1. Mɔgɔ caaman b’a ɲinina ka mun lo kɛ Jehova ka baara la?

 DUNIƝA nin laban wagati be surunyana kosɔbɛ minkɛ, baara kɛta caaman b’an fɛ (Mat. 24:14; Luka 10:2; 1 Piyɛri 5:2). An bɛɛ b’a fɛ k’an seko bɛɛ kɛ Jehova ka baara la. Mɔgɔ caaman be dɔ farala u ka waajuli baara kan. Dɔw b’a fɛ ka kɛ piyɔniyew ye. Dɔ wɛrɛw b’a fɛ ka baara kɛ Betɛli la wala ka dɛmɛ don Masaya Boonw n’a ɲɔgɔnnaw lɔli baara la. Balimacɛ caaman fana b’u jijara ka saratiw dafa walisa ka kɛ kɔrɔsigi cidenw wala diinan mɔgɔkɔrɔw ye (1 Tim. 3:1, 8). Jehova dusu ka di kosɔbɛ k’a ye ko a sagokɛlaw be sɔnna k’u yɛrɛ di k’ale ka baara kɛ!—Zab. 110:3; Ezayi 6:8.

2. N’an tɛ sera k’an ka laɲinita dɔw dafa Alako ta fan fɛ, o be se ka mun lo kɛ an na?

² Nka wagati caaman tɛmɛnin kɔ, n’an tɛ sera k’an ka laɲinita dɔw dafa Alako ta fan fɛ, an fari be se k’a daminɛ ka faga. An fari be se ka faga fana sabu an tɛ sera ka koo dɔw kɛ Jehova ka ɔriganisasiyɔn kɔnɔ kɔrɔya wala koo wɛrɛw kosɔn (Talenw 13:12). Misali la, a tun bena diya Melissa * ye kosɔbɛ ka baara kɛ Betɛli la wala ka Masaya waajulikɛlaw ka lakɔli kɛ. Nka, a ko: “N’ sanda tɛmɛna. N’ tɛ se k’o baaraw kɛ tugun. Tuma dɔw la, n’ fari be faga o kosɔn.”

3. Walisa kunkanbaara wɛrɛw ka kalifa dɔw ma Jehova ka baara la, n’a sɔrɔ u ka ɲi ka mun lo kɛ?

³ Kanbelew ni sunguru minw ka kɛnɛ, olu dɔw ka ɲi k’a ɲini ka kɛ ni jogo dɔw ye fɔlɔ. O kɔ le, u bena se ka  kunkanbaara wɛrɛw sɔrɔ. Misali la, n’a sɔrɔ u dɔw hakili ka di, u be desizɔnw ta joona joona ani u labilanin lo ka baara kɛ. Nka, n’a sɔrɔ u ka ɲi ka muɲuli kɛ kosɔbɛ fana, k’u ka baara kɛ koɲuman ani ka tɔɔw bonya kosɔbɛ. N’i b’i jija ka kɛ ni jogo ɲumanw ye, n’a sɔrɔ u bena kunkanbaara dɔ kalifa i ma. U be se k’o kɛ wagati min na i yɛrɛ tɛ miirila o la. An ka Nick ka koo lajɛ. Tuma min na a tun be ni saan 20 ye, a dusu tiɲɛna kosɔbɛ sabu u m’a kɛ kɔrɔsigi ciden ye. A ko: “N’ tun b’a miiri ko n’ ye koo jugu dɔ lo kɛ.” Nka, Nick m’a fari faga. A tora k’a seko bɛɛ kɛ kafo kɔnɔ ani waajuli baara la. Bi, a ye tɔnbolo dɔ ka kɔmite mɔgɔ dɔ ye.

