɔɔw be se ka min kɛ. Ni bali sigira an ka baara kan, n’a sɔrɔ an ka ɲi ka jɛn n’an balimaw ye jɛnkulu denninw lo la. O kama, a kɔrɔtanin lo kosɔbɛ ka tɛmɛ sanga ni wagati bɛɛ kan an ka to hɛɛrɛ la n’an balimaw ye. Sanni an ka ɲɔgɔn kɛlɛ, an ka ɲi ka Sutana lo kɛlɛ. Ni balima dɔ donna i gasi la, tɛmɛ o koo kan wala a ɲini k’o koo ɲɛnabɔ joona joona (Talenw 19:11; Efɛz. 4:26). A’ y’a bɔ aw yɛrɛ la ka ɲɔgɔn dɛmɛ (Titi 3:14). Balimamuso min mako tun be dɛmɛ na, balimaw ye dɛmɛ min lase a ma, o ye nɔɔ ɲuman to tɔɔw kan u ka waajuli jɛnkulu kɔnɔ. U magwɛrɛla ɲɔgɔn na i ko denbayamɔgɔw.—Zab. 133:1.

16. Ka kɛɲɛ ni Kɔlɔsikaw 4:3, 18 ye, kɔrɔbɔli be an balima minw kan an be se k’u dɛmɛ cogo di?

¹⁶ Jamana dɔw la, hali k’a sɔrɔ bali sigira  an ka baara kan, balima waa caaman be Jehova sago kɛra yen. U y’u dɔw don kaso la u ka limaniya kosɔn. An be se ka delili kɛ olu n’u ka denbayamɔgɔw ye. Balima minw be u jaa gwɛlɛya k’o balimaw dɛmɛ Alako ta fan fɛ, k’u makoɲɛfɛnw di u ma ani k’u lafasa kititigɛso la, an be se ka delili kɛ olu fana ye c (Kɔlɔsikaw 4:3, 18 kalan). Kana ɲinɛ abada ko i ka deliliw be se k’o balimaw bɛɛ dɛmɛ!—2 Tes. 3:1, 2; 1 Tim. 2:1, 2.

17. I be se k’i yɛrɛ labɛn cogo di kɔrɔbɔliw kama kabi sisan?

¹⁷ Ele n’i ka denbayamɔgɔw be se k’aw yɛrɛ labɛn kabi sisan kɔrɔbɔliw kama (Kɛw. 14:22). Koo jugu minw bɛɛ be se ka kɛ, kana a ɲini ka miiri o la. Nka, teriya min be i ni Jehova cɛ, i jija k’o barika bonya ani i deenw dɛmɛ u fana k’o kɛ. N’i be hamina tuma dɔw la, i dusukunnakow bɛɛ fɔ Ala ye (Zab. 62:8, 9). Kuun minw bɛɛ kama i be se k’i jigi la Jehova kan, a’ ye baro kɛ o kan aw ka denbaya kɔnɔ. d N’i b’i yɛrɛ labɛn kasaraw kama, o b’i deenw nafa. O kelen lo n’i b’i deenw labɛn kɔrɔbɔliw kama. U jaa bena gwɛlɛya ani u hakili bena sigi sabu i y’a yira u la u be se k’u jigi la Jehova kan cogo min na.

18. An be siniɲasigi juman lo makɔnɔna?

¹⁸ Ala ka hɛɛrɛ b’a to an b’a ye ko an latanganin lo (Filip. 4:6, 7). Banaw, kasaraw ani kɔrɔbɔliw be se ka nɔɔ to an kan. Nka o bɛɛ n’a ta, Ala be tɛmɛ a ka hɛɛrɛ fɛ k’an hakili sigi o koow la. A be tɛmɛ fana diinan mɔgɔkɔrɔw fɛ k’u janto an na Alako ta fan fɛ. O balimaw be baaraba lo kɛ. Ala be sababu di an kelen kelen bɛɛ ma an ka ɲɔgɔn dɛmɛ. An be hɛɛrɛ wagati min na sisan, an be se k’an yɛrɛ labɛn kɔrɔbɔli nataw kama, hali “tɔɔrɔba” yɛrɛ (Mat. 24:21). O wagati la, an mako bena kɛ a la ka to hɛɛrɛ la ani ka tɔɔw dɛmɛ u k’o kɛ. O wagati kɔ, an tɛna gwɛlɛyaba si sɔrɔ minw bena hami bila an na. Kabi a daminɛ, Jehova tun b’a fɛ an ka to hɛɛrɛ sɔbɛ ani hɛɛrɛ banbali min na, an bena se k’o diyabɔ!—Ezayi 26:3, 4.