1-2. An bena mun lo lajɛ barokun nin na?

MIIRI k’a filɛ ko i be minan dɔw kɔnɔna i makoya gwɛlɛ be minw na. I be u kɔnɔna wagati min na, n’u ma se o wagati la, o be mun lo kɛ i la do? Yala o be i jigi tigɛ wa? N’a sɔrɔ min fɔra Talenw 13:12 (Biblu Ala ta Kuma) kɔnɔ, o lo bena kɛ i la. A fɔra yen ko: “Mɔgɔ jigi bɛ fɛn min kan, ni o fɛn mɛɛnna kojugu, a bɛ i jusu kasi.” Nka, n’i y’a faamu ko kuun jɔnjɔn dɔw lo kama o minanw ma se a wagati la, o bena mun lo kɛ i la do? N’a sɔrɔ i bena sɔn ka muɲu ka kɔnɔni kɛ.

² Barokun nin na, an bena Bibulu ka sariyakolo dɔw lajɛ minw bena an dɛmɛ ka “Ala makɔnɔ.” (Mise 7:7, Bible senuma). O kɔ, an bena koo fila lajɛ, o minw na an ka ɲi ka muɲu ka kɔnɔni kɛ walisa Jehova ka dɔ kɛ dɔ ye. Minw labilanin lo ka Jehova makɔnɔ, a laban, an bena a ye olu bena duga minw sɔrɔ.

3. Talenw 13:11 b’an dɛmɛ ka mun lo faamu?

³ Talenw 13:11 b’a yira an na fɛɛn min kama an ka ɲi ka muɲuli kɛ. A fɔra yen ko: “Nafolo min sɔrɔla joona joona, o bena taga ten fana. Nga min sɔrɔla dɔɔni dɔɔni, o bena caya.” O sariyakolo b’an dɛmɛ ka mun lo faamu? A b’an dɛmɛ k’a faamu ko hakilitigi be muɲu ka koow kɛ koɲuman ani a be nafa sɔrɔ o la.

4. Talenw 4:18 b’an dɛmɛ ka mun lo faamu?

⁴ Talenw 4:18 b’a fɔ ko: “Mɔgɔtilennin ka sira be i  ko dugugwɛda yeelen, dɔ be to ka fara min kan fɔɔ ka taga tile gwan.” O vɛrise b’a yira ka gwɛ ko Jehova be a sagokɛlaw dɛmɛ u k’a sagonata faamu dɔɔni dɔɔni. O vɛrise b’an dɛmɛ fana k’a faamu kerecɛn be yɛlɛmaniw kɛ cogo min na ani cogo min na a b’a magwɛrɛ kosɔbɛ Jehova la. Walisa mɔgɔ k’a magwɛrɛ kosɔbɛ Jehova la, o be wagati ta. Ala ka Kuma n’a ka ɔriganisasiyɔn be ladili minw di an ma, an ka ɲi k’o sɛgɛsɛgɛ koɲuman ani k’o sira tagama. N’an b’o kɛ, dɔɔni dɔɔni, an bena kɛ ni Krista ka jogow ɲɔgɔn ye. Dɔ bena to ka fara an ka lɔnniya kan fana Ala koo la. An k’a filɛ Yezu ye ɲɛyirali min ta o koo la.