4. An bena mun lo lajɛ barokun nin na?

⁴ Yala i fari faganin lo sabu i ma se ka laɲinita tigitigi dɔ dafa fɔlɔ Alako ta fan fɛ wa? N’o lo, i dusukunnakow fɔ Jehova ye delili la (Zab. 37:5-7). I be se ka ladiliw ɲini balimacɛ kolɔnbagaw fɛ fana walisa k’a lɔn i be baara min kɛra Jehova ye, i be se k’o fisaya cogo min na. O kɔ, i seko bɛɛ kɛ k’u ka ladiliw sira tagama. N’i y’o kɛ, n’a sɔrɔ i bena se k’i ka laɲinita dafa. Nka, i ko Melissa min kofɔra ka tɛmɛ, n’a sɔrɔ i tun b’a fɛ ka min kɛ Jehova ka baara la, i tɛna se k’o kɛ sisan. N’o lo, i ninsɔndiyanin be se ka to cogo di? Walisa k’o ɲiningali jaabi, an bena koo saba nunu lajɛ barokun nin na: 1) Ninsɔndiya sɔrɔcogo, 2) i be se ka min kɛ walisa ka dɔ fara i ka ninsɔndiya kan ani 3) i be se ka laɲinita minw latigɛ minw bena dɔ fara i ka ninsɔndiya kan.

5. N’an b’a fɛ ka ninsɔndiya sɔrɔ, an ka ɲi ka to ka miiri mun lo la? (Waajulikɛla 6:9).

⁵ Waajulikɛla 6:9 (Bible senuma) b’a yira ko an be se ka ninsɔndiya sɔrɔ n’an b’a ɲini cogo ɲuman na. A fɔra yen ko: “Mɔgɔ bɛ fɛn min ye ka ɲagali o kosɔn, o ka fisa ni nege la fɛn ye.” Mɔgɔ min ka koow cogoya ka di a ye ani a ka koow b’a to a be se ka min kɛ, n’a b’a jija o la, o tigi ka teli ka ninsɔn diya kosɔbɛ. Nka, mɔgɔ min be tugu a “nege la fɛn[w]” ani fɛɛn dɔw nɔfɛ a tɛ se ka minw sɔrɔ, o tigi tɛna wasa ka ye. O b’an dɛmɛ ka mun lo faamu? O b’an dɛmɛ k’a faamu ko walisa ka ninsɔndiya sɔrɔ, min b’an bolo ani an be se ka laɲinita minw dafa, an ka ɲi ka to ka miiri o lo la.

6. An bena talen juman lo lajɛ sisan, ani an bena sinsin mun lo kan?

⁶ Min b’an bolo, yala o be se k’an wasa tiɲɛn na wa? Mɔgɔ caaman b’a miiri k’o tɛ se ka kɛ sabu a ka di an ye ka koo kuraw degi. Nka min b’an bolo, an be se ka ninsɔn diya o kosɔn. An be se k’o kɛ cogo di do? Walisa k’o lɔn, Yezu ye talen min la wari talanw koo la Matiyo 25:14-30 * kɔnɔ, an k’o lajɛ. O bena an dɛmɛ k’a faamu an be se ka ninsɔndiya sɔrɔ cogo min na an ka koow la ani ka dɔ fara o ninsɔndiya kan yɛrɛ.

7. Yezu ye talen min la wari talanw koo la, o lakali ka surunya.

⁷ O talen na, cɛɛ dɔ tun b’a fɛ ka taga tagamana na. Nka sanni a ka taga, a y’a ka baaradenw weele ka wari talanw kalifa u kelen kelen bɛɛ ma ko u ka jago kɛ n’o ye. * A y’o wari talanw kalifa o baaradenw ma ka kɛɲɛ n’u seko ye. A ye talan 5 kalifa baaraden fɔlɔ ma, ka talan  fila kalifa baaraden filanan ma ani ka talan kelen kalifa sabanan ma. Baaraden fɔlɔ ni filanan ye jago kɛ walisa k’u matigi ka wari buguya. Nka, baaraden sabanan ma foyi kɛ n’a ta ye. O kama, a matigi y’a gwɛn baara la.

8. Mun na baaraden fɔlɔ tun be se ka ninsɔn diya?

⁸ Baaraden fɔlɔ ninsɔn diyara kosɔbɛ sabu a matigi ye wari talan duuru kalifa a ma. O tun ye wariba lo ye ani o tun b’a yira ko a matigi lanin lo a la kosɔbɛ! Nka, baaraden filanan do? A fari tun be se ka faga sabu a matigi ma wari talan caaman kalifa a ma ka se baaraden fɔlɔ ta ma. Nka, a ye mun lo kɛ?

