1. N’an miirila Jehova ka danfɛnw bɛɛ koo la, n’a sɔrɔ an b’an yɛrɛ ɲininga mun lo la?

N’AN miirila Jehova ka danfɛnw bɛɛ koo la, n’a sɔrɔ an bena miiri i ko Zaburu sɛbɛbaga Dawuda. A ye Jehova ɲininga delili la ko: “Ni ne ye sankolo ye, min ye i yɛrɛ bolo nɔɔ ye, ani ka kalo ni lolow filɛ, i ye minw dan, n b’a fɔ ko: ‘Mɔgɔ ye mun ye n’i b’i hakili to a la? Adamaden ye mun ye n’i b’i janto a la?’ ” (Zab. 8:4, 5). I ko Dawuda, n’an y’an yɛrɛ suma ni sankolola fɛɛnw ye, an b’a ye ko an ka dɔgɔ kojugu. A b’an kabakoya k’a ye ko o bɛɛ n’a ta, Jehova b’a janto an na. An bena a ye ko Jehova y’a janto Adama ni Awa la. Nka o dɔrɔn tɛ, a ye u kɛ a ka denbaya mɔgɔ dɔw ye fana.

2. Jehova ka laɲinita tun ye mun lo ye a deen fɔlɔw koo la?

² Adama ni Awa lo kɛra Jehova deen fɔlɔw ye dugukolo kan ani Jehova tun ye u sankolola Faa kanutigi ye. A tun b’a fɛ u ka deen caaman sɔrɔ. A y’a fɔ u ye ko: “Aw ka deenw wolo ka caya ka dugukolo fa k’a kolo.” (Zɛnɛzi 1:28). U tun ka ɲi ka deenw sɔrɔ ani ka dugukolo ladon koɲuman. Jehova ye min ɲini Adama ni Awa fɛ, n’u tun y’o kɛ, olu n’u deenw tun bena to a ka denbaya kɔnɔ fɔɔ abada.

3. Mun na an be se k’a fɔ ko Jehova tun ye lɔyɔrɔba di Adama ni Awa ma a ka denbaya kɔnɔ?

³ Adama ni Awa tun be ni lɔyɔrɔba ye Jehova ka denbaya kɔnɔ. Zaburuw 8:6 kɔnɔ, Dawuda y’a fɔ Jehova ye adamaden koo la ko: “I y’a kɛ a lɔyɔrɔ ma se [mɛlɛkɛw, NW] ta ma. I ye nɔɔrɔ ni karama la a kan.” Tiɲɛn lo ko mɛlɛkɛw ka setigiya, u ka hakilitigiya ani u ka lɔnniya ɲɔgɔn ma di adamadenw ma (Zab. 103:20). Nka, bɛrɛ tɛ adamadenw n’o mɛlɛkɛ barikamanw cɛ. O ye kabako ye dɛ!  Tiɲɛn na, Jehova ye an faa Adama ni an ba Awa dan cogo dɔ la walisa u ka ɲɛnamaya diyabɔ.

4. Komi Adama ni Awa ma mɛnni kɛ Jehova fɛ, mun lo y’u sɔrɔ? An bena mun lo ye barokun nin na?

 ⁴ A fɔ man di nka, Adama ni Awa ma mɛnni kɛ Jehova fɛ. O kama, nɛɛma min tun dira u ma ka kɛ a ka denbaya mɔgɔ dɔw ye, u bɔnɛna o la. An bena a ye barokun nin na ko u ye bɔnɛ lase u bɔnsɔnw fana ma. Nka, Jehova ka laɲinita ma yɛlɛma. Adamaden minw be mɛnni kɛ a fɛ, a bele b’a fɛ olu ka kɛ a deenw ye fɔɔ abada. An k’a lajɛ fɔlɔ Jehova ye nɔɔrɔ la an kan cogo min na. O kɔ, an bena a ye an be se ka min kɛ sisan walisa k’a yira ko an b’a fɛ ka kɛ Ala ka denbaya mɔgɔ dɔw ye. A laban, an bena a ye Jehova bena duga minw lase a deenw ma dugukolo kan fɔɔ abada!