5. Yezu ye ɲɛyirali juman lo ta k’a yira ko walisa mɔgɔ ka yɛlɛmaniw kɛ, o be wagati ta?

⁵ Yezu tɛmɛna ɲɛyirali dɔ fɛ k’a ɲɛfɔ ko an be Masaya kibaro min fɔ, o be i ko sumankisɛ dennin dɔ. O kisɛ be falen ka bonya dɔɔni dɔɔni mɔgɔ kɔnɔgwɛw dusukun na. A ko: “Kisɛ be falencogo min na ka boɲa k’a sɔrɔ cɛɛ m’a falen n’a boɲacogo lɔn. Kisɛ be falen a yɛrɛ ma ka bɔ dugukolo la. A be wili dɔɔni dɔɔni fɔɔ ka na kuun bɔ, o kɔ, a be fa ni kisɛ ye.” (Mariki 4:27, 28). Yezu ka kumaw kɔrɔ ko di? A tun b’a ɲɛfɔra le ko mɔgɔ min be sɔn Masaya kibaro la, o tigi be yɛlɛmaniw kɛ dɔɔni dɔɔni le. O be i ko kisɛ be falen ka bonya dɔɔni dɔɔni cogo min na. Misali la, n’an ka Bibulu kalandenw b’u magwɛrɛla kosɔbɛ Jehova la, an b’a daminɛ k’a ye u be yɛlɛmani ɲuman minw bɛɛ kɛra (Efɛz. 4:22-24). Nka, an k’a to an hakili la ko Jehova lo b’a kɛ o sumankisɛ dennin be falen ka bonya.—1 Kor. 3:7.

6-7. Jehova ye dugukolo dan cogo min na, an be kalan juman lo sɔrɔ o la?

⁶ Jehova be fɛɛn o fɛɛn kɛ, a mako be wagati hakɛ min na, a b’o ta k’o kɛ. A b’o kɛ walisa ka nɔɔrɔ la a tɔgɔ kan ani ka tɔɔw dɛmɛ. Misali la, an k’a lajɛ Jehova ye dugukolo labɛn dɔɔni dɔɔni cogo min na adamadenw ye.

 ⁷ Bibulu b’a ɲɛfɔ Jehova ye dugukolo dan cogo min na. A b’a fɔ ko a y’a “boɲa n’a waga latigɛ,” k’a ‘juu sigi’ ani k’a “nɔnkɔn kabakuruw sigi.” (Zɔbu 38:5, 6). Jehova yɛrɛ ye wagati ta k’a ka danfɛnw lajɛ (Zɛnɛzi 1:10, 12). Tuma min na mɛlɛkɛw y’a ye Jehova be fɛɛn kuraw danna dɔɔni dɔɔni, miiri k’a filɛ o ye min kɛ u la! Siga t’a la, u dusu diyara yɛrɛ le! O lo kama, wagati dɔ la, u y’a daminɛ ka “nisɔndiya, ka pɛrɛn.” (Zɔbu 38:7). An be kalan juman lo sɔrɔ o la? Jehova ye saan waa caaman ta walisa ka fɛɛnw dan koɲuman. A ye fɛɛn minw dan, tuma min na a y’u bɛɛ filɛ, a ko o “ɲɛna kosɔbɛ.”—Zɛnɛzi 1:31.

8. An bena mun lo lajɛ sisan?

⁸ I ko an y’a ye cogo min na, sariyakolo caaman be sɔrɔ Ala ka Kuma kɔnɔ minw b’a yira ko an ka ɲi ka muɲuli kɛ. Sisan, an bena koo tigitigi fila lajɛ, o minw na an ka ɲi ka sɔn ka Jehova makɔnɔ.

9. Koo minw na an ka ɲi ka Jehova makɔnɔ, u dɔ ye juman ye?

⁹ N’a sɔrɔ an ka ɲi ka Jehova makɔnɔ a ka an ka deliliw jaabi. A be se ka kɛ ko an ye Jehova deli a ka fanga di an ma walisa an ka se ka gwɛlɛya dɔ muɲu wala ka see sɔrɔ an ka barikantanya dɔ kan. O kɔ, an b’a ye komi a t’an ka delili jaabira joona. Mun na Jehova tɛ sin k’an ka deliliw bɛɛ jaabi?