9. Yezu ma mun lo fɔ baaraden filanan koo la? (Matiyo 25:22, 23).

⁹ Matiyo 25:22, 23 kalan. Yezu m’a fɔ ko baaraden filanan dusu tiɲɛna ani a ye dimi mara a kɔnɔ sabu a matigi ye wari talan fila dɔrɔn lo kalifa a ma. Yezu m’a fɔ fana k’o baaraden ŋunuŋununa ko: “Mun na n’ matigi ye wari talan fila dɔrɔn lo di n’ ma? N’ do be baara kɛ ka ɲɛ i ko baaraden min ye wari talan duuru sɔrɔ! Ni n’ matigi b’a miiri ko n’ tɛ baarakɛla ɲuman ye, n’a sɔrɔ a ka fisa n’ ka dingɛ sogi k’a ka wari don yen ani ka n’ yɛrɛla baara kɛ.”

10. Baaraden filanan ye mun lo kɛ n’a ka wari talanw ye?

¹⁰ I ko baaraden fɔlɔ, baaraden filanan y’a faamu ko a matigi ye baara min kalifa a ma, o kɔrɔtanin lo kosɔbɛ. O kama, a y’a sɔbɛ don o baara la. O kɛra sababu ye a ye wari talan fila wɛrɛ sɔrɔ ka fara a matigi taw kan. A matigi y’a sara a ka baaraba  kosɔn. A y’a tando fana ani ka baara wɛrɛ kalifa a ma!

11. An be se ka dɔ fara an ka ninsɔndiya kan cogo di?

¹¹ I ko baaraden filanan, u mana baara o baara kalifa an ma Jehova ka ɔriganisasiyɔn kɔnɔ, n’an b’an sɔbɛ don o la, o b’an ninsɔn diya kosɔbɛ. I seen don bɛrɛbɛrɛ waajuli baara ani kafo ka baara tɔɔw la (Kɛw. 18:5; Eburuw 10:24, 25). Kafo ka lajɛnw labɛn koɲuman walisa ka lakalitaw kɛ minw be mɔgɔw jija. Lakɔli min be kɛ lajɛn na lɔgɔkun kɔnɔ, n’o kalan dɔ kalifara i ma, o ta sɔbɛ la. N’u ko i ka dɛmɛ don kafo ka baara dɔ la, o kɛ a wagati la ani a yira ko i ye lannamɔgɔ ye. N’u ye baara dɔ kalifa i ma, kana a miiri ko o baara kɔrɔtanin tɛ ani ko kuun t’a la i k’i ka wagati ta k’o kɛ. I jija ka se o baara la koɲuman (Talenw 22:29). I sɔbɛ don Jehova ka baara la. O la, i bena ɲɛtaga kɛ joona joona ani dɔ bena fara i ka ninsɔndiya kan (Gal. 6:4). I bena se ka ninsɔn diya ni tɔɔw ye fana ni kunkanbaara dɔ kalifara u ma i tun b’a fɛ ka min sɔrɔ.—Ɔrɔm. 12:15; Gal. 5:26.

12. Mun lo ye Melissa ni Nick dɛmɛ u ninsɔn diyara kosɔbɛ?

¹² An kumana Melissa min koo la dakun 2nan na, i hakili b’a la wa? A tun b’a fɛ ka taga Betɛli la wala ka Masaya waajulikɛlaw ka lakɔli kɛ. Hali k’a sɔrɔ a tun tɛ se k’o laɲinitaw dafa, a ko: “N’ be n’ seko bɛɛ kɛ n’ ka piyɔniye baara la ani n’ be n’ seen don waajuli baara faan bɛɛ la. O y’a to n’ ninsɔn diyara kosɔbɛ.” Nick dusu tun tiɲɛna sabu u m’a kɛ kɔrɔsigi ciden ye. Nka, a ye mun lo kɛ do? A ko: “N’ tun be se ka min kɛ, n’ tora ka miiri o lo la i n’a fɔ ka waajuli kɛ ani ka lakalitaw kɛ minw be mɔgɔ jija. N’ ye demandi dɔ dafa fana walisa ka taga baara kɛ Betɛli la ani saan min tugura o kɔ, u ye n’ weele yen.”