5. An be se ka Ala waleɲuman lɔn cogo di sabu a y’an dan a yɛrɛ jaa la?

⁵ Jehova ye nɔɔrɔ la an kan a kɛtɔ k’an dan a yɛrɛ jaa la (Zɛnɛzi 1:26, 27). Komi Ala y’an dan a yɛrɛ jaa la, an be se ka kɛ n’a ka jogo kabakomanw ɲɔgɔn ye ani k’u yira. U dɔw ye kanuya, hinɛ, kantigiya ani tilenninya ye (Zab. 86:15; 145:17). N’an b’an jija ka kɛ n’o jogow ye, an be nɔɔrɔ la Jehova kan ani an b’a yira ko an b’a waleɲuman lɔn (1 Piyɛri 1:14-16). N’an be ɲɛnamaya kɛ i ko an sankolola Faa b’a fɛ cogo min na, o b’an ninsɔn diya. Jehova b’a fɛ mɔgɔ sifa minw ka kɛ a ka denbaya kɔnɔ, an be se ka kɛ o ye sabu a y’an dan a yɛrɛ jaa la.

6. Tuma min na Jehova tun be dugukolo danna, a ye nɔɔrɔ la adamadenw kan cogo di?

⁶ Jehova ye yɔrɔ ɲuman labɛn an ye. A ye dugukolo labɛn adamadenw ye wagatijan ka sɔrɔ ka cɛɛ fɔlɔ dan (Zɔbu 38:4-6; Zer. 10:12). Jehova ka ɲi ani a tɛgɛ labilanin lo minkɛ, a ye fɛɛn ɲuman caaman dan an ye walisa an ka ninsɔn diya (Zab. 104:14, 15, 24). Tuma dɔw la, a tun be wagati ta ka miiri a ka danfɛnw koo la ani a tun b’a “ye k’o ka ɲi.” (Zɛnɛzi 1:10, 12, 31). Jehova ye nɔɔrɔ la adamadenw kan a kɛtɔ ka ‘kuntigiya di u ma’ a ka danfɛn cɛɲumanbaw bɛɛ kun na dugukolo kan (). Ala sagonata ye ko adamaden dafaninw ka to k’u janto o danfɛnw na fɔɔ abada ani u ka ninsɔndiya sɔrɔ o la. Yala i be to ka Jehova waleɲuman lɔn tuma o tuma o sagonata ɲuman kosɔn wa?

7. Zozuwe 24:15 b’a yira cogo di ko Jehova ye see di an ma an ka koow latigɛ an yɛrɛ ma?

⁷ Jehova ye see di an ma an ka koow latigɛ an yɛrɛ ma. An be se k’a latigɛ an bena min kɛ an ka ɲɛnamaya kɔnɔ (Zozuwe 24:15 kalan). N’an b’a latigɛ k’an Faa kanutigi Ala sago kɛ, o b’a dusu diya (Zab. 84:12; Talenw 27:11). See min dira an ma ka koow latigɛ an yɛrɛ ma, an be se ka baara kɛ n’o ye ka desizɔn ɲuman caaman wɛrɛw ta. An ka Yezu ka ɲɛyirali lajɛ o koo la.

8. See min dira Yezu ma ka koow latigɛ a yɛrɛ ma, a ye baara kɛ n’o ye cogo di? Ɲɛyirali dɔ fɔ.

⁸ An be Yezu ladegi n’an b’a latigɛ ka tɔɔw nafa lo ɲini fɔlɔ. Loon dɔ, Yezu n’a ka cidenw tun sɛgɛnnin lo kosɔbɛ. O kama, u tagara yɔrɔ dɔ la, yɔrɔ min na mankan tɛ yen walisa ka lafiɲɛ. Nka, u ma se ka lafiɲɛ sabu jama dɔ nana u sɛgɛrɛ ani u tun b’a fɛ Yezu k’u kalan. Yezu ma dimi u kɔrɔ, nka a makarila u la. O kɔ, a ye mun lo kɛ do? “A y’a daminɛ k’u kalan fɛɛn caaman na.” (Mariki 6:30-34). N’an b’an ka wagati n’an fanga kɛ ka tɔɔw dɛmɛ, an be Yezu lo  ladegira. N’an b’o kɛ, an be nɔɔrɔ la an sankolola Faa kan (Mat. 5:14-16). An b’a yira Jehova la fana ko an b’a fɛ ka kɛ a ka denbaya mɔgɔ dɔw ye.

