Mɔgɔ kura fila, Koow Ɲɛnabɔla Jɛnkulu la
ARABALON, saan 2023 zanwiyekalo tile 18nan loon na, kunnafoni kɛrɛnkɛrɛnnin dɔ yirala jw.org kan. A tun fɔra ko balimacɛ Gage Fleegle ani Jeffrey Winder kɛra Jehova Seerew ka Koow Ɲɛnabɔla Jɛnkulu mɔgɔ dɔw ye. U fila bɛɛ be Jehova sago kɛra kantigiya la kabi saan caaman.
Gage Fleegle n’a muso Nadia.
Balimacɛ Fleegle lamɔnna Pɛnsilvani tileben fan fɛ Etazini. A bangebagaw ye Jehova Seerew ye. A kanbele tuma na, u yɛlɛmana dugu dennin dɔ la yɔrɔ min na weleweledalaw tun man ca. Dɔɔni o kɔ, a batizera saan 1988 novanburukalo tile 20nan.
Blimacɛ Fleegle bangebagaw tun b’a jija tuma bɛɛ a ka kɛ kudayi cidenya baarakɛla ye. U tun ka teli ka kafokulu kɔrɔsibagaw ni betɛlidenw ladon u ka soo ani balimacɛ Fleegle y’a kɔrɔsi k’o balimaw ninsɔn ka di. Dɔɔni a batizenin kɔ, a kɛra kudayi piyɔniye ye saan 1989, sɛtanburukalo tile fɔlɔ la. A ka laɲinita tun ye ka kɛ betɛliden ye kabi a saan 12. Saan 2 a kɛnin kɔ kudayi piyɔniye ye, a sera k’o laɲinita dafa. A ye baara daminɛ Buruklini Betɛli la saan 1991, ɔkutɔburukalo la.
Betɛli la, balimacɛ Fleegle ye baara kɛ saan 8 gafew dilanyɔrɔ la. O kɔ biro min be waajuliko ɲɛnabɔ, u y’a bila ka taga o yɔrɔ la. O wagati la, a ye saan damanin kɛ irisikan kafo dɔ kɔnɔ. Saan 2006, a ye Nadia furu ani Nadia fana kɛra betɛliden ye. U ye u bila pɔrtigɛkan kafo dɔ kɔnɔ ani o kɔ, u ye saan 10 ni kɔ kɛ ɛsipaɲɔlikan kafo dɔ kɔnɔ. Biro min be waajuliko ɲɛnabɔ, balimacɛ Fleegle ye saan caaman kɛ o yɔrɔ la. O kɔ, u y’a bila ka taga Kalanko ɲɛnabɔbagaw ka kɔmite biro la ani kɔfɛ waajuliko ɲɛnabɔbagaw ka kɔmite biro la. Saan 2022 marisikalo la, a kɛra waajuliko ɲɛnabɔbagaw ka kɔmite mɔgɔw dɛmɛbaga dɔ ye. O kɔmite ye Koow Ɲɛnabɔla Jɛnkulu mɔgɔw ka kɔmite dɔ ye.
Jeffrey Winder n’a muso Angela.
Balimacɛ Winder lamɔnna Muriyeta, Kalifɔrni mara la, Etazini. A bangebagaw y’a lamɔ tiɲɛn sira kan ani a batizera saan 1986, marisikalo tile 29. Kalo min tugura o kɔ, a kɛra piyɔniye kɔrɔsigi ye. O baara diyara a ye kosɔbɛ fɔɔ a y’a latigɛ ka to k’o kɛ. A y’o baara kɛ kalo caaman kɔnɔ ani o kɔ, a ye kudayi piyɔniye baara daminɛ saan 1986, ɔkutɔburukalo tile fɔlɔ la.
Balimacɛ Winder kanbele tuma na, a tagara bɔ a kɔrɔcɛ fila ye Betɛli la. O y’a to a y’a latigɛ ko loon dɔ, a bena baara kɛ Betɛli la. Saan 1990 mɛkalo la, u y’a weele ka na baara kɛ Wɔlkil Betɛli la.
Balimacɛ Winder ye Betɛli baara caaman kɛ i n’a fɔ yɔrɔ saniya, foro baara ani biro dɔ la min be Betɛli ka koow ɲɛnabɔ. A ye Angela furu saan 1997 ani u bɛɛ be baara kɛra Betɛli la kabi o wagati. Saan 2014, u ye u bila ka taga Wɔrwik. O yɔrɔ la, balimacɛ Winder ye dɛmɛ don an ka sigiyɔrɔsoba lɔli baara la. Saan 2016, u y’u bila ka taga Jehova Seerew ka kalansoba la Patɛrsɔn. O yɔrɔ la, a ye baara kɛ biro dɔ la min be sono ni videwow koo ɲɛnabɔ. Saan naani o kɔ, u kɔsegira ka taga Wɔrwik ani kɔmite min be betɛlidenw ka koo ɲɛnabɔ, balimacɛ Winder ye baara kɛ o yɔrɔ la. O kɔmite ye Koow Ɲɛnabɔla Jɛnkulu mɔgɔw ka kɔmite dɔ ye. Saan 2022 marisikalo la, balimacɛ Winder kɛra o kɔmite mɔgɔw dɛmɛbaga dɔ ye.
O cɛɛw ye Jehova ka “boɲafɛnw” lo ye ani an b’a deli a k’u duga kosɔbɛ u ka baaraba la, u be min kɛra a ka Masaya kosɔn.—Efɛz. 4:8.