13. Baara min kalifara i ma, n’i ye i jija o la kosɔbɛ, mun lo bena kɛ do? (Waajulikɛla 2:24).

¹³ Baara min kalifara i ma, n’i ye i jija o la kosɔbɛ, yala o bena a to u be baara wɛrɛw kalifa i ma sini ma wa? Nick ka koo b’a yira ko o be se ka kɛ. Nka n’o ma kɛ, i be se ka ninsɔndiyaba sɔrɔ i ko Melissa ani ka wasa kosɔbɛ Jehova ka baara la (Waajulikɛla 2:24 kalan). Ka fara o kan, i ninsɔn bena diya kosɔbɛ k’a lɔn ko i koo ka di an Matigi Yezu Krista ye.

14. An be laɲinita minw latigɛ Alako ta fan fɛ, an ka ɲi ka mun lo to an hakili la u koo la?

¹⁴ Baara minw kalifanin be an ma sisan, n’an b’an sɔbɛ don u la, yala o kɔrɔ ko an man ɲi k’a ɲini ka baara wɛrɛw kɛ Jehova ye wa? Ayi, o tɛ. An ka ɲi ka laɲinitaw latigɛ minw bena a to an b’an ka waajuli kɛcogo ni mɔgɔw kalancogo fisaya ani k’an balimaw dɛmɛ. An bena se k’o laɲinitaw dafa n’an be koow kɛ ni hakilitigiya ye. An k’an majigi fana ka baara kɛ tɔɔw ye sanni ka to ka miiri an yɛrɛ dɔrɔn koo la.—Talenw 11:2; Kɛw. 20:35.

15. Laɲinita minw be se ka dɔ fara an ka ninsɔndiya kan, u dɔw ye jumanw ye?

¹⁵ I be se ka laɲinita jumanw lo latigɛ i yɛrɛ ye? Jehova deli a k’i dɛmɛ k’a lɔn i be se ka laɲinita minw dafa (Talenw 16:3; Zaki 1:5). An kumana laɲinita dɔw koo la  dakun fɔlɔ la i n’a fɔ ka kɛ kɔrɔsigi piyɔniye wala kudayi piyɔniye ye, ka baara kɛ Betɛli la wala ka dɛmɛ don Masaya Boonw n’a ɲɔgɔnnaw lɔli baara la. Yala i be se k’a ɲini k’o laɲinita dɔ dafa wa? N’a sɔrɔ i be se ka kaan wɛrɛ degi wala ka taga waajuli kɛ yɔrɔ wɛrɛ la.  I be se ka gafe Organisés sapitiri 10nan lajɛ walisa ka dɔ lɔn o laɲinita dɔw koo la. I be se ka kuma n’i ka kafo diinan mɔgɔkɔrɔw ye fana. * N’i b’a ɲinina k’o laɲinitaw dafa, dɔ bena fara i ka ninsɔndiya kan ani mɔgɔw bena a ye ko i be ɲɛtaga kɛra.

16. I be se ka mun lo kɛ n’i tɛ se ka laɲinita tigitigi dɔ dafa sisan?

¹⁶ An kumana laɲinita minw koo la, n’i tɛ se k’u dɔ dafa sisan, i be se ka mun lo kɛ do? Laɲinita wɛrɛ latigɛ i be se ka min dafa. An k’a filɛ i be se ka koo minw kɛ.