9. Jehova ye nilifɛn kɛrɛnkɛrɛnnin juman lo di adamadenw ma?

⁹ Jehova ye see di adamadenw ma u ka deenw sɔrɔ. A ye kunkanbaara kalifa u ma fana u ka u deenw kalan walisa u k’ale kanu ani k’a bato. N’i ye bangebaga ye, yala i be Jehova waleɲuman lɔn o nilifɛn kɛrɛnkɛrɛnnin kosɔn wa? Jehova ye setigiya kabakoman caaman di mɛlɛkɛw ma, nka a ma nɛɛma di u ma u ka deenw wolo. O la, n’i ye bangebaga ye, Jehova waleɲuman lɔn sabu a ye nɛɛma di i ma ka deenw lamɔ. A ye kunkanbaaraba kalifa bangebagaw ma, o min ye k’u deenw “kolo k’u ladi, ani k’u kalan ka kɛɲɛ ni Matigi sago ye.” (Efɛz. 6:4; Deter. 6:5-7; Zab. 127:3). Ala ka ɔriganisasiyɔn ye fɛɛn caaman labɛn bangebagaw ye walisa k’u dɛmɛ. O fɛɛnw basiginin be Bibulu kan ani u dɔw ye an ka gafew, videwow, miziki ani barokun minw be sɔrɔ an ka site web kan. Siga t’a la, an deenw koo ka di kosɔbɛ an sankolola Faa n’a Dencɛ ye! (Luka 18:15-17). Jehova dusu ka di ni bangebagaw b’u jigi la a kan ani n’u b’u seko bɛɛ kɛ k’u janto u deen kanulenw na. O bangebagaw b’u deenw dɛmɛ fana u ka jigiya sɔrɔ ka kɛ Jehova ka denbaya mɔgɔ dɔw ye fɔɔ abada!

10-11. An be se ka mun lo sɔrɔ kunmabɔsara sababu fɛ?

¹⁰ Jehova Dencɛ min koo ka gwɛlɛ a ma kosɔbɛ, a y’o di walisa an ka se ka kɛ a ka denbaya mɔgɔw ye tugun. I ko an y’a ye  dakun 4nan na cogo min na, komi Adama ni Awa ye jurumu kɛ, u tɛ Jehova ka denbaya mɔgɔ dɔw ye tugun. U deenw fana bɔnɛna o nɛɛma na (Ɔrɔm. 5:12). Adama ni Awa y’a latigɛ ka ban Ala ta ma. O kama, a tun bɛnnin lo Ala k’u bɔ a ka denbaya kɔnɔ. Nka mun lo tun bena u deenw sɔrɔ? Komi Jehova be u deenw kanu, a ye labɛn kɛ walisa minw be mɛnni kɛ ale fɛ, u ka kɛ a ka denbaya mɔgɔw ye. A ye a Dencɛ kelenpe bangelen Yezu Krista di k’a kɛ kunmabɔsara ye (Zan 3:16; Ɔrɔm. 5:19). Yezu ka kunmabɔsara sababu la, Jehova ye mɔgɔ kantigi 144 000 kɛ a deenw ye.—Ɔrɔm. 8:15-17; Yir. 14:1.

¹¹ Ka fara olu kan, mɔgɔ miliyɔn caaman be Ala sago kɛra kantigiya la. U jigi b’a la ka kɛ Ala ka denbaya mɔgɔ dɔw ye kɔrɔbɔli laban bannin kɔ. O bena kɛ Krista ka saan waa kelen mara laban na (Zab. 25:14; Ɔrɔm. 8:20, 21). Komi u be n’o jigiya ye, kabi sisan, u be u Danbaga Jehova weele ko u “Faa.” (Mat. 6:9). Mɔgɔ minw suu bena kunu, olu fana bena sababu sɔrɔ k’a lɔn Jehova be min ɲini u fɛ. Minw bena mɛnni kɛ a fɛ, a laban, olu bena kɛ a ka denbaya mɔgɔ dɔw ye fana.

12. An bena ɲiningali juman lo jaabi sisan?

¹² I ko an y’a ye cogo min na, Jehova ye koo caaman kɛ ka ban walisa ka nɔɔrɔ la adamadenw kan. A ye kerecɛn mɔlenw kɛ a deenw ye ka ban ani a ye jigiya di “jamaba” mɔgɔw ma u ka kɛ a deenw ye duniɲa kura kɔnɔ (Yir. 7:9). An be se ka mun lo kɛ kabi sisan k’a yira Jehova la ko an b’a fɛ ka kɛ a ka denbaya mɔgɔ dɔw ye fɔɔ abada?