10. Mun na an ka ɲi ka muɲu ka kɔnɔnin kɛ walisa Jehova k’an ka deliliw jaabi?

¹⁰ Jehova b’an ka deliliw lamɛn koɲuman (Zab. 65:3). An be delili minw kɛ n’an dusu bɛɛ ye, ale fɛ o b’a yira ko an limaniyanin lo ale la (Eburuw 11:6). N’an b’an jija ka koow kɛ ka kɛɲɛ n’an ka deliliw ye ani ka Jehova sago kɛ, o ka di a ye fana (1 Zan 3:22). O la, n’an ye a deli ko a k’an dɛmɛ ka see sɔrɔ an ka barikantanya dɔ kan, n’a sɔrɔ an ka ɲi ka muɲuli kɛ. An ka ɲi ka koow kɛ ka kɛɲɛ n’an ka deliliw ye fana. Yezu y’an dɛmɛ k’a faamu ko Jehova tɛ sin k’an ka delili dɔw jaabi. A ko: “Aw k’aw ka makoyafɛn daali Ala fɛ, a bena o d’aw ma. Aw mako be fɛɛn min na, aw k’o ɲini, aw ben’a sɔrɔ. Aw ka daa kɔkɔ, daa bena yɛlɛ aw ye. Bari mɔgɔ o mɔgɔ man’a makoyafɛn daali Ala fɛ, Ala bena o di o tigi ma. Min man’a makoyafɛn ɲini, o tigi b’o sɔrɔ. Daa bena yɛlɛ daa kɔkɔbaga ye.” (Mat. 7:7, 8). N’an b’o ladili sira tagama ani k’an “jija Aladali” la, an be se ka la a la ko an sankolola Faa bena an ka deliliw lamɛn ani k’u jaabi.—Kɔlɔs. 4:2.

11. Eburuw 4:16 be se k’an dɛmɛ cogo di n’a b’an ɲɛɛ na ko Jehova t’an ka delili dɔ jaabira joona?

¹¹ Hali n’a b’an ɲɛɛ na ko an ka delili dɔ tɛ jaabili sɔrɔla joona, Jehova ye layidu ta ko a bena o jaabi “wagati bɛnnin na.” (Eburuw 4:16 kalan). * O la, an man ɲi ka Jehova jalaki abada ni a m’an ka delili dɔ jaabi joona joona i ko an tun b’a miiri cogo min na. Misali la, mɔgɔ caaman be delili kɛra kabi saan caaman walisa Ala ka Masaya ka daan sigi duniɲa juguman nin na. Yezu yɛrɛ y’a fɔ ko an ka delili kɛ o koo la (Mat. 6:10). An jigi tun b’a la ko duniɲa laban bena se wagati min na, n’a ma se o wagati la, an man ɲi k’an jigi bɔ Ala kan. N’o tɛ, o bena kɛ hakilintanyako yɛrɛ lo ye! (Abak. 2:3;  Mat. 24:44). Hakilitigiyako lo n’an be to ka Jehova makɔnɔ ani ka la a la ko a bena an ka deliliw jaabi. Laban loon bena se a wagati la tigitigi sabu Jehova y’o “loon n’o waati” latigɛ ka ban. O loon bena kɛ wagati bɛnnin ye an bɛɛ fɛ.—Mat. 24:36; 2 Piyɛri 3:15.

12. Koo juman yɛrɛ lo la a be se ka gwɛlɛya an ma ka muɲuli kɛ?

¹² N’a sɔrɔ an ka ɲi ka muɲuli kɛ walisa Jehova ka daan sigi tilenbaliyako dɔ la. Duniɲa mɔgɔw ka teli ka tilenbaliyako kɛ tɔɔw la, n’a y’a sɔrɔ ko u tɛ u cɛɲɔgɔn wala u musoɲɔgɔn ye, u ka siya, u ka kaan wala u bɔyɔrɔ be daan na n’u ta ye. U be tilenbaliyako kɛ dɔw la fana sabu farikolodɛsɛ b’u la wala u hakili dafanin tɛ. U ye tilenbaliyakow kɛ Jehova Seere caaman na u ka lannakow kosɔn. N’u ye o koo juguw dɔ kɛ an na, an ka ɲi ka Yezu ka kuma nunu to an hakili la: “Ni mɔgɔ min muɲuna fɔɔ ka taga se a laban ma, o tigi bena kisi.” (Mat. 24:13). Nka, n’i bɔra a kala ma ko kafo mɔgɔ dɔ ye jurumuba kɛ do? Ni o koo fɔra diinan mɔgɔkɔrɔw ye, yala i bena koow to u bolo ani ka muɲu u ka o ɲɛnabɔ i ko Jehova b’a fɛ cogo min na wa? Diinan mɔgɔkɔrɔw ka ɲi ka mun lo kɛ ni mɔgɔ dɔ ye jurumuba kɛ?