17. Ka kɛɲɛ ni 1 Timote 4:13, 15 ye, balimacɛ dɔ be se k’a ɲini k’a ka kalankɛcogo fisaya cogo di?

¹⁷ Vɛrise nunu kalan: 1 Timote 4:13, 15. N’i ye balimacɛ batizenin ye, i be se k’i jija k’i kumacogo ani mɔgɔw kalancogo fisaya. Mun na do? Sabu n’i b’i jija ka se kumacogo, kalangwɛ ni mɔgɔw kalancogo la, i bena se k’i lamɛnbagaw dɛmɛ koɲuman. Ladili ɲumanw be sɔrɔ o koo la kitabunin nin kɔnɔ: I jija kalangwɛ ni mɔgɔw kalancogo la. A latigɛ k’o kitabunin ka kalansen kelen kelen bɛɛ sɛgɛsɛgɛ ani k’a ka ladiliw sira tagama. N’i ye kalansen dɔ sɛgɛsɛgɛ, ladili minw dira yen, o kɛ k’a filɛ i ka soo. O kɔ, ni kalan dɔ dira i ma kafo ka lajɛn na, o ladiliw sira tagama. Ladiliw ɲini fana ladili dibaga kankɔrɔsigi wala diinan mɔgɔkɔrɔ wɛrɛw fɛ minw b’u jija ka “mɔgɔw kalan” * (1 Tim. 5:17). I jija ka kumacogo fɛɛrɛw faamu. A ɲini fana k’i lamɛnbagaw ka limaniya barika bonya ani k’u lasun u ka kalan sira tagama. N’i b’o  kɛ, i bena dɔ fara ele n’i lamɛnbagaw ka ninsɔndiya kan.

18. Mun lo be se k’an dɛmɛ ka laɲinitaw dafa an ka cidenya baara la?

¹⁸ An kelen kelen bɛɛ ka kunkanbaara lo ka waajuli kɛ ani ka mɔgɔw kɛ Krista ka kalandenw ye (Mat. 28:19, 20; Ɔrɔm. 10:14). O baara kɔrɔtanin lo kosɔbɛ. I be waajuli kɛ ani ka mɔgɔw kalan cogo min na, yala i b’a fɛ k’o kɛcogo fisaya wa? Kitabunin nin sɛgɛsɛgɛ: I jija kalangwɛ ni mɔgɔw kalancogo la. O kɔ, laɲinita tigitigi dɔw latigɛ walisa i ye min kalan, i ka se k’o sira tagama. I be se ka ladili nafaman wɛrɛw sɔrɔ Lajɛnsɛbɛ kɔnɔ ani barokɛcogo modɛli ka videwow la minw be yira lajɛnw na lɔgɔkun kɔnɔ. Ladili caaman sira tagama k’a filɛ minw b’i dɛmɛ koɲuman. Ladili minw kofɔra yan, n’i b’u sira tagama, i bena i ka waajuli kɛcogo fisaya. O bena dɔ fara i ka ninsɔndiya kan fana.—2 Tim. 4:5.

19. I be se ka kɛ ni kerecɛn jogow ye cogo di?

¹⁹ N’i be laɲinitaw latigɛra i yɛrɛ ye, kana ɲinɛ koo kɔrɔtanin nin kɔ: A ɲini ka kɛ ni kerecɛn jogow ye (Gal. 5:22, 23; Kɔlɔs. 3:12; 2 Piyɛri 1:5-8). Mun lo be se k’i dɛmɛ ka kɛ n’o jogow ye? Misali la, n’a sɔrɔ i b’a fɛ ka kɛ ni limaniya barikaman ye. N’o lo, i be se ka barokun dɔw lajɛ an ka gafew kɔnɔ minw be ladili nafamanw di limaniya sabaticogo koo la. JW Telewisɔn ka videwo dɔw be balima dɔw kofɔ minw y’a yira k’u limaniyanin lo kosɔbɛ gwɛlɛyaw bɛɛ n’a ta. Siga t’a la, n’i b’o videwow filɛ, o bena i nafa. O videwow filɛnin kɔ, miiri k’a filɛ i be se k’o balimaw ka limaniya ladegi cogo minw na.

20. An be se ka dɔ fara an ka ninsɔndiya kan ani ka dɔ bɔ an ka jigitigɛ la cogo di?

²⁰ An be baara min kɛra Jehova ye sisan, siga t’a la, an bɛɛ b’a fɛ ka dɔ fara o kan. Ala ka duniɲa kura kɔnɔ, an bena se ka baara kɛ a ye bɛrɛbɛrɛ. Yanni o cɛ, an be sera ka min o min kɛ sisan, an k’an seko fisaman kɛ o la. N’an y’o kɛ, an bena dɔ fara an ka ninsɔndiya kan ani ka dɔ bɔ an ka jigitigɛ la. Min yɛrɛ kɔrɔtanin lo kosɔbɛ, o ye ko an bena bonya la ninsɔndiyatigi Ala Jehova kan ani k’a tando (1 Tim. 1:11). O la, an be sera ka min kɛ Jehova ye, an ka ninsɔn diya o kosɔn!