13. An be se ka mun lo kɛ walisa ka kɛ Ala ka denbaya mɔgɔ dɔw ye? (Mariki 12:30).

¹³ A yira ko i be Jehova kanu, i kɛtɔ k’a sago kɛ n’i dusu bɛɛ ye (Mariki 12:30  kalan). Ala ye see di an ma an k’ale bato. A ye nilifɛn minw bɛɛ di an ma ni kanuya ye, n’a sɔrɔ o nilifɛn ye u bɛɛ la nafaman dɔ ye. An b’a yira ko an be Jehova kanu, n’an b’a ka ‘ciiw bato.’ (1 Zan 5:3). Jehova b’a fɛ an ka cii minw labato, u la dɔ ye ka mɔgɔw kɛ Yezu ka kalandenw ye ani k’u batize i ko Yezu y’a ɲini an fɛ cogo min na (Mat. 28:19). Yezu ye cii di an ma fana ko an ka ɲɔgɔn kanu (Zan 13:35). Jehova sagokɛla minw be duniɲa kuru bɛɛ kɔnɔ, olu ye a ka denbaya mɔgɔw ye fana. Mɔgɔ minw be mɛnni kɛ a fɛ, a bena olu kɛ o denbaya mɔgɔ dɔw ye.—Zab. 15:1, 2.

14. An be se k’a yira tɔɔw la cogo di ko an b’u kanu? (Matiyo 9:36-38; Ɔrɔmukaw 12:10).

¹⁴ A yira tɔɔw la ko i b’u kanu. Kanuya ye Jehova ka jogow bɛɛ la belebeleba ye (1 Zan 4:8). Jehova y’a yira ko a b’an kanu sanni an yɛrɛ k’a lɔn (1 Zan 4:9, 10). N’an b’a yira tɔɔw la ko an b’u kanu, an be Jehova lo ladegira (Efɛz. 5:1). An b’a yira mɔgɔw la ko an be u kanu cogo fisaman minw na, u la dɔ ye k’u dɛmɛ u ka Jehova lɔn sanni wagati ka tɛmɛ (Matiyo 9:36-38 kalan). O la, an be sababu di u ma u ka se ka kɛ Ala ka denbaya mɔgɔ dɔw ye. Mɔgɔ dɔ batizenin kɔ, an ka ɲi ka to k’a kanu ani k’a bonya (1 Zan 4:20, 21). An be se k’o kɛ cogo di? Misali la, an ka ɲi ka la a la ko a be ni ŋaniya ɲumanw ye. O la, hali n’an m’a faamu fɛɛn min kama a ye koo dɔ kɛ, an tɛna ŋaniya jugu la a kan. Nka, an bena bonya la a kan ani k’a jati ko a ka fisa n’an ye.—Ɔrɔmukaw 12:10 kalan; Filip. 2:3.

15. An ka ɲi ka makari ani ka ɲumanya kɛ mɔgɔ jumanw lo ye?

¹⁵ Makari ani ɲumanya kɛ mɔgɔ bɛɛ ye. N’an b’a fɛ ka kɛ Jehova ka denbaya mɔgɔ dɔw ye fɔɔ abada, an ka ɲi ka Bibulu ka sariyaw sira tagama. Misali la, Yezu ko an ka ɲi ka makari ani ka ɲumanya kɛ mɔgɔ bɛɛ ye, hali an juguw yɛrɛ (Luka 6:32-36). Tuma dɔw la, a be se ka gwɛlɛya an ma k’o kɛ. N’o lo, an ka ɲi k’an jija ka miiri ani ka koow kɛ i ko Yezu. An k’an seko bɛɛ kɛ ka mɛnni kɛ Jehova fɛ ani ka Yezu ladegi. N’an b’o kɛ, an b’a yira an sankolola Faa la ko an b’a fɛ ka kɛ a ka denbaya mɔgɔ dɔw ye fɔɔ abada!

16. An be se ka mun lo kɛ walisa Jehova ka denbaya mɔgɔw tɔgɔ kana tiɲɛ?

¹⁶ Kana a to Jehova ka denbaya mɔgɔw tɔgɔ ka tiɲɛ. Denbaya kɔnɔ, dɔgɔcɛ ka teli k’a kɔrɔcɛ ladegi. Ni kɔrɔcɛman be Bibulu ka sariyakolow sira tagama, a bena kɛ ɲɛyirali ɲuman ye dɔgɔcɛman fɛ. Nka n’a be koo jugu kɛ, dɔgɔcɛman ka teli ka tugu a ka ɲɛyirali jugu kɔ. O kelen lo Jehova ka denbaya kɔnɔ. Ni kerecɛn kantigi dɔ y’a daminɛ ka murutili kalanw, kakalayakow wala koo kolon wɛrɛw kɛ, kerecɛn wɛrɛw ka teli k’a ladegi ani ka koo jugu kɛ fana. Minw b’o kɛ, olu be Jehova sagokɛlaw tɔgɔ tiɲɛ (1 Tes. 4:3-8). An man ɲi ka tugu ɲɛyirali juguw kɔ ani k’a to koo si ka an ni an sankolola Faa ka jɛnɲɔgɔnya nagasi.