13. Ni mɔgɔ dɔ ye jurumuba kɛ, Jehova b’a fɛ diinan mɔgɔkɔrɔw ka mun lo kɛ?

¹³ Diinan mɔgɔkɔrɔw be se k’a mɛn ko kafoden dɔ ye jurumuba kɛ. O koo ɲɔgɔn na, “hakilitigiya min be Ala fɛ,” u b’o deli a fɛ walisa k’o koo faamu i ko ale b’a faamu cogo min na (Zaki 3:17). Diinan mɔgɔkɔrɔw ka laɲinita ye ka hakɛkɛla dɛmɛ a ka “kɔsegi ka bɔ a ka filisira kan,” n’o be se ka kɛ (Zaki 5:19, 20). U b’u seko bɛɛ kɛ fana walisa ka kafo latanga ani o koo jugu kɛra minw na, u b’olu dusu saalo (2 Kor. 1:3, 4). Ni diinan mɔgɔkɔrɔw bɔra a kala ma ko dɔ ye jurumuba kɛ, u ka ɲi k’a ɲini k’a lɔn fɔlɔ min kɛra tiɲɛn na. O be se ka wagati ta. O kɔ u be delili kɛ, u be basigi Ala ka Kuma kan ka ladiliw di jurumukɛla ma koɲuman ani u b’a kolo “ni tilenninya ye.” (Zer. 30:11). Hali ni diinan mɔgɔkɔrɔw tɛ koow bila ka suma, u tɛ desizɔnw ta joona joona kojugu fana. N’u ye koow ɲɛnabɔ cogo bɛnnin na, o be kafodenw bɛɛ nafa. Nka, hali n’u ye koow  ɲɛnabɔ o cogo la, koo jugu kɛra mɔgɔ min na, o tigi bele be se ka tɔɔrɔ. Ni koo jugu kɛra ele lo la, i be se ka mun lo kɛ walisa o koo kana i tɔɔrɔ kojugu?

14. Ni an kerecɛnɲɔgɔn dɔ ye kojuguba kɛ an na, Bibulu ka ɲɛyirali juman lo be se k’an dusu saalo?

¹⁴ Yala mɔgɔ dɔ, wala i kerecɛnɲɔgɔn dɔ yɛrɛ delila ka kojuguba kɛ i la wa? I be se ka ɲɛyirali ɲumanw sɔrɔ Ala ka Kuma kɔnɔ minw b’a yira an be se ka Jehova makɔnɔ cogo min na walisa a ka tilenbaliyakow ɲɛnabɔ. Misali la, Yusufu kɔrɔcɛw yɛrɛ ye tilenbaliyako kɛ a la. O bɛɛ n’a ta, a ma dimi mara a kɔnɔ o kosɔn. A tora k’a seko bɛɛ kɛ Jehova ka baara la. O kama, Jehova y’a duga kosɔbɛ a ka muɲuli kosɔn (Zɛnɛzi 39:21). Kɔfɛ, Yusufu yafara a kɔrɔcɛw ma ani a y’a ye Jehova y’a duga cogo min na (Zɛnɛzi 45:5). I ko Yusufu, ni an b’an magwɛrɛ Jehova la ani k’a to a ka tilenbaliyakow ɲɛnabɔ, an bena dususalo sɔrɔ.—Zab. 7:18; 73:28.