17. An ka ɲi ka ban miiricogo juman lo la ani mun na?

¹⁷ I jigi la Jehova kan, kana i jigi la bololafɛnw kan. Jehova ye layidu ta ko n’an b’a ka Masaya ɲini fɔlɔ ani k’a ka sariya tilenninw sira tagama, a bena dumuni, faniw ani siyɔrɔ di an ma (Zab. 55:23; Mat. 6:33). N’an b’o to an hakili la, an tɛna a miiri ko duniɲa ka bololafɛnw bena an latanga ani ka hɛɛrɛ sɔbɛ di an ma. An b’a lɔn ko n’an b’a fɛ ka hakilisigi sɔrɔ sɔbɛ la, fɔɔ an ka Jehova sago lo kɛ (Filip. 4:6, 7). N’a sɔrɔ see b’an ye ka fɛɛn caaman san. Nka, an ka ɲi k’an yɛrɛ ɲininga n’an bena wagati ani fanga sɔrɔ ka  baara kɛ n’u ye ani k’u ladon. Kɔni an tɛna an masiri o bololafɛnw na kojugu? An k’a to an hakili la ko Ala ye baara kalifa an ma a ka denbaya kɔnɔ. O kɔrɔ ko an man ɲi k’a to koo si k’an bali k’o baara kɛ. Yezu tun ye kanbele dɔ weele walisa a ka na baara kɛ Jehova ye. O tun bena sababu di a ma a ka kɛ Jehova dencɛ dɔ ye. Nka, a banna sabu a tun masirinin lo a ka bololafɛnw na. Siga t’a la, an t’a fɛ ka kɛ i ko o kanbele!—Mariki 10:17-22.

18. Minw be mɛnni kɛ Jehova fɛ, olu bena nɛɛmaba ani duga jumanw lo sɔrɔ fɔɔ abada?

¹⁸ Minw be mɛnni kɛ Jehova fɛ, olu bena nɛɛma sɔrɔ k’a kanu ani k’a bato fɔɔ abada! O nɛɛma ɲɔgɔn tɛ yen! Jehova ye dugukolo labɛn cogo dafanin na walisa a ka kɛ adamadenw sigiyɔrɔ ye. Minw jigi b’a la ka ɲɛnamaya kɛ dugukolo kan, olu bena ninsɔndiya sɔrɔ ka o dugukolo cɛɲumanba ladon. Yanni dɔɔni, Ala ka Masaya bena dugukolo n’a kɔnɔnafɛnw bɛɛ lakuraya. Adama ni Awa y’a latigɛ ka bɔ Ala ka denbaya kɔnɔ minkɛ, u ye gwɛlɛya caaman lase u deenw ma. Yezu bena o gwɛlɛyaw bɛɛ ban. Jehova bena mɔgɔ miliyɔn caaman kunu ka bɔ saya la. A bena sababu di u ma u ka ɲɛnamaya kɛ fɔɔ abada kɛnɛya dafanin na, alijɛnɛ kɔnɔ dugukolo kan (Luka 23:42, 43). Tuma min na Jehova sagokɛlaw bena kɛ mɔgɔ dafaninw ye, u bɛɛ bena “nɔɔrɔ ni karama” sɔrɔ, i ko Dawuda y’a fɔ cogo min na.—Zab. 8:6.

19. An ka ɲi ka mun lo to an hakili la?

¹⁹ N’i be “jamaba” mɔgɔw cɛma, i be ni jigiya ɲuman ye. Ala b’i kanu ani a b’a fɛ i ka kɛ a ka denbaya mɔgɔ dɔ ye. O la, i seko bɛɛ kɛ k’a dusu diya. Ala ka layiduw to i hakili la loon o loon. Nɛɛma min b’i fɛ ka an sankolola Faa kanulen bato, o jati fɛɛn nafamanba ye! Ninsɔn diya fana sabu i bena se k’a tando fɔɔ abada!