15. Mun lo ye balimamuso dɔ dɛmɛ ka tilenbaliyako dɔ muɲu ani ka kɛ ni hakilisigi ye?

¹⁵ Tiɲɛn lo ko tilenbaliyakow bɛɛ man jugu i ko min kɛra Yusufu la. Nka, hali tilenbaliyako minw ma se Yusufu ta ma, u be se ka digi mɔgɔ la. Ni koo dɔ be an ni mɔgɔ dɔ cɛ, hali ni o tigi tɛ Jehova sagokɛla ye, an ka ɲi ka Bibulu ka sariyakolow sira tagama. N’an y’o kɛ, o bena an nafa (Filip. 2:3, 4). An ka ɲɛyirali dɔ lajɛ. Balimamuso dɔ dusu kasira kosɔbɛ sabu a baarakɛɲɔgɔn dɔ tun be to k’a kɔrɔfɔ. A tun be to ka kumajuguw ani ngalon kumaw fɔ balimamuso koo la. Nka, sanni balimamuso ka dimi ka koow kɛ, a ye wagati ta ka miiri Yezu ka ɲɛyirali la. Tuma min na mɔgɔw tun be Yezu nɛnina, a m’u nɛni (1 Piyɛri 2:21, 23). O balimamuso ye Yezu ka koo to a hakili la ani a baarakɛɲɔgɔn ye min kɛ a la, a y’a latigɛ ka tɛmɛ o kan. Kɔfɛ, a y’a mɛn ko bana jugu dɔ tun b’a baarakɛɲɔgɔn na ani ko a hakili tun ɲagaminin lo kosɔbɛ. Balimamuso y’a fɔ a yɛrɛ ye ko n’a sɔrɔ a baarakɛɲɔgɔn tun t’a fɛ k’ale hakɛ ta. Ka fara o kan, a ninsɔn diyara kosɔbɛ sabu a ye o tilenbaliyako muɲu ani a hakili sigira.

16. N’i be tilenbaliyako dɔ muɲuna, mun lo be se k’a to i hakili be sigi? (1 Piyɛri 3:12).

 ¹⁶ N’i dusu kasinin lo tilenbaliyako dɔ wala koo wɛrɛ kosɔn, a to i hakili la ko Jehova be “dusukasibagaw gɛrɛfɛ.” (Zab. 34:19). Jehova b’i kanu sabu i muɲunin lo ani i b’i ka haminankow to a bolo (Zab. 55:23). Ale lo ye dugukolo kuru bɛɛ Kitibaga ye ani a ɲɛɛ be koo bɛɛ la (1 Piyɛri 3:12 kalan). Ni gwɛlɛyabaw b’i kan i tɛ se ka minw ɲɛnabɔ, yala i be sɔn ka Jehova makɔnɔ wa?

17. Jehova ye layidu juman lo ta Ezayi 30:18 kɔnɔ?

¹⁷ Yanni dɔɔni, an sankolola Faa bena duga caaman lase an ma a ka Masaya sababu la. Ezayi 30:18 b’a fɔ ko: “Masaba be waati dɔ le kɔnɔna k’aw dɛmɛ, a bena wili ka makari aw la. Bari, Masaba Ala tilennin lo. Mɔgɔ minw bɛɛ b’u jigi la a kan, olu dagamuna!” Minw be Jehova makɔnɔ, olu bena duga caaman sɔrɔ kabi sisan ani duniɲa kura nata kɔnɔ.

18. An bena duga jumanw lo sɔrɔ?

¹⁸ Gwɛlɛya minw be Ala sagokɛlaw kan bi, o gwɛlɛyaw bena ban duniɲa kura kɔnɔ. Tilenbaliyakow ni tɔɔrɔkow fana bena ban (Yir. 21:4). An tɛna jɔrɔ an makoɲɛfɛnw koo la sabu an bena u bɛɛ sɔrɔ (Zab. 72:16; Ezayi 54:13). O bena kɛ dugaba yɛrɛ lo ye!

19. Kabi sisan, Jehova b’an labɛnna dɔɔni dɔɔni mun lo kama?

¹⁹ Kabi sisan, Jehova b’an labɛnna walisa an ka se ka ɲɛnamaya kɛ a ka Masaya kɔrɔ. A b’o kɛra, a kɛtɔ k’an dɛmɛ an ka see sɔrɔ delinanko juguw kan ani an ka kɛ n’a ka jogow ɲɔgɔn ye. An kana an fari faga ani ka Jehova sago kɛli dabila. An bena ɲɛnamaya min kɛ sini ma, o bena diya yɛrɛ le! O kama, an ka to ka muɲu ka Jehova makɔnɔ ninsɔndiya la a k’a sago dafa!